Kultivá e Amor Ku No Ta Faya Nunka

‘Amor ta soportá tur kos. Amor no ta faya nunka.’​—1 KOR. 13:​7, 8.

1. (a) Kon amor ta ser presentá hopi biaha? (b) Ken i kiko hopi hende ta stima mas?

SI TIN un tópiko ku a haña hopi publisidat, anto esei ta amor. Por ehèmpel, hopi kansion ta drei rònt di e tema di amor i ta asta present’é na un manera irealista. Ta bèrdat ku amor ta un nesesidat humano básiko, ma hopi biaha buki i pelíkula—ku ta disponibel na gran kantidat riba merkado—ta present’é den historianan di amor fiktisio. Sinembargo, berdadero amor pa Dios i pa próhimo ta masha skars. Ku nos propio wowonan nos ta mira sosodé nos dilanti loke Beibel a profetisá tokante e último dianan akí. Hende ta ‘stimadó di nan mes, stimadó di plaka i stimadó di plaser mas bien ku stimadó di Dios.’​—2 Tim. 3:​1-5.

2. Ki spièrtamentu Beibel ta duna relashoná ku e tendensia di stima loke ta inkorekto?

² Hende tin e kapasidat pa mustra amor, ma e Palabra di Dios ta spièrta nos pa tene kuido ku e tendensia di stima loke ta inkorekto. I Beibel ta deskribí kiko lo pasa ora e tipo di amor ei saka rais den kurason di un hende. (1 Tim. 6:​9, 10) Bo ta kòrda kiko apòstel Pablo a skirbi di Demas? Ounke e tabata kompañero di Pablo, el a kuminsá stima loke mundu a ofresé. (2 Tim. 4:10) Apòstel Juan a spièrta kristiannan pa nèt e peliger akí. (Lesa 1 Juan 2:15 i 16.) Si un hende ta stima e mundu akí i  su kosnan i aktitutnan pasahero, e no por ta stima Dios i loke ta bini di Dios.

3. Nos mester hasi esfuerso pa evitá kiko, i p’esei ki preguntanan ta lanta?

³ Ounke nos ta biba den mundu, nos no ta parti di dje. Pues, nos tin ku hasi esfuerso pa no adoptá e mundu su punto di bista trosí di amor. Ta masha importante pa nos no kai den e trampa di stima loke ta inkorekto. Pa ken anto nos tin ku kultivá i demostrá berdadero amor? Kiko por yuda nos kultivá un amor ku ta soportá tur kos i ku no ta faya nunka? I kon e esfuerso pa hasi esei por benefisiá nos tantu awor komo den futuro? Nos tin ku laga e palabra di Dios kontestá e preguntanan ei, ya asina nos por sigui Dios su guia.

Kultivá Amor pa Yehova

4. Kon nos amor pa Dios por krese?

⁴ E palabra “kultivá” ta enserá prepará i stimulá e kresementu di algu. Pensa riba un kunukero ku ta traha duru pa prepará su tereno i sembra simia. E ta hasi esei pa e simianan sprùit i krese bira planchi. (Heb. 6:7) Meskos tambe, nos amor pa Dios mester krese. Kiko nos tin ku hasi pa esei sosodé? Nos tin ku prepará e bon tera di nos kurason, kaminda e simia di e bèrdat di Reino a ser sembrá. Nos por hasi esaki pa medio di un estudio diligente di e Palabra di Dios pa asina nos haña mas konosementu di Dios. (Kol. 1:10) Otro kos ku por yuda nos haña mas konosementu ta ora nos ta asistí ku regularidat na e reunionnan di kongregashon i partisipá den nan. Ta bon pa nos puntra nos mes: Mi ta hasiendo esfuerso konstante pa haña un konosementu mas profundo?​—Pro. 2:​1-7.

5. (a) Kon nos por siña tokante Yehova su kualidatnan prinsipal? (b) Kiko bo por bisa di Dios su hustisia, sabiduria i poder?

⁵ Yehova a revelá su personalidat pa medio di su Palabra. Ora nos ta studia e Skritura i haña gradualmente mas konosementu di Yehova, nos por haña tambe mas apresio pa su kualidatnan, esta, pa su hustisia, poder, sabiduria i, riba tur kos, su amor supremo. Yehova ta manifestá hustisia den tur su kamindanan i tambe den su lei perfekto. (Deu. 32:4; Sal. 19:7) Nos por meditá riba tur Yehova su obranan di kreashon i keda impreshoná ku su sabiduria superior. (Sal. 104:24) Universo tambe ta duna prueba ku Yehova ta e Fuente di energia dinámiko i di poder inagotabel.​—Isa. 40:26.

6. Kon Dios a demostrá su amor pa nos, i ki efekto esei tabatin riba bo?

⁶ Kiko nos por bisa awor di Yehova su kualidat di mas sobresaliente, esta, su amor? Su amor ta yega hopi leu i e ta alkansá nos tur. El a ekspresá e amor ei ora el a perkurá e reskate pa libra humanidat di piká. (Lesa Romanonan 5:8.) E provishon akí ta disponibel pa henter humanidat, pero ta únikamente esnan ku ta reakshoná faborablemente riba e amor di Dios i pone fe den su Yu lo benefisiá di dje. (Juan 3:​16, 36) E echo ku Dios a ofresé Hesus komo un sakrifisio di rekonsiliashon pa nos pikánan mester motivá nos pa nos tambe stima Dios awor.

7, 8. (a) Kiko nos tin ku hasi pa demostrá nos amor pa Dios? (b) Apesar di kiko sirbidónan di Dios ta warda su mandamentunan?

⁷ Kon nos por demostrá nos amor pa Dios pa tur loke el a hasi pa nos? Ta bon pa nos tuma nota di e kontesta di Beibel: “Esaki ta e  amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Sí, e amor ku nos tin pa Yehova Dios ta motivá nos pa warda su mandamentunan. Esei ta un di e motibunan pakiko nos ta duna testimonio tokante su nòmber i su Reino, lokual ta benefisiá otro hende. Ora nos ta hasi esei for di e abundansia di nos kurason, nos ta demostrá ku nos ta warda Dios su mandamentunan ku un motivashon puru.​—Mat. 12:34.

⁸ Apesar ku hende ta indiferente òf ta rechasá e mensahe di Reino abiertamente, nos rumannan rònt mundu ta sigui warda e mandamentunan di Dios. Nan no ta baha man den nan esfuerso pa kumpli ku nan ministerio kabalmente. (2 Tim. 4:5) Meskos ku nan, nos tambe ta sinti nos motivá pa warda tur su mandamentunan i yuda otro hende konosé Dios.

Pakiko Nos Ta Stima Nos Señor Hesukristu?

9. Kiko Kristu a soportá, i kiko a motiv’é?

⁹ Ademas di stima Dios, tin hopi motibu mas pakiko nos ta kultivá amor pa su Yu. Ounke nos no a mira Hesus nunka, nos amor p’e ta bira mas profundo segun ku nos ta siña mas tokante dje. (1 Ped. 1:8) Kiko ta algun di e kosnan ku Hesus a soportá? Wèl, ounke e tabata hasi e boluntat di su Tata, tòg nan a odi’é sin motibu; tambe nan a persiguié, akus’é falsamente, zundr’é i humi’é vários biaha. (Lesa Juan 15:25.) Ta e amor ku e tabatin pa su Tata selestial a motiv’é pa soportá e pruebanan ei. I ta amor a motiv’é tambe pa sakrifiká su bida i asina perkurá un reskate pa hopi hende.​—Mat. 20:28.

10, 11. En bista di loke Kristu a hasi pa nos, kiko ta nos meta?

¹⁰ E ehèmpel di Hesus ta motivá nos pa hasi algu. Ora nos pensa riba loke Kristu a hasi pa nos, nos amor p’e ta bira mas profundo. Komo su siguidónan, nos meta mester ta pa kultivá—i sigui mustra—amor manera esun ku Kristu a demostrá a fin ku nos por sigui warda su mandamentu di prediká tokante e Reino i hasi disipel.​—Mat. 28:​19, 20.

¹¹ Ora nos pensa riba e amor ku Kristu a demostrá pa henter humanidat, nos ta sinti ku nos tin un deber pa kaba ku nos asignashon promé ku e fin yega. (Lesa 2 Korintionan 5:​14 i 15.) Loke Kristu a hasi pa kumpli ku Dios su propósito pa humanidat tabata un akto di amor; amor tabata su motivashon. I e ehèmpel ku Kristu a laga pa nos sigui ta permití kada un di nos partisipá den e propósito divino ei. Pa hasi esei, nos mester kultivá amor pa Dios mas tantu posibel. (Mat. 22:37) Ora nos ta sigui e siñansanan di Hesus i ta warda su mandamentunan, nos ta mustra ku nos ta stim’é i ku nos ta determiná pa sostené e soberania di Dios kueste loke kueste, meskos ku Hesus a hasi.​—Juan 14:​23, 24; 15:10.

Sigui Tras di Amor, e Kaminda Mas Ekselente

12. Kiko Pablo tabata ke men ku e ekspreshon “un kaminda mas ekselente”?

¹² Apòstel Pablo a imitá Kristu. Pa motibu ku el a sigui e pasonan di Kristu fielmente, e por a papia ku frankesa ora el a urgi su rumannan  pa imit’é. (1 Kor. 11:1) Ounke el a animá e kristiannan di Korinto pa sigui buska ku empeño sierto donnan di spiritu ku a keda manifestá den promé siglo, manera e don di kura hende i di papia den lenga, Pablo a mustra nan ku tabatin algu mas mihó ku nan mester a sigui tras di dje. Na 1 Korintionan 12:31, el a splika: “Mi ta mustra boso un kaminda mas ekselente ainda.” E konteksto den e versíkulonan ku a sigui ta mustra ku tabata trata aki di e kaminda mas ekselente di amor. Den ki sentido e tabata mas ekselente? Pablo a ilustrá e ora ei kiko e tabata ke men. (Lesa 1 Korintionan 13:​1-3.) Si e tabatin sierto abilidatnan sobresaliente i a logra kosnan grandi ma no tabatin amor, ku kiko esei lo a yud’é? Ku nada! Bou di guia di e spiritu di Dios, el a splika e punto importante akí, i su splikashon ta hasi un impreshon profundo riba nos.

13. (a) Kiko ta e teksto di aña pa 2010? (b) Den ki sentido amor no ta faya nunka?

¹³ Siguientemente, Pablo ta definí kiko amor ta i kiko e no ta. (Lesa 1 Korintionan 13:​4-8.) Para ketu un ratu i analisá te na ki grado bo ta kumpli ku loke amor ta rekerí. Enfoká prinsipalmente riba e último parti di versíkulo 7 i e promé frase di versíkulo 8: ‘Amor ta soportá tur kos. Amor no ta faya nunka.’ Esei lo ta nos teksto di aña pa 2010. Ripará ku den versíkulo 8 Pablo a bisa ku e donnan di spiritu, inkluso esun di profetisá i di papia den lenga—ku e rumannan a risibí tempu ku e kongregashon kristian a kuminsá nobo-nobo—lo a ser eliminá. Nan lo a kaba na nada. Pero amor sí lo eksistí pa semper. Yehova ta e personifikashon di amor, i e ta eterno. Di manera ku nunka amor lo faya, òf kaba na nada. Lo e keda eksistí pa semper komo un kualidat di nos Dios eterno.​—1 Juan 4:8.

Amor Ta Soportá Tur Kos

14, 15. (a) Kon amor por yuda nos soportá prueba? (b) Pakiko un ruman hòmber yòn a nenga di komprometé su fe?

¹⁴ Kiko ta yuda kristiannan soportá tur e pruebanan, situashonnan difísil i problemanan ku nan ta haña nan kuné? Básikamente, esei ta berdadero amor. E amor ei ta bai mas leu ku djis e sakrifisionan material ku nos ta hasi. E ta yega te na e punto di keda dispuesto pa mantené nos integridat i asta pèrdè nos bida pa kousa di Kristu. (Luk. 9:​24, 25) Pensa riba e Testigunan fiel ku a sufri den kamponan di konsentrashon i di trabou fòrsá, i tambe den prizòn durante i despues di Segundo Guera Mundial.

¹⁵ E kaso di un Testigu yòn di Alemania ku yama Wilhelm ta ilustrá esaki bon. En bes di komprometé su fe, el a mantené su lealtat ora el a enfrentá morto na man di un peloton nazi. El a skirbi su famia den un karta di despedida: “Mas ku tur kos, nos mester stima Dios, manera nos Lider Hesukristu a manda. Si nos skohe su banda, lo e rekompensá nos.” Mas despues, un miembro di su famia a skirbi den un artíkulo di Toren di Vigilansia: “Den tur e trastornonan ku nos a pasa aden atraves di tempu, nos a sòru pa komo famia nos amor pa Dios semper tabata na promé lugá.” Ta e aktitut ei hopi ruman ku aktualmente ta den prizòn na Armenia, Eritrea, Sur Korea i otro paisnan tin. E rumannan akí ta keda firme den nan amor pa Yehova.

16. Kiko nos rumannan na Malawi a soportá?

¹⁶ Den hopi pais na mundu, rumannan ta haña nan ku un otro tipo di prueba ku ta tèst nan fe i perseveransia. Pa 26 aña largu, Testigunan di Yehova na Malawi a soportá prohibishon di gobièrnu, oposishon severo i hopi krueldat. Nan perseveransia a duna  bon resultado. Ora persekushon a kuminsá, tabatin mas o ménos 18.000 Testigu den e pais ei. Trinta aña despues, nan a bira mas ku dòbel: 38.393. Otro paisnan tabatin resultadonan similar.

17. Ki situashon algun ruman den kasnan dividí ta enfrentá, i pakiko nan por soportá e pruebanan ei?

¹⁷ Si atakenan frontal kontra e pueblo di Dios en general ta difísil pa soportá, e oposishon ku kristiannan individual ta haña di parti di nan famia ta asta mas difísil ainda. Hende di kas òf famia yegá tal bes ta kousa hopi tenshon. Hesus a profetisá ku esaki lo a tuma lugá i hopi ruman a eksperensiá esaki. (Mat. 10:​35, 36) Por ehèmpel, hóbennan adolesente a yega di haña nan ku oposishon di parti di mayornan no-kreyente. Algun asta a ser saká for di kas, pero otro Testigunan a risibí nan bondadosamente. Otronan a ser nengá komo yu. Kiko a yuda e hóbennan ei wanta e pruebanan akí? Esei no ta djis nan amor pa e hermandat, sino, mas ku tur kos, nan berdadero amor pa Yehova i pa su Yu.​—1 Ped. 1:22; 1 Juan 4:21.

18. Kon e amor ku ta soportá tur kos por yuda kristiannan kasá?

¹⁸ Tin hopi otro situashon den bida ku ta rekerí e amor ku ta soportá tur kos. Den matrimonio, amor ta permití parehanan respetá Hesus su palabranan: “Loke Dios a uni, no laga ningun hende separá.” (Mat. 19:6) Ora kristiannan kasá ta sufri ‘tribulashon den bida,’ nan mester kòrda ku Yehova ta un parti importante den nan matrimonio. (1 Kor. 7:28) Su Palabra ta bisa ku ‘amor ta soportá tur kos,’ i un esposo ku esposa ku tin e kualidat akí ‘bistí’ ta haña e forsa pa keda fiel na otro i mantené nan matrimonio intakto.​—Kol. 3:14.

19. Kiko sa tuma lugá den e pueblo di Dios despues di desasternan natural?

¹⁹ Amor ta yuda nos soportá tur kos ora desaster natural tuma lugá. Esaki tabata e kaso ora ku un temblor a sagudí e parti zùit di Perú i ora orkan Katrina a destruí un área parti zùitost di Merka. Hopi di nos rumannan a pèrdè nan kas òf propiedat den e desasternan ei. Amor a motivá e kongregashon mundial pa duna ousilio, i rumannan boluntario a yuda rekonstruí kasnan i drecha Salònnan di Reino. E aktonan ei ta demostrá ku nos rumannan ta stima otro i ta perkurá pa otro na tur momento i bou di tur sirkunstansia.​—Juan 13:​34, 35; 1 Ped. 2:17.

Amor No Ta Faya Nunka

20, 21. (a) Pakiko amor ta bal mas ku tur kos? (b) Kiko ta duna bo e determinashon pa sigui tras di amor?

²⁰ Awe, den e pueblo di Yehova nos ta mira e sabiduria di sigui tras di amor, e kaminda mas ekselente. En bèrdat, e ta sobresalí den tur situashon. Ripará kon apòstel Pablo a enfatisá e bèrdat ei. Na promé lugá, el a mustra ku donnan di spiritu lo kaba na nada i ku e kongregashon kristian, despues di su etapa di infansia, lo a krese i madurá. Anto el a konkluí: “Ma awor ta keda fe, speransa, amor, e tresnan akí; ma esun di mas ekselente di esakinan ta amor.”​—1 Kor. 13:13.

²¹ Ku tempu, e kosnan ku nos tin fe den dje lo bira realidat, i p’esei nos lo no tin nodi di pone fe mas den nan. I despues ku tur kos bira nobo, nos no tin nodi di karga speransa mas pa mira promesanan keda realisá. Pero kiko di amor? Esei sí nunka lo faya òf kaba na nada. Lo e keda eksistí. Ku e perspektiva di biba pa semper, sin duda nos lo sigui mira i komprondé mas i mas faseta di e amor di Dios. Si bo ta hasi e boluntat di Dios i ta sigui tras di e amor ku no ta faya nunka—e kaminda mas ekselente—lo bo por permanesé pa semper.​—1 Juan 2:17.

Kon Lo Bo Kontestá?

• Pakiko nos tin ku tene kuidou ku e tendensia di stima loke ta inkorekto?

• Kiko amor por yuda nos soportá?

• Den ki sentido amor no ta faya nunka?

[Preguntanan di Estudio]

[Komentario na página 27]

E teksto di aña pa 2010 lo ta: ‘Amor ta soportá tur kos. Amor no ta faya nunka.’​—1 Kor. 13:​7, 8.

[Plachi na página 25]

Amor pa Dios ta motivá nos pa duna testimonio

[Plachi na página 26]

Amor ku no ta faya nunka a yuda nos rumannan na Malawi soportá prueba