Mulekka Xayenna Siiquwaa Dichite
Mulekka Xayenna Siiquwaa Dichite
‘Siiqoy ubbabaa genccees. Siiqoy mulekka xayenna.’—1 QORONTTOOSA 13:7, 8.
1. (a) Siiqoy darotoo ayba ogiyan qonccidee? (b) Daroti oonanne aybaa siiqiyoonaa?
SIIQUWAA xeelliyaagan darobay geetettiis. Asay a daro sabbiisinne abaa yexxiis. Siiqoy asau keehi koshshiyaaba. SHin maxaafatinne pilimeti darotoo medhi ekkido siiqo taarikiyaa yootoosona; qassi hegeeti bessidi aggidosona. Gidoppe attin, Xoossaanne shooruwaa tumuppe siiqiyo siiqoy irxxiis. Geeshsha Maxaafay ha wurssetta wodiyaabaa yootidobay polettiiddi deˈiyoogaa beˈoos. “Asati banttana siiqiyaageeta, miishshaa siiqiyaageeta, . . . Xoossaappe aattidi, ufaittiyoobaa dosiyaageeta gidana.”—2 Ximootiyoosa 3:1-5.
2. Bessenna siiquwaa xeelliyaagan Geeshsha Maxaafay woygidi akeekissii?
2 Asaa naati siiquwaa bessana danddayoosona; shin Xoossaa Qaalay bessenna siiquwaa xeelliyaagan nuna akeekissees. Geeshsha Maxaafay hegaa mala siiqoy issi ura wozanan xaphuwaa yeddiyo wode haniyaabaakka yootees. (1 Ximootiyoosa 6:9, 10) Kiitettida PHauloosi Deemaasabaa xeelliyaagan xaafidobaa hassayay? Deemaasi PHauloosaara issippe oottidaba gidikkonne, alamiyaa dosiyaagaa gidiis. (2 Ximootiyoosa 4:10) Kiitettida Yohaannisi Kiristtaaneta he daafaabaa akeekissiis. (1 Yohaannisa 2:15, 16 nabbaba.) Alamiyaa, an deˈiya aadhiyaabaanne a ogiyaa siiqiyoogee, Xoossaanne i giigissidobaa siiqiyoogaara moggenna.
3. Nuuni ay oottanau baaxetana koshshii, qassi woygiya oyshati denddiyoonaa?
3 Nuuni ha alamiyan deˈiyaaba gidikkonne, a bagga gidokko. Hegaa gishshau, alamee siiquwaa xeelliyo moorettida xeelaappe haakkanau baaxetana koshshees. Nuuni bessennabaa siiqennaadan naagettana koshshees. Yaatin, nuuni tumu siiquwaa oossi bessana koshshii? Ubbabaa gencciyaanne mulekka xayenna siiquwaa dichanau nuna maaddiya ayba giigissoti deˈiyoonaa? Siiquwaa bessiyoogee nuna ha wodiyaaninne sinttappekka waati maaddii? Nuuni Xoossay koyiyoogaadan deˈanau ha oyshatuyyo i immiyo zaaruwaa erana koshshees.
Yihoowa Siiqiyoogaa Dichiyoogaa
4. Xoossaa siiqiyo siiqoy waanidi diccii?
4 Gadiyaa minni oottidi, kattaa zeriya issi goshshanchaa qoppa. I kattay mokkanaagaa hidootan naagees. (Ibraawe 6:7) Hegaadan, nuuni Xoossaa siiqiyo siiqoy diccana koshshees. Hegau ay oottana koshshii? Kawotettaa tumaa zerettay zerettido, loˈˈo biittan leemisettida nu wozanaa giigissana bessees. Nuuni hegaadan oottana danddayiyoy, Xoossaa xeelliyaagan eraa gujjanau a Qaalaa minnidi xannaˈiyoogaana. (Qolasiyaasa 1:10) Gubaaˈiyaa shiiqotun ubbatoo beettiyoogeenne qofaa immiyoogeekka nu eraa dichanau maaddees. Nuuni ubbay ciimma eraa demmanau ubbatoo baaxetiyoo?—Leemiso 2:1-7.
5. (a) Yihoowa waanna eeshshatubaa waatidi erana danddayiyoo? (b) Xoossaa suure pirddaa, aadhida eratettaanne wolqqaa xeelliyaagan woygana danddayay?
5 Ba Qaalaa baggaara Yihooway ba eeshshaa qonccissiis. Geeshsha Maxaafaa xannaˈiyoogaaninne Yihoowa xeelliyaagan ubbatoo eraa demmiyoogan, a eeshshata, giishin suure pirddaa, wolqqaa, aadhida eratettaanne ubbaappe aadhiya siiquwaa kaseegaappe aaruwan nashshana danddayoos. Yihooway ba oge ubbaaninne ba polo higgiyan suure pirddaa qonccissiis. (Zaarettido Wogaa 32:4; Mazamure 19:7) Nuuni Yihooway medhidoba ubban wotti dentti qoppanaunne a aadhida eratettan maalaalettanau danddayoos. (Mazamure 104:24) Saluwaaninne saˈan deˈiya meretatikka Yihoowayyo gita wolqqay deˈiyoogaa qonccissoosona.—Isiyaasa 40:26.
6. Xoossay nuna siiqiyoogee ayba ogiyan qonccidee? Hegee nena waatidi bochidee?
6 Xoossaa waanna eeshshaa gidida, siiquwaa xeelliyaagan woygana danddayettii? A siiqoy ubbaban qonccidabanne nuna ubbaa bochiyaaba. Xoossay asaa naata ashshanau wozuwaa giigissiyoogan he siiquwaa qonccissiis. (Roome 5:8 nabbaba.) He wozuwaa giigissoy asaa naatu ubbaassi giigidaba; shin Xoossaa siiquwau zaaruwaa immiyaageetunne a Naˈan ammaniyoogaa oosuwan bessiyaageetu xallay an goˈettana. (Yohaannisa 3:16, 36) Nu nagaraa atto giissiya yarshsho oottidi Xoossay Yesuusa immidoogee, nuunikka a siiqanaadan denttettees.
7, 8. (a) Xoossaa siiqiyoogaa bessanau nuuni ay oottana koshshii? (b) Xoossaa asay a azazuwaa naagiyoy ayba hanotay gakkishiinee?
7 Xoossay nuussi oottido ubbabau a siiqiyoogaa waatidi bessana danddayiyoo? Ayyaanaa kaaletuwan xaafettida: “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagiyaagee, hegau qoncce zaaruwaa immees. (1 Yohaannisa 5:3) Ee; Xoossaa Yihoowa siiqiyoogee nuuni a azazuwaa naaganaadan denttettees. Nuuni harata goˈˈiya, a sunttaabaanne a Kawotettaabaa markkattiyoogau issi gaasoy hegaa. Nu wozanan kumidabaappe hegaa oottiyoogee nuuni suure wozanaappe Xoossau azazettiyoogaa bessees.—Maatiyoosa 12:34.
8 Kawotettaa kiitaa asay sheneho giyaabanne ixxiyaaba gidikkokka, saˈaa yuushuwan deˈiya nu ishati Xoossaa azazuwaa minnidi poloosona. Eti bantta haggaazuwaa kumetta hanotan polanau hidootaa qanxxennan baaxetoosona. (2 Ximootiyoosa 4:5) Nuunikka hegaadan, wozanappe Xoossaa eraa haratussi yootoosinne i azazido harabaa ubbaa naagoos.
Nuuni Nu Godaa Yesuus Kiristtoosa Siiqiyo Gaasuwaa
9. Kiristtoosi aybin genccidee, i hegaadan oottanaadan denttettiday aybee?
9 Nuuni Xoossaa siiqiyoogaa bolli, a Naˈaa kaseegaappe aaruwan siiqanaadan oottiya daro gaasoy deˈees. Nuuni Yesuusa mule beˈibeennaba gidikkonne, abaa gujjidi tamaariyo wode, a keehippe siiqoos. (1 PHeexiroosa 1:8) Yesuusi genccido issi issibati aybee? I ba Aawaa sheniyaa oottiyo wode, asay a gaasoy baynnan ixxiis, yedettiis, wordduwan mootiisinne kariis. Hara ogiyankka asay a toochiis. (Yohaannisa 15:25 nabbaba.) Yesuusi saluwan deˈiya ba Aawaa siiqiyoogee, i he paaciyan genccanaadan oottiis. Siiqoy denttettin, i yarshsho gididi hayqqidoogee daro asay wozettanaadan oottiis.—Maatiyoosa 20:28.
10, 11. Kiristtoosi nuussi oottidobaa qoppiyo wode, nu halchoy ay gidana bessii?
10 Yesuusi oottidobay a ufayssiya ogiyan deˈanaadan nuna denttettees. Kiristtoosi nuussi oottidobaa qoppiyo wode, nuuni a kaseegaappe aattidi siiqoos. A kaalliyaageeta gidiyoogaadan, nuuni Kawotettaabaa markkattanaunne erissiyo ashkkara oottanau i immido azazuwaa genccidi polana mala, Kiristtoosaagaa mala siiquwaa ubbatoo bessanaunne dichanau koshshees.—Maatiyoosa 28:19, 20.
11 Kiristtoosi asa ubbau bessido siiquwau bessiya zaaruwaa immiyoogan, nuuyyo imettida oosuwaa wurssettay yaanaappe kase polanau koyoos. (2 Qoronttoosa 5:14, 15 nabbaba.) Xoossay asaa naatuyyo halchidobaa polanaadan Kiristtoosa denttettida waannabay, i bessido siiquwaa. Kiristtoosi kaallanau nuussi leemiso gididobay, nu ubbaassi Xoossaa halchuwan oottiyoobay deˈanaadan oottees. Hegaadan oottanau, nuuyyo danddayettida keenan, kumetta hanotan Xoossaa siiqiyoogaa dichana koshshees. (Maatiyoosa 22:37) Yesuusi tamaarissidobaa naagiyoogaaninne a azazuwaa poliyoogan, nuuni a siiqiyoogaa bessoos; qassi Yesuusi oottidoogaadan ayba hanotankka Xoossay ubbabaa haariyo maataa kaafanau murttida.—Yohaannisa 14:23, 24; 15:10.
Ubbaappe Aadhiya Siiquwaa Ogiyaa Kaalliyoogaa
12. PHauloosi “ubbaappe keehi aadhiya ogiyaa” giidobay aybee?
12 Kiitettida PHauloosi Kiristtoosa milatiis. PHauloosi Kiristtoosa leemisuwaa loyttidi kaallido gishshau, ba doonaa kunttidi haasayiyoogan, Kiristtaaneti bana milatanaadan minttettiis. (1 Qoronttoosa 11:1) PHauloosi koyro xeetu layttan ayyaanaa imota gidida, pattiyoogaanne dumma dumma qaalan haasayiyoogaa malabata mintti koyanaadan Qoronttoosa Kiristtaaneta minttettidaba gidikkokka, kaallana bessiya hegaappe aadhiyaabay deˈiyoogaa yootiis. Koyro Qoronttoosa 12:31n: “Ubbaappe keehi aadhdhiya ogiyaa taani inttena bessana” yaagiis. Kaallidi deˈiya xiqisetu qofay ubbaappe keehi aadhiya he ogee siiquwaa gidiyoogaa bessees. Hegee ubbaappe aadhiyoy ayba ogiyaanee? PHauloosi woygana koyidaakko loytti qonccissiis. (1 Qoronttoosa 13:1-3 nabbaba.) Issi issibaa oottiyo daro eray au deˈiyaabanne i gitabaa oottiyaaba gidikkokka, siiqoy xayikko hegee ay maaddii? Aynnekka maaddenna! Xoossaa ayyaanay denttettin PHauloosi keehippe koshshiya ha qofaa qonccissiis. Hegaa qonccissiyoogan nuussi keehippe goˈˈiyaabaa oottiis!
13. (a) Laytta xiqisee, 2010n woygiyaagaa gidanee? (b) Siiqoy mulekka xayennay ayba ogiyaanee?
13 PHauloosi kaallidi, siiqoy oottiyoobaanne oottennabaa nuussi qonccissiis. (1 Qoronttoosa 13:4-8 nabbaba.) Siiqoy oottiyoobaanne oottennabaa xeelliyaagan ne deˈoy ay malakko wodiyaa immada pilgga. Paydo 7 wurssettaaninne paydo 8 doomettan deˈiya: ‘Siiqoy ubbabaa genccees. Siiqoy mulekka xayenna’ yaagiya, 2010n laytta xiqise gidanaagan ne qofaa wotta. Kiristtaane gubaaˈee doommido wode goˈettido, hananabaa yootiyoogaanne dumma dumma qaalan haasayiyoogaa gujjiya, ayyaana imotay attanaagaa PHauloosi paydo 8n yootidoogaa akeeka. Hegee xayana. SHin siiqoy ubba wode deˈana. Siiquwau waanna leemisoy Yihoowa; qassi i merinau deˈees. Yaatiyo gishshau, siiqoy mulekka xayenna. Siiqoy merinaa Xoossaa eeshsha gidiyoogaadan merinau deˈana.—1 Yohaannisa 4:8.
Siiqoy Ubbabaa Genccees
14, 15. (a) Paaciyaa genccanaadan siiqoy nuna waatidi maaddana danddayii? (b) Issi yelaga ishay ba ammanuwaa kaddennan ixxidoy aybissee?
14 Kiristtaaneta paacee, deexxiya hanotaynne metoy gakkikkokka, eti genccanaadan oottiyaabay aybee? Bantta goˈˈaa yarshshiyo siiquwaa. Hegaa mala siiqoy nuuyyo deˈiyaabaa yarshshiyoogaappe aadhiyaaba. Hegee Kiristtoosa gishshau hayqqana gakkanaashinkka nu suuretettaa naagidi deˈanau koyiyoogaa gujjees. (Luqaasa 9:24, 25) Naaˈˈantto Alamiyaa Olaa wodenne hegaappe simmin, cora asaa issippe gurddiyo kamppiyan, deexo oosuwaa ootissiyo kamppiyaaninne qasho keettan waayettida, ammanettida Yihoowa Markkatu hanotaa wotta dentta qoppa.
15 Jarmanen, Vilhelm geetettiya yelaga Yihoowa Markkay hegau loˈˈo leemiso. Naaze wotaaddarati a woriyo wode, ba ammanuwaa kaddiyoogaappe ammanettidi hayqqiis. I bantta soo asau xaafido wurssetta dabddaabbiyan: “Nu Godaa Yesuus Kiristtoosi azazidoogaadan, nuuni ubbaappe aaruwan Xoossaa siiqana bessees. Nuuni a miyyiyan eqqikko, i nuna woytana” yaagiis. Guyyeppe, eta soo asaappe issinna: “Deexo meto wode ubban, nu soo asay Xoossaa siiqiyoogaa ubbatoo kaseyiis” yaagidoogee, Wochiyo Keelaa issi huuphe yohuwan kiyiis. Ha wodiyan, Armeniyan, Erttiran, Tohossa Koriyaaninne hara biittatun qasho keettan genccidi deˈiya daro Yihoowa Markkatussi hegaa mala xeelay deˈees. Ha ishati Yihoowa siiqiyoogan minnidi deˈoosona.
16. Maalaawen nu ishati ay genccidonaa?
16 Daro heeratun, nu ishatu ammanuwaa paacciyaabaynne gencciyoogee deexxanaadan oottiya harabay deˈees. Maalaawe biittan Yihoowa Markkati kawotettay eta oosuwaa teqqidoogaa, wolqqaama yedetaanne iita hanotaa 26 layttau genccidosona. Eti genccidoogee woytuwaa demissiis. Yedetay doommiyo wode, 18,000 gidiya Yihoowa Markkati he biittan deˈoosona. Hasttamu layttappe guyyiyan eta qooday naaˈˈu kusheppe daridi, 38,393 gidiis. Hara biittatunkka hegaa malabay haniis.
17. Ubbay Kiristtaane gidenna keettan deˈiya issotu issotu bolli aybi gakkii? Hegaa mala hanotan eti gencciyoy aybissee?
17 Cita xekkan Xoossaa asaa bolli gakkiya yedetay deexxiyaaba. SHin issi Kiristtaaniyaa bolli so asaappe yedetay gakkiyo wode, hegaappekka aadhidi deexxees. Sugettay gakkiyoy so asappe woykko mata dabboppe gidana danddayees. Hegee hananaagaa Yesuusi kasetidi yootibeennee? Yootiis; hegee tuma gidiyoogaa daroti bantta deˈuwan beˈidosona. (Maatiyoosa 10:35, 36) Yelagati, banttana yelida Kiristtaane gidennaageeti gattiyo yedetaa genccidosona. Issoti issoti ubba sooppe yedetettidosona; shin Yihoowa Markkati kehatettan eti banttanaara deˈanaadan oottidosona. Harata qassi eta yelidaageeti nu naata gidekketa giidosona. Hegaa malabay gakkidoogeeti genccanaadan oottidabay aybee? Ishanttu maabaraa siiqiyoogaa xalla gidennan, ubbaappe aaruwan, Yihoowanne a Naˈaa wozanappe siiqiyoogaa.—1 PHeexiroosa 1:22; 1 Yohaannisa 4:21.
18. Ubbabaa gencciya siiqoy ekkidanne gelida Kiristtaaneta ayba ogiyan maaddii?
18 Ubbabaa gencciya siiquwaa deˈuwan bessana koshshiyo hara daro ginati deˈoosona. Aqo laggeti bantta deˈuwan, “Xoossai issippe gattidoogaa asi shaakkoppo” yaagidi Yesuusi yootidoogaa bonchanaadan siiqoy maaddees. (Maatiyoosa 19:6) Ekkidanne gelida Kiristtaaneti ‘bantta bolli woykko bantta asatettan waayee’ gakkiyo wode, bantta aqo deˈuwan Yihoowayyo xoqqa sohoy deˈiyoogaa akeekana koshshees. (1 Qoronttoosa 7:28) A Qaalay, ‘siiqoy ubbabaa genccees’ yaagees; ha eeshshaa maayida azinaynne machiyaa issoy issuwaara keehippe matattanaunne bantta aqo deˈuwaa minttanau danddayoosona.—Qolasiyaasa 3:14.
19. Meretay gattiyo daafaappe simmin Xoossaa asay issoy issuwau ay oottidee?
19 Meretay gattiyo daafaa wode, nuuni ubbabaa genccanaadan siiqoy maaddees. Tohossa bagga Peerun biittay qaaxxido wode, qassi Hurikeen Katirino giyo gotee Amarkkan tohossa baggan darosaa qohido wode, ishantti hegaadan oottidosona. He daafan nu ishatuppe darotu keettay woykko aqoy xayiis. Alame yuushuwan deˈiya gubaaˈee, daafay gakkidoogeetuyyo koshshiyaabaa kunttanaadan siiqoy denttettiis; bantta koshshan oottiyaageeti keettaa zaarettidi keexxiyoogaaninne Kawotettaa Addaraashaa bottokoniyoogan maaddidosona. Hegaa mala oosoy nu ishantti ubba wode, qassi ay hanotankka issoy issuwaa siiqiyoogaanne issoy issuwau koshshiyaabaa kunttiyoogaa bessees.—Yohaannisa 13:34, 35; 1 PHeexiroosa 2:17.
Siiqoy Mulekka Xayenna
20, 21. (a) Siiqoy ubbaappe keehi aadhiyoy aybissee? (b) Neeni siiquwaa ogiyaa kaallanau murttidoy aybissee?
20 Ha wodiyan Yihoowa asay ubbaappe aadhiya siiquwaa ogiyaa kaalliyoogee eratetta gidiyoogaa nuuni akeekoos. Ubba hanotatun siiqoy aadhiyoogee tuma. Kiitettida PHauloosi he tumaa woygidi mintti qonccissidaakko akeeka. Koyruwan, ayyaana imotati attanaagaanne naˈi diccidi gasttiyoogaadan Kiristtaane gubaaˈee minnanaagaa yootiis. Hegaa gi simmidi: “SHin hegaa gidikko, ammanoi, hanana giidi ufaissan naagiyoogeenne siiqoi, hageeti heezzai minnidi de7oosona. De7inkka hageetuppe aadhdhiyaagee siiquwaa” yaagidi kuuyiis.—1 Qoronttoosa 13:13.
21 Nuuni ammaniyoobay wurssettan polettana; hegaappe simmin an ammaniyoogee attees. Nuuni hidootan naagiyoobaa, ubbabay ooraxxi simmin naagokko. Siiqoy shin waananee? Siiqoy mulekka xayenna; merinau deˈana. Merinaa deˈuwaa nu xeelan wottidi, Xoossay siiquwaa bessiyo hara daro ogeta beˈananne akeekana. Xoossaa sheniyaa oottaydda mulekka xayenna, ubbaappe aadhiya siiquwaa ogiyaa kaalliyoogan, neeni merinau deˈana danddayaasa.—1 Yohaannisa 2:17.
Woygada Zaaruutii?
• Nuuni bessenna siiquwaa bessennaadan naagettana koshshiyoy aybissee?
• Siiqoy nuuni ay genccanaadan maaddana danddayii?
• Siiqoy mulekka xayennay ayba ogiyaanee?
[Oyshata]
[Sinttaa 25n deʼiya misiliyaa]
‘Siiqoy ubbabaa genccees. Siiqoy mulekka xayenna’ yaagiyaagee, 2010 laytta xiqise gidana.—1 Qoronttoosa 13:7, 8.
[Sinttaa 23n deʼiya misiliyaa]
Nuuni Xoossaa siiqiyoogee markkattanaadan denttettees
[Sinttaa 24n deʼiya misiliyaa]
Xayenna siiqoy Maalaawen deˈiya ishatinne michoti paaciyan genccanaadan oottiis
Woygada Zaaruutii?
• Nuuni bessenna siiquwaa bessennaadan naagettana koshshiyoy aybissee?
• Siiqoy nuuni ay genccanaadan maaddana danddayii?
• Siiqoy mulekka xayennay ayba ogiyaanee?