Seer Lun A Dooshima U Been Mayange Ga la
Seer Lun A Dooshima U Been Mayange Ga la
‘Dooshima taver ishima sha akaa cii. Dooshima been mayange ga.’—1 KOR. 13:7, 8.
1. (a) Mba hembe ôron kwagh u dooshima nena? (b) Ior kpishi hemba wan unô ikyo, man kanyi i hembe doon ve ishima?
ÍÔR kwagh u dooshima sha igbenda kposo kposo. I wuese ieren i injaa ne var var, shi ka i ôr kwagh u dooshima ken amo a gberen i wa bar sha mi kpaa. Dooshima ka ieren i hange hange i kwagh a gbe uumace sha mi yô. Kpa ashighe kpishi dooshima u ka i ôr kwagh na ken ityakerada kua ufiim la ka i lu dooshima u mimi ga, man ityakerada kua ufiim mban ta ijar ken kasua. Nahan kpa, mdoo u Aôndo man mbawanndor a vese doon se ishima sha mimi la ban je kunya kôr. Kwagh u Bibilo tsengeôron sha kwagh u ayange a masejime ne ngu eren se mba nengen. Ior “hingir mbawan ayol a ve ikyo tseegh man mba inyaregh ki doo ve ishima, . . . man mba iember i iyolough i hembe doon ve a Aôndo” yô.—2 Tim. 3:1-5.
2. Bibilo ta icin sha kwagh u mimi ga la ér nyi?
2 Uumace vea fatyô u tesen dooshima, nahan kpa Mkaanem ma Aôndo ta se icin sha kwagh u dooshima u mimi ga la. Shi Bibilo pase kwagh u ka a er zum u imba dooshima la a we amishe ken ishima i or yô. (1 Tim. 6:9, 10) Ú umbur kwagh u apostoli Paulu yange nger sha kwagh u Dema la kpa? Shin er Dema luun vea Paulu nahan kpa, tar va hingir u doon un ishima kpishi. (2 Tim. 4:10) Apostoli Yohane kpa ta Mbakristu icin sha imba kwaghbo ne. (Ôr 1 Yohane 2:15, 16.) Aluer tar doo or ishima kua igbenda i u man akaa a taregh a aa va kar kera la yô, Aôndo iyol na kua akaa a a dugh her a na la cii doo nan ishima ga.
3. Ka mtaver u nyi se tagher a mini, man ka mbampin mba nyi ve dugh kere?
3 Shin er se lu shin tar ne nahan kpa, se mba ior i tar ne ga. Sha nahan yô, se mba tagher a mtaver u nôngon ser se palegh mnenge u kpeegh u tar u lu a mi sha kwagh u dooshima la. Gba hange hange u se palegh u gban ken imeen i dooshima u mimi ga la. Nahan ka an i gbe u se tese nan dooshima? Ka akaa a nyi nahan a wasen se u seer lun a dooshima u a taver ishima sha akaa cii shi a been mayange ga laa? Dooshima ne una wase se hegen zan zan ken hemen kpaa nena? Gba u se fa mnenge u Aôndo sha kwagh u dooshima sha er mnenge na la una kôôm se yô.
Mdoo u Yehova a Doo U Ishima la a Seer Vesen
4. Mdoo u doon a Aôndo la una seer vesen ken a vese nena?
4 Se er nan ve mdoo u Yehova a doo se ishima la una seer vesen ken a vese? Hide nenge ase er orsule ka nan er tom kpoghuloo, nan kaha sule cii ve nan mase lôôn ivor la. Ka nan ver ishima ér ivor i nan lee la i vese. (Heb. 6:7) Kape i gbe u mdoo u Aôndo a doo se ishima la kpa una vesen ken a vese je la. Kpa kanyi se er ve dooshima ne una seer vese ken a vese? Gba u se er tom hen inya i dedoo i ken ishima yase, hen ape i te ivor i mimi u Tartor la. Se er kwagh ne sha u henen Mkaanem ma Aôndo sha gbashima sha er se fa un se seer yô. (Kol. 1:10) Aluer se mba zan mbamkombo mba tiônnongo hanma shighe shi se mba wan zwa sha akaaôron a ker la kpaa yô, se seer zuan a mfe. Nahan se asange asange se mba nenge sha afatyô wase hanma shighe cii ser se seer zuan a mfe kpa?—Anz. 2:1-7.
5. (a) Se hen kwagh sha aeren a Yehova a vesen la nena? (b) Ú ôr kwagh u ijirôron i Aôndo i mimi man kwaghfan na kua tahav nav wer nyi?
5 Yehova pase iyol na ken Mkaanem nam. Aluer se mba timen ken Ruamabera shi zuan a mfe u Yehova seer yô, se seer fan aeren a Aôndo, er ijirôron i mimi man tahav man kwaghfan kua dooshima, u a lu ieren na i vesen la nahan. Atindiakaa a Yehova man igbenda na cii tese ijirôron i mimi. (Dut. 32:4; Ps. 19:7) Aluer se hide se gbidye kwar sha hanma kwagh u Yehova a gbe yô, a kpiligh se iyol er kwaghfan na a gande ave yô. (Ps. 104:24) Sha man tar kua akaa a a lu ken a ve cii tese ér Yehova ka Imbor i agee a vesen kua tahav mbu been mayange ga.—Yes. 40:26.
6. Aôndo tese se dooshima na nena, man dooshima la bende a we nena?
6 Se kaa ser nyi sha kwagh u dooshima u Aôndo, u a lu ieren na i vesen laa? Dooshima na la vese shi a bende a vese cii. A tese se dooshima la sha u nan ipaan sha u yiman uumace. (Ôr Mbaromanu 5:8.) Ipaan ne ngi sha ci u uumace cii, kpa ka mba Aôndo a doo ve ishima shi ve ne Wan na jighjigh la tseegh vea zua a mtsera u ipaan la ye. (Yoh. 3:16, 36) Er Aôndo a ne Yesu ér a lu nagh ku iwom sha ci u asorabo a ase yô, gba u Aôndo una doo se ishima.
7, 8. (a) Kanyi i gbe u se er sha ci u tesen ser Aôndo doo se ishima? (b) Kanyi mbacivir Aôndo ve tagher a mi kpa ve gbe uwer u kuran atindi a na ga?
7 Se tese ser Aôndo doo se ishima sha akaa a a er sha ci wase la nena? Mlumun u mkaanem nam ma ne ne ngu a inja kpen kpen, ma kaa ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yoh. 5:3) Ka mimi, dooshima u Yehova Aôndo mgbeghan se u kuran atindi a na. Ka ityôkyaa i môm i se lu eren shiada sha kwagh u iti na man Tartor na, man mbagenev kpa ve lu zuan a mtsera je la. Aluer se mba eren nahan a ishima yase cii yô, se lu tesen ser se mba kor atindi a Aôndo a awashima u wang.—Mat. 12:34.
8 Anmgbianev asev tar sha won cii kange ishima u kuran atindi a Yehova, shin er ve lu tagher a mba uwer u gbe ve shi ve vende u ungwan loho u Tartor la nahan kpaa. Ve gba uwer ga, mba nôngon ér vea kure tom ve u pasen kwagh la doo doo. (2 Tim. 4:5) Se kpa kape ishima ka i mgbegha se u pasen ior mbagenev mkaanem ma Aôndo shi kuran atindi a na agen kpaa je la.
Er i Hii ve Ter Wase Yesu Kristu a Doo Se Ishima Yô
9. Kristu yange taver ishima a nyi, man lu nyi i mgbegha unu?
9 Dugh mdoo u Aôndo a doo se ishima la sha yô, atôakyaa agen kpa nga kpishi a a ne ve Wan na a seer doon se ishima yô. Shin er se nenge a Yesu shighe môm ga nahan kpa, er se lu henen kwagh na seer yô, ngu doon se ishima seer a seer. (1 Pet. 1:8) Ka akaa agen a nyi Yesu taver ishima sha mini? Shighe u lu kuren awashima u Ter na shin tar la, ior kôr un ihyom a ityôkyaa shio, shi i tôv un a ican shi i wa un mbaaie iyol shi i tuhwa un, shi i hee un sha igbenda igen kpaa. (Ôr Yohane 15:25.) Yesu yange taver ishima a ameen la sha ci u Ter na u sha la doo un ishima. Er dooshima mgbegha un u nan uma na sha ci u ior yô, nagh ku na sha uma na la hingir ipaan sha ci u ior kpishi.—Mat. 20:28.
10, 11. Se wa ishima u eren nyi sha kwagh u Kristu a er sha ci wase laa?
10 Ishimataver i Yesu la mgbegha se u vengese. Ka sea hen sha kwagh u Kristu a er sha ci wase la nahan, a seer doon se ishima. Er se lu mbadondon un yô, awashima wase a lu u lun a imba dooshima u Kristu kpa lu a mi la ken a vese shi zan hemen u tesen dooshima shon, sha er se taver ishima u kuran tindi na u a we ér se pase kwagh u Tartor shi se gema ior ve hingir mbahenen la yô.—Mat. 28:19, 20.
11 Mdoo u uumace ve doo Kristu ishima la na yô, se nenge ser gba kpee u se er tom u a ne se ne se kure cii ve a mase timin tar ne ye. (Ôr 2 Mbakorinte 5:14, 15.) Lu dooshima u Kristu tesen la wase un u kuren awashima u Aôndo sha ci u uumace ye. Shi ikyav i Kristu a ver ér se dondo la i wasen hanmô wase u lun a ci ken awashima u Aôndo la. U se lu a ci ken awashima u Aôndo ne yô, gba u Aôndo una hemba doon se ishima cii. (Mat. 22:37) Aluer se wa ikyo sha ityesen i Yesu shi se mba kuran atindi a na yô, se lu tesen ser a doo se ishima, nahan se kange ishima ser, a lu nyi je ia er kpa, se ta ikyaa a hemen u Aôndo, er Yesu nahan.—Yoh. 14:23, 24; 15:10.
Tsua Dooshima u a Lu Gbenda u Hemban Jimin cii La
12. Inja i ishember i “gbenda u hemban jimin cii” i Paulu ôr kwagh u i̱ la ér nyi?
12 Apostoli Paulu yange eren kwagh er Kristu nahan. Er Paulu tôôn sha angahar a Kristu vough vough hanma shighe yô, lu a vangertiôr u taver anmgbianev nav ishima ér ve lu mba kaven un. (1 Kor. 11:1) Shin er Paulu taver Mbakristu mba ken Korinte ishima ér ve nôngo ngeegh sha u zuan a uiyua mba ken jijingi mbagenev mba í yaren tom a mi ken deri anyom u hiihii, er u been ior iangev man u lamen ken ijô igen la nahan kpa, a tese ve ér kwagh ugen ngu u a hembe lun a inja, u i gbe u vea tsua u eren yô. A pase ken 1 Mbakorinte 12:31 ér: “Man me gema me tese ne gbenda u hemban jimin cii.” Kwagh u avur a Bibilo a dondon sha ivur ne a er la tese ér, gbenda u hemban jimin cii u Paulu lu ôron la ka dooshima. Dooshima lu gbenda u hemban jimin cii inja nena? Paulu za hemen u pasen inja i kwagh u lu ôron yô. (Ôr 1 Mbakorinte 13:1-3.) Luun er Paulu yange una lu a uiyua mbagenev shi una er akaa a kpilighyol, kpa una gem a lu a dooshima ga nahan, ma lu un a inja sha nyi? Yange ma lu un a inja sha ma kwagh môm môm ga! Er jijingi u Aôndo mgbegha un yô, a pase mimi u hange hange ne. Paulu wase se kpishi u kaven inja i kwagh ne!
13. (a) Ivur i sha inyom ken inyom i 2010 ér nyi? (b) Dooshima been mayange ga nena?
13 Paulu za hemen u pasen se kwagh u a lu dooshima man u a lu dooshima ga yô. (Ôr 1 Mbakorinte 13:4-8.) Nahan tôô ase shighe time sha mlu wou nenge wea eren akaa a i gbe u ú eren ve a lu ieren i dooshima la yô. Hemba veren ishima sha vegher u masetyô u ivur i sha 7 la, kua vegher u hiihii u ivur i sha 8 la, i kaa ér: ‘Dooshima taver ishima sha akaa cii. Dooshima been mayange ga,’ man ka ivur ne ia lu ivur yase i sha inyom ken inyom i 2010 ye. Umbur wer ken ivur i sha 8 la, Paulu kaa ér uiyua mba ken jijingi mba yange i yaren tom a mi shighe u i hii veren tiônnongo u Kristu la, er u ôron akaaôron a profeti man u lamen ken ijô igen nahan cii, a va kar a mi kera. Vea bee. Kpa dooshima yô una lu heregh gbem. Ka Yehova iyol na a lu dooshima ye, man un ka u tsôron. Nahan dooshima una bee mayange ga. Er dooshima a lu ieren i dedoo i Aôndo wase u tsôron yô, una za hemen u lun gbem sha wôn.—1 Yoh. 4:8.
Dooshima Taver Ishima sha Akaa Cii
14, 15. (a) Dooshima una wase se u taver ishima a ameen nena? (b) Gumor ugen u civir Yehova yange lumun u undun mimi na ga sha ci u nyi?
14 Kanyi ka i wase Mbakristu u taver ishima a ameen man mbamtaver kua mbamzeyol mba ve tagher a mi laa? Kwagh u ka a wase ve jighilii yô, ka dooshima u mimi la. Dooshima la hemba u or den ér akaa a nan a saa nan di tseegh tsô la. Ka u se tilen sha mimi wase her shi lumun ser uma wase a saa sha ci u Kristu je kpaa. (Luka 9:24, 25) Hide hen sha kwagh u Mbashiada mba Yehova mba taver asema mba yange i wuhe ve ve ya ican ken afo a mbakwarev kua ken purusu shighe u i lu nôngon Ityav mbi Tar Cii mbi sha Uhar la, kua shighe u i nôngo mbi i bee kera la.
15 Kwagh u gumor ugen u civir Yehova ken tar u Jamani, iti na ér Wilhelm, la tese kwagh ne wang. Mbanazi yange ve kôr un ér vea wua, kpa tile sha mimi na her. Yange nger tsombor na washika u pasen ve er un lu hiden ga yô, a kaa ér: “Kwagh u vesen yô, Aôndo a doo se ishima, er Orhemen wase Yesu Kristu wa se tindi nahan. Aluer se ta ikyaa a na yô, una na se injar.” Shighe kar yô, anngô na u kwase nger ken Iyoukura wener: “Hen shighe u tsombor wase lu ken ishimanyian kpishi la, se kange ishima ser mdoo u Aôndo a doo se ishima la a luun kwagh u hiihii hen a vese hanma shighe cii.” Ka kwagh u anmgbianev mbagenev kpishi mba ve lu taver ishima ken purusu ken tar u Armenia man Eritrea man South Korea kua ityar igenegh ainge la kpa ve kange ishima u eren je la. Yehova ngu doon anmgbianev mban ishima her kpoghuloo.
16. Anmgbianev mba ken Malawi yange ve taver ishima ken atsan a nyi?
16 Sha ajiir kpishi, anmgbianev asev mba tagher a ameen anza kposo kposo a karen jighjigh ve u nan kua ishimataver ve. Mbashiada mba Yehova mba ken tar u Malawi yange ve tagher a ahendan kua atsan kpishi shi gomoti wa ve tswer, kpa ve taver ishima zan zan anyom 26. Yange ve zua a injar sha ishimataver ve la. Shighe u i hii u tôvon Mbashiada mba Yehova a ican ken tar u Malawi la, ve kuma er iorov 18,000 nahan tseegh. Anyom ikyundugber nga kar yô, ve seer ngeen je kuma er iorov 38,393 nahan, hemba er yange ve lu la je kuma kwa har man kwagh. Ken ityar igen kpa kape anmgbianev ve zough a injar sha ishimataver ve je la.
17. Kanyi mbagenev mba ve lu hen icombor i mbananjighjighga ve tagher a mini, man er i er a ve dang nahan kpa, ve taver ishima sha ci u nyi?
17 Mbacivir Aôndo ka ve ya ican kpishi shighe u mbaahendanev ve mough ayôôso a ve yô. Kpa zum u Mbakristu asange asange ve tagher a mtev u sha ican sha ikyev i mba hen tsombor ve yô, ka i hemba taver ve cii. Ior mba hen ya u or shin mba hen tsombor u nan vea fatyô u nan nan ishimanyian. Ka kwagh u Yesu tsengaôron ér una er ne gaa? Ka un yumu, man ior kpishi nenge a kwagh u yange ôr la. (Mat. 10:35, 36) Agumaior nga tagher a ahendan sha ikyev i mbamaren vev mbananjighjighga, kpa ve taver ishima her. Mbagenev je yô, i zenda ve hen uya vev kera, kpa Mbashiada mba lun a dooshima mba nengen sha a ve doo doo. Mbagenev di icombor ve venda ve. Er i er a ve dang nahan kpa, kanyi i wase ve u taver ishima? Ka er anmgbianev ve doo ve ishima la tseegh ga, kpa kwagh u a hembe wasen ve yô, ka er Yehova man Wan na ve doo ve ishima sha mimi la.—1 Pet. 1:22; 1 Yoh. 4:21.
18. Dooshima u a taver ishima sha akaa cii la una wase noov man kasev mba ken Kristu nena?
18 Ashighe agen kpa nga a ka i gba u uma una har sha dooshima u a taver ishima sha akaa cii la yô. Ken ivaa kpa, dooshima ka a wase nom man kwase u kuran kwagh u Yesu ôr ér: “Kwagh u Aôndo je zua yô, or a̱ de kera paven un ga” la. (Mat. 19:6) Shighe u noov man kasev mba ken Kristu ve lu yan “ican ken iyol” yô, doo u vea umbur ayol a ve er Yehova a lu hange hange ken ivaa ve la yô. (1 Kor. 7:28) Mkaanem Nam kaa ér, “dooshima taver ishima sha akaa cii,” nahan aluer nom man kwase haa dooshima iyol yô, una wase ve u doon ayol a ve shi taver ivaa ve la kpaa.—Kol. 3:14.
19. Kanyi yange i za hemen hen atô u mbacivir Aôndo shighe u uaahe er laa?
19 Dooshima wasen se u taver ishima sha akaa cii shighe u aahe a er yô. Imba kwagh ne yange i er shighe u imbusutariyan i tar u Peru tenger shi ijeverahumbe vihi ajiir agen ken imbusutariyan i tar u Amerika yô. Uaahe mbara yange ve vihi uyaav mba anmgbianev asev kpishi, shi akaa a ve agenegh kpishi saa ishe. Kpa dooshima mgbegha mzough u anmgbianev tar sha won cii u nan iwasen, shi mbagenev na ayol a ve sha u za wasen u hiden maan uya mba iorov shi sôron Ayou a Tartor kpaa. Akaa a ve er ne tese ér anmgbianev asev doo ayol a ve shi mba we mbagenev ikyô hanma shighe, kua ken hanma mlu u ve nyer ker cii.—Yoh. 13:34, 35; 1 Pet. 2:17.
Dooshima Been Mayange Ga
20, 21. (a) Dooshima hemba sha hanma gbenda cii sha ci u nyi? (b) Ú kange ishima wer u tsua gbenda u dooshima sha ci u nyi?
20 Se nenge a kwaghfan u tsuan dooshima, u a lu gbenda u hemban jimin cii la ken mbacivir Yehova nyian. Mimi je, dooshima hemba sha hanma gbenda cii. Ver ishima sha gbenda u apostoli Paulu yange ôr mimi ne var var yô. A hii tesen ér a va kar a uiyua mba ken jijingi kera shi tiônnongo u Kristu una vese zan zan una ar sha iaven i tsough la. Nahan a mase kuren ér: “Hegen yô, akaa ne nga lun her, ka jighjigh u nan man ishimaverenkeghen kua dooshima, nga atar je; kpa kwagh u hemban ken a yô, ka dooshima.”—1 Kor. 13:13.
21 Ken masejime yô, akaa a se ne jighjigh a mi la cii se va nenge a mi, nahan ityôkyaa ia kera lu i nan akaa shon jighjigh ga. Akaa cii aa va hingir a he yô, se kera lu a ishimaverenkeghen sha uityendezwa mba i saa se pe ve kure la ga. Kpa gema dooshima di ye? Dooshima una bee mayange ga. Una lu her. Se zuan a uma u tsôron yô, se seer nengen shi kaven inja i dooshima u Aôndo la sha igbenda igen kpaa. Aluer u tsua dooshima u been mayange ga, u a lu gbenda u hemban jimin cii la sha u eren ishima i Aôndo yô, alaghga u lu uma gbem sha won.—1 Yoh. 2:17.
Ú Na Mlumun Wer Nyi?
• Doo u se palegh dooshima u mimi ga la sha ci u nyi?
• Dooshima una fatyô u wasen se u taver ishima sha nyi?
• Dooshima been mayange ga inja nena?
[Mbampin Mba Ngeren u Henen]
[Mkaanem ma sha peeji 27]
Ivur i sha inyom i ken inyom i 2010 la a lu: ‘Dooshima taver ishima sha akaa cii. Dooshima been mayange ga.’ —1 Kor. 13:7, 8.
[Foto u sha peeji 25]
Mdoo u Aôndo a doo se ishima la ngu a mgbegha se u pasen mbagenev kwagh
[Foto u sha peeji 26]
Dooshima u been mayange ga la wase anmgbianev asev mba nomso man mba kasev mba ken tar u Malawi u taver ishima ken ameen