ĠEĦOVA jridek tkun ferħan. (Salm 100:2) Bħala wieħed mill-​qaddejja tiegħu, x’aktarx li int għandek ħafna x’tagħmel ukoll. Forsi ma kellekx daqshekk x’tagħmel meta ddedikajt ħajtek lil Alla, imma issa responsabbiltajiet sekulari u spiritwali għandhom mnejn iġegħluk tħossok taħt pressjoni. Saħansitra forsi tħossok ħati meta ma tkunx tistaʼ twettaq dak kollu li tkun trid tagħmel. Kif tistaʼ ssib bilanċ xieraq u żżomm “il-​ferħ taʼ Ġeħova”?—Neħ. 8:10.

Int tgħix fi żminijiet kritiċi u tiġi effettwat minn ħafna pressjonijiet, u għalhekk għandek bżonn tkun organizzat sew. F’dan ir-​rigward, ftit mill-​pariri ispirati tal-​appostlu Pawlu huma rilevanti b’mod partikulari: “Oqogħdu attenti bis-​sħiħ li ma timxux bħal nies bla għaqal imma bħal nies għorrief, u użaw il-​ħin bl-​aħjar mod, għax il-​jiem huma ħżiena.”—Efes. 5:15, 16.

Meta tqis dawn il-​pariri għaqlin, kif tistaʼ tagħmel miri realistiċi għalik innifsek u tibbilanċja l-​istudju persunali, il-​bżonnijiet tal-​familja, is-​servizz tal-​għalqa, ix-​xogħol sekulari, u l-​attivitajiet neċessarji oħrajn?

Tiftakar il-​ferħ li ħassejt meta ddedikajt ruħek lil Alla u tgħammidt? Il-​ferħ ġie minn għarfien dwar Ġeħova u l-​iskopijiet tiegħu. Għandek mnejn qattajt xhur sħaħ tistudja b’mod diliġenti biex ksibt dik il-​fehma u l-​ferħ. Imma żgur li dak l-​isforz kollu ma kienx għalxejn. Dak l-​istudju bidillek ħajtek għall-​aħjar.

Sabiex tibqaʼ ferħan, trid tkompli titmaʼ lilek innifsek spiritwalment. Jekk issibha iebsa biex issib il-​ħin għall-​qari u l-​istudju tal-​Bibbja, eżamina l-​iskeda tiegħek. Saħansitra ftit minuti taʼ studju u meditazzjoni kuljum se jressquk eqreb lejn Ġeħova, u dan żgur li se jikkontribwixxi għall-​ferħ tiegħek.

Il-​biċċa l-​kbira mill-​qaddejja t’Alla jistgħu jixtru l-​ħin għal attivitajiet vitali minn ħin li jqattgħu f’affarijiet inqas importanti. Staqsi lilek innifsek, ‘Kemm inqattaʼ ħin naqra rivisti sekulari jew gazzetti, nara t-​televixin, nismaʼ d-​diski, jew f’xi passatemp?’ Attivitajiet bħal dawn jistgħu jkunu pjaċevoli biss jekk inkunu bilanċjati. (1 Tim. 4:8) Jekk tinduna li int għandek problema fil-​mod kif tqassam il-​ħin, ħu passi biex tagħmel aġġustamenti fl-​iskeda tiegħek.

 Adam, raġel miżżewweġ, missier taʼ tlett itfal, u anzjan, jispjega dak li jgħin lilu: “Nistinka biex ngħix ħajja sempliċi. Nevita passatempi li jieħdu ħafna ħin u affarijiet li jirrikjedu ħafna attenzjoni. Ma ngħixx ħajja taʼ ċaħda—sempliċement nieħu pjaċir b’rikreazzjoni li mhix komplikata.”

Meditazzjoni fuq ir-​riżultati tajbin tad-​deċiżjonijiet tiegħek tistaʼ ġġedded il-​ferħ tiegħek u tgħinek iżżomm ħarsa pożittiva. Pereżempju, Mariusz, anzjan li għandu tlett itfal, jgħid: “Meta bdejt nistudja l-​Bibbja sirt ottimist. Minn żmien għal żmien, xorta niffaċċja diffikultajiet, u ħafna minnhom Ġeħova biss jaf bihom. Imma grazzi għall-​appoġġ tiegħu, inħares lejn il-​futur bil-​ferħ.”

Bħal fil-​każ taʼ Mariusz, attitudni pożittiva mhix se telimina s-​sentimenti t’ansjetà kollha. Imma tistaʼ tgħinek tħossok aħjar u tkampa b’mod iktar effettiv mal-​isfidi tal-​ħajja. Naqraw: “Il-​jiem taʼ min isofri kollha huma ħżiena; imma min iħossu tajjeb f’qalbu jinsab f’festa l-​ħin kollu.” (Prov. 15:15) Irrifletti wkoll fuq l-​imħabba li Alla diġà wera miegħek. Meditazzjoni bħal din tistaʼ żżid l-​imħabba tiegħek għalih u tkabbar il-​ferħ divin tiegħek.—Mt. 22:37.

Jekk il-​membri taʼ familja jpoġġu lil Ġeħova u l-​interessi tiegħu l-​ewwel f’ħajjithom, il-​ferħ tagħhom se jiżdied. Il-​fatt li juru kwalitajiet Kristjani jgħin biex jitnaqqas in-​nuqqas taʼ qbil u jirriżulta f’relazzjonijiet tal-​familja iktar magħqudin u ferħanin. Jekk tagħmlu dan, id-​dar tagħkom tkun verament kenn taʼ paċi u unità għall-​familja kollha.—Salm 133:1.

Li nkunu involuti f’attivitajiet spiritwali bħala familja jżid mal-​ferħ ġenwin. Mariusz jispjega: “Jien ngħożż il-​ħin li nqattgħu flimkien bħala familja. Marti tappoġġani ħafna. Kull meta jkun possibbli, hi tkun maʼ ġenbi kemm fil-​ministeru tal-​għalqa kif ukoll meta nkun qed innaddaf l-​istejdjum qabel xi konvenzjoni, u tiġi miegħi meta mmur nagħti taħditiet pubbliċi f’kongregazzjonijiet oħrajn. Dan jinkuraġġini ħafna.”

L-​Iskrittura tikkmanda lill-​Kristjani biex jipprovdu l-​bżonnijiet materjali għall-​familji tagħhom. (1 Tim. 5:8) Imma jekk ix-​xogħol sekulari jieħu ħafna ħin u enerġija, jistaʼ jisraqlek il-​ferħ fis-​servizz t’Alla. Itlob lil Ġeħova dwar il-​kwistjoni. (Salm 55:22) Xi wħud waslu għall-​konklużjoni li biex ipoġġu s-​Saltna t’Alla l-​ewwel kellhom ifittxu impjieg differenti. Ebda Kristjan m’għandu jħalli l-​benefiċċji finanzjarji taʼ xogħol li jirrikjedi ħafna ħin u enerġija jwaqqfuh milli jagħti attenzjoni għall-​affarijiet spiritwali, li huma iktar importanti.—Prov. 22:3.

Forsi ssibha t’għajnuna jekk tikteb il-​benefiċċji u l-​iżvantaġġi t’impjieg li diġà għandek jew li jistaʼ jkollok. M’għandniex xi ngħidu, paga tajba u xogħol sodisfaċenti huma mixtiqin. Però, l-​impjieg preżenti tiegħek qiegħed jgħinek tippromwovi s-​saħħa spiritwali tal-​familja tiegħek? B’mod objettiv qis il-​fatturi kollha, u ħu deċiżjonijiet li jagħtu prijorità lir-​relazzjoni tiegħek maʼ Ġeħova.

Jekk ix-​xogħol li għandek issa ma jgħinekx tikber spiritwalment, hemm bżonn li taġġusta s-​sitwazzjoni tiegħek. Ħafna Kristjani għamlu bidliet drastiċi sabiex isibu l-​ħin għall-​affarijiet spiritwali. Ħu fil-​Polonja jirrakkonta: “Darba ma kellix għażla oħra ħlief li nitlaq il-​kumpanija li kont naħdem għaliha għax spiss kien ikolli nivvjaġġa fuq negozju. Ma kellix biżżejjed ħin biex nieħu ħsieb sew l-​affarijiet spiritwali u lil familti.” Issa jaqlaʼ l-​għajxien f’impjieg li jiħodlu ħafna inqas ħin u enerġija.

Sib il-​Ferħ f’li Tgħin lil Oħrajn

Ġesù qal li “hemm iktar hena meta tagħti milli meta tirċievi.” (Atti 20:35) Il-​Kristjani għandhom ħafna opportunitajiet għal għoti bħal dan. Kultant, tbissima dħulija, li tieħu b’idejn xi ħadd, jew grazzi sinċiera għax-​xogħol iebes taʼ xi ħadd f’inkarigu teokratiku, jistgħu jkunu dak kollu li hu meħtieġ biex it-​tnejn li intom tħossukom ferħanin.

L-​appostlu Pawlu inkuraġġixxa lill-​Kristjani sħabu: “Ikkonslaw lid-​dipressi, wieżnu lid-​dgħajfin.” (1 Tess. 5:14) Id-​dipressi forsi  jħossu li ma jistgħux ikampaw mal-​problemi bis-​saħħa tagħhom stess. Tistaʼ tagħti daqqa t’id lil uħud bħal dawn? Jekk tara li wieħed minn ħutek qed jitlef il-​ferħ tiegħu fis-​servizz taʼ Ġeħova, ipprova inkuraġġih. Jekk tagħmel dan, int se tħossok inkuraġġit ukoll. Hemm problemi li ebda bniedem ma jistaʼ jirranġa. Madankollu, tistaʼ turi mogħdrija sinċiera u tistaʼ tħeġġeġ lil ħuk biex jistrieħ fuq l-​appoġġ taʼ Ġeħova li qatt ma jfalli. Dawk li jagħmlu hekk qatt ma se jħossuhom diżappuntati.—Salm 27:10; Is. 59:1.

Pass prattiku ieħor hu li tistieden lil dak li jidher li qed jonqoslu l-​ferħ biex joħroġ miegħek fil-​ministeru. Meta Ġesù bagħat lis-​70 dixxiplu, għamel dan “tnejn tnejn.” (Lq. 10:1) X’aktarx li taqbel li l-​metodu taʼ Ġesù għen biex iż-​żewġ persuni jinkuraġġixxu lil xulxin. Tistaʼ tuża dan il-​metodu biex tgħin lil xi wħud jerġgħu jiksbu l-​ferħ illum?

Illum għandna ħafna raġunijiet validi biex inħossuna taħt pressjoni. Xorta waħda, Pawlu jħeġġiġna: “Ifirħu dejjem fil-​Mulej. Nerġaʼ ngħidilkom, Ifirħu!” (Flp. 4:4) Minħabba li tħobb lil Alla, tobdih, u b’mod żeluż tippersevera fix-​xogħol li tak biex tagħmel, ħajtek għandha skop. Dan jagħmlek ferħan. Iżjed minn hekk, Ġeħova jgħinek tkampa mal-​pressjonijiet u l-​problemi li tiffaċċja.—Rum. 2:6, 7.

Bl-​għajnejn tal-​fidi, aħna nagħrfu kemm ninsabu viċin id-​dinja l-​ġdida mwiegħda taʼ Ġeħova. Din se ġġib ħafna barkiet u raġunijiet għal ferħ. (Salm 37:34) Għalhekk, nistgħu nkunu ferħanin u ma ninsewx kemm Ġeħova qed iberikna saħansitra issa. B’hekk, nistgħu ‘naqdu lil Ġeħova bl-​hena.’—Salm 100:2.

[Dijagramma f’paġna 8]

(Għall-formazzjoni sħiħa tat-​test, ara pubblikazzjoni)

Forsi għandek bżonn taġġusta l-​mod kif tqassam il-​ħin tiegħek jekk tixtieq tibqaʼ ferħan

IR-​RIKREAZZJONI u D-​DIVERTIMENT

ID-​DAR u L-​BŻONNIJIET TAL-​FAMILJA

IX-​XOGĦOL

IL-​LAQGĦAT KRISTJANI

IL-​ISTUDJU PERSUNALI

IL-​MINISTERU

[Stampi f’paġna 10]

Tinsab int f’pożizzjoni biex tgħin lil oħrajn jerġgħu jiksbu l-​ferħ tagħhom?