Ane Issuwaa Gujjays

ALENI likkiyaappe aattidi ushshaa uyiyoogaa doommidoy 11 laytta naˈa gidido wode. * Inne a laggeti pilmiyan beˈido asatuugaa malatissidi dara giddon kaaˈoosona. Eti milatissidi kaaˈiyoobay tuma gidenna; shin eti uyiyoy tumu ushsha.

Tooni baayyo layttay 40 gidiyo wode, ubba galla omarssan issuwaa woy naaˈˈaa uyiyoogaappe loddan loddan ichashaa woy usuppunaa uyiyoogaa doommiis. Wurssettan, i galla galla woqqaa uyiyaakko qoodaa erenna.

Aleni ushshaara gayttida ba metuwaa xoonanau maaduwaa koyiis. Tooni assi qoppiya so asaynne laggeti immido zoriyaa ekkennan ixxiis. Aleni babaa odanau paxa deˈees; shin Tooni amarida layttaappe kase daro ushshaa uyidi, kaamiyaa daafan hayqqiis.

Issi uri likkiyaappe aattidi uyiyoy barkka gidikkokka, a hanotay kaalettiyoobay haratu deˈuwaakka bochees; hegee darotoo azzanttiyaabaa kaalettees. Ushshaa likkiyaappe aattidi uyiyoogee darotoo qohiyaabaa haasayanaadan, qassi haratu bollan qohuwaa gattanaadan woy asa woranaadan oottees; qassi kaamiyaa laaggiyoogaara woykko oosuwaara gayttida daafaanne payyatettankka daro qohuwaa kaalettees. Ushshaa likkiyaappe aattidi uyiyoogee, izaawu bolli, so asaa bollinne naatu bolli gattiyo qohuwaappe haray, layttan layttan zawi baynna miishshay kiyanaadan oottees.

Gidikkonne, Yu Es Naashinal Inisttitiyut of Helz giyo dirijjitee, “ubbatoo uyiya ubbati ushshaara gayttida metoy deˈiyoogeeta gidokkona; qassi ushshaara gayttida metoy deˈiyo ubbay galla galla uyenna” yaagiis. Ushshaa amalee baynna daroti akeekennan daro ushshaa uyiyoogaa meeze oottidosona. Harati qassi issi issitoo uyoosona; shin issi kutti ichashaappe daruwaa uyoosona.

Neeni uyanau dooriyaaba gidikko, keehi daro giyoogee ay keenee? Neeni, ‘Ane issuwaa gujjays’ gaana koshshennay awudekko waata erana danddayay? (Leemiso 23:29, 30) Ha allaalliyaa xeelliyaagan, maaddiya qofaa kaalliya huuphe yohuwan beˈana.

[Tohossa qofata]