“Umtʼañ munaskaktwa”
“Umtʼañ munaskaktwa”
TUNKA mayan maranïkän ukhaw Albertox machjayir umañanak wal umañ qalltxäna. * Amigonakapampi chʼumi manqhanakan jikisisax peliculanakan uñstki uka jaqinakätanwa sasaw anatapxirïna. Janiw uka jaqinakapunïpkänti, ukampis machjayir umañanakax chiqäskapunïnwa.
Tony sat chachax 40 maranïkän ukhaw jukʼamp umañ qalltxäna. Qalltanxa maya jan ukax pä copakwa arumanakax umtʼirïna, qhipatxa phisqa jan ukax suxta copanak umxäna, tiempompix qhawqsa mä urun umxäna uk janiw amuyasxänti.
Albertox jan machirïxañatakix yanaptʼayasïnwa, ukampis Tonyx janiw familiapampisa amigonakapampis yanaptʼayasiñ munkänti. ¿Kunjamas jupanakax jikxatasipxpacha? Albertox kunarutï purtʼaskäna uk arstʼañatakix jakaskiwa, ukampis Tonyx machataw auto apnaqatayna ukat mä chijir purtʼasisaw jiwxatayna, ukhamar purtʼasitapatxa niya mä qhawqha maranakäxiwa.
Yaqhipanakax sapak umaskä ukhax janiw khitirus jan waltʼaykäti sasaw sapxi, ukampis ukham amuyasax pantjasipxiwa: machirïpxatap laykuw familiapasa amigonakapas ukat yaqhanakas jukʼamp jan waltʼäwin jikxatasipxi. * Chiqansa machirïpxatap laykuw jan wali arunakampi chuyms ustʼayapxi, kunayman jan walinaks lurapxi, jaqsa jiwayapxi jan ukax auto apnaqkasinsa irnaqkasinsa chijir purtʼasipxi ukat kunayman usunaks aptasipxaraki. Kawki markanakantix jakapki uka jaqinakatakix sapa marax walja qullqipuniw machirinakampix aptʼasi, ukhamarus machir jaqinakasa familiapasa jukʼamp llakinakanwa jikxatasipxaraki.
Ukhamarusa, “sapüru mä jukʼ umtʼir jaqix janiw machiripunïtap sañ munkiti, machir jaqinakas janirakiw sapür umapkarakiti”, sasaw Estados Unidos markankir Institutos Nacionales de la Salud ukankirinakax qhanañchtʼapxi. Waljaniw machir jaqir jan mistsupkiti, ukampis jukʼat jukʼat jukʼamp umxapxatapxa janiw amuyasipkiti. Yaqhipasti awisakiw umtʼapxi, ukampis umtʼapxi ukhax sint umantxapxaraki.
Ukhamasti, ¿kunjamatsa machjayir umañanak jiljasktanti janich uk amuyassna? ¿Ukat kunjamatsa machjayir umañanak jan ‘jukʼamp thaqhir sarañasätasxa’ yatsna? (Proverbios 23:29, 30, 35.) Jutïr yatichäwinakanwa uka tuqinakat qhanañchasiskani.
[Qhanañchäwinaka]
^ Yaqha sutimpi uchatawa.
^ Yatxatäwinakarjamax jila partix chachanakaw warminakat sipans jukʼamp machirïpxi, ukampis aka yatichäwin uñstki uka iwxtʼanakax paninpachatakiw wali askixa.