Kasin Nanonotan Yo?

Nanggayagaan mo ta so impanbasa ed agano ni ran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Diad anton pantalos a sarag itayon payamanen na Dios?

Nensaman, walaray benendisyonan nen Jehova na materyal iran kayamanan, a singa di Abraham tan Solomon. Balet say kayamanan a talagan kakkaukolan na saray Kristiano et laktipen toy pananisia, kareenan, inkakontento, tan liket, tan tulongan itayo na Dios a naromog iratan.​—9/1-E, pahina 3-7.

• Antoy naaralan tayo ed impangiliktar nen Jesus ed si Pedro sanen sikatoy onlelereg ed dayat? (Mat. 14:28-31)

No naimano tayon makapuy so pananisia na sakey ya agi, sarag tayon iyunat so lima tayo, a singa panangibaga, tan tulongan tayon ombiskeg so pananisia to.​—9/15, pahina 8.

• Antoy insakripisyo nen Jehova pian niliktar itayo?

Intepel nen Jehova so impamairap tan impanmudmora ed Anak to. Tan, singa inyilustra na inkamabulos nen Abraham sanen inyapay toy anak to, intepel nen Jehova so impamatey ed Anak to a singa kriminal.​—9/15, pahina 28-29.

• Akin et sakey a kayamanan so Vatican Codex?

Say Vatican Codex et Griegon manuskrito ya apawala manga 300 taon manlapud inkakompleto na Biblia. Karga na saya so kompleton Hebreon Kasulatan tan Griegon Kasulatan. Uusaren itan na saray iskolar pian naamtaan no antoy akasulat ed orihinal iran kopya na Biblia.​—10/1, pahina 18-20.

• Antoy naaralan tayo ed Uliran 24:27 nipaakar ed ‘pangipaalagey na abung’?

No labay la na sakey a laki so mangasawa, sikatoy nepeg ya akaparaan parad satan a responsabilidad. Kaiba ed saya so panlegpet ed pamilya to tan pangidaulo ed sikara diad panagdayew ed Dios.​—10/15, pahina 12.

• Akin et agmanepeg a tawagen a Protestante iray Tasi nen Jehova?

Ginmapo so relihyon a Protestante diad Europa nen koma 16 a siglo diad gagalan repormaen so Romano Katoliko. Say salitan “Protestante” et ontutukoy ed saramay manusuporta ed Repormasyon. Tua, agbibidbiren na saray Tasi nen Jehova so autoridad na papa tan aawaten da a say Biblia labat so lapuan na katuaan, balet ta ipupulisay da iray agmakasulatan a bangat tan kagagawa a maslak ed saray Protestanten relihyon.​—11/1-E, pahina 19.

• Kaukolan tayo ni kasin aralen so Hebreo tan Griego pian natalosan so Biblia?

Andi. Agto labay ya ibagan daput no amta tayo iratan a lenguahe et mas natalosan tayo lay mensahe na Biblia. Siansia nin kaukolan tayo iray diksionaryo tan libro ed grammar. Saray salita na sankatalonggaringan a Lingkor nen Jehova a nipatalos la so impuyan tan impreserba na Dios. Kanian kabaliksan na saya a sarag tayoy mangusar na saray patalos na Biblia ed lenguahen natalosan tayo pian naaralan so katuaan.​—11/1-E, pahina 20-23.

• Antoy naaralan tayo ed si Jehova tan Jesus nipaakar ed maabig ya ugali?

Anggaman atagey so posisyon nen Jehova, maabig tan marespeto so pidedeneng to ed totoo. Sanen sikatoy akitongtong ed si Abraham tan si Moises, ginawa to itan aliwan diad paraan a mangigaganggan noagta, sikatoy angusar na Hebreon salita parad mapagalang a kerew. (Gen. 13:14; Exo. 4:6) Ondedengel so Dios ed saray totoo. (Gen. 18:23-32) Ontan met nen Jesus, sikatoy akaparaan tan mabulos a tinmulong ed totoo, a mabetbet a tinawag to ira ed ngaran.​—11/15, pahina 25.

• Akin et ag-iseselebra na saray tuan Kristiano so Lunar New Year?

Say Lunar New Year et importantin piesta diad kalendaryo na saray taga Asia. Maslak a sayan selebrasyon et walay pikonektaan to ed suwerte tan panamagalang ed saray espiritu. Igagalang na saray Kristiano iray atateng da, balet ag-ira mibibiang ed saray engranden panangan pian onkerew na proteksion ed inaatey lan atateng da odino onkerew na pabor ed saray dirios na abung.​—12/1-E, pahina 20-23.