Jchʼiestik li kʼanelal ti mu snaʼ xlaj-o skʼoplale

Li kʼanelale tstsʼik yuʼun skotol. Mu xlaj-o skʼoplal. (1 COR. 13:7, 8)

1. 1) ¿Kʼu yelan chalbeik skʼoplal li kʼanelale? 2) ¿Kʼusitik yakʼoj ta yoʼontonik skʼanel li krixchanoetike?

 LI KʼANELALE jaʼ jtos ti kʼusi toj tsots skʼoplal chtun yuʼun chaʼi li jun krixchanoe, ti ep kʼusitik chichʼ alel ta skoje. Ta melel, mu jechuk ti kʼuyelan chalbeik skʼoplal kʼanelal li ta kʼejimoletike, novelaetik xchiʼuk li ta pelikulaetike. Toj vokol xa ta tael krixchanoetik ti skʼanojik Dios xchiʼuk xchiʼiltakik li ta slajebal kʼakʼal liʼe. Jech kʼuchaʼal yaloj Vivliae, jaʼ mas ep li krixchanoetik ti «jaʼ noʼox tspasic cʼusi tscʼan stuquic», «ta xbat yoʼntonic yuʼun taqʼuin» xchiʼuk «jaʼ batem ta yoʼntonic o li cʼusi tscʼan stuquique; mu jaʼuc tsaʼic li Diose» (2 Tim. 3:1-5).

2. ¿Kʼusi pʼijubtasel chakʼbutik Vivlia ta sventa skʼanel li kʼusi mu stakʼe?

² Akʼo mi jkotoltik jnaʼ xi jkʼanvan, li sKʼop Diose tspʼijubtasutik ti mu jaʼuk jkʼupintik o jkʼantik li kʼusi mu stakʼe xchiʼuk chalbutik ti kʼusi xuʼ jnuptantik ta skoje (1 Tim. 6:9, 10). Jvules ta joltik li buchʼu laj yalbe skʼoplal Pabloe, jaʼ li Demas ti jaʼ bat ta yoʼonton skʼanel li  balumile (2 Tim. 4:10). Jaʼ chalbe skʼoplal Juan ek kʼalal chalbutik ti akʼo xkichʼ jpʼijiltike (kʼelo 1 Juan 2:15, 16). Jamal lek xvinaj chaʼa, ti mu stakʼ jkʼantik Dios xchiʼuk li kʼusitik chakʼbutik mi jaʼ jkʼanojtik li balumil liʼe xchiʼuk li kʼusitik yuʼun ti poʼot xa xlaje.

3. ¿Kʼusi xibal sba xuʼ jnuptantik, xchiʼuk kʼusitik skʼan jtakʼtik?

³ Melel onoʼox ti maʼukutik sventa balumile, pe liʼ nakalutike jaʼ yuʼun xiʼel jchanbetik li kʼusi mu jechuk tsnop ta sventa li kʼanelale. Jech oxal, toj lek me ti xi jakʼbe jbatike: ¿Buchʼutik skʼan jkʼantik? ¿Kʼuxi ta chʼiesel li kʼanel sventa yajtsʼaklom Cristoe, ti stsʼik yuʼun skotole xchiʼuk ti mu xlaj-o skʼoplale? ¿Kʼusitik lek ta jtatik avi xchiʼuk ta tsʼakal mi chi jkʼanvane? Jkʼeltik kʼusi tstakʼbutik Dios sventa xkakʼ batel ta jkuxlejaltik.

Jchʼiestik li kʼanelal ta stojolal Jeovae

4. ¿Kʼuxi xuʼ jchʼiestik li kʼanelal ta stojolal Jeovae?

⁴ Li yajtsʼaklomutik Cristoe skʼan jchʼiestik li kʼanelal ta stojolal Jeovae. Jnopbetik skʼoplal jun jtsʼunolajel ti tsots ch-abtej sventa tslok li yosile xchiʼuk ti tstsʼunolaje, spatoj yoʼonton ti chchʼi li kʼusi tstsʼune (Heb. 6:7). Taje jaʼ me jech skʼan xchʼi kuʼuntik li kʼanelal ta stojolal Diose. Pe ¿kʼusi stakʼ jpastik? Skʼan jlokbetik sbalumilal xkaltik ek li koʼontontike, ti jaʼ te tsʼunul li sbekʼ mantale. Skʼan baxbolukutik ta xchanel Vivlia sventa xkojtikintik mas li Jeovae (Col. 1:10). Yan kʼusi tskoltautik xtoke jaʼ ti xi jbat ta stekel tsobajeletik xchiʼuk ti xkakʼ jloʼiltik tee. Xi jakʼbe jbatike: «¿Mi nopajtik noʼox chkakʼbe yipal sventa xkojtikin batel mas li kʼusitik chal Vivliae?» (Pro. 2:1-7).

5. 1) ¿Kʼuxi stakʼ xkilbetik li stalelal Jeova ti mas toj tsots skʼoplale? 2) ¿Kʼusi labal chavaʼi ta sventa li stukʼilal Diose, li spʼijile xchiʼuk li sjuʼele?

⁵ Te chal kʼuyelan stalelal Jeova li ta Vivliae. Jaʼ yuʼun kʼalal ta jchantik xchiʼuk chkojtikintik batel mas li Diose, mas to me chchʼi ti kʼuyelan jkʼanojtike: li stukʼilale, li spʼijile, li sjuʼele xchiʼuk li kʼanelal yuʼun ti stuk noʼox jeche. Kʼalal ta jkʼelbetik lek kʼuyelan stalelale te chkiltik kʼuyelan li stukʼilale xchiʼuk ti tukʼ li smantaltake (Deu. 32:4; Sal. 19:7). Kʼalal ta jnopbetik skʼoplal li kʼusitik spasoj xtoke te chkiltik ti toj echʼ xa noʼox pʼije (Sal. 104:24). Kʼalal ta jkʼeltik li vinajel-balumile te chkiltik ti toj echʼem stsatsal xchiʼuk ti toj echʼem sjuʼele (Isa. 40:26).

6. ¿Bu laj yakʼ ta ilel Dios ti toj echʼem xa noʼox skʼanojutike, xchiʼuk kʼusi skʼan jpastik?

⁶ Pe ¿kʼusi xuʼ xkaltik li ta stalelal Dios ti mas lek xvinaje, ti jaʼ li kʼanelale? Li Jeovae tskʼan chakʼbe yil epal krixchanoetik ti skʼanojane. Jech, yuʼun ta jtabetik sbalil jtekeltik taje. Laj yakʼ ta ilel ti kʼanvanem kʼalal la spoj li krixchanoetike (kʼelo Romanos 5:8). Xuʼ sta skotol krixchanoetik li matanal taje, jaʼ noʼox venta mi tskʼanik li Dios eke xchiʼuk ti chakʼ xchʼunel yoʼontonik ta stojolal li xNichʼone (Juan 3:16, 36). Ta melel, sta-o tajek li jTotik ti akʼo jkʼan ta sjunul koʼontontik ta skoj ti laj yakʼ ta matanal Jesús ta sventa jmultike.

7, 8. 1) ¿Kʼuxi xuʼ xkakʼtik ta ilel ti jkʼanojtik Diose? 2) ¿Kʼu yelan stalelal krixchanoetik ti muʼyuk tsmakutik ta be ta xchʼunbel li smantaltak Diose?

⁷ Pe ¿kʼuxi xuʼ xkakʼbetik yil Jeova ti jkʼanojtik xchiʼuk ti koliyal chkalbetik ta skoj li kʼusitik spasoj ta jtojolaltike? Jkʼeltik kʼuxi lek jamal tstakʼ li Vivliae: «Me jcʼanojtic o li Diose, ta jchʼunbetic li smantaltaque. Muʼyuc tsots ta chʼunbel chcaʼitic li smantaltaque» (1 Juan  5:3). Kʼuchaʼal chkiltike, mi jkʼanoj li jTotike skʼan me jpastik li kʼusi tskʼanbutike. Jaʼ jtos srasonal ti ta jpukbetik echʼel li sbie xchiʼuk li Ajvalilal yuʼune, jun abtelal ti xuʼ stabeik sbalil li buchʼutik chaʼiik kʼusi chkalbetike. Kʼalal ta koʼontontik chlokʼ ti jech ta jpastik li abtelal taje, ta me xkakʼtik ta ilel ti ta sjunul koʼontontik ta jchʼunbetik smantal li Diose (Mat. 12:34).

⁸ Melel onoʼox ti ep krixchanoetik ti muʼyuk ta yoʼontonik mantale xchiʼuk ti tspʼajike. Pe li voʼotike chkakʼbetik-o yipal ta yakʼel ta ojtikinel li Jeovae, jech kʼuchaʼal tspas kermanotaktik ta spʼejel Balumile, ta jpas li kabteltik ta stojolal Diose xchiʼuk ta jchʼunbetik li yan smantaltake (2 Tim. 4:5).

Kʼu yuʼun jkʼanojtik li Jesucristoe

9. ¿Kʼusitik vokolil la stsʼik li Cristoe, xchiʼuk kʼu yuʼun?

⁹ Ti jech jkʼanojtik Diose jaʼ tstij koʼontontik ti akʼo jkʼantik li xNichʼone. Pe oy to ep srasonal kuʼuntik ti jech jkʼanojtik li Jesuse. Melel onoʼox ti muʼyuk kilojtike, pe mas me ta jkʼantik mi chkojtikinbetik batel mas li xkuxlejale (1 Ped. 1:8). ¿Kʼusitik vokolal la stsʼik? Akʼo mi la spas li kʼusi tskʼan yoʼonton sTote, chʼabal srasonal ti la spʼajike, la skontrainik, la sabeik smul, laj yutik xchiʼuk la xkʼexlaltasik ta jyalel (kʼelo Juan 15:25). Jaʼ ta skoj ti kʼanvanem xtok ti laj yakʼ xkuxlejal ta stojolal krixchanoetike (Mat. 20:28).

10, 11. ¿Kʼusi tstij koʼontontik ta spasel ti skʼanojutik li Cristoe?

¹⁰ Kʼalal ta jnoptik ti kʼusitik spasoj Jesuse, jaʼ tstij koʼontontik xchiʼuk mas ta jkʼantik-o. Skʼan jchantik xi jkʼanvan ek ta skoj ti jaʼ yajtsʼaklomutike. Mi jech ta jpastike jaʼ me tskoltautik ti akʼo jpas-o batel li abtelal yakʼojbutike: chkalbetik batel skʼoplal li Ajvalilal yuʼun Diose xchiʼuk ti jpastik ta yajtsʼaklom Cristo li krixchanoetike (Mat. 28:19, 20).

¹¹ Ti kʼuyelan laj yakʼ ta ilel ti skʼanoj krixchanoetik li Cristoe, jaʼ me chkakʼbetik-o yipal sventa jpastik li abtelal akʼbilutik kʼalal mu to chvul li slajeb kʼusitike (kʼelo 2 Corintios 5:14, 15). Mu me jchʼay ta joltik ti jaʼ chtijbat-o yoʼonton Jesús li kʼanelal sventa xkʼot ta pasel li kʼusi tskʼan tspas Dios ta sventa krixchanoetike. Mi ta jchanbetik lek stalelal li Jchanubtasvaneje ta me spas kuʼuntik li kʼusi jbainojtik ta sventa li kʼusi tskʼan tspas Diose. Sventa spas kuʼuntik taje skʼan me jchʼiestik bu kʼalal xuʼ kuʼuntik li kʼanelal ta stojolal Dios xtoke (Mat. 22:37). Mi ta jpastik li kʼusi laj yakʼ ta chanel Cristo xchiʼuk li smantaltake jaʼ me jech chkakʼtik ta ilel ti jkʼanojtike xchiʼuk ti oy ta koʼontontik ta jpakbetik skʼoplal li mukʼul pas mantal yuʼun Dios kʼuchaʼal la spas stuke, akʼo mi xkil jvokoltik ta skoj (Juan 14:23, 24; 15:10).

Xanavkutik echʼel li ta be ti toj leke

12. ¿Kʼusi laj yalbe skʼoplal Pablo kʼalal xi laj yale: «Jun be ti toj leque»?

¹² Ti buchʼu toj lek la xchanbe stalelal Jesuse jaʼ li Pabloe, jaʼ yuʼun laj yalbe yermanotak ta Corinto ti akʼo xchanbat stalelale (1 Cor. 11:1). Laj yalbe yermanotak ti akʼo yakʼik persa ta stael li matanaletik ta sventa li yajtsʼaklomtak Cristo ta baʼyel sigloe, jech kʼuchaʼal ti chkʼopojik ta yan kʼope xchiʼuk li xpoxtael jchameletike, akʼo mi jech, laj yalbe ti akʼo xakʼ ta yoʼontonik  stael yan kʼusi ti mas toj leke. Xi laj yale: «Vuʼun chacacʼboxuc avilic jun be ti toj leque» (1 Cor. 12:31). Kʼalal ta jkʼeltik li yan versikuloetik ta olone, te chkakʼtik venta ti jaʼ chalbe skʼoplal li kʼanelale. Pe ¿kʼusi smelolal ti jaʼ «jun be ti toj leque»? Te ta jtabetik stakʼobil li ta lokʼolkʼop laj yalbe skʼoplal Pablo liʼe (kʼelo 1 Corintios 13:1-3). Li kʼusi laj yal Pablo ti akʼbat snaʼ yuʼun Diose chakʼ kiltik ti toj ep kʼusitik labalik sba spas yuʼun li krixchanoe, pe mu me kʼusi xtun-o mi muʼyuk kʼanvaneme. ¡Chkʼot ta oʼontonal ti kʼuyelan laj yal li kʼusi toj tsots kʼoplal taje!

13. 1) ¿Kʼusi jaʼ li teksto ta sventa sjabilal 2010? 2) Alo kʼusi smelolal ti «mu xlaj o scʼoplal» li kʼanelale.

¹³ Li Pabloe chal kaʼitik kʼuyelan li kʼanelale (kʼelo 1 Corintios 13:4-8). Jkotoltik me skʼan jkʼel jbatik ta jujuntal sventa jnaʼtik mi jaʼ jech ta jpastik kʼuchaʼal chal li mantale liʼe. Pe li kʼusi mas ta jkʼelbetik skʼoplale jaʼ li kʼusi chal ta slajeb versikulo 7 xchiʼuk li slikeb 8, ti jaʼ te lokʼem li teksto sventa sjabilal 2010: Li kʼanelale tstsʼik yuʼun skotol. Mu xlaj-o skʼoplal. Li ta versikulo 8 te chalbe skʼoplal xtok ti chkʼopojik ta yan kʼope, li yalel kʼusi ch-akʼbat snaʼik yuʼun Diose xchiʼuk li yan matanaletik chakʼ chʼul espiritu ti jaʼ toʼox jech tspasik jlom yajtsʼaklomtak Cristo ta baʼyel sigloe. Li Pabloe laj yal ti chlaj skʼoplal taje, yan li kʼanelale te-o. Jaʼ stalelal chkʼanvan-o li Jeovae xchiʼuk te-o sbatel osil, jaʼ yuʼun «mu xlaj o scʼoplal» li kʼanelale. Te-o me sbatel osil, yuʼun jaʼ stalelal li Dios ti te-o sbatel osile (1 Juan 4:8).

«Tstsʼic yuʼun scotol»

14, 15. 1) ¿Kʼu yuʼun toj tsots skʼoplal li kʼanelal kʼalal chkil jvokoltike? 2) ¿Kʼu yuʼun muʼyuk laj yikta xchʼunel yoʼonton jun kerem?

¹⁴ ¿Kʼusi tskoltautik sventa stsʼik kuʼuntik kʼusiuk vokolil ti ta jnuptantike? Jaʼ mi jech chi jkʼanvan kʼuchaʼal chal Vivliae. Ti jech chi jkʼanvanutike maʼuk noʼox me chkil jvokoltik ta skoj ti oy kʼusi chkiktatik ta sventa li Ajvalilal yuʼun Diose. Skʼan tukʼ koʼonton xkakʼ jbatik ta stojolal li Cristo xtoke, xchiʼuk mi skʼane ta me xkakʼ jkuxlejaltik (Luc. 9:24, 25). Jaʼ jech la spas li tukʼil yajrextikotak Jeova ti kʼalal takatik batel ti bu tspasik tsatsal abtel jchukeletik li ta Xchibal Mukʼta Pas kʼop ta spʼejel Balumile.

¹⁵ Jkʼelbetik skʼoplal jun kerem ta Alemania ti Wilhelm sbie. Ta skoj ti muʼyuk bu xikta li xchʼunel yoʼontone, albat yuʼun jnazietik ti chmilate. Xi laj yal li ta slajeb skarta la stakbe batel yutsʼ yalale: «Ti kʼusi skʼan mas jpastike jaʼ ti jkʼantik li Dios kʼuchaʼal laj yal li Jbeiltasvanej Jesús kuʼuntike. Ta me stoj jvokoltik mi lek tukʼ chkakʼ jbatik ta stojolale». Echʼ van jayibuk jabile xi laj yal jun yutsʼ yalal li ta revista Li Jkʼel osil ta toyole, ta sventa ti kʼuxi kuch yuʼunik li vokolil ti laj yil ta xkuxlejalike: «Ta onoʼox jkʼelkutik lek ta kutsʼ kalalkutik ti jaʼuk mas tsots skʼoplal xkaʼi ta jkuxlejalkutik li skʼanel Diose». Jaʼ jech yoʼontonik ep tukʼil ermanoetik ti skʼanojik tajek Jeovae, ti chil svokolik ta chukel ta lumetik kʼuchaʼal Armenia, Corea del Sur xchiʼuk Eritrea.

16. ¿Kʼusitik tsʼik yuʼunik li ermanoetik ta Malauie?

¹⁶ Ta yantik lume jelajtik ti kʼuyelan chichʼ akʼel ta preva li xchʼunel yoʼonton kermanotaktike xchiʼuk ti bu to kʼalal xkuch yuʼunike. Li yajrextikotak Jeova ta Malauie 26 jabil tsʼik yuʼunik ti mu x-akʼbat spasbeik yabtel Dios yuʼun ajvaliletike, tsʼik yuʼunik tsatsal kontrainel xchiʼuk yantik vokoliletik. Pe lek kʼusi kʼot ta pasel ta skoj ti tsʼik yuʼunike. Kʼalal lik kontrainatikuke kʼajomalik toʼox 18,000, pe echʼ van 30 jabil une pʼolik mas ta oʼlol, pasik ta 38,393. Taje jaʼ jechtik tsnuptanik ek li ta yantik lume.

17. ¿Kʼusi ilbajinel tsnuptan ta yutsʼ yalalik jlom ermanoetik, xchiʼuk kʼuxi kuchem yuʼunik?

 ¹⁷ Vokol onoʼox chkaʼitik li kontrainel chil steklumal Diose, mas to me tsots chkaʼitik ti kʼalal tskontrainutik li kutsʼ kalaltike. Pe ¿mi mu jechuk onoʼox yaloj li Jesuse chaʼa? Jaʼ jech ta melel, ep ermanoetike jaʼ jech yiloj ta xkuxlejalik (Mat. 10:35, 36). Jlom chex kerem-tsebetike yiloj svokolik ta skoj ti chkontrainat yuʼun stot smeʼik ti muʼyuk bu chaʼiik mantale. Bateltike chichʼ nutsel lokʼel ta snaik, jaʼ yuʼun te chbat xchʼamun snailik ta sna ermanoetik ti lek yoʼontonike. Yan ermanoetike pʼajbilik yuʼun li yutsʼ yalalik xtoke. ¿Kʼuxi kuchem yuʼunik li ilbajinel taje? Jaʼ ti skʼanojik li ermanoetike, pe ti kʼusi mas tsots skʼoplale jaʼ ti skʼanojik li Jeova xchiʼuk Jesuse (1 Ped. 1:22; 1 Juan 4:21).

18. ¿Kʼuxi chkoltaatik nupultsʼakaletik li kʼanelal ti skotol stsʼik yuʼune?

¹⁸ Ep ta velta chtun kuʼuntik li kʼanelal ti stsʼik yuʼun skotole. Jech kʼuchaʼal liʼe, toj tsots skʼoplal ta sventa li buchʼutik nupultsʼakalike, yuʼun skʼan tukʼ xchʼunik li mantal yaloj Jesús liʼe: «Li bochʼotic laj xa spas ta jun li Diose, muʼyuc bochʼo xuʼ ta svocʼ» (Mat. 19:6). Kʼalal oy «[s]vocolic liʼ ta banamil» li nupultsʼakaletike, skʼan me snaʼik ti jaʼ mas tsots skʼoplal ta snupunelik li Jeovae (1 Cor. 7:28). Li ta sKʼope chal ti stsʼik yuʼun skotol li kʼanelale. Jaʼ yuʼun mi jech stalelalik li vinik xchiʼuk antse, jaʼ me jech jmoj oyik-o xchiʼuk muʼyuk tsokes li snupunelike (Col. 3:14).

19. ¿Kʼusi tspas li steklumal Dios kʼalal tsnuptanik vokolile?

¹⁹ Li kʼanelale tskoltautik xtok sventa xkuch kuʼuntik kʼalal chtal nojelal ta voʼ, nikel o yantik. Jaʼ jech ikʼot ta pasel ti kʼalal echʼ nikel ta smaleb kʼakʼal yuʼun Perú xchiʼuk li tsatsal ikʼal voʼ Katrina ti ep kʼusitik la slajes ta Estados Unidos li ta golfo de Mexicoe. Ep ermanoetik jin snaik xchiʼuk chʼay yantik kʼusitik yuʼunik, pe li tsobobbailetik ta spʼejel Balumile la stakik echʼel koltael, ep ay koltavanikuk sventa xchaʼvaʼanbeik li snaike xchiʼuk ti smeltsanbeik li Salonik sventa Tsobobbail ti bu soke. Taje jaʼ chakʼ ta ilel ti jkʼanoj jbatik li yajtsʼaklomutik Cristoe xchiʼuk ti ta jchabi jbatik ta komone (Juan 13:34, 35; 1 Ped. 2:17).

«Li cʼanvaneje mu xlaj o scʼoplal»

20, 21. 1) ¿Kʼu yuʼun jaʼ mas xjelav skʼoplal li kʼanelale? 2) ¿Kʼu yuʼun oy ta koʼontontik ta jtamtik-o batel li sbelel kʼanelale?

²⁰ Li ta steklumal Jeovae ep svinajeb te ta jtatik ti jaʼ jun lekil be li kʼanelale. Ta melel, jaʼ noʼox stuk xjelav skʼoplal ta stekel. Jkʼeltik kʼuxi laj yal Pablo taje. Baʼyele laj yal ti muʼyuk xa bu ch-akʼbat spasik skʼelobil juʼelal yuʼun chʼul espiritu kʼalal mi chʼi xaʼox ta mantal li tsobobbaile. Laje xi laj yale: «Oy oxib li cʼusi mu xlaj scʼoplale: Jaʼ li xchʼunojel coʼntontique, xchiʼuc li smalael cʼusi jpatoj coʼntontic yuʼune, xchiʼuc li cʼanvaneje. Pero ti bu xjelov tsots scʼoplal yuʼun li oxib liʼi, jaʼ li cʼanvaneje» (1 Cor. 13:13).

²¹ Ta me xkʼot ta pasel li kʼusi jchʼunojtik mi kʼot yoraile, vaʼun muʼyuk xa me bu ta xkakʼ xchʼunel koʼontontik ta stojolal. Kʼalal mi kʼot skʼakʼalil tspas ta achʼ skotol xtok li kʼusitike, mu xa me bu ta jpat-o koʼontontik li kʼusi ta jkʼantik xa tajek akʼo xkʼot ta pasel avie. ¿Li kʼanelal une? Jech kʼuchaʼal laj xa jchantike, mu xlaj skʼoplal maʼ leʼe, te oy-o. Kʼalal ta jkʼupintik li kuxlejal sbatel osile, te me chkiltik mas li kʼanelal yuʼun Diose. Jaʼ yuʼun chaʼa, kakʼtik me persa spasbel li yabtel Diose xchiʼuk xanavkutik-o batel li ta be ti mu xlaj skʼoplale. Ta me xi jkuxi sbatel osil mi jech ta jpastike (1 Juan 2:17).

¿Kʼusi van stakʼobil chaval?

• ¿Kʼu yuʼun chopol kʼalal jaʼ ta jkʼantik li kʼusi mu stakʼe?

• ¿Kʼusitik stsʼik kuʼuntik ta skoj ti chi jkʼanvane?

• ¿Kʼusi smelolal ti «mu xlaj o scʼoplal» li kʼanelale?

[Sjakʼobiltak sventa xchanobil]

[Lokʼol ta pajina 27]

Teksto sventa sjabilal 2010: Li kʼanelale tstsʼik yuʼun skotol. Mu xlaj-o skʼoplal (1 Cor. 13:7, 8).

[Lokʼol ta pajina 25]

Tstij koʼontontik ta xcholel mantal ti jkʼanojtik Diose

[Lokʼol ta pajina 26]

Jaʼ kuch-o yuʼunik preva li ermanoetik ta Malaui ti oy yuʼunik li kʼanelal ti mu xlaj skʼoplale