“Ha Mikɛ Glase Kome Kɛkɛ Afata He”

ALLEN bɔi dãatɔɔ beni eye afii 11. * Ekɛ enanemɛi lɛ shwɛɔ yɛ tsei ashishi, ni amɛkaseɔ mɛi ni amɛnaa yɛ sinii amli lɛ. Sui ni Allen kɛ enanemɛi lɛ kaseɔ yɛ sini mli gbɔmɛi nɛɛ ahe lɛ ji nɔ ni akwaa afeɔ, shi dãa ni Allen kɛ enanemɛi lɛ nuɔ lɛ ji dãa diɛŋtsɛ.

Beni Tony ye afii 40 lɛ ebɔi dãanumɔ babaoo, eha dãa falɛ ni enuɔ lɛ tee hiɛ kɛjɛ glase kome loo enyɔ daa gbɛkɛ kɛtee glasei enumɔ loo ekpaa. Eshɛ he ko ni agbɛnɛ enyɛɛɛ ekane dãa glasei abɔ ni enuɔ yɛ gbi lɛ mli.

Allen bi koni aye abua lɛ kɛtsu edãatɔɔ naagba lɛ he nii. Tony kpoo yelikɛbuamɔ ni ewekumɛi kɛ nanemɛi ni sumɔɔ lɛ lɛ kɛha lɛ lɛ. Ŋmɛnɛ lɛ, Allen yɛ wala mli ni ebaanyɛ egba nɔ ni ba; Tony gbo afii komɛi ni eho nɛ yɛ tsɔne oshara ko ni ená beni eyanu dãa babaoo ní etɔ lɛ sɛɛ.

Kɛ́ mɔ ko nu dãa babaoo lɛ, nɔ ni jɛɔ edãanumɔ lɛ mli kɛbaa lɛ saa mɛi babaoo ashihilɛi ahe, ni bei pii lɛ naagbai wuji ji nɔ ni jɛɔ mli baa. * Dãa ni akɛtsuuu nii yɛ nilee mli lɛ ji nɔ ni bei pii lɛ ekɛ jɛmɔi kɛ yii, pilamɔi kɛ mɔgbee, tsɔne kudɔmɔ kɛ nitsumɔi amli osharai, kɛ gbɔmɔtsoŋ hewalɛnamɔ mli naagbai krokomɛi baa. Dãa ni akɛtsuuu nii yɛ nilee mli lɛ haa maŋ lɛ fiteɔ shika babaoo daa afi, kɛfata he lɛ enɛ kɛ naagbai baa mɛi ni nuɔ dãa lɛ, amɛwekui, kɛ amɛbii anɔ.

Fɛɛ sɛɛ lɛ, nitsumɔhe ko (U.S. National Institutes of Health) wie akɛ, “jeee mɔ fɛɛ mɔ ni fɔɔ dãanumɔ lɛ ji mɔ ni yɔɔ dãatɔɔ he naagba, ni jeee mɛi fɛɛ ni yɔɔ dãanumɔ he naagba lɛ ni nuɔ dãa be fɛɛ be.” Mɛi babaoo ni be ko lɛ amɛjeee dãatɔlɔi lɛ ebatsɔmɔ mɛi ni nuɔ dãa babaoo ni amɛleee. Mɛi komɛi hu, eyɛ mli aahu dani amɛnuɔ shikome, shi kɛ́ amɛkɛɛ amɛmiinu hu lɛ, amɛnuɔ fe glasei enumɔ.

Kɛ́ okpɛ oyiŋ akɛ obaanu dãa lɛ, dãa falɛ enyiɛ baafee nɔ ni fa tsɔ? Te ooofee tɛŋŋ ole be ni esaaa akɛ okɛɔ akɛ “ha mikɛ glase kome kɛkɛ afata he”? (Abɛi 23:29, 30, Contemporary English Version) Saneyitsei ni nyiɛ sɛɛ lɛ baawie saji ni he hiaa ni kɔɔ sane nɛɛ he lɛ ahe.

[Shishigbɛ niŋmai]