Okupá, Pero Gososo den Sirbishi di Dios

YEHOVA ke pa bo tin goso. (Sal. 100:2) I komo un di su sirbidónan, probablemente bo ta okupá tambe. Podisé bo programa no tabata asina yen tempu ku bo a dediká bo bida na Yehova. Pero awor, kisas bo ta sinti ku bo responsabilidatnan relashoná ku adorashon berdadero i otro asuntunan ta pone un sierto preshon riba bo. Podisé bo ta sinti bo asta kulpabel ora bo no por logra tur loke bo tin gana di hasi. Kon bo por balansá bo asuntunan i mantené e ‘goso di Yehova’?​—Neh. 8:10.

Bo ta bibando den un tempu krítiko ku ta pone hopi preshon riba hende, pues bo mester ta bon organisá. Relashoná ku esaki, tin algun konseho inspirá ku apòstel Pablo a duna ku ta masha oportuno. Por ehèmpel, el a bisa: “Mira bon kon boso ta kana, no manera hende bobo, ma manera hende sabí, hasiendo bon uso di boso tempu, pasobra e dianan ta malu.”​—Efe. 5:​15, 16.

En bista di e konseho sabí ei, kon bo por pone metanan realístiko i kumpli ku bo responsabilidatnan relashoná ku estudio personal, famia, sirbishi di vèlt, trabou i otro aktividatnan na un manera balansá?

Bo ta kòrda e goso ku bo tabatin tempu bo a dediká bo mes na Dios i a batisá? Konosementu di Yehova i su propósito a duna bo e goso ei. Kisas bo tabatin ku studia Beibel diligentemente pa vários luna promé ku bo a haña e komprondementu i goso ei. Pero sin duda, e esfuerso ku bo a hasi tabata bale la pena. Bo estudio di Beibel a mehorá bo kalidat di bida.

Pa bo mantené bo goso, bo tin ku sigui alimentá bo mes spiritualmente. Si bo tin problema pa haña tempu pa lesa i studia Beibel, analisá bo programa. Asta si ta un par di minüt so pa dia bo ta dediká na estudio i meditashon, esaki lo yuda bo hala mas serka Yehova. I mas bo hala serka Yehova, mas bo goso lo oumentá.

Mayoria di sirbidó di Dios por saka tempu pa aktividatnan importante ora nan kita tempu for di kosnan ménos importante. Puntra bo mes: ‘Kuantu tempu mi ta dediká na lesamentu di revista mundano òf korant, wakmentu di televishon, skuchamentu di músika òf na mi hòbi?’ Pa e aktividatnan ei por ta plasentero, nos mester hasi nan na un manera balansá. (1 Tim. 4:8, BPK) Si bo realisá ku e manera ku bo ta usa bo tempu no ta bon, ahustá bo programa.

 Adam, un ansiano kasá ku tin tres yu, a splika loke a yud’é: “Mi ta hasi esfuerso pa mi tin un bida simpel. Mi ta evitá hòbinan ku ta tuma hopi tempu i propiedatnan ku ta eksigí hopi atenshon. Esei no ta nifiká ku mi tin un bida di apnegashon. Simplemente, mi ta preferá di rekreá na un manera simpel.”

Meditashon riba bon resultado di e desishonnan ku bo a tuma por yuda bo haña goso atrobe i mantené un punto di bista positivo. Por ehèmpel, Mariusz, un ansiano ku tin tres yu, a bisa: “Ora mi a kuminsá studia Beibel, mi a bira un persona optimista. De bes en kuando, ainda mi ta haña mi ku problema. Pero mayoria di biaha, ta Yehova so sa esei. I ku su yudansa, mi ta sigui wak padilanti ku goso.”

Manera e kaso di Mariusz ta mustra, un aktitut positivo no ta kita tur ansiedat. Pero e por laga bo sinti mihó i yuda bo trata ku e desafionan di bida ku éksito. Beibel ta bisa: “Tur e dianan di esun ku ta afligí ta malu, ma esun di kurason kontentu semper tin fiesta.” (Pro. 15:15) Reflekshoná tambe riba e maneranan ku Dios a demostrá su amor kaba na bo. Ora bo ta meditá riba eseinan, lo bo stima Yehova mas i bo goso lo oumentá.​—Mat. 22:37.

Un famia ta haña mas goso ora e miembronan ta pone Yehova i su interesnan na promé lugá den nan bida. Ora nan ta desplegá kualidatnan kristian, lo tin ménos frikshon, i nan lo disfrutá di relashonnan plasentero i mas estrecho ku otro. Di e manera ei, bo kas lo ta un berdadero fuente di pas i union pa henter famia.​—Sal. 133:1.

Ora miembronan di famia ta partisipá huntu den aktividatnan spiritual, nan ta haña mas goso. Mariusz a splika: “E tempu ku nos ta pasa huntu komo famia ta di gran balor pa mi. Mi kasá ta apoyá mi masha bon mes. Ki ora ku ta posibel, e ta na mi lado, sea ta den sirbishi di vèlt òf ora mi ta limpia stadion promé ku kongreso. Ademas, ora mi ta bai duna diskurso na e otro kongregashonnan, e ta bai ku mi. Esaki ta animá mi mashá.”

Beibel ta bisa ku kristiannan mester perkurá pa e nesesidatnan material di nan famia. (1 Tim. 5:8) Pero si bo trabou ta eksigí hopi tempu i energia, e por pone bo pèrdè goso den e sirbishi di Dios. P’esei, hasi orashon na Yehova tokante e asuntu. (Sal. 55:22) Algun ruman a yega na e konklushon ku nan tin ku kambia di trabou pa nan por pone e Reino di Dios na promé lugá. Ningun kristian no mester permití benefisionan finansiero di un trabou ku ta eksigí hopi tempu i energia stroba nan di pone e debido atenshon na asuntunan spiritual, pasobra esakinan ta e kosnan di mas importante.​—Pro. 22:3.

Kisas ta bon pa bo skirbi tur e benefisio- i desbentahanan di bo aktual òf futuro trabou. Klaru ku ta dushi pa bo tin un trabou ku ta paga bon i ku ta duna bo satisfakshon. Pero, e trabou ku bo tin aworakí ta laga bo ku tempu i energia pa yuda bo famia den sentido spiritual? Evaluá tur faktor na un manera ophetivo i tuma desishonnan ku ta duna prioridat na bo relashon ku Yehova.

Si e trabou ku bo tin aktualmente no ta yuda bo krese spiritualmente, bo tin ku hasi kambio. Hopi kristian a hasi kambio drástiko pa nan por haña tempu pa asuntunan spiritual. Un ruman hòmber na Polonia a konta: “Tabatin ún biaha ku mi no por a hasi otro. Mi mester a kita for di e kompania kaminda mi tabata traha pasobra hopi bes mi mester a bai afó pa trabou. Mi no tabatin sufisiente tempu pa atendé mi asuntunan spiritual ni pa perkurá pa mi famia manera mester ta.” Aktualmente e ta gana su pan na un trabou ku ta eksigí muchu ménos di su tempu i energia.

Haña Goso den Yuda Otro Hende

Hesus a bisa ku “ta mas bendishoná pa duna ku pa risibí.” (Echo. 20:35) Kristiannan tin hopi oportunidat pa duna. Tin biaha, ta kosnan chikitu mes ta duna goso, por ehèmpel, un smail, un man fuerte òf un danki sinsero pa un ruman su trabou duru den su asignashon teokrátiko.

Apòstel Pablo a animá kompañeronan kristian pa ‘enkurashá esnan ku ta falta ánimo i  yuda e débilnan.’ (1 Tes. 5:14) Personanan deprimí por sinti ku nan no tin sufisiente forsa pa trata ku nan problemanan. Bo por yuda personanan asina? Si bo mira ku ún di bo rumannan ta pèrdiendo su goso den e sirbishi di Yehova, trata di anim’é. Esei lo animá bo mes tambe. Tin sierto problemanan ku niun hende no por solushoná. Apesar di esei, bo por mustra kompashon sinsero na bo ruman i anim’é pa dependé riba Yehova, pasobra Su yudansa nunka no ta faya. Esnan ku hasi esei lo no keda desapuntá.​—Sal. 27:10; Isa. 59:1.

Un otro manera práktiko ku bo por yuda un persona ku falta goso ta di invit’é pa traha ku bo den sirbishi. Ora Hesus a manda su 70 disipelnan bai prediká, el a manda nan “dos-dos.” (Luk. 10:1) Bo no ta kere ku esaki a duna nan chèns di animá otro? Abo tambe por invitá algun ruman pa traha ku bo den sirbishi i asina yuda nan haña goso atrobe?

Ounke nos por tin motibu válido pa preokupá, Pablo a animá nos ku e siguiente palabranan: “Regosihá den Señor semper; atrobe lo mi bisa, regosihá!” (Fil. 4:4) E echo ku bo ta stima Dios, ta obedes’é i ta perseverá ku entusiasmo den su trabou ta duna bo bida propósito. I esei ta duna bo goso. Es mas, Yehova ta yuda bo trata ku e preshon- i problemanan ku bo ta konfrontá.​—Rom. 2:​6, 7.

Nos tin fe ku e mundu nobo ku Yehova a primintí ta masha serka. E tempu ei, e bendishonnan i motibunan pa goso lo ta hopi. (Sal. 37:34) Sí, nos por ta gososo. Ademas, nos no mester lubidá tur e maneranan ku Yehova ta bendishoná nos asta for di awor. Pues, nos por sigui ‘sirbi Yehova ku goso.’​—Sal. 100:2.

[Tabèl na página 29]

(Pa e teksto den su formato kompleto, wak e publikashon)

Pa bo keda gososo, kisas bo tin ku ahustá e manera ku bo ta parti bo tempu

REKREO i ENTRETENIMENTU

KAS i FAMIA

TRABOU

REUNIONNAN KRISTIAN

ESTUDIO PERSONAL

SIRBISHI

[Plachi na página 31]

Bo por yuda otro hende haña goso atrobe?