“Ase Ngitsi Minye, Litsamo Lekugcina”
“Ase Ngitsi Minye, Litsamo Lekugcina”
MANDLA watsi nakaneminyaka lengu-11 budzala wacala kunatsa kakhulu tjwala. a Yena nebangani bakhe bebavamise kudlala emahlatsini futsi bebalingisa labanye bantfu labebababona kumabhayisikobho. Badlali labebabalingisa bebangesibo bantfu sibili, kodvwa tjwala Mandla nebangani bakhe labebabunatsa, kwakungibo sibili.
Sipho yena abeneminyaka lengu-40 budzala ngalesikhatsi kancane kancane likhula linani lemabhodlela etjwala labewanatsa, esuka ebhodleleni linye aya kulamabili kuye kulasihlanu nobe lasitfupha ngelilanga. Ngekuhamba kwesikhatsi, abengasati kutsi unatse mangakhi emabhodlela ngelilanga.
Mandla wafuna lusito ngenkinga labebhekene nayo yetjwala. Sipho yena kwatsi nanobe emalunga emndeni nebangani labamkhatsalelako bamniketa lusito, wavele watitsela ngalabandzako. Mandla nalamuhla loku usaphila, kungako nje asicocela lendzaba; Sipho yena eminyakeni lembalwa nje leyengcile, ufile engotini yemoto ngemva kwekunatsa kakhulu tjwala.
Nobe ngasikhatsi lotsite angahle anatse kakhulu ayedvwa, kodvwa imiphumela yekunatsa kwakhe kakhulu akwenteki ingabatsintsi labanye bantfu futsi iba mibi kakhulu. b Kusebentisa kabi tjwala imvamisa kuphumela ekuhlukunyetweni kwalabanye ngemavi, ngemiva, ngekushaywa, ekufeni, etingotini temoto, ekulimaleni emsebentini ngisho nasetinkingeni letinyenti temphilo. Kudzakwa kucedza imali lenyenti yelive umnyaka nemnyaka, sesingabali nje tinkinga nekuhlukubeteka ngekwemivelo lokukuletsako kumuntfu nemuntfu, emndenini ngisho nakubantfwana.
Nobe kunjalo, i-U.S. National Institutes of Health, itsi: “Akusibo bonkhe bantfu labavamise kunatsa tjwala njalo labanenkinga yekunatsa, futsi akusibo bonkhe bantfu labanenkinga yetjwala labanatsa onkhe malanga.” Labanyenti labangesiyo imilutsa yetjwala batikhandze sebanatsa kakhulu bangakanaki. Labanye bafane banatse ngaleso sikhatsi, kepha batsi nasebabusukele behluleke kubuyekela.
Nangabe ukhetse kunatsa tjwala, ungati njani nangabe sebubunyenti kakhulu kuwe? Ungati njani nangabe sekungasiso sikhatsi sekutsi “minye litsamo lekugcina”? (Taga 23:29, 30, Contemporary English Version) Letihloko letilandzelako titasiniketa kwatiswa lokulusito kulendzaba.
[Imibhalo lengentasi]
a Emabito ashintjiwe.
b Ngesizatfu sekutsi banyenti bantfu labadvuna lababa yimilutsa yetjwala kwendlula labasikati, kungako kusetjentiswe emabito ebantfu labadvuna kuletihloko letikhuluma ngetjwala letilandzelanako. Nobe kunjalo, lokwatiswa kusebenta kulabadvuna nalabasikati.