Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe e mafai ona e taliina fesili o loo mulimuli mai:

• I le ā le uiga e mafai ai ona faatamaoaigaina oe e le Atua?

I taimi ua tuanaʻi, sa faamanuia ai e Ieova nisi i ʻoa faaletino, e pei o Aperaamo ma Solomona. Ae o le ʻoa e sili ona manaʻomia e Kerisiano, ma e mafai ona fesoasoani mai le Atua i se tasi ia maua, e aofia ai le faatuatua, filemu, lotomalie ma le fiafia.—9/1, itulau e 3-7.

• O le ā le lesona tatou te aʻoaʻoina mai i le laveaʻiina e Iesu o Peteru a o magoto i le sami? (Mata. 14:28-31)

Pe a tatou mātauina ua faasolo ina vaivai le faatuatua o se uso, e mafai ona tatou aapa atu faafaatusa ma fesoasoani iā te ia ina ia toe faamalosia lona faatuatua.—9/15, itulau e 8.

• O le ā na faia e Ieova ina ia laveaʻiina ai i tatou?

Sa onosaia e Ieova le faapuapuagatiaina ma le tauemua o lona Alo. Ma e pei ona faaatagia mai i le lotomalie o Aperaamo e ofo atu lona atalii, sa onosaia foʻi e Ieova le fasiotia o lona Alo e pei o se tagata solitulafono.—9/15, itulau e 28-29.

• Aiseā ua avea ai le Vatican Codex ma ʻoa tāua?

O se manusikulipi Eleni na tusia a lē itiiti ifo e 300 tausaga talu ona mavae le tusiaina o le Tusi Paia. E toetoe o mau uma o Tusitusiga Eperu ma Tusitusiga Kerisiano Eleni o loo iai. O se tasi o meafaigaluega ua faaaogā e tagata atamamai ina ia iloa ai mea na tusia i le uluaʻi faaliliuga o le Tusi Paia.—10/1, itulau e 18-20.

• O le ā le lesona o loo aʻoaʻo mai i le Faataoto 24:27 e faatatau i le ‘faia o se fale’?

E ao i se alii ua manaʻo e faaipoipo ona sauniuni lelei mo lenā matafaioi. E aofia ai i lea matafaioi le nofosauni e saunia manaʻoga faaletino o se aiga, ma taʻimua i mea faaleagaga i totonu o le aiga.—10/15, itulau e 12.

• Aiseā e lē talafeagai ai ona taʻua Molimau a Ieova o se lotu Porotesano?

Na tulaʻi mai talitonuga faa-Porotesano i le senituri lona 16 i Europa, i se taumafaiga e toe fuataʻi le Lotu Katoliko Roma. O le upu “Porotesano” e faatatau atu iā i latou o loo tausisi i sini o le Toefuataʻiga. E teena e Molimau a Ieova le pule aoao a le pope ma lagolagoina atoatoa le tāua o le Tusi Paia, ae e latou te teena le tele o aʻoaʻoga ma faiga masani e lē faale-Tusi Paia a lotu Porotesano.—11/1, itulau e 19.

• Pe e manaʻomia ona aʻoaʻoina e se tasi le gagana Eperu ma le Eleni ina ia malamalama ai i le Tusi Paia?

E leai. E lē faapea a malamalama i na gagana, ona faigofie ai lea ona malamalama se tagata i le feʻau o le Tusi Paia. E faalagolago atu pea se tasi o loo ia suʻesuʻeina na gagana, i lomifefiloi ma tusi kalama. O le mea moni, o le Atua na faagaeeina le faasaoina o fetalaiga a lana Auauna silisili i se faaliliuga, ua faaalia ai, e mafai ona faaaogā ma aʻoaʻoina e se tagata le upu moni mai i faaliliuga a le Tusi Paia o loo maua i aso nei.—11/1, itulau e 20-23.

• Na faapefea ona faataatia e Ieova ma Iesu se faaaʻoaʻoga mo i tatou i le faaaloalo?

E ui o Ieova o le Pule Silisili Ese, ae e feutagaʻi o ia ma tagata i le agalelei ma le faaaloalo. Na ia fetalai atu iā Aperaamo ma Mose ma faaaogā se upu Eperu a faaliliuina o lona uiga, “faamolemole.” (Kene. 13:14; Eso. 4:6) E faafofoga mai foʻi le Atua i tagata. (Kene. 18:23-32) Sa faia foʻi faapea e Iesu, na nofosauni o ia ma lotomalie e fesoasoani atu i isi, ma e masani foʻi ona ia taʻua o latou igoa.—11/15, itulau e 25.

• Aiseā e lē faamanatu ai e Kerisiano moni le tausaga fou?

O le Tausaga Fou o se aso faamanatu e sili ona tāua i tagata Asia. E masani ona aofia ai i le faamanatuina o lea aso faamanatu, le taumafai ia maua se laki, ma faaalia le faaaloalo i agaga. E faaaloalo ma alolofa Kerisiano i o latou mātua, ae e latou te lē auai i ʻaiga ia e taulaʻi atu e faatasitasi ai ma tuaa ua maliliu, pe ia fiafia mai ai atua o o latou aiga.—12/1, itulau e 20-23.