Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso orụk inyene ke Abasi edinọ fi?

Jehovah ama ọnọ ndusụk owo ke eset, utọ nte Abraham ye Solomon, inyene. Edi se nnyịn inen̄erede iyom idahaemi ye se Abasi edinọde nnyịn edi mbuọtidem, emem, ediyụhọ ye se inyenede, ye inemesịt.—9/1, page 3-7.

• Jesus ndikanyan̄a Peter ke ini enye okoyomde ndiden̄ ekpep nnyịn nso? (Matt. 14:28-31)

Edieke etiede nte ke eyenete inyeneke mbuọtidem, imekeme ndinyanade ubọk ke ndamban̄a usụn̄ mmụm enye, nnyụn̄ n̄n̄wam enye enen̄ede enyene mbuọtidem.—9/15, page 8.

• Nso ke edinyan̄a nnyịn akakpa Jehovah?

Inua ikemeke nditịn̄ nte eketiede Jehovah ke idem ndikụt nte ẹtụhọrede Eyen esie, ẹsakde enye nsahi, ekem ẹmen ẹkewot nte abiatibet. Abraham ndikenyịme ndiwa Isaac Eyen esie akada aban̄a emi.—9/15, page 28-29.

• Ntak emi ikpan̄wed obio ukara Pope edide n̄kpọuto?

Ẹkewet Ikpan̄wed emi ke usem Greek ke n̄kpọ nte isua 300 ama ekebe tọn̄ọ ẹkewet Bible ẹkụre. Enye esịne ofụri N̄wed Abasi Usem Hebrew ye eke Christian Usem Greek, ibọhọke ikpehe ifan̄ oro ẹkesopde. Ikpan̄wed emi an̄wam nditọ ukpepn̄kpọ ẹfiọk nte akpasarade N̄wed Abasi eketiede.—10/1, page 18-20.

• Nso ke Mme N̄ke 24:27 ekpep nnyịn aban̄a nte ‘ẹkpebọpde ufọk’?

Owo ekededi oro oyomde ndidọ n̄wan akpana enen̄ede eben̄e idem ndise mban̄a ubon esie. Emi abuana ndinyene okụk ndida nse mban̄a ubon nnyụn̄ n̄n̄wam mmọ ẹtuak ibuot ẹnọ Abasi.—10/15, page 12.

• Ntak emi mînenke ndidọhọ ke Mme Ntiense Jehovah ẹdi ido ukpono Protestant?

Ẹketọn̄ọ ido ukpono Protestant ke Europe ke n̄kpọ nte isua 500 emi ẹkebede man ẹnam ukpụhọde ke Ufọkabasi Roman Catholic. Ẹkot mbon oro ẹnyịmede mme edumbet ye uduak mme anam Ukpụhọde emi mbon “Protestant.” Okposụkedi emi Mme Ntiense Jehovah mînyịmeke ke pope akara ofụri ererimbot, edi ẹnen̄erede ẹnịm ke Bible kpọt ekpep akpanikọ, mmọ itieneke mbon Protestant ikpep nsunsu ukpepn̄kpọ m̀mê nditiene nnam se mmọ ẹnamde.—11/1, page 19.

• Ndi ana ekpep usem Hebrew ye Greek man Bible an̄wan̄a fi?

Baba. Ikpîkpu edifiọk mme usem emi inamke owo ọfiọk etop Bible. Idem mbon emi ẹkpepde usem emi ẹsụk ẹyoyom n̄wed ukabadeikọ ye mme n̄wed mbet usem emi. Abasi ndikekpeme ikọ akakan Asan̄autom esie emi ẹkekabarede owụt ke owo ekeme ndikpep akpanikọ ke usem ekededi oro ẹkabarede Bible ẹsịn.—11/1, page 20-23.

• Didie ke Jehovah ye Jesus ẹkpep nnyịn ido?

Kpa ye oro Jehovah edide Andikara ofụri ekondo, enye esinam n̄kpọ ukpono ukpono ye owo onyụn̄ ọfọn ido. Ke ini Jehovah ekenemede nneme ye Abraham ye Moses, enye ama etịn̄ ikọ Hebrew oro ẹsiwakde ndikabade nte “mbọk.” (Gen. 13:14; Ex. 4:6, NW) Enye esikpan̄ utọn̄ n̄ko ọnọ mme owo. (Gen. 18:23-33) Jesus okonyụn̄ etie ntre n̄ko, enye ama esima ndin̄wam mme owo onyụn̄ esikot mmọ ke enyịn̄.—11/15, page 25.

• Ntak emi ata mme Christian mîsidiaha Obufa Isua China?

Mbon Asia ẹda usọrọ Obufa Isua China nte akakan usọrọ mmọ. Mme owo ẹsidia usọro emi man ẹnyene mfọniso ẹnyụn̄ ẹkpono mme spirit. Mme Christian ẹsikpono mme ete ye eka mmọ, edi mmọ isitieneke idia usọrọ ekededi oro ẹnamde man ekeme ndidiana ye mme akpan̄kpa m̀mê man mme abasi ubon ẹkpeme mmọ.—12/1, page 20-23.