Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Anji tangila ni udi mua kuandamuna nkonko idi ilonda eyi:

• Ntshinyi tshiatuambuluisha bua kutungunuka ne kutumikila Nzambi nansha mutudi bena mapanga?

Bua tuetu kukandamena meji mabi, tudi ne bua ‘kulongolola muoyo wetu’ kumpala kua tuetu kupeta ntatu ne tudi ne bua kudisuika bua kutumikila Yehowa nansha mu ntatu ya mushindu kayi. (Mus. 78:8) Umue mushindu wa kulongolola mioyo yetu nkudilongela Bible ne muoyo mujima, kulonga kabidi mikanda yetu.​—15/9, dibeji dia 12-13.

• Ndilongesha kayi ditudi mua kulongela ku tshivua Yezu muambile Petelo pavuaye udina mu mâyi? (Mat. 14:28-31)

Tuetu bamone muanetu kampanda udi umueneka bu udi ne ditabuja dikese, tudi mua kuolola tshianza bua kumuambuluisha bua ditabuja diende dikole.​—15/9, dibeji dia 8.

• Ntshinyi tshivua Yehowa mufile bua kutupikula?

Bivua bisame Yehowa bua kumona muvuabu bakengesha Muanende, bamuseka. Anu muvuabi bimuenekela ku dijinga divua nadi Abalahama dia kulambula muanende, Yehowa wakanyisha bua bashipe Muanende bu muenji wa malu mabi nansha muvuabi bimusama.​—15/9, dibeji dia 28-29.

• Ntshinyi tshidi Yehowa ulomba bantu badiye ulongesha?

Bualu bunene budiye utulomba nkudipuekesha ne kuitaba bua atulongeshe. Davidi wakamba ne: ‘Yehowa udi muimpe ne muakane, udi uyisha badi ne mitshima mipuekele njila wende.’ (Mus. 25:8, 9).​—15/9, dibeji dia 21.

• Ndilongesha kayi ditudi tupetela ku tshidi Nsumuinu 24:27 wamba bua ‘kuasa nzubu’?

Muntu udi musue kusela udi ne bua kudilongolola bua kuambulaye bujitu ebu. Bujitu ebu budi bulomba kudisha bena mu dîku diende ne kubalongesha Dîyi dia Nzambi.​—15/10, dibeji dia 12.

• Bua tshinyi kuikala ne dituku dia kuenza Ntendelelu wa mu Dîku kudi ne mushinga bua bana?

Kuenza nunku, kudi kubambuluisha bua kuanyisha bionso bidi Yehowa mutuenzele ne nekubambuluishe kabidi bua kukolesha malanda abu ne Nzambi, kukolesha ne ditabuja diabu.​—15/10, dibeji dia 30-31.

• Mbimpe bua muanetu wa bakaji kubuikilaye mutu wende padiye ukudimuna miyuki mu muakulu wa tumama mu bisangilu, mu mpuilu ne mu mpungilu anyi?

Padi muanetu wa bakaji ukudimuna muyuki bua bantu badi bumvua, bateleji batu batangila ngamba-malu eku bikale bateleja eu udi ukudimuna. Bana betu ba bakaji batu bakudimuna mu miakulu ya nunku kabatu bimana kumpala mu mushindu udi ukoka ntema ya bateleji to. Dîba adi kabiena ne mushinga bua muanetu wa bakaji udi ukudimuna muakulu udi bantu bakula kuvuala tshitambala to.​—15/11, dibeji dia 12.

• Mmushindu kayi udi Yehowa ne Yezu batushile tshilejilu tshia bukalanga?

Nansha mudi Yehowa Mfumu mutambe bunene, udi wenzela bantu malu ne bulenga ne kanemu. Pavuaye muyukile ne Abalahama ne Mose, wakatela muaku wa mu tshiena Ebelu udibu bakudimune ne: ‘Bu wewe mua kusua.’ (Gen. 13:14; Ekes. 4:6, NW) Nzambi utu kabidi uteleja bantu. (Gen. 18:23-32) Yezu uvua pende uleja bantu kanemu ne uvua mudiakaje bua kuambuluisha bantu bavua balua kudiye ne misangu ya bungi uvua ubabikila mu mêna abu.​—15/11, dibeji dia 25.

• Mmunyi mutudi mua kudiundisha dinanga dietu bua bakuabu?

Patudi ku Nzubu wa Bukalenge tudi mua kuyukila ne bantu bapiabapia ne kuela bakulumpe ne bana muoyo. Tudi mua kuyukila nansha minite mikese ne bantu batuvua katuyi bayukile nabu musangu mushale. Tudi mua kudimanyisha kudi bakuabu patudi mu mpuilu ne mu mpungilu.​—15/11, dibeji dia 20-22.