သင်မှတ်မိသလော

မကြာသေးမီက ထုတ်ဝေခဲ့သော ကင်းမျှော်စင်စာစောင်များကို ဖတ်ရှုရ၍ တန်ဖိုးထားလေးမြတ်ခဲ့ပါသလော။ သို့ဖြစ်လျှင် အောက်ပါမေးခွန်းများကို သင်ဖြေဆိုနိုင်၊ မဖြေဆိုနိုင် စမ်းကြည့်ပါ–

• ဘုရားသခင်သည် သင့်အား အဘယ်သဘောဖြင့် ချမ်းသာကြွယ်၀စေသနည်း။

အတိတ်က ဘုရားသခင်သည် အာဗြဟံနှင့် ရှောလမုန်ကဲ့သို့သော အချို့သူတို့ကို ရုပ်ပစ္စည်းချမ်းသာကြွယ်၀မှုဖြင့် ကောင်းချီးပေးခဲ့သည်။ သို့သော် ခရစ်ယာန်များအတွက် အလိုအပ်ဆုံး ချမ်းသာကြွယ်၀မှုမှာ ဘုရားသခင့်အကူအညီဖြင့် ရရှိနိုင်သည့် ယုံကြည်ခြင်း၊ ငြိမ်သက်ခြင်း၊ ကျေနပ်ရောင့်ရဲခြင်းနှင့် ပျော်ရွှင်ခြင်းတို့ဖြစ်သည်။—၉/၁၊ စာမျက်နှာ ၃-၇။

• ပေတရု အိုင်ထဲနစ်ခဲ့ချိန်တွင် ယေရှု သူ့အားကယ်တင်ခဲ့ခြင်းမှ ကျွန်ုပ်တို့အဘယ်အရာ သင်ယူနိုင်သနည်း။ (မ. ၁၄:၂၈-၃၁)

ညီအစ်ကိုတစ်ဦး ယုံကြည်ခြင်းကင်းမဲ့နေကြောင်း ကျွန်ုပ်တို့သတိပြုမိပါက သူ၏ယုံကြည်ခြင်းပြန်ရရှိလာအောင် ပုံဆောင်သဘောအရ ကျွန်ုပ်တို့၏လက်ကို  ဆန့်ထုတ်၍  ကူညီပေးနိုင်သည်။—၉/၁၅၊ စာမျက်နှာ ၈။

• ကျွန်ုပ်တို့အားကယ်နုတ်ရာတွင် ယေဟောဝါ အဘယ်အရာ အနစ်နာခံခဲ့ရသနည်း။

သားတော်အား ညှဉ်းဆဲခြင်းနှင့်  ကဲ့ရဲ့ပြောင်လှောင်ခြင်းကို ယေဟောဝါသည်းခံခဲ့ရသည်။ ထို့ပြင် သားဖြစ်သူကိုပူဇော်ရန် အာဗြဟံ လိုလိုလားလားရှိမှုက ရာဇဝတ်သားတစ်ဦးအဖြစ် သားတော်ကွပ်မျက်ခံရသည်ကို ယေဟောဝါသည်းခံခဲ့ခြင်း၏ ရှေ့ပြေးပုံရိပ်ဖြစ်ခဲ့သည်။—၉/၁၅၊ စာမျက်နှာ ၂၈-၂၉။

• ဗက်တီကင်ကိုဒက်စ်သည် အဘယ်ကြောင့် အဖိုးထိုက်ရတနာတစ်ခုဖြစ်သနည်း။

ယင်းသည် ကျမ်းစာတစ်အုပ်လုံးရေးသားပြီးစီးသည့်နောက် အနှစ် ၃၀၀ မပြည့်မီက ဂရိလက်ရေးစာမူတစ်ခုအဖြစ် နေ့စွဲတပ်ထားသည်။ ယင်းတွင် ဟေဗြဲနှင့် ခရစ်ယာန်ဂရိကျမ်းစာ အားလုံးနီးပါးပါဝင်သည်။ ယင်းသည် မူရင်းကျမ်းစာသား၌ ပါရှိသောအရာကို သတ်မှတ်ရာတွင် ကျမ်းပညာရှင်များအသုံးပြုသည့် ကိရိယာတစ်ခုဖြစ်သည်။—၁၀/၁၊ စာမျက်နှာ ၁၈-၁၉။

• နယပုံပြင် ၂၄:၂၇ တွင် “နေရာအိမ်ကို ဆောက်လော့” ဟုဆိုခြင်းမှ အဘယ်အရာသင်ယူနိုင်သနည်း။

အိမ်ထောင်ပြုလိုသောအမျိုးသားတစ်ဦးသည် အိမ်ထောင့်တာဝန်များအတွက် ကြိုတင်ပြင်ဆင်သင့်သည်။ ယင်းတွင် အိမ်ထောင်ဦးစီးအဖြစ် မိသားစုအတွက် ကာယပိုင်းအရရော ဝတ်ပြုရေးအရပါ ထောက်ပံ့ပေးရန် အဆင်သင့်ရှိခြင်းပါဝင်သည်။—၁၀/၁၅၊ စာမျက်နှာ ၁၂။

• ယေဟောဝါသက်သေများအား ပရိုတက်စတင့်ဘာသာအဖြစ် ပြောဆိုခြင်းသည် အဘယ်ကြောင့် မသင့်လျော်သနည်း။

ပရိုတက်စတင့်အယူဝါဒသည် ရိုမန်ကက်သလစ်ချာ့ခ်ျကို ပြုပြင်ပြောင်းလဲရန်ကြိုးပမ်းသည့် ၁၆ ရာစုတွင် ဥရောပ၌ ပေါ်ထွက်လာခြင်းဖြစ်သည်။ “ပရိုတက်စတင့်” ဟူသည် ပြုပြင်ပြောင်းလဲလိုသည့် တစ်ယူသန်များအတွက် အသုံးပြုသည်။ ယေဟောဝါသက်သေများသည် ပုပ်ရဟန်းမင်းကြီး၏အာဏာကို ငြင်းပယ်ကာ သမ္မာကျမ်းစာ၏အဓိကကျမှုကို အပြည့်အ၀ထောက်ခံကြသည်၊ ထို့အပြင် သူတို့သည် ပရိုတက်စတင့်ဘာသာတွင် လက်ခံထားသည့် ကျမ်းစာနှင့်မညီသော အကျင့်ဓလေ့များနှင့် သွန်သင်ချက်များကို ငြင်းပယ်ကြသည်။—၁၁/၁၊ စာမျက်နှာ ၁၉။

• တစ်စုံတစ်ဦးသည် သမ္မာကျမ်းစာကို နားလည်နိုင်ရန် ဟေဗြဲနှင့် ဂရိဘာသာစကားကို သင်ယူဖို့လိုသလော။

မလိုပါ။ ရှေးဟောင်းဘာသာစကားနှင့်ပတ်သက်သော အသိပညာရှိထားခြင်းကိုယ်နှိုက်က လူတစ်ဦးအား ကျမ်းစာသတင်းတရားကို ပို၍နားလည်အောင် မပြုလုပ်ပေးနိုင်ချေ။ ထိုဘာသာစကားများကို လေ့လာထားသူတစ်ဦးသည် အဘိဓာန်များနှင့် သဒ္ဒါစာအုပ်များကို အားထားနေရဆဲဖြစ်သည်။ ယေဟောဝါသည် မိမိ၏အကြီးမြတ်ဆုံးကျေးကျွန်ဖြစ်သူ ယေရှု၏နှုတ်ထွက်စကားများကို ဘာသာပြန်ကျမ်းတွင် မှတ်တမ်းတင်ရန် စွမ်းအားတော်ဖြင့် လမ်းညွှန်ခဲ့သည် ဟူသောအချက်က လူတစ်ဦးသည် လက်ရှိဘာသာစကားများဖြင့်ပြန်ဆိုထားသော ဘာသာပြန်ကျမ်းများကို အသုံးပြု၍ အမှန်တရားကို သင်ယူနိုင်ကြောင်း ဖော်ပြသည်။—၁၁/၁၊ စာမျက်နှာ ၂၀-၂၃။

• ယေဟောဝါနှင့်ယေရှုသည် အမူအကျင့်ကောင်းတင်ပြရာတွင် ကျွန်ုပ်တို့အတွက် မည်သို့ ပုံသက်သေကောင်းတင်ပြခဲ့သနည်း။

ယေဟောဝါသည် အမြင့်မြတ်ဆုံးအနေအထားတွင် ရှိသော်လည်း လူသားများအား မဟာကြင်နာမှုနှင့် လေးစားမှုဖြင့် ဆက်ဆံသည်။ ကိုယ်တော်သည် အာဗြဟံ၊ မောရှေတို့နှင့် စကားပြောရာတွင် “ကျေးဇူးပြု၍” ဟုအဓိပ္ပာယ်ရှိသည့် ဟေဗြဲစကားလုံးကို မကြာခဏအသုံးပြုတော်မူသည်။ (က. ၁၃:၁၄; ထွ. ၄:၆) ဘုရားသခင်သည် လူသားတို့ပြောဆိုရာကိုလည်း နားထောင်တော်မူသည်။ (က. ၁၈:၂၃-၃၂) ယေရှုလည်း အလားတူပင် ကိုယ်တော့်ပတ်ဝန်းကျင်တွင်ရှိသူများကို တလိုတလားကူညီပေးရန် အသင့်ရှိခဲ့ပြီး ရံဖန်ရံခါ သူတို့ကိုအမည်ဖြင့်ပင် ခေါ်ခဲ့သည်။—၁၁/၁၅၊ စာမျက်နှာ ၂၅။

လကိုအခြေခံသော နှစ်သစ်ကူးကျင်းပခြင်းကို ခရစ်ယာန်စစ်များ အဘယ်ကြောင့် ရှောင်ကြသနည်း။ အာရှပြက္ခဒိန်များတွင် လကိုအခြေခံသော နှစ်သစ်ကူးပွဲသည် အရေးပါသော ပွဲတော်တစ်ခုဖြစ်သည်။ ပွဲတော်တွင် ကံကောင်းစေခြင်းနှင့် ဝိညာဉ်များကို လေးစားကြောင်းတင်ပြခြင်းတို့ ပါဝင်လေ့ရှိသည်။ ခရစ်ယာန်များသည် သူတို့၏မိဘများကို ဂုဏ်တင်လေးစားကြသော်လည်း သေလွန်သူဘိုးဘေးများ၏ ကာကွယ်မှုရရှိရန် အဆက်အသွယ်ပြုလုပ်ခြင်း၊ အိမ်စောင့်နတ်များ၏ မစမှုရဖို့ ပူဇော်ပသခြင်းတို့အတွက် ပြုလုပ်သော စားသောက်ပွဲများတွင် မပါဝင်ကြချေ။—၁၂/၁၊ စာမျက်နှာ ၂၀-၂၃။