Mu noʼox xokobik, pe xmuyubaj noʼox chtunik ta stojolal Dios

LI Jeovae tskʼan ti xkuxet noʼox koʼontontike (Sal. 100:2). Akʼo mi jech, stalel onoʼox ti mu noʼox xi jxokobe. Yikʼaluk van xi jxokob toʼox mas kʼalal skʼan toʼox xkichʼtik voʼe, pe ta skoj ti oy kʼusi jbainojtik xchiʼuk ti oy kabteltik ta sventa li mantale yikʼaluk van chi jlub tajek. Yikʼaluk van oy jmul chkaʼitik ta skoj ti muʼyuk bu tspas kuʼuntik skotol li kʼusi jbainojtike. ¿Kʼuxi tspas kuʼuntik ti parejouk noʼox kʼusi ta jpastik sventa mu xchʼay kuʼuntik li «xcuxetel coʼntontic chacʼ Mucʼul Diose»? (Neh. 8:10.)

Ta skoj ti vokol li kuxlejal avie xchiʼuk ti ep kʼusitik skʼan xichʼ pasele, skʼan me jchapanbetik lek yorail li kʼusi ta jpastike. Xi akʼbat snaʼ yuʼun Dios jun lekil tojobtasel li Pabloe: «Qʼuelo me abaic lec ta sventa li cʼusitic chapasique. Mu me jechucoxuc jech chac cʼu chaʼal li bochʼo bolique, jaʼuc jechoxuc jech chac cʼu chaʼal li bochʼo bijique. Tunesic lec li cʼacʼal chjelov avuʼunique, yuʼun yantic tsoc batel li banamile» (Efe. 5:15, 16).

¡Jaʼ jun lekil tojobtasel taje! Jaʼ yuʼun lek me ti jakʼbe jbatik kʼusi oy ta koʼontontik spasel sventa parejo jkʼelbetik skʼoplal li xchanel jVivliatike, li kutsʼ kalaltike, li chol mantale, li kabteltike xchiʼuk li yan kʼusitike.

Xvul van ta ajol ta melel ti kʼu to yelan xa muyubaj kʼalal la avakʼ aba ta stojolal Diose xchiʼuk ti kʼalal la avichʼ voʼe. ¿Kʼu yuʼun ti jech la muyubaj tajeke? Jaʼ ta skoj li kʼusitik la achan ta sventa Jeovae xchiʼuk ta sventa li kʼusi tskʼan tspase. Yikʼaluk van oy jayibuk u la avakʼbe yipal ta xchanel sventa xavaʼibe lek smelolal li kʼusitik melel ta Vivliae. Pe toj lek me ti jech la avakʼbe yipale, yuʼun la sjel akuxlejal xchiʼuk jaʼ xa muyubaj-o li kʼusi la avojtikine.

Veno, pe mi muʼyuk bu ta jmakʼlin jbatik ta mantale yikʼaluk me xchʼay kuʼuntik li muyubajele. Jaʼ yuʼun chaʼa, mi mu noʼox xa xokob chavaʼi ta jyalel ta skʼelel xchiʼuk ta xchanel li aVivliae jelbo me yorail li kʼusitik cha pase. Akʼo mi kʼajomal noʼox jayibuk minuto ta jujun kʼakʼal xa chan li Vivliae xchiʼuk ti xa nopbe lek smelolale, ta me xa nopaj-o ta stojolal Jeova xchiʼuk jaʼ me xa muyubaj-o.

Li kʼusi tspas ep yajtuneltak Diose jaʼ ti chokobtasbeik skʼakʼalil ta spasel li kʼusitik mas tsots skʼoplale. ¿Kʼusi xuʼ xkaltik li ta atojolale? Xi xa jakʼbe abae: «¿Kʼu sjalil ta jkʼel li revista ti maʼuk chalbe skʼoplal Vivliae o li periodikoetike, li televisione, kʼu sjalil chkaʼi son, o kʼu sjalil ta jchʼay-o koʼonton li  kʼusitik mas lek chkaʼie?». Akʼo mi ta jkuxtik-o yaʼel li kʼusitik ta jpastik taje, maʼuk me xbat ta koʼontontik (1 Tim. 4:8). Mi mu xa xa naʼ kʼusi cha pas yilel ta skoj ti mu xa xakʼ orae, jaʼ xa me yorail ti skʼan xa chapan lek li kʼusitik cha pase.

Adam ti jaʼ jun mol xchiʼuk ti oy oxvoʼ xnichʼnabe chal kʼuxi tspas yuʼun li kʼusitik sbainoje: «Lek noʼox sba ti kʼuyelan li jkuxlejal ta jkʼane. Muʼyuk bu ta jchʼay-o koʼonton li kʼusi ep ora yichʼoje, chʼabal kuʼun xtok li kʼusitik toj echʼem skʼan kʼelele. Pe maʼuk skʼan xal ti muʼyuk bu ta jkʼupin li kuxlejale. Moʼoj, yuʼun jaʼ noʼox ta jpas li kʼusitik mu masuk chakʼ kabtele».

¿Mi mu jechuk ti ep kʼusitik lekik jtaojtik ta skoj li be bu jtamoj batel ta jkuxlejaltike? Jech chaʼa, kʼalal ta jnopbetik skʼoplale jaʼ me xi jmuyubaj-o xchiʼuk muʼyuk me mas kʼusi ta jvul-o koʼontontik. Jaʼ jech chkiltik ta stojolal Mariusz ti jaʼ jun mol eke xchiʼuk ti oy oxvoʼ xnichʼnabe. Xi chal kaʼitike: «Lik muyubajkun kʼalal lik jchan Vivliae. Melel onoʼox chaʼa, oy onoʼox vokol ta jnuptan bakʼintik ti jaʼ noʼox snaʼoj stuk li Jeovae. Pe koliyal ti tskoltaune xi muyubaj noʼox jmalaoj li kʼusi chkʼot ta pasele».

Kʼuchaʼal laj xa kiltike, mu onoʼox xchʼay-o jvokoltik ti xi jmuyubaj noʼoxe, pe tskoltautik ti akʼo mas lek xkaʼi jbatike xchiʼuk ti stsʼik kuʼuntik li vokolil ta jkuxlejaltike. Xi chal jun pʼijil loʼil ta Vivliae: «Li bochʼo oy svocole jech ta vocol noʼox oy o scotol cʼacʼal; yan li bochʼo xcuxet noʼox yoʼntone puru qʼuin noʼox chaʼay o scotol cʼacʼal» (Pro. 15:15). Mi ta jnoptik lek xtok ti kʼu to yelan skʼanojutik li Diose ta me jkʼantik mas xchiʼuk mas me xi jmuyubaj (Mat. 22:37).

Jaʼ me mas xmuyubaj-o utsʼ-alaliletik kʼalal jaʼ baʼyel chakʼ ta xkuxlejalik li Jeovae. Mi jaʼ jech tspas stalelalik kʼuchaʼal chal Vivliae mas me jutuk chut sbaik, mas me tskʼan sbaik xchiʼuk mas me tskʼupin xkuxlejalik. Jech ta melel, jaʼ me te tsta xkuxetel yoʼontonik xchiʼuk slekilalik li ta utsʼ-alalile (Sal. 133:1).

Toj jtunel me xtok ti jmoj spasik li kʼusitik sventa mantal li utsʼ-alaliletike. Xi chal li Mariusze: «Toj tsots skʼoplal chkaʼi ti kʼu sjalil ta jchiʼin li kutsʼ kalale», xi to chal kaʼitike: «Tskoltaun li kajnile. Koʼol chi lokʼkutik ta chol mantal kʼalal stakʼe, xchiʼuk kʼalal xuʼ chile chbat xchiʼinun ta smesel li estadio bu ch-echʼ kuʼunkutik mukʼta tsobajeletike xchiʼuk chbat xchiʼinun kʼalal chbat ketʼes mantal ta yan tsobobbailetike. Tspat koʼonton ti kʼuyelan tskoltaune».

Jech onoʼox ta melel, li Vivliae chal ti akʼo xakʼbe kʼusitik chtun yuʼun yutsʼ yalal li yajtsʼaklomtak Cristoe (1 Tim. 5:8). Pe mi te chbat-o jkʼakʼaltik li kabteltike xchiʼuk ti chi jlub tajek yuʼune, xuʼ me xchʼay kuʼuntik li muyubajel ta jtatik ti chi jtun ta stojolal Diose. Mi jeche toj tsots me skʼoplal ti xa kʼanbe li beiltasel chakʼ Jeovae (Sal. 55:22). Oy buchʼutik sjeloj yabtelik sventa jaʼ baʼyel xakʼ ta xkuxlejalik li Ajvalilal yuʼun Diose. Mu me junuk yajtsʼaklom Cristo stakʼ xchʼay ta sat li kʼusi mas tsots skʼoplale, jaʼ xkaltik, li kʼusitik ta sventa mantal ta skoj noʼox ti toyol lek stojol ta yabtele, pe ti te chbat-o kʼakʼal yuʼune (Pro. 22:3).

Mi jaʼ jech yakal cha nuptane yikʼaluk van lek ti xa tsʼiba ta vun li kʼusi lek xchiʼuk li xchopolil avabtel avie o li abtelal chalbeik skʼoplale. Veno, jech onoʼox ti ta jkʼan kabteltik ti lek xi jtojate xchiʼuk ti xkuxetuk noʼox koʼontontik yuʼune, pe ¿mi oy to yorail chavil sventa xa chabi ta mantal li avutsʼ avalale? Kʼelbo lek skʼoplal li kʼusitike, vaʼun jaʼuk xkʼot ta nopel avuʼun ti kʼusi jaʼ chakʼ ta ilel ti oy sbalil chavil ti kʼuyelan lek xavil aba xchiʼuk Jeovae.

Mi mu xa chʼi-o ta mantal chavil ti kʼuyelan oyot avie, mu me xa nop ti jech xa la kom-oe. Ep yajtsʼaklomtak Cristo ti ep kʼusitik sjeloj ta xkuxlejalik sventa xtunik mas ta stojolal li Jeovae. Xi chal kaʼitik jun ermano ta Poloniae: «Toj ep xchiʼuk toj nom chi xanav yuʼun li kabtele, vaʼun muʼyuk xa mas xokolun ta sventa li mantale xchiʼuk ta sventa li kutsʼ kalale. Jaʼ yuʼun laj kikta li empresa bu chi abteje». Mas xa jutuk te chbat skʼakʼal xchiʼuk yipal li ta yabtel avie.

Chakʼ muyubajel ti ta jkoltatik yantike

Xi laj yal li Jesuse: «Jaʼ toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe» (Hech. 20:35). Li yajtsʼaklomutik Cristoe toj ep jech chkiltik kʼuchaʼal taje. Oy bateltik chmuyubaj kuʼuntik yantik kʼalal chi jtseʼine, kʼalal ta jtsakbetik skʼobike o kʼalal oy kʼusi chkalbetik sventa ta jtojbetik ta vokol li kʼusi echʼ yal ta tsobajel jun ermano o ermanae. Xchiʼuk ta me xi jmuyubaj-o ta melel taj eke.

Xi laj yalbe mantal yermanotak li jtakbol Pabloe: «Tsatsubtasbeic me yoʼnton li bochʼotic muʼyuc stsatsal yoʼntonique. Coltaic me li bochʼotic  aluben noʼox chaʼyique» (1 Tes. 5:14). Yikʼaluk van mu stsal yuʼun svokol chaʼi stukik li buchʼutik muʼyuk stsatsal yoʼontonike xchiʼuk ti chat yoʼontonike. ¿Kʼuxi xuʼ jkoltatik? Patbo yoʼonton li buchʼu muʼyuk xa yip chaʼi chavil sventa chtun ta stojolal Jeovae. Mi jech cha pase ta me xa ta spatobil avoʼonton ek. Jech onoʼox ta melel, oy vokoliletik ti muʼyuk buchʼu xuʼ xchapaj yuʼune. Pe li kʼusi xuʼ jpastike jaʼ ti xkakʼbetik yil ti xkaʼibetik smelolal svokol li ermanoe. Vulesbo ta sjol ti mu jecheʼuk chakʼ svokol mi tspat sjunul yoʼonton ta stojolal Jeovae (Sal. 27:10; Isa. 59:1).

Xuʼ me xkalbetik xtok ti akʼo xbat xchiʼinutik ta chol mantale. Kʼalal laj yalbe ti akʼo xbat xcholik mantal li 72 yajtsʼaklomtak Jesuse, «ta chabchab la stacan batel» (Luc. 10:1). Vaʼun jaʼ jech xuʼ skolta sbaik xchiʼuk spatbe sba yoʼontonik ta jujuntal. ¿Mi mu jechuk ti jaʼ jech chkʼot ta pasel ta jtojolaltik ek kʼalal chbat jchiʼintik ta chol mantal li ermanoetik ti chibajemike?

Ta melel, ta onoʼox xjel batel li jkuxlejaltike xchiʼuk ta jnuptantik vokoliletike. Akʼo mi jech, toj ep me srasonal kuʼuntik ti akʼo jchʼuntik li mantal laj yal Pablo liʼe: «Jʼechʼel me cuxetuc o avoʼnton acotolic ta stojol li Cajvaltique. Chacalboxuc yan velta, cuxetuc o me avoʼntonic» (Fili. 4:4). Jtos ti kʼusi chakʼbe sbalil li jkuxlejaltike xchiʼuk ti xi jmuyubaj-oe jaʼ ti jkʼanojtik li Diose, ti ta jchʼunbetik smantale xchiʼuk ti ta sjunul koʼontontik ta jpastik-o li abtelal yakʼojbutike. Li kʼusi mas tsots skʼoplal ta skotolale jaʼ ti tskoltautik ta stsalel li vokoliletike (Rom. 2:6, 7).

Ta sventa li xchʼunel koʼontontike toj poʼot xa me xvul chkiltik li achʼ balumil yalojbutik Diose. ¡Toj echʼem xa noʼox li muyubajel chkaʼitike xchiʼuk li xkuxetel oʼontonal ta jkʼupintike! (Sal. 37:34.) Jaʼ yuʼun chaʼa, mu me xi jchibaj. Oyuk me lek ta joltik skotol li bendisionetik ti yakal xa chakʼbutik avi li jTotik ta vinajele. Mi jech ta jpastike jaʼ me jech chkaʼitik kʼuchaʼal liʼe: «Cuxetuc noʼox avoʼnton tunanic yuʼun li Mucʼul Diose» (Sal. 100:2).

[Lokʼol ta pajina 8]

Sventa mu xchʼay kuʼuntik li muyubajele, skʼan me xkakʼbetik yorail jujutos li kʼusitik ta jpastike

CHʼAYOB OʼONTONAL

KUTSʼ KALALTIK xchiʼuk JNATIK

ABTELAL

TSOBAJELETIK

XCHANEL JVIVLIA JTUKTIK

CHOL MANTAL

[Lokʼol ta pajina 10]

¿Mi xuʼ xa kolta li buchʼutik chibajemike?