Ndin̄wọn̄ Mmịn ke Ufat

N̄KPỌ ikpeketiehe ntre ye Tony oro iketịn̄de iban̄a ke akpa ibuotikọ edieke enye ekpekenyịmede ke imọ imenyene mfịna mmịn. Edi sia eketiede nte ke enye ekeme ndinen̄ede n̄n̄wọn̄ mmịn edi n̄kpọ inamke enye, enye ekekere ke imọ imọfiọk se inamde. Ntak emi ekikere akabian̄ade enye?

Ọkpọsọn̄ un̄wọn̄ mmịn ikayakke enye ekere n̄kpọ ọfọn. Edide Tony ama ọfiọk m̀mê ikọfiọkke, enye ama ọn̄wọn̄ mmịn akaha—mfre esie—emi akarade nsọn̄idem esie, ekikere, ye nte etiede enye ke idem, ikesinamke aba utom nte akpanamde. Adan̄a nte enye ọkọn̄wọn̄de mmịn, ntre ke mfre esie mîkekemeke aba ndinen̄ede mfiọk nte idem esie etiede.

Ọkpọsọn̄ udọn̄ emi Tony ekenyenede ndika iso n̄n̄wọn̄ n̄kpọ nte ekesin̄wọn̄de edi udiana ntak emi ekikere akabian̄ade enye. Allen emi iketịn̄de iban̄a ke akpa ye udiana ibuotikọ, ikenyịmeke ke ntọn̄ọ ntọn̄ọ ke imenyene mfịna mmịn. Enye ọdọhọ ete: “N̄kesiyakke owo ọfiọk ke mmesinen̄ede n̄n̄wọn̄ mmịn, nsinyụn̄ ndomo ndinọ ntak nnyụn̄ ndọhọ ke se nnamde idiọkke. N̄kosụk nyom ndika iso n̄n̄wọn̄ mmịn nte n̄kesin̄wọn̄de.” Okposụkedi emi mbon en̄wen ẹkekụtde ke mmịn ama akan Tony ye Allen ubọk, mmọ mbiba ikekwe se idiọkde do. Ama oyom mmọ mbiba ẹnam n̄kpọ man ẹtre ndin̄wọn̄ mmịn mbe ubọk. Edi okoyom mmọ ẹnam nso?

Nam N̄kpọ!

Ediwak owo emi ẹtrede ndin̄wọn̄ mmịn mbe ubọk ẹmenam n̄kpọ emi ekemde ye ikọ  Jesus emi: “Ndien edieke enyịn nnasia fo oro anamde fi atuak ukot ọduọ, wụbede enye top duọk. Koro etetịm ọfọn afo nditaba kiet ke otu ndido idemfo akan nditop fi ofụri idem nduọk ke Gehenna.”—Matthew 5:29.

Edi Jesus ikọdọhọke mme owo ẹsịbe ndido idem mmọ ẹduọk. Utu ke oro, enye eketịn̄ ke ndamban̄a usụn̄ ke akpana inyịme nditre n̄kpọ ekededi oro ekemede ndibiat ufan nnyịn ye Abasi. Edi akpanikọ ke se idinamde ekeme ndinen̄ede mbiak nnyịn. Edi emi idiyakke nnyịn idu ke ebiet inyụn̄ inyene orụk ekikere emi ẹkemede ndinam nnyịn in̄wọn̄ mmịn ibe ubọk. Ke ntem, edieke mbon en̄wen ẹdọhọde ke ọmọn̄wọn̄ mmịn akaha, nam n̄kpọ ban̄a oro. * Edieke ọfiọkde ke udukemeke ndin̄wọn̄ mmịn ke ufat, tre mmịn ofụri ofụri. Okposụkedi emi nditre mmịn ekemede ndibiak fi, oro enen̄ede ọfọn akan ndibiat uwem fo.

Idem edieke afo mûdịghe owo mmịn, ndi emesin̄wọn̄ mmịn awak akaha? Ke edide ntre, nso ke akpanam man an̄wam fi ọn̄wọn̄ mmịn ke ufat?

Ebiet Oro Ekemede Ndibọ Un̄wam

1. Nyene mbuọtidem ke akam ofụri esịt oro ọbọn̄de kpukpru ini enyene odudu. Bible eteme kpukpru mbon oro ẹyomde ndinem Jehovah Abasi esịt ete: “Ke kpukpru n̄kpọ ẹda akam ye n̄kpeubọk ọkọrọ ye ekọm ẹsian Abasi eben̄e mbufo; ndien emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.” (Philippi 4:6, 7) Nso ke ọkpọbọn̄ akam aban̄a man enyene emem emi?

Nyịme ke ofụri esịt ke emenyene mfịna mmịn, kpa mfịna idemfo. Ndisian Abasi se afo aduakde ndinam mban̄a n̄kpọ emi ayanam enye ọdiọn̄ ukeme oro afo esịnde man etre mmịn onyụn̄ efep ata ikpọ mfịna en̄wen. “Owo eke edịpde idiọk ido esie idikwe unen: edi owo eke ayararede, onyụn̄ ọkpọn̄de mmọ, oyokụt mbọm.” (Mme N̄ke 28:13) Jesus n̄ko ama ọdọhọ ke imekeme ndibọn̄ akam ite: “Kûnyụn̄ uda nnyịn usịn ke idomo, edi nyan̄a nnyịn sio ke ubọk andidiọk.” (Matthew 6:13) Edi didie ke ekeme ndinam n̄kpọ ekekem ye mme orụk akam oro, ndien m̀mọ̀n̄ ke ekeme ndikụt ibọrọ akam fo?

2. Da odudu to Ikọ Abasi. “Ikọ Abasi enyene uwem onyụn̄ enyene odudu . . . onyụn̄ ekeme ndifiọk mme uduak ye ekikere esịt owo.” (Mme Hebrew 4:12) Ediwak mbon oro ẹkesin̄wọn̄de mmịn ẹbe ubọk ẹbọ un̄wam ke ndikot nnyụn̄ ntie n̄kere mban̄a mme ufan̄ikọ Bible kpukpru usen. Andiwet psalm emi abakde Abasi ekewet ete: “Ọfọfọn ọnọ owo eke mîsan̄ake ke item mme idiọk owo, mînyụn̄ idaha ke usụn̄ mme anam idiọk, mînyụn̄ itiehe ke itie mbon nsahi; edi mbet Jehovah adat enye esịt; enye onyụn̄ osụk ekere mbet esie ke uwemeyo ye ke okoneyo. . . . Kpukpru se enye anamde ọwọrọ usụn̄.”—Psalm 1:1-3.

Allen ama ekpep Bible ye Mme Ntiense Jehovah, ndien emi ama ọnọ enye odudu nditre ndin̄wọn̄ mmịn mbe ubọk. Enye ọdọhọ ete: “Mmenịm ke n̄kpakakpa mîkpedịghe emi Bible ye mme edumbet Bible ẹn̄wamde mi ntre mmịn.”

3. Nyene mfara ke idem. Bible ọdọhọ ke ẹma ẹnam mbon oro ẹkesikpade mmịn mbemiso ẹkekabade ẹdi mme Christian ẹsana “ke spirit Abasi nnyịn.” (1 Corinth 6:9-11) Didie? Akpa kan̄a, ẹma ẹn̄wam mmọ ẹnyene mfara ke idem, emi edisana spirit esin̄wamde owo enyene, ndien emi ama anam mmọ ẹtre mbun̄wọn̄i ye uyom uyom usọrọ. “Ẹkûkpa mmịn, emi edide etịme etịme ido, edi ẹyọhọ ye spirit.” (Ephesus 5:18; Galatia 5:21-23) Jesus Christ ama ọn̄wọn̄ọ ke “Ete [nnyịn] ke heaven ediyak edisana spirit ọnọ mbon oro ẹben̄ede enye.” Mmọdo, “ẹka iso ẹben̄e, ndien ẹyenọ mbufo.”—Luke 11:9, 13.

 Mbon oro ẹyomde ndituak ibuot nnọ Jehovah nte enye amade ẹkeme ndinyene mfara ke idem edieke mmọ ẹkotde ẹnyụn̄ ẹkpepde Bible ẹnyụn̄ ẹbọn̄de akam kpukpru ini ke ofụri esịt. Utu ke ndiyak idem emem fi, nịm ke un̄wọn̄ọ emi edi akpanikọ: “Owo emi ọtọde ọnọ spirit ọyọdọk nsinsi uwem oto spirit. Ntre ẹyak nnyịn ikûkpa mba ke edinam se ifọnde, koro ke edikem ini nnyịn iyọdọk edieke nnyịn mîkpaha mba.”—Galatia 6:8, 9.

4. Mek nti nsan̄a. “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (Mme N̄ke 13:20) Sian mme ufan fo ke uyomke ndin̄wọn̄ mmịn aba nte ekesin̄wọn̄de. Edi Bible etetịn̄ ke edieke etrede “ediyụhọ mmịn, uyom uyom usọrọ, [ye] mbuba un̄wọn̄ mmịn,” ke ‘idem ayakpa ndusụk n̄kani nsan̄a fo, mmọ ẹyenyụn̄ ẹka iso ẹsụn̄i fi.’ (1 Peter 4:3, 4) Tre nsan̄a ye mbon oro mîmaha nte afo ebierede nditre ndin̄wọn̄ mmịn nte ekesin̄wọn̄de.

5. Nịm Adan̄a. “Ẹkûnyụn̄ ẹbiet editịm n̄kpọ emi, edi ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Edieke adade edumbet Ikọ Abasi enịm adan̄a mmịn oro esin̄wọn̄de, utu ke ndiyak mme nsan̄a fo m̀mê “editịm n̄kpọ emi” enịm adan̄a ọnọ fi, afo oyodu uwem oro Abasi amade. Edi afo edisan̄a didie ọfiọk adan̄a mmịn oro ọfọnde ye afo?

Udomo mmịn ekededi oro mîyakke anam eti ubiere onyụn̄ ekere n̄kpọ ọfọn ifọnke ye afo. Ke ntem, edieke emekde ndin̄wọn̄ mmịn, ifọnke enịm adan̄a ke udomo emi ekemede ndinam fi. Ekan̄ idiyakke fi okụt ke emesin̄wọn̄ mmịn ebe ubọk. Nịm adan̄a ke udomo oro mîkpereke se ikemede ndinam fi.

 6. Kpep ndisịn mmịn. “Yak ikọ mbufo Ih edi Ih, Ihih mbufo edi Ihih.” (Matthew 5:37) Kpep ndisịn ukpono ukpono ke ini owo oro ọfọnde ido akpakde fi ọn̄wọn̄ mmịn oro enye ọnọde fi. “Ẹyak ikọ mbufo enyene inem kpukpru ini, nte n̄kpọ eke ẹsịnde inụn̄, man mbufo ẹfiọk nte ẹkpenọde owo kiet kiet ibọrọ.”—Colossae 4:6.

7. Yom un̄wam. Dọhọ nti ufan oro ẹkemede ndisịn udọn̄ nnọ fi etre ndin̄wọn̄ mmịn mbe ubọk, emi ẹnyụn̄ ẹkemede ndida Ikọ Abasi nsịn udọn̄ nnọ fi, ẹn̄wam fi. “Owo iba ẹfọn ẹkan owo kiet; koro mmọ ẹdiade eti n̄kpọ eyen utom mmọ. Koro edieke mmọ ẹduọn̄ọde, kiet eyemenede ufan esie.” (Ecclesiastes 4:9, 10; James 5:14, 16) Itieutom Oro Esede N̄kpọ Aban̄a Edin̄wọn̄ Mmịn N̄kaha ye Mbumehe Un̄wọn̄ Mmịn ke United States eteme n̄ko ete: “Ekeme ndisọn̄ ndusụk ini ndisụhọde udomo mmịn oro esin̄wọn̄de. Dọhọ ubon ye mme ufan fo ẹn̄wam fi ọn̄wọn̄ udomo oro ekenịmde.”

8. Nam se ekebierede. “Ẹdi mme anam ikọ, ẹkûdi mme andikokop kpọt, ẹbian̄a idem ke nsunsu ekikere. Edi owo eke owụkde enyịn ese mfọnmma ibet oro anamde owo ọwọrọ ufụn onyụn̄ ọsọn̄ọde eyịre ke enye, owo emi, sia enye mîdịghe andikokop eke efrede, edi edide andinanam, oyokop inemesịt ke ndinam enye.”—James 1:22, 25.

Nditre Mbumehe Mmịn

Idịghe kpukpru mbon oro ẹn̄wọn̄de mmịn ẹkaha ẹsikabade mbon mmịn. Edi ndusụk owo ẹsitọn̄ọ ndin̄wọn̄ mmịn n̄wak—m̀mê ndin̄wọn̄ ke ubọk ke ubọk—tutu ẹnyene mbumehe mmịn. Sia mbumehe mmịn abuanade owo ndiberi edem ke odudu mmịn, ekeme ndiyom se ikande ubiere idemowo ye un̄wam Ikọ Abasi man mme utọ owo oro ẹkan mbumehe mmịn. Allen ọdọhọ ete: “Ke ini n̄kọtọn̄ọde nditre mmịn, ama esifịna mi etieti. Ini oro ke n̄kọfiọk ke ama oyom abiausọbọ an̄wam mi, ke adianade ye un̄wam oro ẹkedade Ikọ Abasi ẹnọ mi.”

Oyom mbiausọbọ ẹn̄wam mbon mmịn ke  adianade ye un̄wam oro ẹdade Ikọ Abasi ẹnọ mmọ man ẹtre ndin̄wọn̄ mmịn mbe ubọk. * Oyom ndusụk owo ẹnana ke ufọkibọk man ẹn̄wam mmọ ẹkan mme mfịna oro ẹsan̄ade ye editre ndin̄wọn̄ mmịn mbe ubọk mîdịghe ẹnọ mmọ usọbọ mbak ẹdinyene ọkpọsọn̄ udọn̄ ndin̄wọn̄ mmịn ẹnyụn̄ ẹn̄wam mmọ ẹka iso ẹtre mmịn. Eyen Abasi emi ekesinamde utịben̄kpọ ọkọdọhọ ete: “Mbon emi idem ọsọn̄de isiyomke abiausọbọ, edi mbon emi ẹdọn̄ọde ẹsiyom.”—Mark 2:17.

Mme Ufọn Edinam Item Abasi

Nti item oro Bible ọnọde aban̄a mmịn ẹto ata Abasi emi oyomde n̄kpọ enen̄ede ọfọn ye nnyịn idahaemi ye ke nsinsi nsinsi. Ke isua 24 ẹma ẹkebe tọn̄ọ Allen eketre mmịn, enye ama ọdọhọ ete: “Ama enem ọsọn̄ ndifiọk ke mma n̄keme nditre mmịn, ndifiọk ke Jehovah ama oyom ndin̄wam mi ntre ndinam se mîfọnke, nte ke enye . . . ” Allen ama odop kan̄a mbak editua ke ini enye eketide nte enye ekesidude uwem. “Am, . . . am ndifiọk ke an̄wan̄a Jehovah, ke enye ekere aban̄a onyụn̄ ọnọ un̄wam oro iyomde—edi ata utịben̄kpọ!”

Ke ntre edieke edide emesin̄wọn̄ mmịn awak akaha m̀mê edieke enyenede mbumehe mmịn, kûsọsọp ukere ke imọ idikemeke nditre m̀mê ke ufọn idụhe. Allen ye anana-ibat mbon en̄wen ẹma ẹtiene ẹnyene mfịna emi, edi idahaemi ẹdin̄wọn̄ ke ufat mîdịghe ẹtre taktak. Mmọ ituaha n̄kpọfiọk; afo udunyụn̄ utuaha n̄ko.

Edide emebiere ndin̄wọn̄ mmịn ke ufat mîdịghe etre taktak, nam item emi ima anamde Abasi ọnọ nnyịn ete: “Afo akpakam akpan̄ utọn̄ ke mbet mi! ndien emem fo ekpebiet akpa mmọn̄, edinen ido fo ekpebiet mbufụt inyan̄.”—Isaiah 48:18.

[Mme Ikọ Idakisọn̄]

[Ekebe/Ndise ke page 8]

 Ndi Mmịn Akara Mi?

Emekeme ndibụp idemfo ete:

• Ndi mmọn̄wọn̄ mmịn awak akan nte n̄kesin̄wọn̄de?

• Ndi mmọn̄wọn̄ mmịn ediwak ini idahaemi n̄kan nte n̄kesin̄wọn̄de?

• Ndi mmọtọn̄ọ ndin̄wọn̄ mmịn oro ọsọn̄de odudu akan se n̄kesin̄wọn̄de?

• Ndi nsin̄wọn̄ mmịn man mfre uwa?

• Ndi ufan mi m̀mê owo ke ubon mi etịn̄ ikọ aban̄a nte nsin̄wọn̄de mmịn?

• Ndi nte nsin̄wọn̄de mmịn esịn mfịna ke ubon mi, ke itieutom, m̀mê ke ini n̄kade isan̄?

• Ndi ọsọn̄ mi nditie urua kiet n̄n̄wọn̄ke mmịn?

• Ndi enyene nte esitiede mi edieke mbon en̄wen mîn̄wọn̄ke mmịn?

• Ndi mmesidịp udomo mmịn oro nsin̄wọn̄de mbak mbon en̄wen ẹdifiọk?

Edieke ọbọrọde ih ke kiet m̀mê ke ediwak mbụme emi, oyom anam n̄kpọ man ekpeme nte esin̄wọn̄de mmịn.

[Ekebe/Ndise page 9]

Nte Ẹkpenamde Eti Ubiere Ẹban̄a Mmịn

Mbemiso ọn̄wọn̄de mmịn, bụp ete:

• Ndi ọfọn n̄n̄wọn̄ mmịn, mîdịghe ndi n̄kpetetre ndin̄wọn̄?

Se ẹtemede: Owo emi mîkemeke ndin̄wọn̄ mmịn ke ufat ekpetetre ọfụri ofụri.

• N̄kpọn̄wọn̄ adan̄a didie?

Se ẹtemede: Biere adan̄a mmịn oro edin̄wọn̄de mbemiso mmịn ọbiọn̄ọ fi ndinam eti ubiere.

• Ini ewe ke n̄kpọn̄wọn̄ mmịn?

Se ẹtemede: Kûn̄wọn̄ mbemiso awatde uwat m̀mê mbemiso anamde n̄kpọ oro oyomde enen̄erede etịn̄ enyịn; kûn̄wọn̄ mbemiso edinam ido ukpono; kûn̄wọn̄ ke ini asan̄ade ye idịbi; kûn̄wọn̄ mmịn ke ini adade ndusụk ibọk.

• M̀mọ̀n̄ ke n̄kpọn̄wọn̄ mmịn?

Se ẹtemede: Ke eti itie; kûdedịbe un̄wọn̄ ukere ke uyomke mme owo ẹfiọk adan̄a mmịn oro ọn̄wọn̄de; kûn̄wọn̄ ke ebiet emi mbon oro mîmaha mmịn ẹdude.

• N̄kpọn̄wọn̄ mmịn ye anie?

Se ẹtemede: Ye nti ufan m̀mê mbonubon; kûn̄wọn̄ mmịn ye mbon oro ẹnyenede mfịna mmịn.

[Ekebe/Ndise ke page 10]

Ikọ Abasi An̄wam Owo Emi Ekedide Owo Mmịn

Supot ke Thailand ekenen̄ede edi ọn̄wọn̄-n̄kpọ-owo. Ini akpa, enye ekesin̄wọn̄ n̄kpọ ke mbubreyo kpọt. Enye ama ọtọn̄ọ nsịtnsịt ndin̄wọn̄ mmịn ke usenubọk, ndien ekem ọn̄wọn̄ n̄ko ke ini udia uwemeyo. Enye ekesin̄wọn̄ mmịn man akpa mmịn. Edi ekem, enye ama ọtọn̄ọ ndikpep Bible ye Mme Ntiense Jehovah. Ke ini Supot ekekpepde ke Jehovah Abasi imaha ukpammịn, enye ama etre mmịn. Edi ke esisịt ini ama ekebe, enye ama afiak ọtọn̄ọ ndin̄wọn̄ n̄kpọ. Ibuot ama oyon̄ mbonubon esie.

Edi Supot okosụk amama Jehovah onyụn̄ oyom ndituak ibuot nnọ enye nte odotde. Mme ufan Supot ẹma ẹka iso ẹn̄wam enye ẹnyụn̄ ẹsịn udọn̄ ẹnọ ubon esie ẹte ẹnen̄ede ẹtie ye enye ẹkûnyụn̄ ẹduọk idotenyịn. Ke ini oro, se ẹtịn̄de ke 1 Corinth 6:10 ẹte ke ‘mme akpammịn ididaha obio ubọn̄ Abasi inyene’ ama anam Supot ọfiọk ke edinam imọ idịghe n̄kpọ mbubru. Enye ama ọfiọk ke oyom imọ isịn ofụri ukeme man itre ndin̄wọn̄ mmịn mbe ubọk.

Isan̄ enye emi, Supot ama ebiere nditre mmịn taktak. Ke akpatre, odudu edisana spirit Abasi, un̄wam Ikọ Abasi, ye un̄wam emi ubon ye esop Christian ẹkenọde enye ama ọnọ enye ukeme nditre mmịn. Ubon esie ẹma ẹnen̄ede ẹdat esịt ke ini enye akanade baptism ndiwụt ke imọ imayak idemmọ inọ Abasi. Idahaemi Supot edi ata ufan Abasi, kpa n̄kpọ emi ekesinen̄erede ọdọn̄ enye, enye onyụn̄ ada ini esie an̄wam mbon en̄wen ẹnam ufan ye Abasi.