¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼax unaj k-beetik utiaʼal k-naʼatik le Bibliaoʼ?

Unaj k-kʼáatik u espíritu santo Dios, unaj k-ilik wa jaaj le baʼaxoʼob ku yaʼalaʼal tu yoʼolaloʼ yéetel unaj k-kʼáatik áantaj (10-12, táan juʼun 4-7).

• ¿Baʼax ku kaʼansiktoʼon le úuchik u salvartaʼal Pedro tumen Jesús le ka joʼopʼ u búululoʼ? (Mat. 14:28-31.)

Wa k-ilik utúul sukuʼun bey táan u pʼíittal u fejeʼ, unaj k-tichʼik k-kʼab utiaʼal k-áantik yéetel unaj k-líiʼsik u yóol (15/9, táan juʼun 8).

• ¿Baʼaxten jach nojoch le baʼax tu beetaj Jéeoba le úuchik u tsʼáaik u Hijo t-oʼolaloʼ?

Jéeobaeʼ jach yaʼab úuchik u muʼyaj ka tu yilaj baʼaxoʼob ku sen beetaʼal tiʼ u Hijo, bix u pʼaʼastaʼal yéetel le úuchik u kíimsaʼal jeʼex utúul kʼasaʼan máakoʼ. Lelaʼ ku yeʼesikeʼ jach koʼoj tu tojoltajtiʼ úuchik u salvarkoʼon (15/9, táan juʼun 28 yéetel 29).

• ¿Baʼaxten unaj k-uʼuyik baʼax ku yaʼalik Dios sáamsamal?

U xokik máak le Bibliaoʼ jeʼel u páajtal u keʼetel yéetel u néenkuba máakeʼ (Sant. 1:23-25). Tumen le baʼaxoʼob ku yaʼalikoʼ ku yáantkoʼon k-il bixoʼon. Cada ken k-xokeʼ k-kanik baʼaloʼob túumbentak jeʼel u yáantkoʼon ichil k-kuxtaleʼ. ¿A wojel wa baʼaxten? Tumen le baʼaxoʼob ku yilaʼal teʼ yóokʼol kaabaʼ táan u kʼexpajal, yéetel yoʼolal lelaʼ mantatsʼ táan u kʼexpajal xan bix k-kuxtal (1 Cor. 7:31) (10-12, táan juʼun 4-7).

• ¿Baʼax ku kaʼansiktoʼon Proverbios 24:27, ken u yaʼal «a beetik a najil»?

Ku kaʼansiktoʼoneʼ le máax taak u tsʼoʼokol u beeleʼ unaj u yáax ilik wa jeʼel u páajtal u tsʼoʼokbesik tuláakal le baʼaxoʼob ku kʼáataʼal tiʼ le máaxoʼob tsʼokaʼan u beeloʼoboʼ. Tumen le Bibliaoʼ ku yaʼalikeʼ letiʼe íichamtsil unaj u tsʼáaik baʼaxoʼob kʼaʼabéet ichil u yotochoʼ yéetel letiʼ unaj u yáantik u yatan yéetel u paalal u meyajtoʼob Dios (15/10, táan juʼun 12).

• ¿Baʼaxten ku taasik talmil le taakʼin tiʼ le máaxoʼob tsʼokaʼan u beeloʼoboʼ yéetel baʼax jeʼel u yáantkoʼobeʼ?

U jaajileʼ le talmiloʼob yaan yil yéetel le taakʼinoʼ maases ku yantal tumen maʼ tu confiar máak tiʼ u núup wa tumen sajak ka úuchuk wa baʼax ichiloʼob. Yaan kampʼéel baʼaloʼob jeʼel u yáantik máakeʼ: 1) ken tʼaanak máak tiʼ baʼaloʼob yaan yil yéetel taakʼineʼ maʼ unaj u tsʼíikiliʼ, 2) ¿bix unaj u yilik máak le taakʼin ku náajaltikoʼ?, 3) u tsʼíibtik máak baʼaxoʼob ku tuklik u beetik yéetel 4) u chʼaʼatuklik bajux ken u xup cada utúul (10-12, táan juʼun 28-30).

• ¿Baʼaxten u yantal le adoración ich familiailoʼ jeʼel u taasik utsil tiʼ le paalaloʼoboʼ?

Le adoración ich familiailoʼ ku tsʼáaik tuʼux u yáantaʼal le paalaloʼob utiaʼal ka u maas tsʼáa u yóol u meyajtoʼob Diosoʼ. Le oʼolaleʼ, áant u yiloʼob tuláakal le baʼaxoʼob tsʼoʼok u beetik Jéeoba tu yoʼolaloʼoboʼ yéetel chaʼa u péeksaʼaloʼob tumen u yaabilajoʼob tiʼ letiʼ utiaʼal ka u meyajtoʼob (15/10, táan juʼun 29-31).

• ¿Baʼaxten k-aʼalik Jéeoba yéetel Jesuseʼ jach maʼalob bix u yeʼeskoʼob jatsʼuts modos?

Kex Jéeoba u nojchil tuláakal baʼaleʼ ku yeʼesik yaabilaj yéetel jatsʼuts modos tiʼ wíinik. Jeʼex le ka tʼaanaj yéetel Abraham bey xan yéetel Moiseseʼ meyajnajtiʼ le tʼaan «beet uts» (Gén. 13:14, NM; Éxo. 4:6, NM). Tsʼoʼoleʼ ku yeʼesik xan jatsʼuts modos yoʼolal bix u chʼenxikintik le máaxoʼob meyajtikoʼ (Gén. 18:23-32). Jesuseʼ tu yeʼesaj jach uts, mantatsʼ tu yeʼesaj tsiikil tiʼ u maasil yéetel chúukpaj u yóol u yáantoʼob. Upʼéel bix tu beetileʼ letiʼe úuchik u tʼankoʼob tu kʼaabaʼoboʼ (15/11, táan juʼun 25).

• ¿Kʼaʼabéet wa u pixik u pool le kiikoʼob sutik le tsoltʼaanoʼob ku máansaʼal teʼ muchʼtáambaloʼob wa teʼ asambleaʼoboʼ?

Le kiikoʼob sutik le tsoltʼaanoʼ maʼ letiʼob ku paktaʼaloʼobiʼ. Bey túunoʼ, yaan kʼiineʼ ku páajtal u yantaloʼob aktáan tiʼ le sukuʼun máansik le tsoltʼaanoʼ wa ku kutaloʼob xan. Le oʼolaleʼ maʼ tsaj ka u pix u pooloʼobiʼ (15/11, táan juʼun 12).