Nyene Ima Oro Mîdibehe Ifep ke Nsinsi
Nyene Ima Oro Mîdibehe Ifep ke Nsinsi
‘Ima ọyọyọ kpukpru n̄kpọ. Ima idibehe ifep ke nsinsi.’—1 COR. 13:7, 8.
1. (a) Didie ke ẹsio ima etop mfịn? (b) Mme owo ẹma nso?
ẸSIO ima etop etieti. Ẹkọkwọ ke ikwọ, ẹtetịn̄ nte uto. Idụhe owo emi mîyomke ẹma imọ. Mbụk ima ke n̄wed ye vidio ẹyọyọhọ urua. Edi ata ima Abasi ye ima mbọhọidụn̄ anana etieti. Nnyịn imokụt se Bible ọkọdọhọde ke eyetịbe ke akpatre usen emi. Mme owo ẹdi “mme ama idem, mme ama okụk, . . . ẹma inemesịt utu ke ndima Abasi.”—2 Tim. 3:1-5.
2. Nso ke Bible etịn̄ aban̄a ndima ererimbot?
2 Abasi ọnọ mme owo ukeme ndima ima, edi Ikọ Abasi ọdọhọ ikûma ererimbot ye se idude ke ererimbot. Bible etịn̄ se isitịbede ke ini utọ ima oro ọdọn̄de n̄kam ke esịt owo. (1 Tim. 6:9, 10) Ndi emeti se apostle Paul ekewetde aban̄a Demas? Okposụkedi emi enye ekesisan̄ade ye Paul, Demas ama akabade ama ererimbot. (2 Tim. 4:10) Apostle John ama odụri mme Christian utọn̄ aban̄a utọ ima emi. (Kot 1 John 2:15, 16.) Owo emi amade ererimbot ye se idude ke ererimbot—emi odude mfịn mfịn kpọt—ikemeke-keme ndima Abasi ye n̄kpọ Abasi.
3. Ewe ọkpọsọn̄ ẹn̄wan ke in̄wana, ndien nso mbụme ke emi edemerede?
3 Okposụkedi emi idụn̄ọde ke ererimbot, nnyịn idịghe ubak ererimbot emi. Ntak edi oro anade in̄wana ọkpọsọn̄ mbak nnyịn iditiene ererimbot ima se mmọ ẹmade. Ana inen̄ede ikpeme mbak se ererimbot ẹmade edidedei ọdọn̄ nnyịn itọn̄. Anie ndien ke ikpama ata ima? Nso ikeme ndin̄wam nnyịn itọn̄ọ ndima ima oro ọyọde kpukpru n̄kpọ onyụn̄ ebịghide ke nsinsi? Nso ufọn ke ididia idahaemi ye ke ini iso edieke inamde emi? Yak Abasi ọbọrọ mbụme emi man itịm ifiọk se ikpanamde.
Ma Jehovah
4. Didie ke ima Abasi esikọri owo ke esịt?
4 Ọtọin̄wan̄ oro esịnde idem ofụn̄ isọn̄ mbemiso ọtọ n̄kpọ oyom n̄kpọ oro ọkọri. (Heb. 6:7) Kpasụk ntre, oyom utom edieke iyomde ima oro imade Abasi ọkọri. Nso ke ikpanam? Ana inam utom ke esịt nnyịn, kpa ebiet emi ẹketọde n̄kpasịp Obio Ubọn̄. Isịn idem ikpep Ikọ Abasi man inen̄ede ifiọk Abasi. (Col. 1:10) Idụk mbono esop kpukpru ini isinyụn̄ itiene ibuana ke se ẹnamde. Edieke inamde kpukpru emi, iyenen̄ede ifiọk Abasi. Ndi nnyịn owo kiet kiet ke inen̄ede isịn ukeme ikọ ifiọk Abasi?—N̄ke 2:1-7.
5. (a) Nso ke ikpanam man inen̄ede ifiọk edinen ikpe, odudu, ọniọn̄, ye ima Jehovah? (b) Nso ke ekpetịn̄ aban̄a edinen ikpe, ọniọn̄, ye odudu Abasi?
5 Bible anam nnyịn ifiọk orụk Owo emi Jehovah edide. Edieke ikpepde Bible inyụn̄ ika iso ikọ ifiọk Jehovah, nnyịn iyenen̄ede ifiọk edinen ikpe esie, odudu esie, ọniọn̄ esie, ye akakan edu esie emi edide ima. Kpukpru usụn̄ Jehovah ẹnenen, ibet esie onyụn̄ ọfọn ama. (Deut. 32:4; Ps. 19:7) Edieke itiede ikere kpukpru se Jehovah anamde, akakan ifiọk m̀mê ọniọn̄ esie ayanam nnyịn uten̄e. (Ps. 104:24) Ekondo n̄ko owụt ke odudu Jehovah inyeneke mbiet.—Isa. 40:26.
6. Didie ke Abasi owụt ke imama nnyịn, ndien ima esie emi otụk fi didie?
6 Nso ke ikpetịn̄ iban̄a ata akpan edu Abasi, emi edide ima? Ima esie inyeneke adan̄a, idụhe owo emi mîdiaha ufọn ima esie. Ima emi akanam enye ọnọ ofụri ererimbot ufak. (Kot Rome 5:8.) Edi n̄kukụre mbon oro ẹdibọde ufọn ufak emi edi mbon oro ẹmade Abasi ẹnyụn̄ ẹbuọtde idem ye Eyen esie. (John 3:16, 36) Abasi ndikenyene ima nnọ Jesus edikpa ke ibuot nnyịn ekpenyene ndinam nnyịn ima enye nde.
7, 8. (a) Nso ke ikpanam man iwụt ke imama Abasi? (b) Ikọt Abasi ẹka iso ẹnịm ibet Abasi kpa ye nso?
7 Nso ke ikpanam man iwụt ke imama Abasi usiene ke kpukpru se enye anamde ọnọ nnyịn? Bible ọnọ ata eti ibọrọ ete: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3) Ih, ima oro imade Jehovah Abasi anam inịm ibet esie. Ntak kiet edi oro isinamde mme owo ẹfiọk enyịn̄ Abasi ye Obio Ubọn̄ esie, ndien ediwak owo ke ẹdia ufọn ẹto oro. Edieke inamde utom emi ke uyọhọ esịt, oro owụt ke inịm ibet Abasi ke edisana esịt.—Matt. 12:34.
8 Nditọete nnyịn ke ofụri ererimbot ẹka iso ẹnịm ibet Abasi kpa ye oro ediwak owo mînyeneke udọn̄ ke etop Obio Ubọn̄, ke ini ndusụk ẹsuade-sua etop emi. Mmọ ke ẹsịn ifịk ẹdomo ndinam utom emi mma. (2 Tim. 4:5) Nnyịn n̄ko ke idomo ndinam mme owo ẹfiọk Abasi, ke inyụn̄ idomo ndinịm kpukpru ibet esie eken n̄ko.
Se Inamde Ima Ọbọn̄ Nnyịn Jesus Christ
9. Nso ke Christ ọkọyọ, ndien nso ikanam enye ọyọ kpukpru emi?
9 Ke adianade ye ndima Abasi, imenyene ediwak ntak ndima Eyen esie n̄ko. Okposụkedi emi nnyịn mîkwe Jesus, nte ikpepde ekese iban̄a enye, emi ayanam inen̄ede ima enye. (1 Pet. 1:8) Nso idi ndusụk n̄kpọ emi Jesus ọkọyọde? Nte enye okosụk anamde uduak Ete esie, ẹma ẹsua enye ke unana ntak, ẹkọbọ enye, ẹdori enye ikọ, ẹsụn̄i enye, ẹnyụn̄ ẹsuene enye. (Kot John 15:25.) Ima oro Jesus akamade Ete esie akanam enye ọyọ kpukpru oro. Ima emi okonyụn̄ anam enye ọnọ uwem esie man afak ediwak owo.—Matt. 20:28.
10, 11. Nso ke ibiere ndinam ke ini ikerede iban̄a se Christ anamde ọnọ nnyịn?
10 Se Jesus akanamde enen̄ede otụk nnyịn. Ke ini itiede ikere se Christ anamde ọnọ nnyịn, emi ayanam idọdiọn̄ ima enye. Akpana nnyịn emi idide mbet esie ika iso inyene ima nte Christ man ikeme ndika iso nnam ewụhọ esie emi edide edikwọrọ etop Obio Ubọn̄ nnyụn̄ nnam mbet.—Matt. 28:19, 20.
11 Ke ini ikerede iban̄a nte Christ amade ofụri ubonowo, emi esinam isịn idem ikụt ite ke imokụre utom emi enye ọnọde nnyịn mbemiso utịt edi. (Kot 2 Corinth 5:14, 15.) Ima emi Christ enyenede akanam enye esịn idem anam kpukpru se Abasi akaduakde ndinam nnọ ubonowo. Ndien uwụtn̄kpọ oro enye ekenịmde ọnọ nnyịn nditiene nde ikpat esie ketket ọnọ nnyịn owo kiet kiet ifet nditiene nnyene ubọk ke ndisu uduak Abasi emi. Man ikeme ndinam emi, ana inen̄ede ima Abasi ke ofụri esịt. (Matt. 22:37) Ke ini inamde se Jesus ekekpepde inyụn̄ inịmde ibet esie, oro owụt ke imama enye inyụn̄ ibiere ndisọn̄ọ nda n̄wụt ke ida ye Abasi nte Jesus akadade, inamke n̄kpọ m̀mê nso itịbe.—John 14:23, 24; 15:10.
Ka Iso Ma Ima Sia Enye Edi Akakan Usụn̄ Uwem
12. Nso idi “akakan usụn̄” oro Paul eketịn̄de aban̄a?
12 Apostle Paul ama ekpebe Christ, onyụn̄ etiene nde ikpat esie ketket. Ntak edi oro enye ekekemede ndidọhọ nditọete eken ete ẹkpebe imọ. (1 Cor. 11:1) Okposụkedi emi Paul ọkọdọhọde mme Christian ke Corinth ẹsịn ifịk ẹyom mme enọ eke spirit oro ẹkenọde mme Christian ini oro, utọ nte enọ ukọk udọn̄ọ ye edisem nsio nsio usem, enye ama owụt mmọ n̄kpọ emi akam ọfọnde akan oro, emi mmọ ẹkpeyomde. Enye ọkọdọhọ ke 1 Corinth 12:31 ete: “Edi mmowụt mbufo akakan usụn̄.” Se idude ke mme ufan̄ikọ oro ẹtienede ẹwụt ke enye eketịn̄ aban̄a akakan usụn̄ ima. Ntak emi Paul ọkọdọhọde ke ima edi akakan usụn̄ uwem-e? Paul aka iso anam ikọ esie an̄wan̄a. (Kot 1 Corinth 13:1-3.) Edieke enye ekenyenede n̄wọrọnda ukeme esinyụn̄ anamde ikpọ n̄kpọ, edi inyeneke ima, oro ikpọwọrọke n̄kpọ ndomokiet. Spirit Abasi ama anam enye ada ikọ esie ekesịn ke ufọk. Nnyịn idisọpke ifre utọ ukpepn̄kpọ emi.
13. (a) Nso idi ibuotikọ isua 2010? (b) Ntak emi idọhọde ke ima idibehe ifep ke nsinsi?
13 Paul ama etịn̄ n̄ko se ima edide ye se enye mîdịghe. (Kot 1 Corinth 13:4-8.) Idahaemi, tie kere ise m̀mê emenen̄ede enyene ima. Tịn̄ enyịn ke utịt utịt ufan̄ikọ 7, ye akpa udịmikọ ke ufan̄ikọ 8, emi ọdọhọde ete: ‘Ima ọyọyọ kpukpru n̄kpọ. Ima idibehe ifep ke nsinsi.’ Ibuotikọ isua 2010 edi oro. Fiọk ete ke Paul ọdọhọ ke ufan̄ikọ 8 ete ke mme enọ eke spirit, emi esịnede editịn̄ ntịn̄nnịm ikọ ye edisem nsio nsio usem—emi ẹkedide ọsọ n̄kpọ ke ini ẹketọn̄ọde esop Christian obufa obufa—ẹyebe ẹfep. Edi ke ima idibehe ifep ke nsinsi. Jehovah edi ima, ndien sia enye odude ke nsinsi, ima idibehe ifep ke nsinsi.—1 John 4:8.
Ima Ọyọyọ Kpukpru N̄kpọ
14, 15. (a) Didie ke ima ekeme ndinam iyọ idomo? (b) Ntak emi ekpri eyenete nnyịn kiet mîkamaha ndikan̄ mbuọtidem-e?
14 Nso isinam mme Christian ẹka iso ẹyo idomo, afanikọn̄, m̀mê mfịna ekededi? Edi ima Abasi. Utọ ima oro ikụreke ke ndiyak se inyenede atak ke ntak n̄kpọ Abasi. Ima emi esinam ika iso isọn̄ọ ida ọkpọkọm ẹyom ndiwot nnyịn ke ntak Christ. (Luke 9:24, 25) Kere ban̄a nsọn̄ọnda Mme Ntiense oro ẹkesịnde ke ufọk-n̄kpọkọbi ẹnyụn̄ ẹtụhọrede ke mme itienna ekikere ke ini ẹken̄wanade udiana ekọn̄ ererimbot ye ke ẹma ẹken̄wana ẹma.
15 Se iketịbede inọ uyen Ntiense kiet ke Germany emi ekekerede Wilhelm enen̄ede owụt emi. Enye ama ọsọn̄ọ ada, inyịmeke ndikan̄ mbuọtidem ke ini mbonekọn̄ Nazi ẹkeyomde nditop enye n̄wot. Enye ọkọdọhọ ke akpatre leta oro enye ekewetde mbonubon mmọ ete: “Idụhe se ifọnde nte ndima Abasi nte Ọbọn̄ nnyịn Jesus Christ eketemede. Edieke isọn̄ọde ida ye enye, enye iditreke ndinọ nnyịn utịp.” Ekem iman esie ama ewet ke ibuotikọ kiet ke Enyọn̄-Ukpeme ete: “Ke ofụri ini afanikọn̄ emi, nnyịn ikosụk imama Abasi ikan n̄kpọ ekededi.” Utọ edu oro ke ediwak nditọete nnyịn oro ẹdude ke ufọk-n̄kpọkọbi ke Armenia, Eritrea, South Korea, ye ke mme idụt eken, ẹnyene. Nditọete emi ke ẹsọn̄ọ ẹda ẹma Jehovah.
16. Nso ke nditọete nnyịn ke Malawi ẹkeyọ?
16 Nsio nsio idomo ẹsịm nditọete nnyịn ke nsio nsio ebiet. Nditọete nnyịn ke Malawi ẹma ẹsobo ọkpọsọn̄ ubiọn̄ọ ye ibak ibak unọmọ ke ofụri isua 26. Ukara ikonyụn̄ iyakke mmọ ẹkpono Abasi ke ifụre. Edi Abasi ama ọdiọn̄ mmọ ke ndikọsọn̄ọ nda nyọ kpukpru emi. N̄kpọ nte Mme Ntiense Jehovah 18,000 ẹkedu ke ofụri idụt oro ke ini ukọbọ emi ọkọtọn̄ọde. Edi ke isua 30 ama ekebe, mmọ ẹma ẹwak ẹkan oro utịm ikaba; mmọ ẹkedi owo 38,393. Se isinyụn̄ itịbede edi oro ke mme idụt eken oro ẹkọbọde ikọt Jehovah.
17. Nso ke nditọete emi kpukpru owo ke ufọk mmọ mîdịghe Mme Ntiense Jehovah ẹsisobo, ndien nso isinam mmọ ẹyọ?
17 Esisọn̄ ndiyọ ukọbọ, edi enye emi esisọn̄de akan ndiyọ esidi enye emi otode ufọk. Ke akpanikọ, ata mbonufọk nnyịn ẹkeme ndibiọn̄ọ nnyịn. Jesus ama ọdọhọ ke emi eyetịbe. Ndien se itịbede inọ ediwak nnyịn edi oro. (Matt. 10:35, 36) Mme ete ye eka emi mîdịghe Mme Ntiense ẹsikọbọ nditọ mmọ oro ẹkpepde akpanikọ, ẹyet ndusụk aran, mîdịghe ẹbịn ẹsion̄o ke ufọk. Edi nditọete nnyịn eken ẹsimen mmọ ẹkama. Nso isinam mmọ ẹsọn̄ọ ẹda ẹnam n̄kpọ Jehovah kpa ye utọ ukọbọ emi? Se isinen̄erede inam mmọ ẹsọn̄ọ ẹda ẹyo kpukpru emi esidi ata ima emi mmọ ẹmade Jehovah ye Eyen esie, ye ima emi mmọ ẹmade nditọete mmọ ke ofụri ererimbot.—1 Pet. 1:22; 1 John 4:21.
18. Didie ke ima oro ọyọde kpukpru n̄kpọ ekeme ndin̄wam mme ọdọ ndọ?
18 Odu mme idaha efen oro oyomde inyene ima emi ọyọde kpukpru n̄kpọ. Ima esinam ebe ye n̄wan ẹnam item Jesus emi: “Se Abasi ama akadian yak baba owo kiet okûdianade.” (Matt. 19:6) Ke ini ebe ye n̄wan ẹkụtde “ukụt ke obụkidem,” akpana mmọ ẹti ke Jehovah edi ọyọhọ owo ita ke ndọ mmọ. (1 Cor. 7:28) Bible ọdọhọ ke ‘ima ọyọyọ kpukpru n̄kpo,’ ndien ebe ye n̄wan emi ẹmade kiet eken ẹsinen̄ede ẹdiana kiet ẹnam ndọ mmọ ọfọn.—Col. 3:14.
19. Nso ke ikọt Abasi ẹsinam ke ini oto-obot afanikọn̄ etịbede?
19 Ima esinam iyọ kpukpru n̄kpọ ke ini oto-obot afanikọn̄ etịbede. Ke ini unyekisọn̄ eketịbede ke usụk usụk Peru, ye ke ini Oyobio Katrina akabiatde ndusụk ikpehe Itụn̄ Inyan̄ibom ke United States, n̄kpọntịbe emi ama owụri ufọk ediwak nditọete nnyịn, inyene mmọ onyụn̄ atak. Ima ama anam esop Abasi ẹnọ mmọ un̄wam, ndien mme anamutom unyịmesịt ẹma ẹfiak ẹbọp ufọk nditọete emi ẹnyụn̄ ẹdiọn̄ mme Ufọkmbono Obio Ubọn̄. Emi owụt ke nditọete nnyịn ẹnyene ima ẹnyụn̄ ẹkere ẹban̄a kiet eken ke idaha ekededi.—John 13:34, 35; 1 Pet. 2:17.
Ima Idibehe Ifep ke Nsinsi
20, 21. (a) Ntak emi ima edide akakan usụn̄ uwem? (b) Ntak emi ebierede ndima ima?
20 Nnyịn emi idide ikọt Jehovah imokụt ufọn edinyene ima emi edide akakan usụn̄ uwem. Idụhe idaha ekededi oro orụk ima emi mîkemeke ndiyọ. Se apostle Paul eketịn̄de owụt ke emi edi akpanikọ. Ke enye ama ọkọdọhọ ke mme enọ eke spirit ẹyebe ẹfep, ye nte ke esop Christian iditiehe nte eyenọwọn̄ ke nsinsi, enye akada ikọ esie ekeberi ntem: “Idahaemi, nte ededi, mbuọtidem, idotenyịn, ye ima, ẹsụk ẹdodu, mbita emi; edi andikpon n̄kan ke otu mmọ edi ima.”—1 Cor. 13:13.
21 Kpukpru se idoride enyịn inyụn̄ inyenede mbuọtidem iban̄a ẹyesu ke ini ẹdinamde kpukpru n̄kpọ ẹdi mbufa, ndien ufọn mbuọtidem ye idotenyịn ididụhe aba. Edi nso kaban̄a ima? Ima idibehe ifep ke nsinsi. Ndien sia ididude uwem ke nsinsi, iyokụt inyụn̄ ifiọk ekese iban̄a ima Abasi. Mmọdo, edieke akade iso anam se Abasi oyomde, oro edi, ndima ima emi edide akakan usụn̄ uwem oro mîdibehe ifep ke nsinsi, afo n̄ko udunyụn̄ ubehe ufep ke nsinsi.—1 John 2:17.
Didie ke Afo Ọkpọbọrọ?
• Ntak emi nnyịn mîkpamaha ererimbot ye se idude ke ererimbot?
• Nso ke isiyọ ke ntak ima?
• Ntak ẹdọhọde ke ima idibehe ifep ke nsinsi?
[Mme Mbụme Ukpepn̄kpọ]
[Se ẹwetde ke ikpọ abisi ke page 27]
Ibuotikọ isua 2010 edi: ‘Ima ọyọyọ kpukpru n̄kpọ. Ima idibehe ifep ke nsinsi.’—1 Cor. 13:7, 8.
[Ndise ke page 25]
Ima oro imade Abasi esinam ikwọrọ ikọ
[Ndise ke page 26]
Ima oro mîdibehe ifep akanam nditọete nnyịn ke Malawi ẹyọ ukọbọ