“Paas-y-m rãam bilfu”

A ALLEN sẽn wa n tar yʋʋm 11 t’a ra zoe n yũuda rãamã wʋsgo. * Yẽ ne a zo-rãmbã ra kẽeda weoogã n deemdẽ, n maand wa rã-yũudb nins b sẽn yãt filim dãmbã pʋsã. B ra yũuda rãamã n maand wa nin-kãensã, n yaool n yĩm tɩ sẽn be-b filmã pʋgã sẽn yũudã pa rãam sɩd-sɩd ye.

A Tony ra yũuda rãamã bilf-bilfu, la a sẽn wa n ta yʋʋm 40, a yũubã sɩnga paasgo. A ra yũuda vɛɛr a ye bɩ a yiib zaabr fãa, tɩ wa lebg vɛɛr a nu bɩ a yoobe. Kaoosg zugẽ, a wa n pʋd n pa le mi a sẽn yũud vɛɛr dãmb sõor daar pʋgẽ ye.

Rãamã yell wa n paka a Allen hal t’a bao sõngre. A Tony yẽ zakã neb la a zo-rãmb baoome n na n sõng-a, t’a tõdge. Rũndã-rũndã, a Allen ket n tõe n togsa nebã a kibarã, bala a ket n vɩɩme. A Tony yẽ wa n yũu rã-toaag tɩ looge, n zomb montɛɛr n fão tɩ tũ ne a yõore.

Ned sã n yũud rãam tɩ loogdẽ, a rã-yũurã sẽn wat ne zu-loees ninsã mata neb a taaba, hal tɩ wakat ning menga, tõe n tũ ne yõore. * Rãamã yũ tɩ loog nong n wata ne gom-yoodo, tʋya, zaba, bi-be-tʋʋma, nin-kʋʋre, sor zug la tʋʋm zĩisẽ sãmpoaga, n paas bãas buud toor-toore. Yʋʋmd fãa, rã-yũurã sẽn wat ne yɛl ninsã kɩtdame tɩ tẽmsã sãamd hal milyaar dãmba, tɩ pa gomd a sẽn wat ne zu-loees a taab n kõt rã-yũudbã la b zagsã rãmbã ye.

La baasgo, Etazĩni siglg a ye (U.S. National Institutes of Health) sẽn get laafɩ wã yell yeelame tɩ “pa sẽn yũud-a rãam fãa la rã-yũud-kãaga, la tɩ pa rã-yũud-kãag fãa n yũud daar fãa me ye.” Neb wʋsg sẽn da pa rã-yũud-kãas wa n yũudame tɩ loogdẽ, n yaool n tẽed tɩ b yũubã zemsame. Kẽer pa yũud daar fãa, la b sã n wa paame, b yũudame hal tɩ loog noore.

Y sã n yãk yam n na n yũ rãam, bõe la y na n maan n bãng sẽn zemse? Wakat bʋg la y pa segd n le paase? (Yelbũna 23:29, 30) Sõss nins sẽn pʋgdã kõta sagls sẽn tõe n sõng-yã.

[Tẽngr not rãmbã]