Asanninneq soraanngisaannartussaq ineriartortiguk
Asanninneq soraanngisaannartussaq ineriartortiguk
‘Asanninneq tamatigut ilalaartarpoq. Asanninneq soraanngisaannassaaq.’ — 1 KORINTHIMIUT 13:7, 8.
1. Asanninneq amerlanertigut qanoq saqqummiunneqartarpa, inuppassuilli qanoq ittuuppat?
ASANNINNEQ sammineqartupilussuusarpoq. Tamanna tupinnarpallaanngilaq, tamattami asanninneq pisariaqartipparput. Ingammilli asanninnilersaarutitut nuannaartorinartutut erinarsuusiarineqartarpoq, atuakkiarineqartarpoq filmiliarineqartarlunilu. Tamakkununngalu tunngasut tuniniakkat ikigisassaanngillat. Ajoraluartumilli Guutimik tullermillu ilumoorlutik asannittut ikittuinnaapput. Avatangiisitsinni takusinnaavarput ullut kingulliit Biibilimi siulittuutigineqarnerattut pisoqartoq. Inuit ‘namminissarsiortuupput, aningaaserituujupput inuulluarniutinillu Guutimit pingaarnerutitsillutik’. — 2 Timotheusi 3:1-5.
2. Kukkusumik asanninneq pillugu Biibilimi qanoq mianersoqqussuteqarpa?
2 Inuit asannissinnaassuseqarput, Biibilimili asanninnermut kukkusumut mianersoqquneqarpugut. Tassani allaaserineqarpoq asanninneq taama ittoq inuup uummataani sorlanikkaangat qanoq pisoqartartoq. (1 Timotheusi 6:9, 10) Demasi pillugu apustili Paulusi qanoruna allattoq? Paulusi suleqatigigaluarlugu silarsuup neqeroorutigisinnaasaanik nuannarinnilerpoq. (2 Timotheusi 4:10) Apustilip Johannesip kristumiut navianartumut tamatumunngarpiaq mianersoqquai. (Atuakkit 1 Johannesi 2:15, 16). Silarsuarmik tamatumanilu neqeroorutigineqarsinnaasunik sivikitsuinnarmik atuuttunik asanniitigaluni Guutimik asannittoqarsinnaanngilaq taassumanngalu pisunik nuannarinnittoqarsinnaanani.
3. Suna uagutsinnut unamminiarnartuua, suullu apeqqutaalerpat?
3 Silarsuarmut matumunnga ilaanngilagut suli silarsuarmiikkaluarluta. Taamaattumik asanninneq pillugu silarsuup killormoortumik isiginnittaaseqarneratut isiginnittaaseqarnaveersaarnissaq uagutsinnut unamminiarnartuuvoq. Pingaaruteqarluinnarpoq asanninnermit killormoortumit, imaluunniit kukkusumit, sunnerneqannginnissarput. Kimut asanninneq, asanninneq najoqqutassianik tunngavilik, ineriartortissavarput? Asanninnermik tamatigut ilalaartumik soraanngisaannartussamillu ineriartortitsinitsinni suut iluaqutigisinnaavavut? Asanninneq tamanna maannakkut siunissamilu qanoq iluaqutigissavarput? Apeqqutinut akissutit Guutimeersut najoqqutarisinnaasavut pisariaqartippavut.
Jehovamik asanninneq ineriartortiguk
4. Guutimik asanninnerput qanoq ineriartortissavarput?
4 Ineriartortitsineq tassaasinnaavoq arlaannik naajartortitsiniarluni naggorissaaneq. Naasorissaasup nunaatini naggorissaraangamiuk naatsiiassanillu siaruarterigaangami naatsorsuutigisarpaa siaruartikkami naanissaat. (Hebræerit 6:7) Taamatulli Guutimik asanninnerput ineriartortittariaqarpoq. Ineriartortinniarlugu qanoq iliortoqartariaqarpa? Uummatitta issorinnersaa, Guutip naalagaaffiata naatsiiassartaanik siaruarteriffigineqarsimasoq, suliarisariaqarparput. Taamaaliussaagut Guuti pillugu ilisimasaqarnerulerluta taassuma oqaasianik eqiasuilluta atuaqqissaartarnikkut. (Kolossemiut 1:10) Aamma ilisimasaqarnerulissaagut ilagiit ataatsimiittarnerannut aalajangersimasumik najuuttarutta peqataasaruttalu. Ilisimasaqarnerunissarput tamatta immikkut ilungersuutigiuarparput? — Ussatit 2:1-7.
5. (a) Jehovap pissusii pingaarnerit pillugit qanoq ililluta ilisimasaqalersinnaavugut? (b) Guutip naapertuilluassusia, ilisimassusia pissaaneralu qanoq oqaatigisinnaavigit?
5 Jehovap oqaatsini aqqutigalugu kinaassutsi paasinarsisippaa. Taamaattumik Biibilimik atuaqqissaarnikkut Jehovalu pillugu ilisimasaqarnerulernikkut taassuma pissusiinik — naapertuilluassusianik, pissaaneranik, ilisimassusianik pingaarnerpaamillu asanninneranik asseqanngitsumik — paasinninnerulersinnaavugut pingaartitsinerulersinnaallutalu. Jehovap aqqutigeqqusai tamarmik naapertuilluartuupput, soorlu inatsisaani naammalluinnartuni naapertuilluarneq ersertoq. (5 Mosesi 32:4; Tussiaat 19:8) Jehovap pinngortitarsua qimerlooraangatsigu ilisimassusersua pillugu mianerinningaalertarpugut. (Tussiaat 104:24) Aamma qilak nunarsuarlu Jehovap nakuussusersuanut pissaaneqangaarneranullu uppernarsaataapput. — Esaja 40:26.
6. Guutip qanoq asannittuliorfigaatigut, tamannalu qanoq killinneqaatigaajuk?
6 Jehovap pissusia malunnarnerpaaq, asanninneq, pillugu qanoq oqartoqarsinnaava? Jehova ima asannitsigaaq asanninnera tamatsinnut sunniuteqarluni. Jehovap asanninneq tamanna pissutigalugu utertitsissut inuit ajortimit toqumillu aniguisinneqaatissaat pilersippaa. (Atuaruk Romamiut 5:8). Inuit tamarmik utertitsissummik tamatuminnga iluaqutiginninnissaminnut periarfissaqarput, Guutilli asanninneranik ilassinnittut taassumalu erneranik upperinnittut kisimik iluaqutigissavaat. (Johannesi 3:16, 36) Guutip Jiisusimik ajortit matoorneqaatissaattut pilliuteqarnera akillugu Guutimik asannilertariaqarpugut.
7, 8. (a) Guutimik asanninneq sunissamut kajumississutigaarput? (b) Guutip innuttai pissutsinik qanoq ittunik atugaqaraluarlutik taassuma inassutaanik maleruaappat?
7 Guutip uagut pilluta iliuuserisarpassuinut akissutitut taassuminnga asanninnerput qanoq ersersissinnaavarput? Tamatuma akissutaa isumassarsiarititaasoq imaappoq: “[Guutimut] asanninneq tassaavoq inassutai maleruaratsigit, inassutaalu artornartuunngillat.” (1 Johannesi 5:3) Aap, Jehovamik Guutimik asanninneq taassuma inatsisaanik maleruaanissamut kajumississutigaarput. Ilaatigut tamanna pissutigalugu taassuma aqqa naalagaaffialu pillugit nalunaajaasarpugut, allat iluaqutigisaannik. Uummatikkut iluunngarluta taamaalioraangatta tamanna Guutip inassutaanik minguitsumik pissutiginiagaqarluta maleruaanitsinnut uppernarsaataasarpoq. — Matthæusi 12:34.
8 Qatanngutivut nunarsuarmi sumi tamaaniittut soqutiginnittoqarnanilu tusaajumanngittoqartaraluartoq pinertusaarlutik Guutip inassutaanik maleruaajuarput. Kiffartornerminnik naammassinninniarlutik ilungersuutitik qasukkartinngilaat. (2 Timotheusi 4:5) Aamma uagut Guuti pillugu ilisimasatsinnik allanik avitseqateqarnissamut taassumalu inassutaanik tamanik maleruaanissamut kajumippugut.
Sooq naalagarput Jiisusi Kristusi asagipput
9. Jiisusip suut ilalaarluni atorpai, aamma sooq pinertusaarsinnaasimava?
9 Guutip erneranik asanninnermik ineriartortitsinissamut pissutissarpassuaqarpugut. Jiisusi takusimanngisaannaraluarlugu ilisarisimanerujartortillugu asanerujartorparput. (1 Petrusi 1:8) Ilaatigut suut Jiisusip ilalaarluni atortariaqarsimavai? Ataatami piumasaatut iliortilluni pissutissaqanngitsumik uumigineqarpoq, malersorneqarpoq, eqqunngitsumik unnerluutigineqarpoq mitaatigineqarlunilu allatullu nikanarsagaalluni. (Atuaruk Johannesi 15:25). Jiisusip Ataatani qilammiusoq asagamiuk misilinneqaatigisamini tamakkunani tamani pinertusaarsinnaanngorpoq, aamma asanninneq kajumississutigalugu utertitsissut amerlasuut utertinneqaatissaat pilersippaa. — Matthæusi 20:28.
10, 11. Jiisusip uagut pilluta iliuuserisai eqqarsaatigalugit suna anguniagarissavarput?
10 Jiisusi uagut pilluta qanoq iliorsimasoq eqqarsaatigigaangatsigu taassumunnga asanninnerulertarpugut iliuuseqarusulertarlutalu. Taassuma ajoqersugaatut taassuma asanninneratut ittumik ineriartortitsillutalu ersersitsisariaqarpugut pinertusaarsinnaaqqulluta Guutillu naalagaaffianik oqaluussissutiginninnissamik ajoqersuganngortitsiortornissamillu peqqussutaanik maleruaajuarsinnaaqqulluta. — Matthæusi 28:19, 20.
11 Kristusip inunnik tamanik asanninnerata naggatissaq nalliutsinnagu suliassatsinnik naammassinninnissatsinnut pinngitsaalivaatigut. (Atuakkit 2 Korinthimiut 5:14, 15). Guutip inunnut siunertaata Kristusimit naammassineqarnissaanut Kristusip asanninnera aalajangiisuuvoq. Jiisusillu maligassiaa malikkutsigu siunertap tamatuma naammassineqarnerani peqataasinnaavugut. Taamaassinnaassagutta Guutimik asanninneq sapinngisaq tamaat ineriartortittariaqarparput. (Matthæusi 22:37) Jiisusip ajoqersuutaanik inassutaanillu maleruaanitsigut ersersissavarput taanna asallutigu qanorluunniillu kinguneqassagaluarpat Jehovap kisimi oqartussaaneranik tapersersuinissarput aalajangiusimallutigu, Jiisusip iliorneratorluinnaq. — Johannesi 14:23, 24; 15:10.
Asanninnerup aqqutaa pitsaanerungaartoq atuaruk
12. Paulusip ‘aqqut pitsaanerungaartoq’ eqqaagamiuk suna pivaa?
12 Apustilip Paulusip Kristusi ilaarpaa, namminerlu Kristusip tumaanik atuaqqissaarami nakimaalluni qatanngutini kajumissaarsinnaavai Jiisusi ilaaqqullugu. (1 Korinthimiut 11:1, NV) Naak kristumiut Korinthimiittut anersaap tunissutaata ukiuni hundredelinni siullerni piusut ilaannik, assersuutigalugu ajorunnaarsitsisinnaanermik oqqanillu oqalussinnaanermik, noqqaassuteqartaqqullugit kajumissaartaraluarlugit ersersippaa pitsaanerusumik anguniagaqartoqarsinnaasoq. Korinthimiunut allakkani siullerni 12:31-mi ima allappoq: “[Aqqutissamik] allanit tamanit pitsaanerungaartumik innersuutissavassi.” Versini tulliuttuni erserpoq tamanna tassaasoq asanninnerup aqqutaa. Pitsaanerungaartuunera qanoq paasisariaqarpa? Paulusip qanoq isumaqarnerluni versini tulliuttuni erseqqissarpaa. (Atuakkit 1 Korinthimiut 13:1, 2). Immikkut ittunik piginnaaneqaraluaruni malunnangaartulioraluaruni asannissuseqanngikkunili taava suussava? Suussanngilaq! Guutip anersaavanit isumassarsisitaalluni ilumoortoq pingaarutilik tamanna nassuiarpaa. Tamatuminngalu nassuiaanera killitsinnangaarami!
13. (a) Ukiumut 2010-mut allassimaffik suua? (b) Asanninneq soraanngisaannassasoq qanoq paasisariaqarpa?
13 Paulusip asanninnerup suunera aamma suunnginnera tulliullugu nassuiarpaa. (Atuakkit 1 Korinthimiut 13:4-8). Maanna qanoq asannittariaqarnerlutit imminut misissornissat piffissaqarfigiuk. Ingammik malugikkit versi 7-ip naggataani versillu 8-p aallaqqaataani allassimasut uku: ‘Asanninneq tamatigut ilalaartarpoq. Asanninneq soraanngisaannassaaq.’ Taanna ukiumut 2010-mut allassimaffiussaaq. Maluginiaruk Paulusi versi 8-mi allattoq anersaap tunissutai, assersuutigalugu pruffiititut oqaluttarnerit oqqanillu oqaluttarnerit, ilagiit kristumiut aallarteqqaarneranni atorneqartut, ‘soraassasut’. Atorunnaassapput. Asanninnerli piujuaannassaaq. Jehova asannilluinnartuuvoq, naassaanngitsuuvorlu. Taamaattumik asanninneq soraanngisaannassaaq. Guutitta naassaanngitsuusup pissusiatut piujuaannassaaq. — 1 Johannesi 4:8.
Asanninneq tamatigut ilalaartarpoq
14, 15. (a) Misilinneqarnerit naammagalugit atornissaannut asanninneq qanoq iluaqutigisinnaavarput? (b) Sooq qatanngut inuusuttoq aalajangiusimasaminik qasukkartitsinngila?
14 Kristumiut annikilliornartunik, unamminiarnartunik ajornartorsiutinillu nalaataqartaraluartik suna pinertusaassutigisinnaavaat? Pingaarnerpaamik asanninneq najoqqutassianik tunngavilik. Tamatumani pigisanik isumakkeerineq pineqaannanngilaq. Aamma toqussagaluaruttaluunniit Kristusi pillugu assuarnaassutsimik aalajangiusimannikkumaneq pineqarpoq. (Lukasi 9:24, 25) Eqqarsaatigikkit Jehovap Nalunaajaasui sorsunnersuup aappaani tamatumalu kingorna parnaarussivinni, tigusanut inissiarsuarni pinngitsaaliissummillu sulisitsivinni naalliutsitaasimasut aalajaassimanerat.
15 Angut inuusuttoq tyskeq Wilhelmimik atilik assersuutissaalluarpoq. Aalajangiusimasaminik qasukkartitsinngilaq, ilumoorfiginnittuarporli allaat nazistit toqutsisittagaannit toqunneqalerami. Ilaquttaminut inuulluaqqusilluni ima allappoq: “Pingaarnerpaamik, Siulersuisutta Jiisusip Kristusip peqqusineratut, Guuti asasariaqarparput. Illersorutsigu akissarsisissavaatigut.” Kingusinnerusukkut qatanngutaasa ilaat Vagttårnet-imi allaaserisami ima allappoq: “Pissutsini allanngorangaartuni Guutimut asanninnerput ilaqutariittut sunit tamanit pingaarnerpaatittuarparput.” Qatanngutivut nalitsinni Armeniami, Eritreami, Koreami kujallermi nunanilu allani parnaarussivinniittut taamatut isiginnittaaseqarput. Jehovamik asanninnertik aalajangiusimajuarpaat.
16. Qatanngutivut Malawimiittut qanoq pineqartarsimappat?
16 Sumiiffippassuarni annikilliuutit allat qatanngutitta uppernerannut pinertusaarnerannullu misilinneqaataasinnaapput. Malawimi Jehovap Nalunaajaasui ukiuni 26-ni naalakkersuisunit inerteqqutigineqarput, akerlilersorneqangaarput amerlaqisunillu naakkittaatsuliorfigineqartarlutik. Pinertusaaramilli akissarsisinneqarput. Malersorneqarneq aallartimmat nunami tamatumani Jehovap Nalunaajaasui 18.000-it missaanniipput. Ukiut 30-t tamatuma kingorna marloriaat sinnerlugu amerlisimapput, tassa 38.393-iulersimallutik. Nunani allani tamatumunnga assingusumik pisoqartarsimavoq.
17. Inoqutigiinni upperisaqaqatigiinngitsuniittut ilaat qanoq misigisaqarsimappat, ajortumillu pineqarnerminni qanoq pinertusaarsinnaasimappat?
17 Artornareeqaaq Guutimut innuttaagatta toqqaannartumik saassunneqartarnerput. Taamatulli artornartigisinnaavoq Jehovap Nalunaajaasui ataasiakkaat ilaquttaminnik akerlilersorneqaraangata. Imaassinnaavoq ilaquttaminnit qaniginerpaasaminnit ukiorpassuarni tatineqartuarsimasut. Jiisusip taamatut pisoqarsinnaanera siulittuutigaa, ilaa? Ilumut, amerlasuullu taama misigisaqarsimapput. (Matthæusi 10:35, 36) Assersuutigalugu inuusuttuaqqat angajoqqaaminnit akerlilersorneqarsimapput. Allaat ilaat allamut nooqquneqarsimapput, tamaanili Jehovap Nalunaajaasuisa angerlarsimaffimminnut tikilluaqqusimavaat. Allallu ilaquttaminnit alarneqarluinnarsimapput. Suna pinertusaarsinnaannguutigisimavaat? Qatanngutigiissuarnik asanninnertik pissutigiinnarnagu, pingaarnerpaamilli Jehovamik taassumalu erneranik asanninnertik pissutigalugu. — 1 Petrusi 1:22; 1 Johannesi 4:21.
18. Asanninneq tamatigut ilalaartartoq kristumiunut aappalinnut qanoq iluaqutaava?
18 Inuunermi allarpassuarnik pisoqartarpoq tamatigut ilalaarluni asannittuliorfiusariaqartunik. Asanninneq pissutigalugu aappariit Jiisusip oqaasiinik ukunannga ataqqinnissapput: “[Guutip] ataqatigiilersitai inuup avissaartissanngilai.” (Matthæusi 19:6) Kristumiut aappallit ‘ajornartorsiuleraangamik’ imminut eqqaasittariaqarput aappariinnerminni Jehova pingaarnerpaajusoq. (1 Korinthimiut 7:28) Taassuma oqaasiani allassimavoq ‘asanninneq tamatigut ilalaartartoq’, aappariillu pissuserineqartussamik tamatuminnga ‘atisisimasut’, aappariinnerat nakussatsinneqartarpoq taamaalillutillu aappariittuarsinnaassallutik. — Kolossemiut 3:14.
19. Pinngortitami ajunaarnersuaqartillugu Guutip innuttai qanoq misigisaqartarpat?
19 Pinngortitami ajunaarnersuaqartillugu asanninneq iluaqutigalugu tamatigut ilalaarsinnaavugut. Tamannalu erserpoq Perup kujasinnerusortaani nuna sajummat USA-llu kujasinnerusortaata ilarujussuani anorersuaq Katrina pitoraammat. Qatanngutitta ilarpassuisa angerlarsimaffitik pigisatilluunniit annaavaat. Asanninnerli kajumississutigalugu silarsuaq tamakkerlugu qatanngutigiissuit ikiuiniartussanik isumaginnipput, namminnerlu kajumissutsiminnik ikiuiartortut illut naalagaaffilersaarfiillu sanaqqippaat. Tamakkua ersersippaat qatanngutivut asaqatigiittut pissutsillu qanoq ikkaluaraangataluunniit tamatigut isumassoqatigiittartut. — Johannesi 13:34, 35; 1 Petrusi 2:17.
Asanninneq soraanngisaannassaaq
20, 21. (a) Sooq asanninneq sunik tamanik akimuiva? (b) Sooq asanninnerup aqqutaa atuarniarlugu aalajangiusimaviuk?
20 Ullumikkut Jehovap innuttaani erseqqippoq asanninnerup aqqutaanik allanit tamanit pitsaanerungaartumik atuaanerup silatusaarnerunera. Aqqut tamanna sumilluunniit — pissutsit qanorluunniit ikkaluarpata — nallerneqarsinnaanngilaq. Maluginiaruk apustilip Paulusip tamanna qanoq erseqqissaraa. Anersaap tunissutaasa atorunnaarumaarnerat, ilagiillu kristumiut anersaakkut meeraajunnaarumaarnerat inersimalluartuulerumaarnerallu eqqaariarlugit, ima isummerpoq: “Tassa atajuassapput upperneq, neriunneq asanninnerlu — taakku pingasut. Asanninnerli taakkua pingaarnersaraat.” — 1 Korinthimiut 13:13.
21 Naggataatigut uppernermut tunngasut tamarmik piviusunngussapput, taamaattumillu tamakkuninnga upperinninnissaq pisariaarutissaaq. Neriorsuutit qilanaarisatta piviusunngornerinik takunninnissamik neriuut aamma pisariaarutissaaq suut tamarmik nutaanngorpata. Asanninnermi? Soraanngisaannassaaq. Piujuaannassaaq. Naassaanngitsumik inuunissamik neriuuteqaratta Guutip asannissusianut tunngasut suli amerlanerusut takujumaarlugillu paasiumaarpavut. Guutip piumasaatut ilioruit asanninnerullu — asanninnerup soraanngisaannartussap — aqqutaa allanit tamanit pitsaanerungaartoq atuarukku naassaanngitsumik inuusinnaavutit. — 1 Johannesi 2:17. (w09 12/15-E)
Qanoq akissavit?
• Sooq kukkusumik asanninneq mianersorfigisariaqarparput?
• Asanninneq pissutigalugu suut ilalaarluta atorsinnaavavut?
• Asanninneq soraanngisaannassasoq qanoq paasisariaqarpa?
[Atuaqqissaarnermi apeqqutit]
[Qupp. 27-mi issuagaq]
Ukiumut 2010-mut allassimaffik unaassaaq: ‘Asanninneq tamatigut ilalaartarpoq. Asanninneq soraanngisaannassaaq.’ — 1 Korinthimiut 13:7, 8.
[Qupp. 25-mi assiliartaq]
Guutimik asanninneq oqaluussinissamut kajumississutigaarput
[Qupp. 26-mi assiliartaq]
Malawimi qatanngutivut asanninneq soraanngisaannartussaq pissutigalugu misilinneqarnerni pinertusaarsinnaasimapput