Kadreklok Yokwe eo Ejamin Joko
Kadreklok Yokwe eo Ejamin Joko
‘Yokwe ej kijenmij ilo men otemjej. Yokwe e jamin joko.’—1 KOR. 13:7, 8.
1. (a) Ewi wãwen ekkã air kwalok kin yokwe? (b) Wõn eo elap an armij ro yokwe, im ta men ko rej yokwi?
ELÕÑ wãwen ko kar kwalok kin karkar in yokwe. Karkar in rar kemejajaiki im kine ilo al ko. Yokwe ej juõn men armij ro rej aikwiji. Bõtab ekkã an buk im pija ko kwalok kin men in ilo bwebwenato ko rejjab mol kin yokwe eo ikõtan leo im lio, im elukkun obrõk mõn wia ko kin men kein. Meñe eindrein, ekaburomõjmõj bwe yokwe eo emol ñõn Anij im armij ro edriklok. Jej lo an walok men ko Baibel ear kanan kaki kin ran ko eliktata. Armij ro rej ‘anij lo burueir, dri arõk mweiuk, im yokwe men in kabuñburueir elap jen air yokwe Anij.’—2 Tim. 3:1-5.
2. Ta nan in kakkil eo Baibel ej letok kin yokwe eo ej ankiliriõp?
2 Eor iben armij ro maroñ eo ñõn kwalok yokwe, bõtab Nan in Anij ej kakkil kij nae yokwe eo ej ankiliriõp. Im Baibel eo ej kwalok kin ta eo ej walok ñe kain yokwe rõt in ej edrek ilo buruen juõn armij. (1 Tim. 6:9, 10) Kwoj kememej ke ta eo dri jilik Paul ear je kin Dimas? Meñe Dimas ear ber iben Paul, ear oktõk im yokwe menin kareelel ko an lõl. (2 Tim. 4:10) Dri jilik Jon ear kakkil dri Kristian ro nae men in ekanuij kauwatata. (Riit 1 Jon 2:15, 16.) Yokwe lõl im men ko an me rej an jidrik wõt ien rejjab juõn wõt iben yokwe Anij im men ko an Anij.
3. Ta aituerõk eo jej jelmaiki, im men in ej bõkmantak ta kajitõk ko?
3 Jejjab mõtõn lõl in meñe jej mour ie. Kin men in, jej jelmae aituerõk eo ñõn bõprae lemnok eo eankeke an lõl in kin yokwe. Ej aurõk bwe jen jab kõtlok ar lorõk ilo yokwe eo ej ankiliriõp ak etao. Inem, wõn eo jej aikwij kadrek im kwalok yokwe eo emol ñõn e? Ta men ko kar litok ñõn jibõñ kij kadreklok yokwe eo me ej kijenmij ilo men otemjej im ejamin joko? Ewi wãwen men in ej or tokjen ñõn kij kiõ im jelet ilju im jeklaj eo ar? Jej aikwiji uak ko me rej berber ion lemnok eo an Anij me emaroñ tel kij.
Kadreklok Yokwe eo Am ñõn Jeova
4. Ewi wãwen yokwe eo ar ñõn Anij ej edrek?
4 Kadrek emaroñ melelen kapoj im lale wãwen an juõn men edrek. Lemnok kin juõn dri kallip me ej kate ñõn kapoj brij eo im kalibwin ine ko. Ej kõtõmene bwe ine ko renaj edrek. (Hib. 6:7) Ilo ejja wãwen in lok wõt, yokwe eo ar ñõn Anij ej aikwij edrek. Ta eo jej aikwij kõmõne bwe men in en walok? Jej aikwij kate kij ñõn kakõmõnmõn buruer, ijo me kar jeor ine in mol eo kin Ailiñ eo ie. Jemaroñ kõmõne men in ikijen ar niknik ilo ar katak Nan in Anij bwe en laplok jelalokjen eo ar kin e. (Kol. 1:10) Ar keini in ber im bõk kwonad ilo kwelok ko an congregation eo enaj bareinwõt jibõñ kij ñõn kalaplok jelalokjen eo ar. Kij kajjojo, jej ke kate kij joñõn wõt ar maroñ ñõn kamulõllok jelalokjen eo ar?—Ken. 2:1-7.
5. (a) Ewi wãwen jemaroñ katak kin karkar ko relap karkarin Jeova? (b) Ta eo kwomaroñ ba kin ekajet jime, meletlet, im kajur eo an Anij?
5 Jeova ej kwalok karkar ko karkarin ikijen Nan eo an. Ilo ar katak Nan ko an im wõnmanlok im bõk jelalokjen eo kin Jeova, jemaroñ kalaplok ar kamolol kin karkar ko karkarin einwõt ekajet jime, kajur, meletlet, im ilõñin men otemjej, yokwe eo an elap. Jeova ej kwalok ekajet jime ilo aolep kõmõn ko an im ilo kien ko an rewãppen. (Dut. 32:4; Sam 19:7) Jemaroñ kalomõnlokjen kin aolep menin kõmõnmõn ko an Jeova im bwilõñ kin joñõn lap in meletlet eo an. (Sam 104:24) Men ko otemjej ilõñ im ilõl rej kamol bwe Jeova ej unjen kajur eo elap im ejelok joñõn.—Ais. 40:26.
6. Ewi wãwen Anij ear kwalok an yokwe kij, im ewi wãwen men in ear jelet yuk?
6 Ta eo jemaroñ ba kin yokwe, karkar eo elaptata karkarin Anij? Ejelok joñõn im ej jelet kij aolep. Ear kwalok yokwe in ilo an kar letok binmour eo ñõn lomoren armij otemjej. (Riit Dri Rom 5:8.) Menin letok in ej bellok ñõn armij otemjej, bõtab ro wõt me rej emakõt ñõn yokwe eo an Anij im kwalok air tõmak ilo Nejin renaj bõk tokjen jene. (Jon 3:16, 36) An kar Anij katok kin nejin einwõt juõn kein mirik kin jerawiwi ko ar en kar kamakõt kij ñõn yokwe e.
7, 8. (a) Ta eo jej aikwij kõmõne ñõn kwalok bwe jej yokwe Anij? (b) Armij ro an Anij rej bokake wõt kien ko an meñe rej iion ta?
7 Ewi wãwen jemaroñ kwalok ar yokwe Anij im kamolol e kin aolep men ko ear kõmõni ñõn kij? Uak eo jen Nan in Anij ej aurõk: “Bwe eñin yokwe Anij, bwe jen kejbãrok kien ko An: im kien ko An re jab erro.” (1 Jon 5:3) Aet, yokwe eo ar ñõn Jeova Anij ej kamakõt kij ñõn bokake kien ko an. Eñin unin jej kwalok kin etan im Ailiñ eo an, eo me eor tokjen ñõn armij ro. Ar kõmõne men in kin aolepen buruer ej kamol bwe jej bokake kien ko an Anij kin juõn un ejime.—Mat. 12:34.
8 Ro jeer im jãter ibelakin lõl rej wõnmanlok wõt im bokake kien ko an Anij meñe rej iion armij ro rejjab itoklimo in roñjake im rej kejekron ennan eo kin Ailiñ eo. Rejjab ebwer jen jibarbar ko air ñõn kajejit jerbal in kwalok nan eo air. (2 Tim. 4:5) Ejja eindreinlok wõt, jej emakõt ñõn kwalok kin jelalokjen eo kin Anij ñõn ro jet, bareinwõt bokake aolep kien ko jet an.
Unin Jej Yokwe Ar Iroij Jisõs Kraist
9. Ta men ko Kraist ear kijenmij kaki, im ta eo ear kamakõt e?
9 Kobalok iben ar yokwe Anij, elõñ un ko unin jej aikwij kadrek yokwe eo ar ñõn Nejin. Elañe jej kalaplok ar katak kin Jisõs, enaj laplok ar yokwe e meñe jejañin kar lo e. (1 Pit. 1:8) Ta jet ian men ko Jisõs ear kijenmij kaki? Ke Jisõs ear kõmõnmõn ankilan Jemen, rar kijirãt e kin ejelok unin, matõrtõr e, naruõn ilo jab jime, im kejekron e. Ear bareinwõt ear iñtan kin men ko jet renana rar kõmõni ñõn e. (Riit Jon 15:25.) Yokwe eo an Jisõs ñõn Jemen ilõñ ear kamakõt e bwe en kijenmij iomin melejoñ kein. Im ikijen yokwe, ear lelok an mour einwõt juõn menin katok bwe en binmour kin ro relõñ.—Mat. 20:28.
10, 11. Ñe jej lemnok kin men eo Jisõs ear kõmõne ñõn kij, ta eo jen kar kate kij ñõn kõmõne?
10 Wãwen mour eo an Jisõs ej lujur kij ñõn emakõt. Ar lemnok kin men eo Jisõs ear kõmõne ñõn kij, men in ej kamulõllok yokwe eo ar ñõn e. Einwõt dri kalor ro an, jej aikwij kate kij ñõn kadreklok im kwalok wõt ejja yokwe eo Kraist ear kwaloke bwe jen maroñ kijenmij ilo ar bokake kien eo an ñõn kwalok kin Ailiñ eo im kõmõn dri kalor ro.—Mat. 28:19, 20.
11 Ilo ar emakõt ñõn yokwe eo an Kraist ñõn aolep armij, men in ej kamakõt kij ñõn kamwijlok jerbal eo ar mokta jen an itok jemlokõn. (Riit 2 Dri Korint 5:14, 15.) Yokwe eo Jisõs ear kwalok ear men eo eaurõktata ilo an kar kajejit karõk eo an Anij ñõn armij ro. Im joñok eo an Kraist ear likit bwe jen anõke ej kamaroñ kij kajjojo ñõn bõk kwonad ilo karõk eo an Anij. Men in ej kitibuj ar kate kij joñõn wõt ar maroñ ñõn kadreklok yokwe eo ar ñõn Anij. (Mat. 22:37) Ilo ar lor katak ko an Jisõs im bokake kien ko an, jej kwalok bwe jej yokwe e im jej kõnan rejetake iroij potata eo an Anij jekron ta abañ ko jej jelmaiki einwõt kar Jisõs.—Jon 14:23, 24; 15:10.
Jibarek Ial eo Emõnlok kin Yokwe
12. Ta melelen nan ko an Paul ke ear ba “ial eo emõnlok”?
12 Dri jilik Paul ear kajeoñwe Kraist. Kinke ear lukkun lor buñten neen Jisõs, Paul ear jab ãliklik in rejañ ro jein im jãtin ñõn kajeoñwe e. (1 Kor. 11:1) Meñe Paul ear rejañ dri Kristian ro ilo Korint ñõn kijejeto wõt ilo air jibarek menin letok ko an jitõb me rekin kõmõni ilo ebeben eo ken kajuõn, einwõt kemour armij im konono kin lo ko, ear kwalok ñõn ir bwe eor juõn men emõnlok rar aikwij jibareke. Ilo 1 Dri Korint 12:31, ear kemelele: “Ij kwalok ñõn kom ial eo emõnlok.” Kemelele ko ilo eon ko elikin eon in rej kwalok bwe ial eo emõnlok ej yokwe. Ilo wãwen it eo emõnlok? Paul ear wõnmanlok im kemelele kin ta melelen nan ko ear ba. (Riit 1 Dri Korint 13:1-3.) Elañe ear or iben maroñ ko relap im ear kõtõbrõk elõñ men ko, ak ejelok yokwe iben, eor ke tokjen? Ejelok! Jitõb eo an Anij ear kamakõt e ñõn kemeleleik nan kein rekamãnãn buru. Elap an emõn an kar kemeleleik men in ñõn kij!
13. (a) Ta unin tel eo an yiõ eo ilo 2010? (b) Ilo wãwen it yokwe ejamin joko?
13 Paul ej kiõ kemeleleik kij kin ta in yokwe im ta in jab yokwe. (Riit 1 Dri Korint 13:4-8.) Kiõ, bõk ien ñõn etale elañe kwoj kõmõne men ko rej kitibuj yokwe. Lale nan kein ilo jinoin 7 eon im 8 eon: ‘Yokwe ej kijenmij ilo men otemjej. Yokwe e jamin joko.’ Eñin naj unin tel eo an yiõ eo ilo 2010. Lale ilo 8 eon, Paul ear ba bwe menin letok ko an jitõb, ekoba drikanij im konono kin lo ko me rekin kõmõni ilo congregation eo an Kristian me ej kab jino ejaak, renaj kar jemlok. Bõtab yokwe enaj berwõt. Jeova eobrõk kin yokwe im enaj ber ñõn in drio. Kin men in, yokwe ejamin joko ak jemlok. Enaj wõnmanlok wõt im ber ñõn indrio einwõt karkar eo karkarin Anij eo ar me ej ñõn indrio.—1 Jon 4:8.
Yokwe Ej Kijenmij ilo Men Otemjej
14, 15. (a) Ewi wãwen yokwe emaroñ jibõñ kij ñõn kijenmij iomin melejoñ ko? (b) Etke juõn brother ear jab ebbururu kin tõmak eo an?
14 Ta eo ej kamaroñ dri Kristian ro ñõn kijenmij jekron ta melejoñ ko, wãwen ko rebin, im abañ ko rej iioni? Ej yokwe eo emol. Yokwe in elaplok jen ar baj kejekron wõt men ko mweier. Ej ñõn joñõn eo me jenaj mõnõnõ ñõn drebij wõt ar tiljek im bareinwõt mij kin Kraist. (Luk 9:24, 25) Lemnok kin tiljek eo an Dri Kennan ro an Jeova me rar kaiñtan ir ilo concentration camp ko, ilo jikin kalbuj ko me rar kamakokoik ir ñõn jerbal, im ilo jikin kalbuj ko jet ilo ien Bata eo an Lõl Ken Karuo im elikin.
15 Juõn ian ro rar tiljek ej juõn likao jen Germany im ej Dri Kennan ro an Jeova etan Wilhelm. Meñe juõn jar in tõrinae an Germany rar iten buki ñõn mij ak ear tiljek wõt im ear jab ebbururu kin tõmak eo an. Ear je ilo letter eo an eliktata ñõn baamle eo an: “Ilõñin men otemjej, jej aikwij yokwe Anij, einwõt an kar dri Tel eo ar Jisõs Kraist kakien kij. Elañe jej jutõk bin wõt, enaj nawõnãd.” Tokelik, ilo juõn katak ilo juõn Imõniaroñroñ, juõn ian baamle eo an ear ba nan kein: “Iomin ien ko rebin, einwõt juõn baamle kim kar kõmõn bwe yokwe eo am ñõn Anij ear men eo moktata ien otemjej.” Eñin lemnok eo an elõñ brother ro me rej ber kiõ ilo jikin kalbuj ko ilo Armenia, Eritrea, South Korea, im ailiñ ko jet. Brother rein rej tiljek wõt ilo air yokwe Jeova.
16. Ta eo ro jeer im jãter ilo Malawi rar kijenmij kake?
16 Ilo elõñ jikin ko, elõñ kain abañ ko rej melejoñwe tiljek im kijenmij eo an ro jeer im jãter. Iomin 26 yiõ ko, Dri Kennan ro an Jeova ilo ailiñ in Malawi rar kijenmij wõt meñe kien eo ear kamo air kwalok nan im kwelok, bareinwõt rar kijenmij iomin jumae ko relap, im elõñ men ko rekanuij nana. Kin air kar kijenmij, rar lo tõbrõk. Ke rar jino iion matõrtõr, kar or wõt 18,000 Dri Kennan ro an Jeova ilo ailiñ in. Jilñoul yiõ ko tokelik, orair ear ruo alen an laplok ñõn 38,393. Ear walok ejja men in wõt ilo ailiñ ko jet.
17. Ta eo ro me baamle ko air rejjab ber ilo tõmak rej iione, im etke rej kijenmij wõt meñe enana air kõmõn ñõn ir?
17 Ej juõn men ebin ñe armij ro rej jumae dri korijer ro an Anij. Bõtab, ebinlok ñe dri Kristian ro kajjojo rej iion jumae jen ro uan baamle ko air. Inebata emaroñ walok jen ro uan baamle eo ak ro nukiir. Jisõs ear kanan bwe men in enaj walok. Im elõñ armij ro rar lo bwe emol nan kein an. (Mat. 10:35, 36) Jodrikdrik ro rej kijenmij iomin jumae ko jen ro jemeir im jineir me rejjab dri tõmak. Jet iair kar jilkinlok ir jen moko imweir, ak Dri Kennan ro an Jeova rar kwalok joij im kadreloñ ir ilo moko imweir. Ro jet kar jolok ir jen baamle ko air. Ta eo ear kamaroñ rein ñõn kijenmij wõt meñe ear nana air kõmõn ñõn ir? Ejjab kin baj yokwe eo wõt air ñõn rolul in jimjãn jimjãtin, ak ilõñin men otemjej kin yokwe eo air emol ñõn Jeova im Nejin.—1 Pit. 1:22; 1 Jon 4:21.
18. Ewi wãwen yokwe eo ej kijenmij ilo men otemjej ej jibõñ dri Kristian ro emwij air mare?
18 Elõñ wãwen ko jet ilo mour me jej aikwij kwalok yokwe eo ej kijenmij ilo men otemjej. Ilo mour in mare eo, yokwe ej kamaroñ dri belele ro ñõn bokake nan ko an Jisõs: “Men eo Anij e ar kobaik, armij en jab kijbili.” (Mat. 19:6) Ñe rej ‘iñtan ilo kõniek,’ Kristian dri belele ro rej aikwij kakememej ir mõke bwe Jeova ej mõtõn mour in mare eo air. (1 Kor. 7:28) Nan eo an ej ba bwe ‘yokwe ej kijenmij ilo men otemjej,’ im leo im lio me rej jerbale karkar in ej kakajur irro ñõn berwõt iben dron im kejbãrok mour in mare eo airro bwe en jab jorran.—Kol. 3:14.
19. Ta eo ear walok ibwiljin ro dron Anij elikin jorran ko relap?
19 Yokwe ej jibõñ kij ñõn kijenmij ilo ien ko ej walok jorran ko relap. Eñin men eo ear walok ke ear or makõtkit lõl ilo bukwon ko tueañ ilo Peru im ke lañ eo rej naetan Katrina ear kokkure jet ian ailiñ ko iturõk ilo Amerika. Elõñ ian ro jeer im jãter rar luji moko imweir im men ko mweieir ilo jorran ko relap. Yokwe ear kamakõt congregation ko ibelakin lõl in ñõn lelok menin jibõñ ko ñõn ir, im elõñ ro rar mõnõnõ in bõk kwonair ñõn bar kalek moko im bar kõmõni Imõn Kwelok ko. Jerbal rõt kein rej kamol bwe ro jeer im jãter rej yokwe im kea kake dron ien otemjej im ilo jabrewõt wãwen ko.—Jon 13:34, 35; 1 Pit. 2:17.
Yokwe Ejamin Joko
20, 21. (a) Etke yokwe emõnlok? (b) Etke kwoj beek ilo buruõm ñõn jibarek ial eo kin yokwe?
20 Ikijen men ko jej lo ibwiljin armij ro an Jeova ranin, jej kile bwe ej juõn menin meletlet ñõn jibarek ial eo emõnlok kin yokwe. Ilo mol, ej emõnlok ilo aolep wãwen ko. Lale wãwen dri jilik Paul ear kwalok kin men in. Mokta, ear ba bwe menin letok ko ilo jitõb renaj joko im congregation in Kristian eo enaj edreklok. Inem ear kajemlok nan ko an ilo an ba: “A kiõ e berwõt tõmak, kejatrikrik, im yokwe, men kein jilu; im eo elap iair yokwe.”—1 Kor. 13:13.
21 Ejjabto, men ko jej tõmak kaki renaj jejit kitieir, kin men in, aikwij eo ñõn tõmak men kein enaj jemlok. Kejatrikrik eo ar kin kalimur ko jej kijorur in lo air jejit kitieir, jejamin bar aikwij lemnok kaki elikin naj kõkãl men otemjej. Ak ta kin yokwe? Men in ejamin joko ak jemlok. Enaj berwõt. Kinke mour indrio ej kejatrikrik eo ar, enaj lukkun laplok ar lo im melele wãwen ko kin yokwe eo an Anij. Ikijen am kõmõnmõn ankilan Anij ilo am jibarek ial eo emõnlok kin yokwe eo me ejamin joko, kwomaroñ ber ñõn indrio.—1 Jon 2:17.
Ewi Wãwen Kwonaj Uak?
• Etke jej aikwij kejbãrok jen yokwe eo ej ankiliriõp?
• Yokwe emaroñ jibõñ kij ñõn kijenmij iomin ta?
• Ilo wãwen it yokwe ejamin joko?
[Kajitõk ko ñan katak]
[Naan ko ilo peij 27]
Unin tel eo an yiõ eo ilo 2010 enaj: ‘Yokwe ej kijenmij ilo men otemjej. Yokwe e jamin joko.’—1 Kor. 13:7, 8.
[Pija eo ilo peij 25]
Yokwe eo ar ñõn Anij ej kamakõt kij ñõn kwalok nan
[Pija eo ilo peij 26]
Yokwe eo emol ear kamaroñ ro jeer im jãter ilo Malawi ñõn kijenmij iomin melejoñ ko