Devlop lanmour ki reste pour touzour
Devlop lanmour ki reste pour touzour
‘Lanmour i siport tou. Lanmour i reste pour touzour.’—1 KOR. 13:7, 8.
1. (a) Ki mannyer lanmour i souvan ganny reprezante? (b) Avek lekel e lo kwa bokou dimoun i santre zot lanmour?
EN KANTITE piblisite i koz lo lanmour. Lanmour i en kalite ki ganny glorifye dan bann sanson romantik. Tou imen i bezwen lanmour dan zot lavi. Me souvan bann liv ek film i fer lanmour paret konman en keksoz ki egziste zis dan bann zistwar romantik. Sa bann kalite liv ek film i partou lo marse. Me malerezman, vre lanmour pour Bondye ek prosen i rar. Nou pe vwar sa ki Labib ti predir pour arive dan bann dernyen zour. Zonm i “egois, kontan larzan, . . . kontan plezir plis ki Bondye.”—2 Tim. 3:1-5.
2. Ki lavertisman Labib i donnen lo lafason lemonn i vwar lanmour?
2 Imen i annan sa abilite pour demontre lanmour anver kanmarad, me an menm tan Parol Bondye i averti nou pour pa les nou ganny enfliyanse par sa move konsep ki sa lemonn i promote lo lanmour. Labib i dir ki i arive kan en dimoun i les sa kalite lanmour anrasinen dan son leker. (1 Tim. 6:9, 10) Eski ou rapel ki zapot Pol ti ekrir lo Demas? Menm si i ti frekant Pol, Demas ti konmans kontan sa ki lemonn ti ofer. (2 Tim. 4:10) Zapot Zan ti averti bann Kretyen kont sa gran danze. (Lir 1 Zan 2:15, 16.) Si nou kontan lemonn ek tou bann keksoz ki tanporerman ladan ek son fason azir nou pa kapab dir nou kontan Bondye ek tou sa ki sorti kot li.
3. Ki defi nou rankontre e ki kestyon sa i souleve?
3 Nou pa form parti sa lemonn menm si nou ankor pe viv ladan. Se pour sa rezon ki nou bezwen fer fas avek sa defi pour rezet sa fo konsep ki lemonn in etablir lo lanmour. I enportan ki nou pa les nou ganny anbete par lafason ki lemonn i vwar lanmour. Alor pour ki sennla nou devret devlop e demontre vre lanmour? Ki provizyon ki permet nou pour devlop lanmour ki siport tou e ki reste pour touzour? Si nou azir dan sa fason, ki mannyer sa pou anmenn byenfe pour nou la konmela e annan en lefe lo nou lavenir? Nou bezwen rod larepons sa bann kestyon dapre pwennvi Bondye pour nou kapab reisi dan sa domenn.
Devlop lanmour pour Zeova
4. Ki mannyer nou devlop lanmour pour Bondye?
4 Pour kiltive i kapab enplik fer preparasyon e fer bann keksoz ki pou fasilit en keksoz pou pouse. Mazin en fermye ki travay dir pour prepar later pour plant lagrenn. I ekspekte ki lagrenn i pouse. (Ebr. 6:7) Pareyman nou lanmour pour Bondye i devret ogmante. Kwa ki neseser pour sa arive? Nou bezwen prepar nou leker kot laverite lo Rwayonm ti ganny semen. Nou kapab fer sa par etidye Parol Bondye pour nou konn plis lo li. (Kol. 1:10) Kan nou asiste e partisipe dan renyon, sa pou osi ed nou pour ogmant nou konnesans. Eski personnelman nou pe kontinyen fer zefor pour ganny plis konnesans?—Prov. 2:1-7.
5. (a) Ki mannyer nou kapab aprann lo bann kalite ekstraordiner ki Zeova i annan? (b) Ki ou kapab dir lo lazistis, lasazes ek pouvwar Bondye?
5 Dan son Parol Zeova i revel son personnalite. Kan nou etidye Labib e nou kontinyelman ganny konnesans lo Zeova, nou kapab ogmant nou lapresyasyon pour son bann kalite, parey lazistis, pwisans, lasazes e par lao tou sa lanmour pli siperyer. Zeova i demontre son lazistis dan tou sa ki i fer e dan son lalwa parfe. (Det. 32:4; Ps. 19:7) Nou kapab reflesir lo tou travay kreasyon Zeova e annan en gran ladmirasyon pour sa gran lasazes ki i annan. (Ps. 104:24) Liniver i osi donn nou laprev ki Zeova i sa Sours en kantite lenerzi ek pwisans ki pa zanmen fini.—Iza. 40:26.
6. Ki mannyer Bondye in eksprim son lanmour anver nou e ki lefe sa in annan lo ou?
6 Ki nou kapab dir lo lanmour Bondye, sa kalite pli dominan dan son personnalite? Son lanmour i gran e i annan en lefe lo nou tou. I’n eksprim son lanmour par fourni en sakrifis pour delivre limanite. (Lir Romen 5:8.) Sa provizyon i disponib pour tou limanite, me zis bann ki reazir anver lanmour Bondye e ki egzers lafwa dan son Garson ki pou benefisye avek sa laranzman. (Zan 3:16, 36) Lefet ki Bondye in ofer Zezi konman en sakrifis pour nou ganny pardonnen nou pese, sa i merit motiv nou pour kontan li an retour.
7, 8. (a) Pour nou kapab demontre lanmour pour Bondye kwa ki neseser? (b) Pep Bondye i obeir komannman Bondye malgre ki difikilte?
7 Ki mannyer nou kapab demontre nou lanmour pour Bondye pour tou sa ki in fer pour nou? Sa larepons ki’n ganny enspire i enportan: “La lanmour Bondye: ki nou obei son konmannman; e son bann konmannman i pa en fardo.” (1 Zan 5:3) Wi, lanmour pour Zeova i motiv nou pour obei son komannman. Sa i en rezon akoz nou rann temwannyaz lo son non ek son Rwayonm e sa i anmenn byenfe pour lezot. Ler nou fer sa avek tou nou leker, sa i en levidans ki nou obeir komannman Bondye avek en bon motivasyon.—Mat. 12:34.
8 Nou bann frer ek ser dan lemonn antye pe kontinyen obeir komannman Bondye malgre i annan dimoun ki pa enterese ek bann ki kareman rezet sa mesaz Rwayonm. Zot pa bes lebra dan zot zefor pour akonplir zot minister plennman. (2 Tim. 4:5) Pareyman, nou ganny pouse pour fer tou sa ki nou kapab pour partaz konnesans Bondye avek lezot e osi obeir tou son komannman.
Akoz nou kontan nou Senyer Zezi Kri
9. Ki Zezi ti andire e kwa ki ti ed li?
9 Apard sa lanmour ki nou annan pour Zeova, nou annan en kantite rezon akoz nou devret devlop lanmour pour son Garson. Menm si nou pa’n deza vwar Zezi, anmezir ki nou aprann plis lo li nou lanmour pour li i vin pli for. (1 Pyer 1:8) Ki soufrans Zezi ti pas ladan? Kan i ti pe fer lavolonte son Papa, serten ti ay Zezi san okenn rezon, persekit li, fer fo lakizasyon lo li, zot ti ensilte li. I ti osi ganny imilye dan plizyer fason. (Lir Zan 15:25.) Lanmour ki Zezi ti annan pour son Papa dan lesyel ti motiv li pour andir sa bann leprev. Lanmour ti pous li pour donn son lavi konman en sakrifis pour sov bokou dimoun.—Mat. 20:28.
10, 11. Kan nou mazin sa ki Zezi in fer pour nou, ki nou lobzektif?
10 Lafason Zezi ti azir i motiv nou pour kontan li an retour. Anmezir nou reflesir lo sa ki Kris in fer pour nou, nou lanmour pour li i vin pli for. Vi ki nou disip Kris, pour nou kapab kontinyen obeir son komannman pour rann temwannyaz lo Rwayonm e fer disip, nou bi i devret pour devlop e kontinyen demontre lanmour parey li.—Mat. 28:19, 20.
11 Kan nou pe reazir anver lanmour ki Kris in demontre pour limanite, nou determinen pour nou fini nou latas avan lafen i vini. (Lir 2 Korentyen 5:14, 15.) Sa lanmour ki Kris in demontre ti esansyel pour ki plan Bondye pour limanite i ganny akonplir. Sa legzanp ki Kris in kite pour nou swiv i permet sakenn de nou pour zwe nou rol dan plan Bondye. Pour nou kapab fer sa, nou bezwen devlop plis lanmour pour Bondye. (Mat. 22:37) Kan nou fer sa ki Zezi in ansenny nou pour fer e obeir son konmann, nou demontre ki nou kontan li e nou determinen pour siport souvrennte Zeova dan nenport ki sirkonstans ki nou ladan, zis parey Zezi ti fer.—Zan 14:23, 24; 15:10.
Devlop sa lanmour ki bokou pli siperyer ki tou
12. Ki Pol ti oule dir kan i ti refer avek sa lanmour “ki bokou pli siperyer ki tou”?
12 Zapot Pol ti imit Kris. Lefet ki i ti pe swiv Kris, Pol pa ti ezite pour ankouraz son bann frer pour imit li. (1 Kor. 11:1) Menm si i ti ankouraz bann Kretyen Korent pour kontinyen demann don ki lespri i donnen e koz dan diferan langaz, Pol ti montre zot ki i annan en keksoz pli meyer pour pourswiv. Dan 1 Korentyen 12:31, i eksplike: “Mon pou montre zot aprezan semen ki bokou pli siperyer ki tou.” Konteks sa bann verse ki swiv i montre ki sa keksoz pli siperyer i lanmour. Dan ki fason i pli siperyer? Pol ti konmans eksplike ki i ti oule dir. (Lir 1 Korentyen 13:1-3.) Si i ti annan serten abilite spesyal e i ti reisi akonplir bann gran gran keksoz me i ti napa lanmour, ki valer i ti pou annan? I ti pou napa valer! I ti ganny pouse par lespri sen pour fer resorti sa pwen enportan. Napa en pli bon fason ki i ti kapab fer nou pli byen konpran sa!
13. (a) Ki tenm pour lannen 2010? (b) Dan ki sans lanmour i reste pour touzour?
13 Apre Pol i donn nou definisyon lanmour e sa ki i pa ete. (Lir 1 Korentyen 13:4-8.) Aprezan, pran letan pour egzaminen ki vre lanmour i vreman enplike. Annou port nou latansyon lo dernyen fraz dan verse 7 ek sa premye fraz dan verse 8: ‘Lanmour i siport tou. Lanmour i reste pour touzour.’ Sa i pou nou tenm pour lannen 2010. Remarke ki dan verse 8, Pol ti dir ki don ki lespri i donnen, enkli parmi i don profesi ek don koz diferan langaz ki ti ganny servi kan kongregasyon Kretyen ti’n fek ganny formen ti pou arete pli tar. I pou annan en lafen avek sa bann don me lanmour pou touzour egziste. Zeova i li menm sours lanmour e i eternel. Pa pou zanmen annan en lafen avek lanmour, i pou reste pour touzour. I pou kontinyen egziste pour touzour konman en kalite nou Bondye eternel.—1 Zan 4:8.
Lanmour i siport tou
14, 15. (a) Ki mannyer lanmour i ed nou pour andir bann leprev? (b) Akoz en zenn frer ti refize fer konpromi?
14 Kwa ki ed bann Kretyen pour andir okenn leprev, sityasyon difisil ek problenm ki zot rankontre? Senpleman se sa lanmour ki baze lo bann prensip dan Labib. Sa kalite lanmour i al pli lwen ki zis les nou bann posesyon materyel deryer. I fer nou gard nou lentegrite e menm pare pour donn nou lavi pour Kris. (Lik 9:24, 25) Reflesir lo lavi bann Temwen ki ti reste fidel kan zot ti soufer dan kan konsantrasyon, kan travay e prizon pandan Dezyenm Lager Mondyal.
15 Legzanp en zenn Temwen Zeova Lalmanny ki ti apel Wilhelm i en bon legzanp. Olye fer konpromi, i ti reste fidel kan i ti pe al ganny met a mor par bann Nazi. Dan son dernyen let pour son fanmir avan son lanmor i ti ekrir: “Parlao tou nou bezwen kontan Bondye, parey Zezi Kri nou Lider ti demann nou pour fer. Si nou pran kote avek li, i pou rekonpans nou.” Plitar dan en lartik Latour Veyer en manm son fanmir ti ekrir: “Dan sa bann moman difisil, konman en fanmir nou’n fer sir ki nou lanmour pour Bondye i toultan pas premye.” Nou bann frer ki pe andire dan prizon Larmeni, Eritre, Sid Kore ek lezot landrwa i annan sa menm kalite leta lespri. Sa bann frer i reste determinen dan zot lanmour pour Zeova.
16. Ki nou bann frer Malawi ti andire?
16 Dan bokou landrwa, diferan kalite leprev i teste lafwa ek landirans nou bann frer. Pour 26 an bann Temwen Zeova Malawi ti andire anba restriksyon ki gouvernman ti mete lo zot. Zot ti ganny opoze severman e ti annan plizyer akt kriyote ki ti ganny fer kont zot. Zot landirans ti ganny rekonpanse. Kan persekisyon ti konmanse ti annan apepre 18,000 Temwen dan sa pei. Trant an plitar lakantite Temwen ti’n plis ki double pour ariv 38,393. In osi annan sa bann menm kalite rezilta dan lezot pei.
17. Ki serten dan bann lakour kot i annan diferan pwennvi relizye i fer fas avek e akoz zot pou kapab andir sa bann persekisyon?
17 I vre ki en latak direk kont pep Bondye pa fasil. Me i pli difisil kan bann endividi i ganny lopozisyon sorti dan zot prop fanmir. Bann manm fanmir ki reste dan menm lakaz avek zot oubyen lezot manm fanmir i kapab met presyon lo zot. Eski pa Zezi ti predir ki sa ti pou arive? Wi, e pour plizyer frer ek ser, sa bann parol in vin vre. (Mat. 10:35, 36) Bann adolesan in andir lopozisyon sorti kot bann paran non krwayan. Serten in menm ganny met deor, me bann Temwen in zantiman donn zot en plas reste. Lezot in ganny rezete. Kwa ki’n ed zot pour andire? Pa zis sa lanmour ki zot annan pour sa lasosyasyon frer ek ser ki’n ed zot andire me par lao tou se zot lanmour pour Zeova ek son Garson.—1 Pyer 1:22; 1 Zan 4:21.
18. Ki mannyer sa lanmour ki siport tou i en led pour bann koup Kretyen?
18 I annan en kantite lezot sityasyon dan lavi ki demande ki nou annan sa kalite lanmour ki siport tou. Dan en linyon maryaz, lanmour i ed sa koup pour respekte parol Zezi: “Sa ki Bondye in ini ansanm zonm pa devre separe.” (Mat. 19:6) Kan zot pe ganny “problenm dan [zot] lavi” bann Kretyen ki’n marye i devret rapel zot lekor ki Zeova i lakle prensipal pour zot maryaz reisi. (1 Kor. 7:28) Son Parol i dir ki ‘lanmour i reste pour touzour’ e en mari ek son madanm ki annan sa kalite dan zot maryaz i fer zot pli determinen pour reste ansanm e pour gard zot maryaz solid.—Kol. 3:14.
19. Ki ti arive parmi pep Bondye apre bann dezas natirel?
19 Lanmour i ed nou pour siport tou dan bann moman kot i annan dezas natirel. Sa ti leka kan en tranblemandter ti frap sid Perou e kan siklonn Katrina ti ravaz serten landrwa dan Golf Leta-z-ini. En kantite nou bann frer ti perdi zot landrwa reste oubyen zot bann keksoz materyel dan sa bann dezas. Lanmour ti pous sa lasosyasyon frer ek ser dan lemonn antye pour donn sekour e bann volonter ti ede pour rekonstrir e repar bann Lasal Rwayonm. Sa fason ki zot ti reazir i prouve ki nou bann frer i kontan kanmarad e enterese avek kanmarad toultan e dan nenport ki sirkonstans.—Zan 13:34, 35; 1 Pyer 2:17.
Lanmour i reste pour touzour
20, 21. (a) Akoz lanmour i annan en valer ekstraordiner? (b) Akoz ou determinen pour devlop lanmour?
20 Parmi pep Zeova ozordi, nou kapab vwar ki i saz pour devlop sa lanmour ki bokou pli siperyer ki tou. Sa kalite lanmour i vreman pli siperyer dan nenport ki sityasyon e dan tou sirkonstans. Remarke ki mannyer zapot Pol ti fer resorti sa pwen. Premyerman i ti dir ki don ki lespri i donnen pour disparet e ki kongregasyon Kretyen ti pou sorti dan son staz devlopman e i ti pou vin matir, apre i ti konklir dan sa fason: “Aprezan sa trwa keksoz i reste: lafwa, lesperans ek lanmour. Me dan tou, lanmour i pli gran.”—1 Kor. 13:13.
21 Avek letan, sa bann keksoz ki nou annan lafwa ladan pou vin en realite e alor nou pou nepli bezwen met lafwa ladan. Apre ki tou keksoz pou’n ganny refer a nef nou pou nepli bezwen annan lespwar dan sa bann promes e annan sa lanvi pour vwar zot ganny akonplir. Me ki pou arive avek lanmour? I pou reste pour touzour. I pa pou zanmen fini. Avek sa lespwar pour viv pour touzour antet, nou pou sirman vwar e konpran pli byen diferan laspe lanmour Bondye. Kan ou fer lavolonte Bondye par devlop sa lanmour ki bokou pli siperyer ki tou e ki reste pour touzour, ou pou kapab viv pour touzour.—1 Zan 2:17.
Ki ou pou reponn?
• Akoz nou bezwen reste an gard kont sa konsep ki lemonn i annan lo lanmour?
• Lanmour i kapab fer nou andir kwa?
• Ki mannyer lanmour i reste pour touzour?
[Kestyon]
[Pwen adisyonnel]
Teks pour lannen 2010 pou: ‘Lanmour i siport tou. Lanmour i reste pour touzour.’—1 Kor. 13:7, 8.
[Portre lo paz 26]
Lanmour ki reste pour touzour ti ed nou bann frer ek ser Malawi pour andir bann leprev