Hmangaihna Reh Ngai Lo Chu Nei Rawh U
Hmangaihna Reh Ngai Lo Chu Nei Rawh U
‘Hmangaihna chuan engkim a tuar chhuak ṭhîn. Hmangaihna hi engtikah mah a reh lo vang.’ —1 KOR. 13:7, 8.
1. (a) Engtin nge hmangaihna chu târ lan ṭhin a nih? (b) Mi tam takin an hmangaihna chu tu chungah leh eng chungah nge an nghah ṭhin?
HMANGAIHNA chungchâng hi nasa taka tlângzarh a ni a. Hla thu-ahte chuan a nihna aia nasa zâwka fak mawi a ni ṭhîn. Hmangaihna chu mihringte mamawh bul ber mah ni se, lehkhabu leh film-ahte chuan hmangaihna thawnthu phuahchawp mai maite chu tihchhuah a ni a, lei tûr lah a tam hle bawk. Chuti chung pawhin, Pathian leh ṭhenawmte hmangaihna dik tak chu lungchhiatthlâk khawpin a vâng hle bawk si. Bible-in hêng ni hnuhnûng hun chhûnga thilthleng tûr a sawi lâwkte chu kan hmu a ni. Mite chu “mahni inhmangaihtu te, tangka ngainatu te, . . . Pathian hmangaih aia mahni lâwmna mai hmangaih zâwktu te,” an ni.—2 Tim. 3:1-5.
2. Thil ṭha lo hmangaihna chungchângah Bible-in eng vaukhânna nge min pêk?
2 Mihringte chuan hmangaihna lantîr theihna an nei a; mahse, Pathian Thu chuan thil ṭha lo hmangaihna lakah min vaukhân a ni. Tin, Bible chuan chutiang hmangaihnain thinlunga zung a kaih huna thil thleng thei chu a târ lang bawk. (1 Tim. 6:9, 10) Tirhkoh Paula’n Dema chungchâng a sawi chu i hre chhuak em? Dema chu Paula nêna inkâwm ṭhîn ni mah se, a hnuah chuan khawvêlin a pêk theih thilte chu a ngaina, a nih loh leh a hmangaih ṭan a ni. (2 Tim. 4:10) Tirhkoh Johana chuan Kristiante chu he thil hlauhawm tak lakah hian a vaukhân a. (1 Johana 2:15, 16 chhiar rawh.) Khawvêl leh rei lo te daih a chhûnga thil leh a kawngte hmangaihna chu Pathian leh a hnên aṭanga chhuak hmangaihna nên a inrem lo.
3. Eng harsatna nge kan hmachhawn a, eng zawhnate nge chhuak?
3 He khawvêlah hian awm mah ila, khawvêla mi kan ni lo. Chuvâng chuan, hmangaihna chungchânga khawvêl thlîr dân veiherh tak pumpelh chu a harsa a ni. Thil ṭha lo hmangaihna emaw, hmangaihna veiherh emaw thanga kan awh loh chu a pawimawh hle. Chuti chu, tu chungah nge hmangaihna dik tak chu kan lantîr ang? Engkim tuar chhuak thei, hmangaihna reh ngai lo chu eng thilte’n nge min neihtîr? Engtin nge chu chu tûnah leh nakinah kan hlâwkpui ang? A chhânna chu Pathian thlîr dân aṭanga kan hmuh a ngai a, chutiang a nih chuan dik taka kaihhruaiin kan awm thei dâwn a ni.
Pathian Hmangaihna Nei Rawh
4. Engtin nge Pathian kan hmangaihna chu a ṭhan chhoh theih?
4 Pathian hmangaihna nei tûra beihna chu lei buatsaih a, thlai chi theh a, a thlai chi ṭhang chho tûra enkawltu, lo neitu thawk rim tak nên tehkhin theih a ni a. (Heb. 6:7) Chutiang bawkin, Pathian kan hmangaihna pawh a ṭhang chho tûr a ni. Chutiang ni tûr chuan eng nge ṭûl? Lalram thutak chi tuh a nihna kan thinlung lei ṭha chu kan enkawl a ngai a. Chu chu Pathian chungchâng kan hriatna tipung tûra Bible taima taka zirna hmangin kan ti thei a ni. (Kol. 1:10-12) Kohhran inkhâwmnaa telh ziah leh chhânna pêkna pawhin kan hriatna tipung tûrin min ṭanpui bawk ang. Hriatna thûk lehzual nei tûrin a mi malin ṭan kan la reng em?—Thuf. 2:1-7.
5. (a) Engtin nge Pathian Jehova miziate chu kan hriat theih? (b) Pathian rorêl dikna te, finna te, leh thiltihtheihna te chungchângah eng nge i sawi theih?
5 Pathian Jehova chuan A Thu-ah a mizia a târ lang a. Pathian Lehkha Thu zirna leh Pathian Jehova hriatna neih tam telh telhna chuan, a mizia—a rorêl dikna te, a thiltihtheihna te, a finna te, leh chûng zînga a chungnung ber a hmangaihna te kan hlutna a tipung thei a ni. Pathian Jehova chuan a rorêl dikna chu a kawng zawng zawngah leh a dân ṭha famkimah chuan a lantîr a. (Deut. 32:4; Sâm 19:7) Pathian Jehova thil siam zawng zawngte chu kan ngaihtuah theiin, a finna ṭha chungchuangte chu mak kan ti hle thei a ni. (Sâm 104:24) Lei leh vân pawh hian Pathian Jehova chu chakna leh thiltihtheihna Hnâr a nihzia a finfiah bawk.—Is. 40:26.
6. Engtin nge Pathian min hmangaihna chu târ lan a nih a, engtin nge chu chuan a nghawng che?
6 Pathian mize langsâr ber, hmangaihna chungchângah eng nge sawi theih awm? Chu chuan awmze thûk tak a nei a, kan zaa chungah nghawng a nei a ni. Ani chuan chu hmangaihna chu mihringte tâna tlanna pein a lantîr a. (Rom 5:8 chhiar rawh.) Chu chu khawvêla mi zawng zawngte tân neih theih a ni a; mahse, Pathian hmangaihna chhâng lêt a, a Fapa chunga rinna lantîrtute chauhvin an hlâwkpui ang. (Joh. 3:16, 36) Pathianin kan sualte thupha chawina inthawina atâna Isua min pêkna chuan Amah hmangaih lêt ve tûrin min chêttîr tûr a ni.
7, 8. (a) Pathian kan hmangaihna târ lang tûrin eng nge kan tih ngai? (b) Eng hmachhawn chungin nge Pathian mite chuan a thupêkte an zawm?
7 Pathianin kan tâna a tih tawh zawng zawngte chhâng lêtin, amah kan hmangaihna chu engtin nge kan lantîr theih? Thlarauva thâwk khum thu chuan kan lantîr theih dân chu a târ lang a ni: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin. (1 Joh. 5:3) Ni e, Pathian Jehova hmangaihna chuan a thupêkte zâwm tûrin min chêttîr a ni. Chu chu mi dangte hlâwkna thlentu, a hming leh Lalram chanchin kan hriattîr chhan pakhat pawh a ni a. Kan thinlunga a khah liam avânga chutianga kan tihna chu rilru dik tak pua Pathian thupêk kan zawmzia târ langtu a ni.—Mt. 12:34.
8 Khawvêl puma kan unaute chuan Lalram thuchah ngaihsak lohna leh hnâwlna tâwk chung pawhin Pathian thupêkte chu an zâwm ṭâng ṭâng a. An rawngbâwlna hlen chhuak tûra an thawh rimna chu an bânsan lo. (2 Tim. 4:5) Chutiang bawkin, Pathian hriatna mi dangte hnêna hrilh tûr leh a thupêk dang zawng zawngte zâwm tûra chêttîrin kan awm a ni.
Kan Lalpa Isua Krista Kan Hmangaih Chhan
9. Krista’n eng nge a tawrh chhuah a, engin nge tawrh chhuahtîr?
9 Pathian kan hmangaihna bâkah, a Fapa pawh hmangaihna tûr chhan tam tak kan nei a. Isua chu hmu ngai lo mah ila, a chanchin kan zir tam poh leh, amah kan hmangaihna a thûk zual a ni. (1 Pet. 1:8) Isua thil tawrh ṭhenkhat chu engte nge ni? A Pa duhzâwng a tih lai khân, Isua chuan enga khawlawi lova huat a hlawh a, tihduhdahna te, dik lo taka puhna te, leh hauna te a tuar a. Tin, tihnawmnahna dangte pawh a tuar ve bawk. (Johana 15:25 chhiar rawh.) Vâna a Pa a hmangaihna chuan Isua chu chûng fiahnate chu a tawrh chhuahtîr a. Tin, hmangaihna avânga inthawina atâna a thihna chuan mi tam takte tân tlanna a pe a ni.—Mt. 20:28.
10, 11. Kan tâna Krista thiltih chu ngaihtuahin, eng nge tih kan tum tlat ang?
10 Isua nun kawng chuan amah hmangaih lêt tûrin min chêttîr a. Krista’n kan tâna thil a tih tawhte kan ngaihtuah hian, amah kan hmangaihna chu a zual tial tial a ni. A hnung zuitute kan nih angin, Lalram chanchin hril tûr leh zirtîra siam tûra a thupêk kan zawmnaa kan chhel nân, Krista neih ang hmangaihna chu neih kan tumin, lantîr kan tum reng tûr a ni.—Mt. 28:19, 20.
11 Mi zawng zawng chunga Krista lantîr hmangaihna chuan tâwpna lo thlen hmaa kan rawngbâwlna hlen chhuak tûrin min tîr lui a ni. (2 Korinth 5:14, 15 chhiar rawh.) Krista’n a lantîr hmangaihna chu mihringte tâna Pathian thiltum a hlen chhuahna kawnga thil pawimawh ber a ni a. Tin, kan zui tlat atâna Isua min hnutchhiah a entawn tûr siam zuina chuan chu Pathian thiltumah chuan chanvo min neihtîr ṭheuh thei a ni. Chutianga chanvo nei tûr chuan Pathian hmangaihna nei chho tûra kan dinhmun azira theih tâwp kan chhuah a ngai a ni. (Mt. 22:37) Isua zirtîrna zawmna leh a thupêkte zuina hmangin, amah kan hmangaihzia kan lantîr a, eng dinhmun hnuaiah pawh amah ang chiaha Pathian lalchungnunna chawisân tlat chu kan tum bawk a ni.—Joh. 14:23, 24; 15:10.
Hmangaihna Kawng Ṭha Lehzual Chu Umin
12. Paula’n “kawng ṭha lehzual” a tih khân eng a sawina nge?
12 Tirhkoh Paula chu Krista entawntu a ni a. Ani chuan Krista hniak hnung a zui tlat avângin, a unaute chu amah zirtu ni tûrin huai takin a fuih thei a ni. (1 Kor. 11:1) Korinth khuaa Kristiante hnênah chuan kum zabi khatnaa lantîr thlarau thilpêk ṭhenkhat, tihdamna leh ṭawng hriat loh ang chite chu ṭhahnemngai taka zawng tûrin fuih mah se, thil ṭha lehzual engemaw ûm tûr a awm tih a hmuhtîr a ni. 1 Korinth 12:31-ah ani chuan: “Kawng ṭha lehzual ka entîr dâwn a che u,” tiin a hrilhfiah a. Chu chu hmangaihna kawng ṭha lehzual a nihzia a dawta Bible chângte chuan a târ lang a ni. Eng kawngin nge chu chu kawng ṭha lehzual a nih? Paula chuan a thil sawi awmzia tak chu a hrilhfiah zui a. (1 Korinth 13:1-3 chhiar rawh.) Ani chuan theihna chungchuang engemaw neiin, thil ropui tak tak pawh hlen chhuak mah se, hmangaihna a neih si lo chuan eng nge a ṭangkaina awm ang? A awm lo hulhual ang! Pathian thlarau chêttîra awmin, ani chuan he thu pawimawh tak hi a hrilhfiah a ni. Chu chu kan hriat thiam nâna hrilhfiahna chiang tak a va ni êm!
13. (a) Kum 2010 atâna kum châng chu eng nge ni? (b) Eng kawngin nge hmangaihna chu a reh ngai dâwn loh?
13 A dawtah Paula chuan hmangaihna chu eng nge a nih a, eng nge a nih loh tih chu a sawifiah a. (1 Korinth 13:4-8 chhiar rawh.) Tûnah chuan, chu hmangaihna i nunpui chin chu ngun takin ngaihtuah ang che. Châng 7-na tâwp ber leh châng 8-na bul bera thu awm: ‘Hmangaihna chuan engkim a tuar chhuak ṭhîn. Hmangaihna hi engtikah mah a reh lo vang,’ tihte hi han ngaihtuah bîk teh, chu chu kum 2010 atâna kan kum châng tûr a ni bawk. Châng 8-naah Paula chuan Kristian kohhran din tirha hman, thu hrilhnate leh ṭawng hriat lohte pawh tiamin thlarau thilpêkte chu tihbân a nih tûr thu a sawi hi lo chhinchhiah teh. Tihbânin a awm ta ngei a. Mahse, hmangaihna chu engtikah mah a reh lo vang. Pathian Jehova chu hmangaihna nihna dik tak a ni a, chatuan mi a ni bawk. Chuvâng chuan hmangaihna chu a reh emaw, a tâwp emaw ngai lo vang. Hmangaihna chu chatuana awm kan Pathian mizia a nih tlat avângin chatuanin a awm chhun zawm reng ang.—1 Joh. 4:8.
Hmangaihna chuan engkim a tuar chhuak
14, 15. (a) Engtin nge hmangaihna chuan fiahna tuar chhuak tûra min ṭanpui theih? (b) Engvângin nge unaupa tlangvâl pakhat chuan a rinna a phatsan duh loh?
14 Fiahna te, harsatna te, leh buaina an tawhte chu a enga pawh ni se, engin nge Kristiante chu tawrh chhuahtîr? A tawrh chhuahtîrtu ber chu thu bula innghat hmangaihna hi a ni. Chutiang hmangaihnaah chuan kan thil neihte pêk mai piah lam a tel a. Kan rinawmna vawn leh Krista avânga kan nunna pawh chân inhuamna thlengin a tel a ni. (Lk. 9:24, 25) Chu chu Indopui II-na hun lai leh a hnua concentration camp leh tihluihnaa hna thawhtîrna hmun, labor camp-a hrehawm tuar Thuhretute rinawmna chuan a târ lang a ni.
15 Thuhretu German tlangvâl Wilhelm-a chuan chu chu a entîr ṭha hle a. Ani chuan thi tûra thiam loh chantîrte kâphlumtu Nazi sipai pâwl (Nazi firing squad) kuta thihna a hmachhawn pawh khân, a rinna phatsan ai chuan rinawmna a vawng tlat zâwk a ni. A chhûngte thlah nâna a lehkha thawnah: “Kan Hruaitu Isua Krista Thupêk angin, eng dang zawng ai pawhin Pathian kan hmangaih tûr a ni. Ama tâna kan din ngheh chuan, lâwmman min pe ang,” tiin a ziak a. A hnuah a chhûngte zînga pakhat chuan, Vênnainsâng thuziakah: “Lungngaihna kan tawn chhûng zawng chuan, a chhûngkuain Pathian kan hmangaihna chu kan dah pawimawh hmasa ber a ni,” tiin a ziak a ni. Chu chu Armenia te, Eritrea te, South Korea te leh ram danga lungin tâng mêk kan unau tam takte rilru put hmang a ni a. Chûng unaute chu Pathian Jehova an hmangaihnaah an ding nghet a ni.
16. Malawi rama kan unaute’n eng nge a tawrh chhuah?
16 Hmun tam takah chuan, kan unaute chuan an rinna leh chhelna fiahna chi hrang hrang an tâwk a. Kum 26 chhûng chu Malawi rama Jehova Thuhretute chuan sawrkâr lama khapna te, nasa taka dodâlna te, leh râwng taka sawisakna tam tak an tuar a. An chhelna chu malsâwmin a awm a ni. Tihduhdahna a inṭan lai chuan chu ramah chuan Thuhretu 18,000 vêl an awm a. Kum sawm thum hnuah chuan mi 38,393 niin, a lêt hnih aia tamin an pung a ni. Chutiang bawk chu ram dangah pawh a thleng a ni.
17. Sakhaw thuhmun vuan lo chhûngkaw ṭhenkhat chuan eng nge an hmachhawn a, engvângin nge ṭha lo taka cheibâwlna chu an tawrh chhuah theih?
17 Pathian mite chunga hmaichhana beihna chu tawrh harsa tak a ni a. Chhûngkua aṭanga dodâlna tawh hi tawrh a harsa lehzual ṭhîn. Chhûngkaw zînga mi emaw, chhûngkhat hnai emaw te chuan lungngaihna an thlen thei a ni. Isua’n chûng thilte chu a thleng ang tih a sawi lâwk a ni lâwm ni? Sawi lâwk e, a thusawi dikzia chu mi tam takin a takin an tawng a ni. (Mt. 10:35, 36) Tleirâwlte chuan ring lotu an nu leh pate hnên aṭangin dodâlna an tâwk a. Ṭhenkhat phei chu in aṭanga hnawhchhuah an ni a; mahse, Thuhretu ngilnei takte’n an inah an la lût a ni. Mi dangte chu tuithlâr an ni bawk. Chûng mite chuan engtin nge ṭha lo taka cheibâwlna chu an tawrh chhuah theih? Unaute hmangaihna an neih bâkah, thil dang zawng aia Pathian Jehova leh a Fapa hmangaihna tak tak an neih vâng a ni.—1 Pet. 1:22; 1 Joh. 4:21.
18. Engtin nge engkim tuar chhuak ṭhîn hmangaihna chuan Kristian nupate chu a ṭanpui?
18 Nunah hian engkim tuar chhuak thei hmangaihna neih a ṭûlna din hmun tam tak a awm a. Inneihnaah chuan, hmangaihna chuan nupate chu Isua thu: “Pathianin a zawm tawh chu mihringin ṭhen suh se,” tih chu zah tûrin a ṭanpui a ni. (Mt. 19:6) Kristian nupate chuan ‘tisaa hrehawm an tawrh’ hunah, Pathian Jehova chu an inneihnaa mi pawimawh ber a ni tih an inhriat nawntîr tûr a ni. (1 Kor. 7:28) ‘Hmangaihna chuan engkim a tuar chhuak ṭhîn,’ tiin Pathian Thu chuan a sawi a; chu mize inbel nupate chu inpumkhat tlat tûr leh an inneihna vawng tlat tûra thuam ngheh an ni.—Kol. 3:14.
19. Leilung chhiatna a thlenin Pathian mite zîngah eng nge hmuh theih a nih?
19 Hmangaihna chuan leilung chhiatna a thlen hunah pawh engkim tuar chhuak tûrin min ṭanpui a. Chu chu Peru ram chhim lama lîr a nghîn ṭum leh Hurricane Katrina thlipuiin United States chhim chhak lam tuipui kam vêl a nuai ṭum khân a thleng a ni. Kan unau tam takte chuan chûng chhiatnaah chuan an in leh lote, leh an thil neihte chu an chân a. Hmangaihna chuan khawvêl pum huap kohhran chu chhawmdâwlna thil pe tûr te, in sa ṭha tûr te, leh Kingdom Hall thawm ṭha tûr tea inpe tûrin a chêttîr bawk a ni. Chûng thiltihte chuan kan unaute chu engtik lai pawhin eng ang dinhmun hnuaiah pawh an inhmangaih a, an ingnaihsak tawnzia a târ lang a ni.—Joh. 13:34, 35; 1 Pet. 2:17.
Hmangaihna Hi Engtikah Mah A Reh Lo Vang
20, 21. (a) Engvângin nge hmangaihna chu a ropui bîk? (b) Engvângin nge hmangaihna kawng ûm tlat chu i tum?
20 Tûn laia Pathian Jehova mite zîngah, hmangaihna kawng ṭha lehzual ûm a finthlâkzia finfiahna kan hmu a. Chu chu kawng engkimah leh dinhmun eng ang hnuaiah pawh a ṭha lawr lak a ni. Chu mi dikzia tirhkoh Paula sawi chu lo chhinchhiah teh. A hmasain, thlarau thilpêkte tihbânin a awm ang a, Kristian kohhran chu din tirh a nihna dinhmun aṭanga ṭhang chhovin, a puitling dâwn tih a sawi a. Chu mi hnuah chuan: “Chutichuan hêng pathum, rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni,” tiin a tlip a ni.—1 Kor. 13:13.
21 Nakinah chuan, rinna kan nghahna thilte chu a takah a lo chang ang a, chûng thiltea kan rinna chu a tâwp tawh ang. Engkim siam thar a nih hunah chuan, a thlen famkimna hmuh kan châk thutiamte beiseina pawh kan nei tawh lo vang. A nih leh, hmangaihna hi engtin nge ni ve ta ang le? Engtikah mah a rehin, a tâwp lo vang a, a awm reng zâwk ang. Chatuan nunna chu thlîr chungin, Pathian hmangaihna hmêl hmang chu chiang lehzualin kan hmu ang a, kan hre thiam lehzual dâwn a ni. Hmangaihna kawng ṭha lehzual reh ngai lo tûr chu ûma Pathian duhzâwng tiin, kumkhuain i nung reng thei a ni.—1 Joh. 2:17. (w09-E 12/15)
Engtin Nge Kan Chhân Ang?
• Engvângin nge thil ṭha lo hmangaihna laka kan invên ang?
• Hmangaihna chuan eng nge min tawrh chhuahtîr theih?
• Eng kawngin nge hmangaihna chu a reh ngai loh?
[Zirlai Atâna Zawhnate]
[Phêk 29-naa thu lâk chhuah]
Kum 2010 kum châng chu hei hi a ni: ‘Hmangaihna chuan engkim a tuar chhuak ṭhîn. Hmangaihna hi engtikah mah a reh lo vang.’ —1 Kor. 13:7, 8.
[Phêk 27-naa milem]
Pathian hmangaihna chuan thu hril tûrin min chêttîr
[Phêk 28-naa milem]
Hmangaihna reh ngai lo chuan Malawi rama kan unaute chu fiahna tuar chhuak tûrin a ṭanpui