Ia Atia‘e le Alofa e Lē Uma
Ia Atiaʻe le Alofa e Lē Uma
‘O le alofa, e tumau i mea uma. E lē uma le alofa.’—1 KORI. 13:7, 8.
1. (a) O le ā le auala e masani ona faalauiloa ai le alofa? (e) O ai, ma o ā mea, ua faaautū i ai le alofa o le toʻatele?
E TELE auala o loo faalauiloa ai le alofa. Ua viiviia ma fatuina pese e faatatau i le alofa. O le alofa, o se mea e manaʻomia e tagata soifua uma. Ae ua faaautū i ai le tele o tala i tusi ma ata tifaga, ma e tele foʻi mea faapena ua faatau atu i tagata. Peitaʻi o le mea e faanoanoa ai, ona ua leai se alofa moni i le Atua ma tuaoi. Ua tatou molimauina le mea na valoia i le Tusi Paia e faatatau i aso e gata ai. E avea tagata ma “ē e alolofa iā i latou lava, . . . o ē pupū i mea faafiafia nai lo le alolofa i le Atua.”—2 Timo. 3:1-5.
2. O le ā le lapataʻiga a le Tusi Paia e faatatau i le sesē o mea e alofa pe manaʻo i ai?
2 E iai i tagata le uiga o le alofa, po le manaʻo i mea, a ua lapataʻi mai le Afioga a le Atua, ia faaeteete i le sesē o mea e alofa pe e manaʻo i ai. Ma o loo faamatala foʻi e le Tusi Paia le mea e tupu pe a iai lenā ituaiga o alofa. (1 Timo. 6:9, 10) Po o e manatua le mea na tusi atu ai le aposetolo o Paulo iā Tema? E ui ina la faatasi ma Paulo, ae na manaʻo Tema i mea o i le lalolagi. (2 Timo. 4:10) Na lapataʻia e le aposetolo o Ioane Kerisiano e faatatau i lea lava lamatiaga. (Faitau le 1 Ioane 2:15, 16.) E lē ōgatusa le manaʻo i le lalolagi ma mea o iai o le a mavae atu, ma le alofa i le Atua ma mea mai iā te ia.
3. O le ā le luʻi o loo tatou fesagaʻi, ma o ā fesili ua tulaʻi mai ai?
3 E ui o loo tatou ola i lenei lalolagi, ae e lē o i tatou o ni tagata o le lalolagi. O lea, ua avea ai o se luʻi lo tatou taumafai e ʻalofia le vaaiga sesē a le lalolagi i le alofa. E tāua le aua neʻi maileia i tatou i le faauiga sesē o le alofa. O ai e tatau ona tatou faatupu, ma faaalia i ai le alofa e faavae i mataupu silisili? O ā sauniuniga e fesoasoani ina ia tatou atiaʻe ai le alofa e tumau i mea uma, ma e lē uma? E faapefea ona aogā lea iā i tatou i le taimi nei ma le lumanaʻi? E tāua ona tatou iloa le silafaga a le Atua ina ia taʻitaʻitonuina ai i tatou.
Ia Faatupu le Alofa iā Ieova
4. E faapefea ona faatupuina le alofa i le Atua?
4 O le upu faatupu, o lona uiga ia sauniuni ma putiputi se fatu ina ia ola. Seʻi faapea o loo galue mamafa se faifaatoʻaga e faamalū le palapala ma totō fatu. E na te faatalitalia o le a ola le fatu. (Epe. 6:7) Ia faapena foʻi le tuputupu aʻe o lo tatou alofa i le Atua. O le ā e manaʻomia ina ia tupu ai le alofa? E ao ona faamalū le eleele lelei o o tatou loto, lea ua totō ai le fatu o le upu moni o le Malo. E ala lea i le toʻaga e suʻesuʻe le Afioga a le Atua ina ia atili ai ona tatou iloa o ia. (Kolo. 1:10) O le auai e lē aunoa ma faia se sao i sauniga, o le a fesoasoani e tupu tele ai le iloa. Po o taʻitoʻatasi ona tatou taumafai pea ina ia faateleina lo tatou malamalama?—Faata. 2:1-7.
5. (a) E faapefea ona tatou aʻoaʻoina e faatatau i uiga autū o Ieova? (e) O le ā sou manatu e uiga i le faamasinotonu o le Atua, lona atamai, ma lona malosi?
5 Ua faamalamalama mai e le Afioga a Ieova ona uiga. E ala i le suʻesuʻe i le Tusi Paia ma faasolosolo ona ave i fale le poto e uiga iā Ieova, o le a atili ai ona tatou talisapaia ona uiga autū, o lona faamasinotonu, malosi, atamai ma lona uiga sili, o le alofa. Ua faaalia le faamasinotonu o Ieova i ona ala uma ma lana tulafono e atoatoa ona lelei. (Teu. 32:4; Sala. 19:7) Ia tatou manatunatu loloto i galuega uma a Ieova ma maofa ai i le maoaʻe o lona atamai. (Sala. 104:24) Ua vaaia foʻi i le vateatea faamaoniga, o Ieova o le Puna o le mana uma ma le malosi e lē uma.—Isa. 40:26.
6. Ua faapefea ona faaalia mai le alofa o le Atua iā i tatou, ma e faapefea ona aafia ai oe?
6 E faapefea ona faamatala le uiga sili o le Atua, o le alofa? E lautele, ma e aafia ai i tatou uma. Na ia faaalia lenā alofa i le saunia o le togiola mo le faasaoina o tagata. (Faitau le Roma 5:8.) E avanoa mo tagata uma lenei sauniuniga, ae e na o ē e tali atu i le alofa o le Atua ma faatuatua i lona Alo, e maua aogā. (Ioa. 3:16, 36) Ua uunaʻia i tatou e alolofa atu i le Atua, ona ua ia ofoina mai Iesu e fai ma taulaga o le leleiga mo a tatou agasala.
7, 8. (a) O le ā e manaʻomia ona tatou faia ina ia faaalia ai le alofa i le Atua? (e) O loo tausia e tagata o le Atua ana poloaʻiga e ui i ā faigatā?
7 E faapefea ona tatou faaalia le alofa i le Atua ona o mea uma ua ia faia mo i tatou? E tāua le tali o loo i le Tusi Paia: “Auā o le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” (1 Ioa. 5:3) Ioe, o le alofa iā Ieova le Atua, ua uunaʻia ai i tatou e tausi ana poloaʻiga. O se tasi lenā o māfuaaga e tatou te molimau atu ai e uiga i lona suafa ma lona Malo, lea e aogā foʻi i isi. E faia faapea ona o lo tatou loto faafetai tele, ma e faamaonia ai ua tatou tausia poloaʻiga a le Atua ma se loto mamā.—Mata. 12:34.
8 O loo finafinau o tatou uso i le lalolagi aoao i le tausia o poloaʻiga a le Atua, e ui ina lē ano mai tagata pe e tetee i le feʻau o le Malo. E latou te lē faavaivai i le faamāeʻaina o la latou faiva. (2 Timo. 4:5) Ua faapena foʻi ona uunaʻia i tatou ia tufa atu i isi le poto e uiga i le Atua, ma tausia isi ana poloaʻiga uma.
Māfuaaga e Alolofa ai iā Iesu Keriso
9. O le ā na onosaia e Keriso, ma o le a na uunaʻia ai o ia?
9 E lē gata i le alofa i le Atua, ae e tele māfuaaga e ao ai ona tatou atiaʻe le alofa i lona Alo. E ui e tatou te leʻi vāai iā Iesu, ae a o tatou aʻoaʻo e uiga iā te ia, e tupu tele ai lo tatou alofa iā te ia. (1 Pete. 1:8) O ā mea na onosaia e Iesu? A o faia le finagalo o lona Tamā, na inosia fua o ia, ma sauāina, ma tuuaʻia pepelo, ma agaleagaina. Na mafatia foʻi o ia i isi mea leaga. (Faitau le Ioane 15:25.) Na onosaia e Iesu na puapuaga ona o le alofa i lona Tamā. O lona alofa, ua togiolaina ai le toʻatele e ala i lona maliu faataulagaina.—Mata. 20:28.
10, 11. Pe a fua i mea na faia e Iesu mo i tatou, o le ā lo tatou sini?
10 O mea na faia e Iesu e uunaʻia ai i tatou e tali atu. O le a faalolotoina lo tatou alofa iā Keriso pe a manatunatu i mea ua ia faia mo i tatou. O i tatou o ona soo, ia avea ma o tatou sini le atiaʻe ma faaalia le alofa e pei o Keriso, ina ia tumau ai i le tausia o ana poloaʻiga e talaʻi atu le Malo, ma faia isi ma soo.—Mata. 28:19, 20.
11 I le tali atu i le alofa o Keriso i tagata uma, ua faamalosia ai i tatou ia faamāeʻaina lo tatou tofiga a o leʻi oo mai le iʻuga. (Faitau le 2 Korinito 5:14, 15.) O le alofa na faaalia e Keriso, o le autū lea o lona faataunuuina o le finagalo o le Atua mo tagata. O le faaaʻoaʻoga na faataatia e Keriso e tatou te mulimuli ai, ua mafai ai ona faia sa tatou vaega i le fuafuaga a le Atua. E tatau ai ona tatou atiina aʻe le alofa i le Atua i le mea sili e tatou te mafaia. (Mata. 22:37) O le usitai i mea na aʻoaʻoina e Iesu ma tausia ana poloaʻiga, e faaalia ai lo tatou alofa iā te ia, ma le filigā e lagolago le pule silisili ese a le Atua e ui i faigatā e oo mai, e pei ona oo iā Iesu.—Ioa. 14:23, 24; 15:10.
Ia Saʻili le Auala Sili o le Alofa
12. O le ā na uiga i ai le faamatalaga a Paulo, o “le auala silisili”?
12 Na faaaʻoaʻo le aposetolo o Paulo iā Keriso. Ona o lona mulimulituʻi i tulagāaao o Keriso, na maua ai e Paulo le saʻolotoga e tautala ai ma uunaʻi ai ona uso ia faaaʻoaʻo iā te ia. (1 Kori. 11:1) Sa uunaʻia e Paulo Kerisiano i Korinito ia maelega pea i le saʻilia o isi meaalofa a le agaga sa faia i le uluaʻi senituri, e pei o faamālōlōga ma tautala i gagana eseese, ae na faaalia e Paulo e iai se isi mea e sili atu. Ua ia faapea mai i le 1 Korinito 12:31: “Ae ou te faailoa atu iā te outou le auala silisili.” O loo faaalia i isi fuaiupu o le mau, o lenei auala silisili, o le alofa. Ua faapefea ona silisili le alofa? Na faamatala e Paulo le uiga o lea fuaiupu. (Faitau le 1 Korinito 13:1-3.) Pe afai e tele ni ona tomai ma faatino ni galuega tāua ae e leai sona alofa, o le ā le aogā o ana galuega? E leai se aogā! Na faagaeeina o ia e le agaga o le Atua e faamatala mai lenei upu moni tāua. Maʻeu le tāua o lana faamatalaga iā i tatou!
13. (a) O le ā le mau o le tausaga e 2010? (e) O le ā le uiga o le faaupuga, e lē uma le alofa?
13 Ona faamatala mai loa lea e Paulo le uiga o le alofa, ma mea e lē uiga i ai. (Faitau le 1 Korinito 13:4-8.) O lea, ia suʻesuʻe ifo po o e faia e tusa ma mea e manaʻomia e le alofa. Ia tagaʻi lelei ane i le vaega mulimuli o le fuaiupu e 7 ma le vaega muamua o le fuaiupu e 8 e faapea: ‘O le alofa, e tumau i mea uma. E lē uma le alofa,’ o la tatou mau lea o le tausaga e 2010. Ia mātau, i le fuaiupu e 8, na taʻua e Paulo, o le a mavae atu meaalofa o le agaga e iai le faia o valoaga ma le tautala i gagana eseese, sa faaaogā i le amatamataga o le faapotopotoga Kerisiano. E lē toe iai. Ae, e tumau pea le alofa. O Ieova o le alofa lava ia, ma e faavavau o ia. O lea la, e lē uma le alofa. E iai pea e faavavau o se uiga o lo tatou Atua e faavavau.—1 Ioa. 4:8.
O le Alofa, e Tumau i Mea Uma
14, 15. (a) E faapefea ona tatou tumau i tofotofoga ona o le alofa? (e) Aiseā na lē lolo atu ai se uso talavou i tofotofoga?
14 Ua faapefea ona tumau Kerisiano e ui i tofotofoga, o faigatā, ma faafitauli? Ona o le alofa e faavae i upu moni o le Tusi Paia. O lea alofa, e sili i lo le foaʻi atu o a tatou mea faitino. E aofia ai le lotomalie e tumau faamaoni ona o Keriso, e tusa lava pe oo mai ai le oti. (Luka 9:24, 25) Ia manatunatu i le faamaoni o Molimau o ē na puapuagatia i nofoaga o faasalaga ma galuega mamafa, ma falepuipui i le taimi o le Taua Lona Lua a le Lalolagi, ma ina ua mavae lenā taimi.
15 Ua manino lea mea i le faaaʻoaʻoga a se Molimau talavou Siamani e igoa iā Wilhelm. E leʻi lolo atu ae na tumau faamaoni ma na fanaina e le ʻau Nasi ma oti ai. I lana tusi faamavae i lona aiga na ia faapea mai ai: “Na poloaʻi mai lo tatou Taʻitaʻi o Iesu Keriso, ia sili lo tatou alofa i le Atua i lo mea uma. Pe afai e tatou te faamaoni iā te ia, o le a ia tauia i tatou.” Na tusia e se tasi o lona aiga i se mataupu o le Watchtower e faapea: “A o faagasolo taimi faigatā, na taumafai lo matou aiga e faamuamua pea lo matou alofa i le Atua.” O uiga foʻi na o le toʻatele o le ʻauuso o loo falepuipui i Armenia, Eritrea, Korea i Saute, ma isi atunuu. O loo tumau faamaoni nei uso ona o le alolofa iā Ieova.
16. O le ā na onosaia e o tatou uso i Malawi?
16 I le tele o atunuu, ua tofotofoina ai le faatuatua ma le faamaoni o o tatou uso. E 26 tausaga o onosaia e Molimau a Ieova i Malawi faasāsāga a le Malo, o teteega ogaoga, ma isi mea faigatā. Na tauia lo latou faamaoni. Ina ua amata sauāga, e tusa ma le 18,000 Molimau sa iai i le atunuu. I le tolusefulu tausaga mulimuli ane, e lē gata ina faaluaina a ua sili atu le aofaʻi ua iai nei, e 38,393. O mea foʻi na o loo tutupu i isi atunuu.
17. O le ā o loo fesagaʻia e nisi e lē talitonu o latou aiga, ma aiseā ua mafai ai ona latou onosaia na faigatā?
17 O se tasi o vala, o sauaga tuusaʻo faasaga i tagata o le Atua. Ae e faigatā foʻi teteega mai i aiga o se Kerisiano. Atonu e ala mai omiga i nisi o aiga, po o ē e latou te mau faatasi. Ae o le mea lenā na valoia e Iesu. Ma ua iloa e le toʻatele le moni o nei upu. (Mata. 10:35, 36) E iai talavou o loo feagai ma teteega mai o latou mātua lē talitonu. O nisi ua tutuliese mai i o latou aiga, ae ua alolofa i ai Molimau a Ieova ma aumai e latou te nonofo faatasi. A o isi ua teena e o latou aiga. Na faapefea ona latou onosaia na faiga leaga? E le na o lo latou alofa i le ʻauuso, ae e sili i na mea uma o lo latou alofa moni iā Ieova ma lona Alo.—1 Pete. 1:22; 1 Ioa. 4:21.
18. E faapefea ona fesoasoani le alofa e tumau i mea uma i ulugalii Kerisiano?
18 E tele nisi vala o le olaga e manaʻomia ai le alofa e tumau i mea uma. I se faaipoipoga, o le alofa o le a mafai ai e le ulugalii ona faatāua fetalaiga a Iesu: “O ē ua faatasia e le Atua, aua neʻi tuueseeseina e se tagata.” (Mata. 19:6) Pe a oo “puapuaga i o latou tino,” e ao i Kerisiano ua faaipoipo ona manatua o Ieova le vaega autū o le faaipoipoga. (1 Kori. 7:28) Ua taʻua i lana Afioga, ‘o le alofa, e tumau i mea uma’ ma o se tane ma se ava e iai lea uiga ua faamalosia ia pipii le tasi i le isi ma tumau ai le la faaipoipoga.—Kolo. 3:14.
19. O le ā ua faia e tagata o le Atua pe a tutupu mala faalenatura?
19 E aogā le alofa iā i tatou ina ia onosaʻi ai i taimi o mala faalenatura. O le mea lenā na tupu ina ua lūlū le mafuiʻe i le itu i saute o Peru, ma ina ua agi le afā o Katerina i se vaega o le Fagaloa i Amerika. Na faaleagaina ai fale ma mea totino a le toʻatele o o tatou uso. O le alofa na uunaʻia ai le ʻauuso i le lalolagi e foaʻi atu mea e manaʻomia, ma tauofo e ō atu e toe fau fale ma faaleleia Maota mo Sauniga. O na galuega na faamaonia ai le alofa o o tatou uso ma le manatunatu mo isi i taimi uma, ma i so o se tulaga.—Ioa. 13:34, 35; 1 Pete. 2:17.
E Lē Uma le Alofa
20, 21. (a) Aiseā e sili ai ona tāua le alofa? (e) Aiseā ua e maumauaʻi ai e tausisi i le ala o le alofa?
20 Ua tatou vaaia i tagata o Ieova i aso nei le atamai o le mulimuli i le auala silisili o le alofa. O le mea moni, o le auala sili lea ma i so o se tulaga. Ia matau le auala na faamamafa ai e le aposetolo o Paulo lenā upu moni. Muamua, na ia faapea mai o le a mavae atu meaalofa a le agaga ma ua matua le faapotopotoga Kerisiano. Ona ia faapea mai lea: “A o lenei, e tumau nei mea e tolu, o le faatuatua, o le faamoemoe, ma le alofa; a o le aupito sili o nei mea, o le alofa lea.”—1 Korinito 13:13
21 Mulimuli ane, o le a taunuu mea uma o loo tatou faamoemoe i ai, o le mea lea e lē toe manaʻomia ai ona faatuatua i na mea. E lē toe manaʻomia ona faamoemoe i folafolaga ua faataunuuina, pe a faafouina mea uma. Ae ā le alofa? E lē uma. E tumau pea. Pe a oo mai le ola e faavavau, o le a tatou vāai ma malamalama ai i isi vala o le alofa o le Atua. E ala i le faia o le finagalo o le Atua, o le tausisi i le auala sili o le alofa e lē uma, o le a e tumau ai e faavavau.—1 Ioa. 2:17.
E Faapefea Ona E Tali?
• Aiseā e tatou te faaeteete ai i le faaaogā sesē o le alofa?
• O le ā e tatou te onosaia ona o le alofa?
• O le ā le uiga, e lē uma le alofa?
[Fesili mo le Suʻesuʻega]
[Faamatalaga faaopoopo i le itulau 27]
O le mau o le tausaga e 2010: ‘O le alofa, e tumau i mea uma. E lē uma le alofa.’—1 Kori. 13:7, 8.
[Ata i le itulau 25]
O le alofa i le Atua e uunaʻia ai i tatou e molimau atu
[Ata i le itulau 26]
O le alofa e lē uma na mafai ai e o tatou uso ma tuafafine i Malawi ona tutumau i tofotofoga