Wo Uyoyou Nọ U Re Re he
Wo Uyoyou Nọ U Re Re he
‘Uyoyou u re thihakọ eware kpobi. Uyoyou u re re he.’—1 KỌR. 13:7, 8.
1. (a) Diẹse a be hae mae jọ ta kpahe uyoyou? (b) Eme ahwo buobu a bi you nẹnẹ?
AHWO a kere ebe buobu no kpahe uyoyou. A rehọ ẹme nana suile buobu no. Ohwo-akpọ kpobi ọ gwọlọ uyoyou. Rekọ uyoyou nọ a be hae jọ ebe gbiku rai hayo jọ ifimu dhesẹ na, enọ e da eria kpobi fia nẹnẹ na yọ iku nọ ahwo a roro ku. Wo ohẹriẹ, uvi uyoyou nọ a re wo kẹ Ọghẹnẹ gbe ọrivẹ o rẹ bẹ ẹruẹ nẹnẹ. Ma be ruẹ orugba eme nọ Ebaibol e ta kpahe edẹ urere nana. Ahwo a bi “you oma-obọrai, je you igho, . . . yowọ enu-awere siọ Ọghẹnẹ ba.”—2 Tim. 3:1-5.
2. Didi unuovẹvẹ Ebaibol e kẹ kpahe uyoyou ọthọthọ?
2 Ahwo-akpọ a rẹ sai dhesẹ uyoyou, rekọ Ebaibol e vẹvẹ omai unu kpahe uyoyou ọthọthọ. Yọ Ebaibol i dhesẹ oware nọ o rẹ via nọ uyoyou utioye o tẹ reria ohwo oma no. (1 Tim. 6:9, 10) Kọ whọ kareghẹhọ eme nọ Pọl ukọ na o kere kpahe Demas? Dede nọ ọ jẹ nyusu kugbe Pọl, Demas o you eware akpọ na. (2 Tim. 4:10) Jọn ukọ na ọ vẹvẹ Ileleikristi unu kpahe enwoma nana. (Se 1 Jọn 2:15, 16.) Ohwo nọ o re you akpọ na gbe eware nọ e riẹe eva nọ i re dhe enwenwene na ọ rẹ sai you Ọghẹnẹ gbe eware Ọghẹnẹ hẹ.
3. Eme ma rẹ daoma whaha, kọ enọ vẹ onana o wha ze?
3 Ma rrọ abọ akpọ na ha, dede nọ ma gbẹ be rria eva riẹ. Fikiere, ma rẹ daoma whaha eriwo ọthọthọ nọ akpọ na o wo kpahe uyoyou. Ma rẹ yọroma kẹ uyoyou ọthọthọ orọ akpọ na. Fikiere, ono u fo nnọ ma re wo uvi uyoyou kẹ? Eruẹrẹfihotọ vẹ i re fi obọ họ kẹ omai wo uyoyou nọ u re thihakọ eware kpobi, onọ u re re he? Ẹvẹ onana o rẹ rọ wha erere se omai enẹna je kpomahọ uzuazọ mai evaọ obaro? Ma gwọlọ iyo nọ e rọwo kugbe eriwo Ọghẹnẹ re ma sai wo uvi uyoyou.
Wo Uyoyou kẹ Jihova
4. Ẹvẹ uyoyou kẹ Ọghẹnẹ o rẹ rọ rro?
4 Re ma wo oware jọ, o gwọlọ omodawọ nọ ma re ro mu ei họ ma vẹ jẹ ruabọhọ iẹe. Rehọ oriruo ọwhẹrẹ nọ o re kporo udhu ọ vẹ kọ ibi. O re rẹro nnọ ibi na e te dhẹ ze. (Hib. 6:7) Epọvo na re, u fo re uyoyou mai kẹ Ọghẹnẹ o rro. Re onana o sae via, eme o gwọlọ? Ma rẹ ruẹrẹ udu mai họ ziezi, oria nọ a kọ ubi uzẹme Uvie na fihọ. Ma re ru onana ẹkwoma Ebaibol na nọ ma rẹ roma totọ wuhrẹ re ma gbe wo eriariẹ Ọghẹnẹ. (Kọl. 1:10) Iwuhrẹ nọ ma re kpohọ ẹsikpobi ma vẹ jẹ jarai wo obọ u re je fi obọ họ kẹ omai wo eriariẹ ziezi. Kọ ma be daoma ẹsikpobi re eriariẹ mai e ruẹse rro?—Itẹ 2:1-7.
5. (a) Ẹvẹ ma sai ro wuhrẹ kpahe ekwakwa-aghae Jihova? (b) Eme whọ rẹ sae ta kpahe uvi-ẹdhoguo, areghẹ, gbe ogaga Ọghẹnẹ?
5 Jihova ọ rehọ ẹkwoma Ebaibol na dhesẹ oghẹrẹ ohwo nọ ọ rrọ via k’omai. Ma tẹ be hai wuhrẹ Ebaibol re ma riẹ Jihova ziezi, ma ti wo ovuhumuo kẹ ekwakwa-aghae riẹ—uvi-ẹdhoguo riẹ, ogaga, areghẹ, onọ o mae rro kọ uyoyou. Jihova o dhesẹ uvi-ẹdhoguo riẹ evaọ iruẹru riẹ kpobi gbe evaọ izi egbagba riẹ. (Izie. 32:4; Ol. 19:7) Ma te roro kpahe eware kpobi nọ Jihova ọ ma, areghẹ ologbo riẹ o re gb’omai unu. (Ol. 104:24) Ehrugbakpọ na o te je dhesẹ inọ Jihova họ Ehri ogaga kpobi.—Aiz. 40:26.
6. Ẹvẹ Ọghẹnẹ o ro dhesẹ uyoyou kẹ omai, kọ eme onana o wọ owhẹ ru no?
6 Eme ma rẹ sae ta kpahe okwakwa-aghae Ọghẹnẹ nọ o mae rro, koyehọ uyoyou? U duobọte omai kpobi. Uyoyou yena o wọ riẹ nọ o ro vi Ọmọ riẹ ze te ta omai no igbo. (Se Ahwo Rom 5:8.) Ọghẹnẹ o vi Ọmọ riẹ ze ti whu kẹ ahwo kpobi, rekọ enọ i dhesẹ edẹro kẹ uyoyou Ọghẹnẹ je fi ẹrọwọ họ Ọmọ riẹ ọvo a ti wo erere noi ze. (Jọn 3:16, 36) U fo inọ ma re you Ọghẹnẹ fiki epanọ ọ rọ kuvẹ re Jesu o whu kẹ izieraha mai.
7, 8. (a) Ẹvẹ ma sai ro dhesẹ inọ ma gine you Ọghẹnẹ? (b) Eware vẹ ahwo Ọghẹnẹ a bi thihakọ rai nọ a bi koko ijaje riẹ na?
7 Ẹvẹ ma re ro dhesẹ inọ ma you Ọghẹnẹ fiki eware kpobi nọ o ru kẹ omai no? Ikereakere na e kuyo onọ nana wowoma nọ e ta nọ: “Onana họ oware nọ uyoyou Ọghẹnẹ u dhesẹ, inọ ma koko ijaje riẹ; dede yọ ijaje riẹ e rrọ owha ha.” (1 Jọn 5:3) Ẹhẹ, uyoyou kẹ Jihova Ọghẹnẹ o rẹ wọ omai koko ijaje riẹ. Onana họ oware jọ nọ o be wọ omai se isẹi kpahe odẹ gbe Uvie riẹ, onọ o be wha erere se amọfa. Ma te bi ru onana no udu ze yọ u bi dhesẹ inọ ma be rehọ eva efuafo koko ijaje Ọghẹnẹ.—Mat. 12:34.
8 Inievo mai wariẹ akpọ na họ a be rehọ ithihakọ koko ijaje Ọghẹnẹ dede nọ ahwo a bi se ovuẹ Uvie na gboja ha hayo bi tube le ai dede. A dadamu iruo usiuwoma ota na ghele. (2 Tim. 4:5) Epọvo na re, ma rẹ rehọ eriariẹ Ọghẹnẹ nọ ma wo ro wuhrẹ amọfa, ma ve je koko ijaje efa riẹ kpobi.
Eware nọ E Lẹliẹ Omai You Olori Mai Jesu Kristi
9. Eware vẹ Kristi o thihakọ rai, kọ eme o wọ riẹ ru ere?
9 U te no Ọghẹnẹ nọ ma re you no, eware buobu e riẹ nọ e lẹliẹ omai you Ọmọ riẹ. Dede nọ ma re ruẹ Jesu hu, epanọ ma bi wuhrẹ kpahe iẹe te, ere uyoyou mai kẹe o be rro te. (1 Pita 1:8) Eware jọ vẹ Jesu o thihakọ rai? Dede nọ o je ru oreva Ọsẹ riẹ, a mukpahe Jesu gheghe, a kpokpo i rie, a bọwo riẹ ota, a tẹ jẹ lae eka. Ọ rioja eware efa re. (Se Jọn 15:25.) Fiki uyoyou nọ Jesu o wo kẹ Ọsẹ obọ odhiwu riẹ, o thihakọ edawọ eyena kpobi. Yọ fiki uyoyou riẹ, o whu re ibuobu e sai no igbo.—Mat. 20:28.
10, 11. Fiki oware nọ Kristi o ru kẹ omai, eme họ ọtamuo mai?
10 Uzuazọ nọ Jesu o yeri o rẹ lẹliẹ omai j’owọ. Nọ ma te roro kpahe oware nọ Kristi o ru kẹ omai, uyoyou mai kẹe o rẹ ga vi epaọ ọsosuọ. Fikinọ mai yọ ilele riẹ, ma re wo ọkpọ uyoyou Kristi re ma sae ruabọhọ ekoko ijaje riẹ gbe usiuwoma ota, ma ve je ru ilele.—Mat. 28:19, 20.
11 Uyoyou nọ Kristi o wo kẹ ahwo-akpọ kpobi o rẹ wọ omai ta usiuwoma na kẹ ahwo kpobi taure urere na o tẹ te ze. (Se 2 Ahwo Kọrint 5:14, 15.) Uyoyou nọ Kristi o wo o wọ riẹ ru ẹjiroro nọ Ọghẹnẹ o wo kẹ ahwo-akpọ gba. Yọ oriruo nọ Kristi o fihọ otọ k’omai u re ru omai omomọvo wo abọ evaọ erugba ẹjiroro Ọghẹnẹ. Onana o gwọlọ inọ ma rẹ rọ eva mai kpobi you Ọghẹnẹ. (Mat. 22:37) Ẹkwoma ekoko izi nọ Jesu o jie, ma re dhesẹ nnọ ma you rie jẹ gbaemu no inọ ma rẹ kpare esuo Ọghẹnẹ kpehru ghelọ oghẹrẹ ẹdawo kpobi, wọhọ epanọ Jesu o ru.—Jọn 14:23, 24; 15:10.
Elele Emamọ Edhere ọrọ Uyoyou
12. Eme họ “emamọ edhere” nọ Pọl ọ fodẹ na?
12 Pọl ukọ na yọ ohwo nọ ọ raro kele Kristi. Fikinọ Pọl ọ raro kele Kristi ziezi, ọ tẹ tuduhọ inievo riẹ awọ inọ a raro kele ọye omariẹ. (1 Kọr. 11:1) Dede nọ ọ tuduhọ Ileleikristi obọ Kọrint awọ inọ a rọ ọwhọ gwọlọ ekẹ ẹzi jọ nọ e jariẹ evaọ ikpe-udhusoi ọsosuọ na, wọhọ okẹ usiwo gbe evẹravẹrẹ, Pọl o dhesẹ inọ oware ofa jọ o roja gaga nọ a rẹ gwọlọ. Eva 1 Ahwo Kọrint 12:31, Pọl ọ ta nọ: “Enẹna me re ti dhesẹ emamọ edhere na kẹ owhai.” Eme efa nọ ọ ta lele ẹme yena i dhesẹ inọ uyoyou họ emamọ edhere na. Oghẹrẹ vẹ o rọ rrọ emamọ edhere? Pọl o dhesẹ oware nọ o wo họ iroro. (Se 1 Ahwo Kọrint 13:1-3.) Ọ ta nnọ o te wo obọdẹ onaa jọ je bi ru ikpeware rekọ o gbe wo uyoyou ho, kiyọ ọ rrọ odẹ-oware ovo ho! Ẹzi Ọghẹnẹ ọ wọ riẹ ru ẹme na vẹ no. Eme riẹ i duobọte omai udu gaga.
13. (a) Eme họ uzoẹme ẹgbukpe ọrọ 2010? (b) Fikieme ma sae rọ ta nọ uyoyou u re re he?
13 Pọl ọ tẹ nyaharo dhesẹ oware nọ uyoyou o rrọ gbe oware nọ o rrọ họ. (Se 1 Ahwo Kọrint 13:4-8.) Whaọ, kiẹ oma ra riwi sọ who bi ru oware nọ uyoyou o gwọlọ. Tẹrovi abọ ọsosuọ ọrọ owọ avọ 7 na gbe abọ ọsosuọ ọrọ owọ avọ 8: ‘Uyoyou u re thihakọ eware kpobi. Uyoyou u re re he,’ onọ o rrọ uzoẹme ẹgbukpe mai ọrọ 2010 na. Muẹrohọ inọ evaọ owọ avọ 8, Pọl ọ ta inọ ekẹ ẹzi na, te aruọruẹ gbe evẹravẹrẹ, enọ e jariẹ evaọ okenọ ukoko Ileleikristi u muhọ obọ, i ti serihọ. Rekọ uyoyou o te jọ bẹdẹ bẹdẹ. Jihova họ uyoyou, yọ ọ be rria bẹdẹ bẹdẹ. Fikiere uyoyou u ti kuhọ họ. O te jọ ribri keme Ọghẹnẹ mai, ọnọ ọ be rria bẹdẹ na, ọye họ uyoyou.—1 Jọn 4:8.
Uyoyou U re Thihakọ Eware Kpobi
14, 15. (a) Ẹvẹ uyoyou o sai ro fi obọ họ kẹ omai thihakọ edawọ? (b) Fikieme ọmoha jọ ọ sai ro kru ẹrọwọ riẹ?
14 Eme o be lẹliẹ Ileleikristi thihakọ ghelọ edawọ gbe ebẹbẹ nọ a be nyaku? Uvi uyoyou. Re ma dhesẹ uyoyou nana, orọnikọ ma rẹ kpairoro vrẹ ekwakwa-efe ọvo họ. O kẹre te ẹgbakiete mai nọ ma re kru rite uwhu fiki Kristi. (Luk 9:24, 25) Roro kpahe ẹrọwọ inievo mai nọ a fihọ uwou-odi gbe enọ e ruẹ uye evaọ ega gbe evuẹ iruo-ọgbahọ evaọ etoke Ẹmo Akpọ II gbe okenọ ẹmo na o fi vrẹ no.
15 Ọmoha jọ nọ a re se Wilhelm, ohwo Germany, yọ emamọ oriruo. Ukpenọ o re siobọno ẹrọwọ riẹ, o kru udu ga okenọ a tubẹ ta nnọ a ti kpei. Evaọ ileta urere nọ o kere se uviuwou riẹ re a te ti kpei, ọ ta nọ: “Onọ o mae rro, ma re you Ọghẹnẹ, wọhọ epanọ Olori mai, Jesu Kristi, ọ ta nnọ ma ru. Ma te kru ẹrọwọ mai, ọ te hwosa kẹ omai.” Uwhremu na, nọ ohwo uviuwou riẹ jọ o je gbiku omariẹ evaọ uvitha Uwou-Eroro jọ, ọ ta nọ: “Ghele ebẹbẹ na, uviuwou mai ọ gba riẹ mu no inọ uyoyou mai kẹ Ọghẹnẹ o rẹ karo.” Uruemu utionana inievo mai buobu a wo, enọ i bi thihakọ uwou-odi evaọ obọ Armenia, Eritrea, South Korea, gbe erẹwho efa. Inievo nana a kru uyoyou rai kẹ Jihova gaga.
16. Eware vẹ inievo mai evaọ obọ Malawi a thihakọ rai?
16 Evaọ eria buobu, ebẹbẹ efa e be dawo ẹrọwọ gbe ithihakọ inievo mai. Evaọ ikpe 26, Isẹri Jihova evaọ Malawi a rioja awhaha egọmeti gbe ukpokpoma ogaga. Erere o no ithihakọ rai ze. Okenọ ukpokpoma na u muhọ, inievo idu ikpegberee (18,000) e jọ orẹwho na. Ikpe ọgba e vrẹ no, a te bu viere akuava, bu te 38,393. Ma ruẹ iyẹrẹ itieye na no evaọ erẹwho efa.
17. Uye vẹ o be bẹ emọ jọ nọ esẹgbini rai a rrọ ukoko ho, kọ eme a be sai ro thihakọ?
17 O ginẹ rrọ bẹbẹ re ahwo Ọghẹnẹ a thihakọ ukpokpoma. Rekọ o rẹ mae jọ bẹbẹ nọ ukpokpoma na u te bi no obọ imoni ohwo ze. Imoni ohwo e rẹ sae wha olahiẹ ze. Kọ Jesu ọ gbẹ ruẹaro nnọ onana o te via? Ee, yọ o via kẹ inievo mai buobu no. (Mat. 10:35, 36) Esẹgbini nọ e rrọ ukoko ho a kpokpo emọ rai no. Esẹgbini jọ a re tube le emọ rai no uwou, rekọ inievo jọ a ve se ai rehọ. Esẹgbini jọ a siọ emọ rai no. Eme u bi fi obọ họ kẹ emọ itieye na thihakọ? Orọnọ fikinọ a you ukoko na ọvo ho, rekọ maero fikinọ a gine you Jihova gbe Ọmọ riẹ.—1 Pita 1:22; 1 Jọn 4:21.
18. Ẹvẹ uyoyou nọ u re thihakọ eware kpobi o rọ rrọ obufihọ kẹ Ileleikristi nọ e rọo no?
18 Eware efa e rẹ jọ uzuazọ via nọ o jọ gwọlọ nọ ma wo uyoyou nọ u re thihakọ eware kpobi. Uyoyou u re fi obọ họ kẹ ọzae avọ aye nọ a gbẹ rọ la ẹme Jesu na vrẹ hẹ inọ: “Onọ Ọghẹnẹ o kugbe no, a jọ ohwo ọvo ọ hẹriẹ e he.” (Mat. 19:6) A te bi wo “ukpokpoma” evaọ orọo, Ileleikristi a rẹ kareghẹhọ inọ Jihova yọ ugogo ohwo jọ evaọ orọo na. (1 Kọr. 7:28) Ebaibol e ta inọ ‘uyoyou u re thihakọ eware kpobi,’ yọ ọzae avọ aye nọ a wo uyoyou a rẹ jọ kugbe ohwohwo, a vẹ jẹ ruẹ nnọ orọo rai o tọ.—Kọl. 3:14.
19. Eme ahwo Ọghẹnẹ a ru no nọ eware okpẹtu e via?
19 Uyoyou u re fi obọ họ kẹ omai thihakọ eware kpobi nọ eware okpẹtu e tẹ via. Oriruo onana họ okenọ otọ u nuhu evaọ obọ Peru, gbe okenọ ofou-ọwhibo ọ raha eware evaọ obọ America. Iwou gbe ekwakwa inievo mai buobu e raha. Uyoyou o wọ inievo mai evaọ eria sa-sa zọhọ eware, amọfa a tẹ fialoma via wariẹ bọ iwou inievo na jẹ ruẹrẹ Egwa Uvie. Iruẹru itieye na i dhesẹ inọ inievo mai a you jẹ be sẹro ohwohwo evaọ oke kpobi.—Jọn 13:34, 35; 1 Pita 2:17.
Uyoyou U re Re He
20, 21. (a) Fikieme uyoyou u ro wuzou tere? (b) Fikieme whọ rọ gbaemu inọ whọ rẹ ruabọhọ uyoyou?
20 Ma jọ udevie ahwo Jihova nẹnẹ ruẹ inọ ma te wo uyoyou kẹ ohwohwo o rẹ wha erere ze. Ghele oware nọ o via kpobi, u re fi obọ họ. Muẹrohọ epanọ Pọl ukọ na o ro fiẹgba họ ẹme na. Orọ ọsosuọ, ọ ta nọ ekẹ ẹzi na e te vrẹ gbe nnọ ukoko Ileleikristi na o te kpako siọ eware jọ ba. O te ku ẹme na họ nọ: “Whaọ wha jọ eva orọwọ, ẹruore, uyoyou, esa enana: rekọ onọ omae jọ enana ro kọ uyoyou.”—1 Kọr. 13:13.
21 Eware nọ ma fi ẹrọwọ họ i te rugba no, yọ ẹrọwọ o ru iruo riẹ no. Eware nọ ma je rẹro rai kpobi i te rugba no, ẹruore o ti gbe wo iruo ho. Kọ ẹvẹ kpahe uyoyou? U ti re he. O te jọ ribri. Fikinọ ma te rria bẹdẹ bẹdẹ, ma te ruẹ odhesẹvia uyoyou Ọghẹnẹ ribri. Who te bi ru oreva Ọghẹnẹ ẹkwoma edhesẹ uyoyou nọ u re re he, whọ sae te rria bẹdẹ bẹdẹ.—1 Jọn 2:17.
Ẹvẹ Whọ te k’Uyo?
• Fikieme ma jẹ yọroma kẹ uyoyou ọthọthọ?
• Eme uyoyou o rẹ sai fi obọ họ kẹ omai thihakọ riẹ?
• Fikieme ma sae rọ ta nọ uyoyou u re re he?
[Enọ Uwuhrẹ]
[Uwoho nọ o rrọ ẹwẹ-obe avọ 25]
Uyoyou kẹ Ọghẹnẹ o rẹ wọ omai ta usiuwoma
[Uwoho nọ o rrọ ẹwẹ-obe avọ 26]
Uvi uyoyou u fi obọ họ kẹ inievo mai obọ Malawi thihakọ ukpokpoma
[Ẹme nọ a fi ẹgba họ nọ ọ rrọ ẹwẹ-obe avọ 27]
Uzoẹme ẹgbukpe ọrọ 2010 họ: ‘Uyoyou u re thihakọ eware kpobi. Uyoyou u re re he.’—1 Kọr. 13:7, 8.