“Zis ankor enn dernyen”

ALLEN ti konmans abiz lalkol ler i ti annan 11 an. * I ti al zwe dan bwa avek son bann zanmi e zot ti kontan imit bann akter ki zot ti vwar dan bann film. Rol ki bann akter ti pe zwe pa ti reel, par kont lalkol ki Allen ek son bann zanmi ti bwar ti vreman lalkol.

Tony ti annan 40 an ler ptitapti i ti konmans ogmant lakantite ki i ti bwar, enn oubyen de ver sak swar ti vin senk oubyen sis. Finalman, i ti perdi kont ki kantite i ti pe bwar dan en lazournen.

Allen ti rod led pour rezourd son problenm lalkol. Me, Tony pa ti aksepte led ki son fanmir ek zanmi ti ofer li. Allen i ankor vivan ozordi pour rakont son zistwar, me Tony in mor detrwa lannen pase dan en aksidan trafik apre ki i ti’n bwar tro bokou.

Menm si en dimoun i bwar tro bokou lalkol li tousel, sa i definitivman annan lefe lo lavi lezot e i souvan anmenn bann konsekans grav. * Bann ki abiz lalkol i souvan abiz lezot fizikman e an parol, atak e touy lezot, zot enplike dan bann aksidan loto, travay e zot ganny en kantite problenm lasante. Sak lannen, lasosyete i depans en kantite larzan, san pran kont domaz personnel e emosyonnel ki labi lalkol i annan lo bann dimoun, fanmir ek zanfan.

National Institutes of Health Leta-z-ini, i dir: “Pa tou sa ki bwar souvan ki annan en problenm lalkol e pa tou sa ki annan en problenm lalkol ki bwar tou le zour.” En kantite dimoun ki pa alkolik i devlop sa labitid pour bwar tro bokou san ki zot realize. Lezot i bwar detanzaot, me sa zour ki zot bwar zot bwar plis ki senk ver.

Si ou deside bwar, ki kantite lalkol ki tro bokou? Ki mannyer ou konnen kan in ler pour aret bwar “zis ankor enn dernyen”? (Proverb 23:29, 30, Contemporary English Version) Sa lot lartik pou donn bann bon lenformasyon lo sa size.

[Not anba lo paz]