Servi lalkol dan en fason apropriye

TONY sa dimoun ki ti ganny mansyonnen o konmansman sa premye lartik ti’n kapab viv en lot kalite lavi, si i ti’n zis admet ki i ti annan en problenm bwar. Me i paret ki akoz i ti kapab bwar en kantite lalkol, san vwar okenn move lefe, i ti krwar ki i ti annan kontrol lo son lavi. Akoz i ti napa bon zizman?

Lefet ki i ti pe bwar tro bokou sa ti annan en move lefe lo son zizman. Ki swa Tony ti realize oubyen non, son laservel, sa lorgann ki kontrol son kondisyon fizik, mantal e emosyonnel pa ti pe fonksyonn byen akoz i ti annan tro bokou lalkol dan son lekor. Pli i ti bwar, pli i ti vin difisil pour son laservel kapab fonksyonn byen.

En dezyenm rezon akoz Tony pa ti vwar nanryen mal avek son sityasyon, i akoz i ti vreman anvi kontinyen bwar parey i ti abitye. Allen, sa lot dimoun ki ti ganny mansyonnen dan lartik presedan, pa ti aksepte o konmansman ki i ti annan en problenm lalkol. I dir: “Mon ti kasyet mon bwar e mon ti rod leskiz e fer konmsi mon problenm bwar pa ti vreman en problenm. Sel keksoz ki mon ti anvi fer ti zis kontinyen bwar.” Menm si lezot ti vwar ki bwar ti pe kontrol lavi Tony ek Allen, zot tou le de zot ti kontinyen dir avek zot lekor ki tou keksoz ti oke. Sa de zonm ti bezwen pran bann pa neseser pour kontrol lakantite ki zot ti bwar. Me ki zot ti bezwen fer?

Pran bann pa neseser!

En kantite dimoun ki’n aret abiz lalkol in azir an armoni avek sa ki Zezi ti dir: “Si ou li zye drwat i fer ou fer pese, aras li e zet li. Vomye ki ou perdi en parti ou lekor plito ki ou lekor antye i ganny zete dan [“zeenn,” NW].”—Matye 5:29.

Byensir, Zezi pa ti pe konsey dimoun pour koup koup zot lekor. Plito i ti pe dir ki nou devret pare pour rezet okenn keksoz ki fer nou ditor spirityelman. I vre, petet desizyon ki nou pou pran i kapab fer nou soufer en kantite. Me i pou protez nou kont bann panse ek sityasyon ki kapab fer nou abiz lalkol. Alor, si lezot i eksprim zot konsern ki nou pe bwar tro bokou, pran bann pa neseser pour kontrol li. * Si ou remarke ki ou pa kapab kontrol lakantite bwar ki ou bwar, alor ou devret pare pour aret bwar net. Menm si i kapab fermal pour pran sa desizyon, i pa pou sitan fermal ki si ou ti pou andomaz ou lasante akoz ou’n kontinyen bwar.

Menm si ou pa en alkolik, eski ou annan sa tandans pour bwar tro bokou? Si wi, ki bann pa pratik ou kapab pran pour ed ou pour kontrol lakantite lalkol ki ou bwar?

Kote ou kapab ganny led

1. Annan lafwa dan pouvwar lapriyer, priy regilyerman e avek en leker senser. Labib i donn sa konsey tou bann ki anvi fer plezir Zeova: “Dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Filipyen 4:6, 7) Lo kwa ou kapab priye pour ganny lape lespri?

Ou bezwen admet onnetman ki ou annan en problenm lalkol e ou menm ki bezwen pran ka avek sa problenm. Eksprim avek Bondye sa ki ou ti a kontan fer pour rezourd sa problenm e i pou beni ou zefor. Sa pou rekonfort ou e ed ou evit bann problenm pli grav. “Sa enn ki pe kasyet son bann lofans pa pou reisi, me sa enn ki pe konfese e pe kit [zot] pou ganny demontre mizerikord.” (Proverb 28:13) Zezi ti osi dir ki nou kapab priye an dizan: “Pa permet ki nou ganny tante, me anpes nou tonm dan le mal.” (Matye 6:13) Alor ki mannyer ou kapab azir an armoni avek ou lapriyer, e kote ou kapab trouv larepons pour ou bann siplikasyon?

2. Ganny lafors dan Parol Bondye. “Parol Bondye i vivan e i annan pisans. . . . I arive desifre tou dezir ek sekre leker imen.” (Ebre 4:12) Plizyer dimoun ki ti bwar bokou avan in ganny led par lir e medit lo bann verse Labib sak zour. En psalmis ki ti annan lakrent pour Bondye ti dir: “Byennere sa zonm ki pa’n swiv konsey bann dimoun mesan . . . Me i pran plezir dan lalwa Zeova, e i lir son lalwa avwabas lizour e aswar. . . . Tou sa ki i fer pou reisi.”—Psonm 1:1-3.

Letid Labib ki Allen ti fer avek Temwen Zeova ti donn li lafors pour aret bwar. I dir: “Mon asire ki Labib ek bann prensip Labib ki’n ed mwan aret bwar, sansa mon ti pou’n mor.”

3. Devlop kontrol lo ou lekor. Labib i dir ki bann dimoun ki ti soular avan vin Kretyen ti ganny pirifye “dan lespri nou Bondye.” (1 Korentyen 6:9-11) Ki mannyer sa? Premyerman zot ti ganny ede pour aret fer bann parti bwar kot zot vin sou, par devlop kontrol lo zot lekor, sa kalite ki lespri sen Bondye i ed nou devlope. “Pa bezwen soul zot avek diven, akoz sa pou zis antrenn zot dan en lavi dezordonnen; okontrer, zot devre ranpli avek Lespri.” (Efezyen 5:18; Galat 5:21-23) Zezi Kri ti promet ki nou “Papa ki dan lesyel pou donn son Lespri Sen tou bann ki demann li.” Alor, kontinyen “demande e zot a gannyen.”—Lik 11:9, 13.

Bann dimoun ki oule ador Zeova dan en fason akseptab i kapab devlop kontrol lo zot lekor par lir e etidye Labib e osi par fer lapriyer senser regilyerman. Olye dekouraze,  plito aksepte sa promes dan Parol Bondye ki dir: “Sa ki fer plezir Lespri, i pou rekolte sorti kot Lespri, lavi eternel. Annou pa aret fer sa ki byen, parski nou pou rekolte kan letan i a’n arive, si nou pa arete.”—Galat 6:8, 9.

4. Swazir bann bon zanmi. “Sa ki mars avek bann dimoun saz pou vin saz, me sa ki frekant bann enbesil pou mal pase.” (Proverb 13:20) Koz avek ou bann zanmi lo ou determinasyon pour servi lalkol avek moderasyon. Me Parol Bondye i averti davans, ki ler ou pou aret ‘lavi soular ek bann parti bwar’ serten dimoun ki ou ti zanmi avek oparavan pou “trouv sa drol, e kritik” ou. (1 Pyer 4:3, 4) Me fodre ou pare pour aret asosye avek bann ki dekouraz ou pour annan sa determinasyon pour bwar avek moderasyon.

5. Etabli bann limit. “Pa swiv bann koutim sa monn konmela me les Bondye transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) Si ou les bann prensip dan Parol Bondye ed ou etabli ou prop limit olye ki les ou bann zanmi oubyen sa lemonn fer li pour ou, ou pou viv en lavi ki fer plezir Bondye. Me ki mannyer ou kapab konn ou limit?

Nenport ki kantite lalkol ki ou bwar, si sa i annan lefe lo ou zizman oubyen i diminyen ou kapasite pour rezonnen, sa i vedir ki ou’n bwar tro bokou. Alor, si ou deside pour bwar, i saz ki ou etabli en limit, me pa enn ki zis ant azen ek sou. Si ou refize aksepte ki ou annan sa problenm, sa pou anpes ou vwar onnetman ki kantite ou bwar. Etabli en limit byen kler, enn ki pou fer ou pa tonm dan pyez bwar tro bokou me pour bwar avek moderasyon.

 6. Aprann dir non. “Dir wi kan i wi, oubyen non kan i non.” (Matye 5:37) Aprann dir non dan en fason poli kantmenm sa dimoun kot ou’n ganny envite i byen zantiy me pe ensiste ki ou bwar. “Ki zot parol i touzour agreab e enteresan, pour zot kapab donn bann repons valab tou dimoun.”—Kolosyen 4:6.

7. Rod led. Demann led bann zanmi ki pou siport ou e ki kapab ankouraz ou pour annan sa determinasyon pour kontrol lakantite ki ou bwar e ki kapab ed ou spirityelman. “De i pli bon ki enn, akoz zot annan en bon rekonpans pour travay dir ki zot in fer. Akoz si enn i tonbe, sa lot i kapab lev son konpanyon.” (Eklezyast 4:9, 10; Zak 5:14, 16) The National Institute on Alcohol Abuse and Alcoholism Leta-z-ini i donn preski sa menm konsey: “Parfwa i difisil pour en dimoun diminyen lakantite lalkol ki i bwar. Demann led ou fanmir ek zanmi pour ou atenn ou lobzektif.”

8. Reste determinen. “Pa bezwen tronp ou lekor, pa zis ekout laparol me osi met li an pratik. Me sa ki egzamin byen lalwa parfe, lalwa laliberte e ki persevere, e ki pa zis ekoute pour oubliye apre, me ki met an pratik, Bondye pou beni li dan tou son laktivite.”—Zak 1:22, 25.

Ki mannyer pour aret adikt avek bwar

Pa tou dimoun ki bwar tro bokou ki vin alkolik. Me serten i konmans bwar tro bokou oubyen tro souvan ki zot vin adikt avek lalkol. Ler en dimoun i vin adikt avek lalkol sa i vedir ki fizikman e mantalman i depan lo sa bann sibstans for, e i bezwen en lot kalite led apard ki annan determinasyon oubyen ganny led spirityel pour aret pran lalkol. Allen i rapel: “Ler mon ti aret servi lalkol mon ti soufer en kantite akoz mon lekor ti an mank. Se la ki mon ti realize ki mon ti bezwen tretman medikal an plis ki sa led spirityel ki mon ti pe gannyen.”

En kantite dimoun ki bwar i bezwen tretman medikal pour ki zot kapab reisi dan zot batay spirityel, pour aret bwar e pour  pa tonm dan labi lalkol. * Serten i bezwen ganny ospitalize pour fer fas avek bann sentonm ki montre ki zot an mank oubyen ganny tretman pour diminyen sa lanvi lalkol e ed li pour pa bwar ditou. Garson Bondye ki ti fer mirak ti dir: “Pa bann ki an bonn sante ki bezwen dokter, me bann ki malad.”—Mark 2:17.

Byenfe pour swiv lenstriksyon ki sorti kot Bondye

Bann konsey rezonnab ki Labib i donnen i sorti kot sa vre Bondye ki anvi sa ki pli bon pour nou. I pa oule ki nou ere zis ozordi me ki nou ganny bann byenfe ki pou dir pour touzour. I fer vennkat-r-an depi ki Allen in aret bwar e i dir: “I ti vreman merveye pour konnen ki mon ti kapab sanze e arive konpran ki Zeova ti anvi ed mwan pour koriz sa ki ti mal dan mon lavi, ki i . . .” Allen i aret koze akoz i pe mazin bann souvenir ki fer li anvi plere. “Mm, . . . pour konnen ki Zeova i konpran, enterese avek nou e donn nou led kan i neseser, sa i vreman enkrwayab.”

Alor, si ou pa kapab kontrol lakantite lalkol ki ou bwar oubyen ou’n vin adikt avek lalkol, pa dekouraze oubyen taye pour dir ki napa okenn lespwar. Allen ensi ki plizyer lezot ankor in fer fas avek menm problenm ki ou pe pas ladan e zot in swa diminyen lakantite lalkol ki zot bwar ouswa zot in aret bwar net. Zot pa regrete, e ou osi ou pa pou regrete.

Ki swa ou swazir pour bwar lalkol dan en fason modere oubyen pa bwar ditou, ou kapab swiv sa konsey ki Bondye i donnen avek lanmour: “Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.”—Izai 48:18.

[Not anba lo paz]

Bwat lo paz 8

Eski mon pe perdi kontrol lo lakantite lalkol ki mon bwar?

Ou kapab demann ou lekor:

• Eski mon pe bwar plis lalkol ki oparavan?

• Eski mon bwar pli souvan ki oparavan?

• Eski pli ale mon bwar sa ki pli for?

• Eski mon servi lalkol pour fer fas avek presyon oubyen pour sov problenm?

• Eski en zanmi oubyen en manm fanmir in eksprim son konsern lo lakantite lalkol ki mon bwar?

• Eski mon ganny problenm kot lakour, dan travay oubyen ler mon pe vwayaze akoz bwar?

• Eski ou pa kapab san pans lalkol pour en semenn?

• Eski mon santi mwan enkonfortab ler lezot i refize bwar?

• Eski mon kasyet lezot lakantite lalkol ki mon bwar?

Si ou’n reponn wi pour enn oubyen plis ki enn sa bann kestyon, i kapab ki ou bezwen pran bann mezir neseser pour kontrol lakantite lalkol ki ou bwar.

[Bwat lo paz 9]

Fer bann bon desizyon konsernan lalkol

Avan ler ou bwar, demann ou lekor:

• Eski i byen pour mwan bwar lalkol oubyen mon pa devret bwar?

Konsey: En dimoun ki pa kapab kontrol lakantite lalkol ki i bwar, i pa devret bwar ditou.

• Ki kantite mon devret bwar?

Konsey: Avan ler lalkol i fer ou perdi ou bon zizman, konn ou limit.

• Kan ki mon pou bwar?

Konsey: Pa bezwen bwar lalkol si ou pe al dray oubyen fer bann aktivite kot ou pou bezwen reste vizilan. Pa bezwen bwar si ou pe al fer kek aktivite spirityel, pandan lansentman oubyen si ou pe servi en serten latizann.

• Kote mon pou bwar?

Konsey: Pa dan kasyet oubyen devan dimoun ki pa kontan lalkol, me plito dan en landrwa konfortab.

• Avek lekel mon merit bwar?

Konsey: Avek fanmir ek zanmi ki annan en bon lenfliyans lo ou, pa avek dimoun ki annan problenm bwar.

[Bwat lo paz 10]

Parol Bondye in ed en dimoun ki ti en soular

Supot ki reste Taylenn ti bwar en kantite lalkol. O konmansman i ti bwar zis lo tar dan apre midi. Avek letan, i ti konmans bwar dan bomaten e apre pandan ler manze. Souvandfwa i ti zis bwar pour sou. I ti apre konmans etidye Labib avek Temwen Zeova. Ler i ti aprann ki soular i en keksoz ki pa akseptab devan lizye Zeova, i ti aret bwar. Me apre en serten letan Supot ti rekonmans bwar ankor. Son fanmir pa ti kontan ditou.

Erezman Supot ti ankor kontan Zeova e i ti anvi ador li dan en fason akseptab. Son bann zanmi ti kontinyen ed li e zot ti ankouraz son fanmir pour pas plis letan avek li e pour pa aret donn li zot sipor. Sa letan, sa ki’n ganny dir dan en fason fran dan 1 Korentyen 6:10 ki ‘bann soular pa pou erit Rwayonm Bondye’ ti ed Supot pour vwar ki son sityasyon ti vreman grav. I ti realize ki i ti pou bezwen fer en kantite zefor pour sirmont son problenm bwar.

Safwasi Supot ti determinen pour aret bwar net. Avek letan, Supot ti vin pli for spirityelman e i ti aret bwar gras a lafors lespri sen Bondye, gidans son Parol Labib, e led ki i ti gannyen avek son fanmir ek kongregasyon. Son fanmir ti byen kontan ler i ti batize pour montre ki i ti’n dedye son lavi avek Bondye. Aprezan, Supot i annan sa bon relasyon avek Bondye ki i’n toultan anvi e i servi son letan pour ed lezot spirityelman.