Haburas domin neʼebé hela nafatin
Haburas domin neʼebé hela nafatin
‘Domin tahan terus hotu. Domin hela nafatin.’—1 KOR 13:7, 8.
1. (a) Iha dalan saida mak ema konta kona-ba domin? (b) Ema barak hadomi liu saida?
DOMIN mak buat neʼebé ema hotu presiza. Tan neʼe, ema hakerek no fó sai buat barak kona-ba domin. Porezemplu, ema halo múzika, livru no filme barak neʼebé konta kona-ba domin, no buat sira-neʼe faʼan iha fatin barak. Maski nuneʼe, ema la hatudu domin neʼebé loos ba Maromak no ba ema seluk. Buat neʼebé Bíblia fó-hatene nanis kona-ba loron ikus sira akontese duni ohin loron. Ema “hanoin deʼit sira an hodi buka osan; . . . hakarak deʼit buka sira rasik nia ksolok liu fali hadomi Maromak”.—2 Tim 3:1-5.
2. Bíblia fó avizu saida kona-ba hadomi buat neʼebé la diʼak?
2 Ema hotu iha kbiit atu hatudu domin, maibé Maromak nia Liafuan fó avizu atu labele hadomi buat neʼebé la diʼak. Bíblia mós hatete kona-ba buat neʼebé akontese kuandu domin hanesan neʼe sai abut iha ema nia laran. (1 Tim 6:9, 10) Hanoin toʼok buat neʼebé apóstolu Paulo hakerek kona-ba Demas. Maski nia uluk serbisu hamutuk ho Paulo, maibé Demas hadomi fali buat neʼebé iha mundu. (2 Tim 4:10) Apóstolu João mós fó avizu ba ema kristaun kona-ba perigu neʼe. (Lee 1 Joao 2:15, 16.) Se ita hadomi Maromak no buat neʼebé mak mai husi nia, ita labele hadomi buat naran deʼit husi mundu neʼe neʼebé la hela kleur.
3. Ita presiza hadook an husi saida? Important atu hetan resposta ba pergunta saida deʼit?
3 Maski ita hela iha mundu neʼe, maibé ita laʼós mundu neʼe nian. Tan neʼe, ita presiza hadook an husi mundu nia hanoin sala kona-ba domin. Importante tebes atu ita la monu ba lasu atu hadomi buat neʼebé aat. Nuneʼe, liuliu ba sé mak ita tenke haburas no hatudu domin neʼebé la hanoin an deʼit? Saida deʼit mak ajuda ita atu bele haburas domin neʼebé tahan buat hotu no hela nafatin? Oinsá mak halo ida-neʼe diʼak mai ita ohin loron no diʼak ba ita-nia futuru? Atubele hetan resposta, ita presiza hatene Maromak nia hanoin atu ita bele halo tuir.
Haburas domin ba Maromak Jeová
4. Oinsá mak ita-nia domin ba Maromak bele sai boot?
4 Atu haburas ai ruma ita presiza habokur rai hodi fini bele moris no sai boot. Hanoin toʼok kona-ba toʼos-naʼin ida neʼebé serbisu makaʼas atu prepara rai no atu kuda fini. Nia hein katak fini sira sei moris no sai boot. (Ebr 6:7) Nuneʼe mós ita-nia domin ba Maromak tenke sai boot liután. Atu ida-neʼe akontese, ita presiza halo saida? Ita tenke habokur ita-nia laran neʼebé hanesan rai diʼak, iha neʼebé fini husi lia-loos kona-ba Maromak nia Reinu kuda tiha. Ita bele halo ida-neʼe hodi estuda Bíblia ho badinas atubele aumenta ita-nia koñesimentu kona-ba Maromak. (Kol 1:10) Tuir reuniaun beibeik no fó komentáriu mós bele ajuda ita atu aumenta ita-nia koñesimentu. Ita hakaʼas an atu halo kleʼan liután Ita-nia koñesimentu ka lae?—Prov 2:1-7.
5. (a) Oinsá mak ita bele aprende Maromak Jeová nia hahalok sira? (b) Saida mak ita bele hatete kona-ba Maromak ninia justisa, matenek, no kbiit?
5 Maromak Jeová hatudu sai ninia hahalok sira liuhusi ninia Liafuan. Hodi estuda Bíblia no kontinua atu hetan koñesimentu kona-ba Maromak Jeová, ita bele hafolin liután ninia hahalok, hanesan justisa, kbiit, matenek, no domin. Maromak Jeová hatudu ninia justisa iha ninia dalan hotu no iha ninia lei sira. (Deut 32:4; Sal 19:7) Kuandu ita hanoin kona-ba buat hotu neʼebé Maromak Jeová kria, ita bele hakfodak ho ninia matenek neʼebé boot liu hotu. (Sal 104:24) Buat hotu iha lalehan no rai hatudu katak Maromak Jeová iha kbiit makaʼas no forsa neʼebé nunka atu lakon.—Isa 40:26.
6. Oinsá mak Maromak hatudu ninia domin mai ita? Oinsá mak ida-neʼe book ita?
6 Oinsá mak Maromak hatudu ninia hahalok neʼebé domina liu, ninia domin? Nia hatudu ninia domin iha dalan barak neʼebé kona ita hotu. Nia hatudu nia domin hodi fó nia Oan nuʼudar sakrifísiu atubele salva ema hotu. (Lee Roma 5:8.) Maski Maromak halo ida-neʼe ba ema hotu, maibé ba deʼit ema neʼebé hafolin domin neʼebé nia hatudu no tau fiar ba ninia Oan nia sakrifísiu mak bele hetan bensaun husi ida-neʼe. (Joao 3:16, 36) Tanba Maromak fó Jesus nuʼudar sakrifísiu atu kasu ita-nia sala, ida-neʼe book ita atu hatudu fali domin ba nia.
7, 8. (a) Saida mak ita presiza halo atu hatudu domin ba Maromak? (b) Maromak nia atan sira halo tuir nafatin nia ukun-fuan maski hasoru saida?
7 Tanba buat hotu neʼebé Maromak halo tiha ona mai ita, oinsá mak ita bele hatudu fali domin ba nia? Bíblia hatete: “Ita-nia domin ba Maromak mak neʼe: katak ita halo tuir nia ukun-fuan sira. Nia ukun-fuan la susar mai ita.” (1 Joao 5:3) Sin, domin ba Maromak Jeová book ita atu halo tuir ninia ukun-fuan sira. Tan neʼe mak ita haklaken kona-ba Maromak nia naran no ninia Reinu, neʼebé ajuda ema seluk iha sira-nia moris. Kuandu ita halo ida-neʼe husi laran, ita hatudu duni katak ita halo tuir Maromak nia ukun-fuan tanba domin.—Mt 12:34.
8 Maski ema barak la gosta no la simu lia-loos kona-ba Maromak nia Reinu, maibé ita-nia irmaun-irmán iha mundu tomak kontinua nafatin atu halo tuir Maromak nia ukun-fuan. Sira la para atu hakaʼas an atu halo didiʼak sira-nia serbisu ba Maromak. (2 Tim 4:5) Nuneʼe mós ho ita, ita hakarak tebes atu fahe koñesimentu kona-ba Maromak ba ema seluk no ita mós hakarak atu halo tuir ninia ukun-fuan sira.
Tansá ita hadomi Jesus Kristu
9. Jesus tahan hasoru susar saida deʼit? Saida mak book nia atu tahan?
9 Ita hadomi Maromak, no mós ita iha razaun barak atu hadomi nia Oan. Tuir loloos, ita nunka hasoru Jesus, maibé bainhira ita aprende liután kona-ba nia, ita-nia domin ba nia sai boot liután. (1 Ped 1:8) Jesus nia domin ba ninia Aman mak book nia atu tahan hasoru susar sira. Jesus tahan hasoru susar saida deʼit? Bainhira nia halo tuir ninia Aman nia hakarak, ema odi nia la ho razaun ruma, haterus nia, duun sala nia, koʼalia aat hasoru nia. Nia mós hasoru susar seluk tan. (Lee Joao 15:25.) No mós, tan domin mak nia prontu atu fó nia moris nuʼudar sakrifísiu atubele salva ema barak.—Mt 20:28.
10, 11. Kristu nia domin book ita atu halo saida?
10 Jesus nia hahalok sira book ita atu halo buat ruma. Bainhira ita hanoin kona-ba buat neʼebé Kristu halo tiha ona mai ita, ita-nia domin ba nia sai boot liután. Nuʼudar Kristu nia dixípulu, ita presiza haburas no hatudu domin hanesan nia, hodi nuneʼe ita bele tahan kuandu halo tuir ninia mandamentu atu haklaken kona-ba lia-foun Reinu nian no atu halo dixípulu.—Mt 28:19, 20.
11 Tanba domin neʼebé Kristu hatudu ba ema hotu, ida-neʼe book ita atu hakarak halo hotu ita-nia serbisu antes rohan neʼe toʼo mai. (Lee 2 Korinto 5:14, 15.) Domin neʼebé Kristu hatudu mak buat neʼebé ajuda nia atu kumpre Maromak nia hakarak ba ema. No kuandu ita halo tuir ho didiʼak Kristu nia ezemplu, ida-neʼe ajuda ita ida-idak atu hola parte atu kumpre buat neʼebé Maromak hakarak halo ba ema. Atu halo ida-neʼe, ita presiza haburas domin ba Maromak iha buat hotu. (Mt 22:37) Hodi halo tuir buat neʼebé Jesus hanorin no ninia mandamentu sira, ita hatudu katak ita hadomi nia no katak ita hakarak duni atu apoia Maromak nia direitu atu ukun maski ita hasoru susar oioin. Hanesan neʼe ita hatudu katak ita banati-tuir Jesus.—Joao 14:23, 24; 15:10.
Buka dalan domin nian mak diʼak liu
12. Kuandu Paulo dehan “dalan diʼak liután”, neʼe katak sá?
12 Apóstolu Paulo banati-tuir Kristu. Tanba nia laʼo tuir Kristu nia ain-fatin ho didiʼak mak Paulo husu ninia irmaun-irmán sira atu banati-tuir nia. (1 Kor 11:1) Maski Paulo haruka ema kristaun sira iha Korintu atu kontinua buka kmanek espíritu nian, hanesan kmanek atu kura ema no atu koʼalia ho lia oioin, maibé nia mós hatudu ba sira katak iha buat ida neʼebé diʼak liu atu sira buka. Iha 1 Korinto 12:31, Paulo hakerek: “Maibé haʼu sei hatudu ba imi dalan diʼak liután.” Versíkulu sira antes no depois eskritura neʼe hatudu katak dalan diʼak liu neʼe mak domin. Tanbasá mak ida-neʼe diʼak liu? Paulo fó ezemplu atu esplika kona-ba ida-neʼe. (Lee 1 Korinto 13:1-3.) Se Paulo iha matenek ruma ka halo serbisu diʼak ruma maibé se nia la iha domin, neʼe iha folin ka lae? Lae duni! Tanba Maromak nia espíritu book Paulo mak nia hakerek lia-loos importante neʼe. No buat neʼebé nia hakerek book ita-nia fuan-laran, loos ka lae?
13. (a) Saida mak eskritura tinan nian ba tinan 2010? (b) Tanbasá mak domin sei hela nafatin?
13 Tuirmai, Paulo esplika mai ita saida mak domin no saida mak laʼós domin. (Lee 1 Korinto 13:4-8.) Agora, hanoin toʼok oinsá Ita rasik bele hatudu domin neʼebé loos. Haree toʼok liafuan iha versíkulu 7 nia parte primeiru no liafuan iha versíkulu 8 nia parte primeiru, neʼebé dehan: ‘Domin tahan terus hotu. Domin hela nafatin,’ neʼe mak ita-nia eskritura tinan nian ba tinan 2010. Maski iha tempu uluk kongregasaun kristaun neʼebé foin harii sei presiza kmanek espíritu nian, neʼebé inklui halo profesia no koʼalia ho lia oioin, maibé iha versíkulu 8 Paulo hatete katak buat sira-neʼe sei lakon. Sira sei la iha tan. Maibé domin sei hela nafatin. Maromak Jeová mak domin, no nia iha ba nafatin. Tan neʼe mak domin sei nunka atu lakon. Domin sei iha ba nafatin nuʼudar hahalok ida husi ita-nia Maromak neʼebé iha ba nafatin.—1 Joao 4:8.
Domin tahan terus hotu
14, 15. (a) Oinsá mak domin bele ajuda ita atu tahan terus? (b) Tanbasá mak irmaun joven ida la husik nia fiar?
14 Saida mak fó forsa ba ema kristaun atu bele tahan terus, susar, no problema naran deʼit? Domin neʼebé la hanoin an deʼit. Domin hanesan neʼe laʼós deʼit kona-ba husik sasán ka rikusoin. Maibé, ida-neʼe inklui prontu atu laran-metin nafatin maski ita lakon ita-nia moris tanba Kristu. (Lc 9:24, 25) Hanoin toʼok kona-ba Testemuña sira neʼebé laran-metin nafatin maski sira hetan terus iha dadur laran durante Funu Mundiál Segundu.
15 Irmaun joven ida husi rai-Alemaña naran Wilhelm fó ezemplu diʼak kona-ba ida-neʼe. Duké husik nia fiar, nia laran-metin nafatin maski ema Nazi sira tiru mate nia. Iha karta ikus antes nia mate, nia hakerek ba nia família: “Ita tenke hadomi Maromak liu fali buat hotu, hanesan ita-nia Ulun-Naʼin Jesus Kristu haruka. Se ita hamriik metin ba nia, nia sei fó bensaun mai ita.” Tempu balu liu tiha, iha The Watchtower, ninia família ida hakerek: “Iha tempu susar, ami nuʼudar família hakaʼas an atu sempre hadomi Maromak ulukliu fali buat hotu.” Ohin loron, irmaun barak neʼebé terus iha dadur laran iha rai-Arménia, rai-Eritreia, rai-Koreia Súl, no iha rai seluk tan mós hamriik metin nafatin iha sira-nia domin ba Maromak Jeová.
16. Irmaun sira iha rai-Malavi tahan susar saida deʼit?
16 Iha rai barak, irmaun sira hasoru situasaun neʼebé halo susar ba sira atu laran-metin nafatin. Durante tinan 26 Testemuña ba Jeová iha rai-Malavi tahan terus, hanesan governu bandu sira, ema fó terus sira, no hahalok aat barak seluk. Maibé, tanba sira tahan, sira hetan bensaun. Kuandu situasaun neʼe mosu, iha Testemuña maizumenus naʼin-18.000 iha rai neʼebá. Maibé, tinan 30 depois neʼe sira aumenta ba ema naʼin-38.393. Iha rai seluk mós iha esperiénsia hanesan neʼe.
17. Joven balu hasoru susar saida? Saida mak ajuda sira atu tahan nafatin?
17 Maski susar duni kuandu hasoru terus husi ema neʼebé kontra Maromak nia povu, maibé se ita-nia família rasik mak kontra ita, ida-neʼe bele sai susar liután. Jesus hatete nanis katak buat neʼe sei akontese, no ema barak ohin loron iha esperiénsia katak ninia liafuan loos. (Mt 10:35, 36) Joven balu hetan terus husi sira-nia inan-aman neʼebé laʼós iha lia-loos. Sira balu duni sai husi uma, maibé sira-nia maluk kristaun ho laran-diʼak simu sira atu hela hamutuk. Balu seluk, sira-nia inan-aman nega sira. Saida mak ajuda sira atu tahan nafatin? Laʼós deʼit sira-nia domin ba ema seluk, maibé liuliu tanba sira-nia domin ba Maromak Jeová no nia Oan.—1 Ped 1:22; 1 Joao 4:21.
18. Oinsá mak domin neʼebé tahan terus hotu bele ajuda ema kristaun neʼebé kaben?
18 Iha ita-nia moris, domin neʼebé tahan terus hotu mak importante atu hasoru situasaun barak seluk tan. Iha kaben laran, domin ajuda kaben-naʼin sira atu hafolin Jesus nia liafuan: “Buat neʼebé Maromak tau hamutuk, ema labele haketak.” (Mt 19:6) Kuandu ema kristaun neʼebé kaben “hetan susar iha sira-nia moris”, sira tenke hanoin-hetan katak Maromak Jeová mak parte importante iha sira-nia moris kaben nian. (1 Kor 7:28) Ninia Liafuan hatete katak “domin tahan terus hotu”, no kuandu laʼen no feen hatudu hahalok neʼe, sira-nia relasaun sei sai metin liu no moris kaben nian sei la naksobu.—Kol 3:14.
19. Saida mak Maromak nia povu halo kuandu iha dezastre naturál?
19 Domin mós ajuda ita atu tahan kuandu ita hasoru dezastre naturál. Ida-neʼe mak akontese iha rai-Perú kuandu rai-nakdoko, no mós iha rai-Estadus Unidus kuandu anin-boot naran Katrina estraga parte balu iha rai neʼe. Ita-nia irmaun-irmán barak lakon sira-nia uma no sira-nia sasán. Domin mak book irmaun-irmán barak iha mundu tomak atu fó ajuda, hanesan sasán no hahán, no sira balu halo serbisu voluntáriu atu hadiʼa no harii fali uma no Salaun Reinu sira. Hahalok hanesan neʼe hatudu katak ita-nia irmaun sira hadomi malu no tau matan ba malu iha tempu hotu no iha situasaun hotu.—Joao 13:34, 35; 1 Ped 2:17.
Domin hela nafatin
20, 21. (a) Tanbasá mak domin iha folin boot? (b) Tanbasá mak ita hakarak atu buka dalan domin nian?
20 Ohin loron, iha Maromak nia povu nia leet ita bele haree katak buka dalan domin nian mak fó rezultadu diʼak tebes. Loos duni, domin diʼak iha situasaun hotu. Haree toʼok oinsá mak apóstolu Paulo koʼalia kona-ba lia-loos neʼe. Depois nia koʼalia tiha kona-ba kmanek espíritu nian neʼebé sei lakon no kona-ba tempu neʼebé kongregasaun kristaun sai metin ona, nia hatete: “Neʼe duni, fiar, esperansa no domin sei hela, maibé ida neʼebé boot liu mak domin.”—1 Kor 13:13.
21 Ikusmai, buat sira neʼebé ita fiar sei sai loos no tan neʼe fiar ba ida-neʼe sei la presiza ona. Ita sei la presiza ona atu iha esperansa ba promesa sira neʼebé ita hein atu sai loos kuandu buat hotu sai foun ona. Maibé oinsá ho domin? Domin sei hela nafatin. Domin sei nunka lakon. Nuʼudar ita moris ba nafatin, ita sei haree no hatene buat barak tan kona-ba Maromak nia domin. Hodi halo tuir Maromak nia hakarak kona-ba buka dalan domin nian neʼebé hela nafatin, ita sei bele moris ba nafatin.—1 Joao 2:17.
Oinsá ita hatán?
• Tanbasá mak ita tenke kuidadu kona-ba hadomi buat neʼebé la diʼak?
• Domin ajuda ita atu tahan susar saida deʼit?
• Tanbasá mak domin sei hela nafatin?
[Pergunta estudu nian]
[Liafuan neʼebé foti husi pájina 27]
Eskritura tinan nian ba tinan 2010 mak: ‘Domin tahan terus hotu. Domin hela nafatin.’—1 Kor 13:7, 8.
[Dezeñu iha pájina 25]
Domin ba Maromak book ita atu haklaken
[Dezeñu iha pájina 26]
Domin mak ajuda irmaun-irmán sira iha rai-Malavi atu tahan terus