Mbaʼépa ikatu rejapo ani hag̃ua reʼu rasa vevída?

PE PRIMER artíkulope ningo jahechákuri mbaʼépa oiko Tony rehe, haʼe ohechakuaa rire mbaʼe situasiónpepa oĩ ndoikoivaʼerãmoʼã hese upéva. Tony heʼi voi ijehe hoʼukuaaha ha upévare oimoʼã ndojapomoʼãiha hese mbaʼeve. Ajépa tuichaite ojavy!

Tony ningo hoʼu rasáma rupi ndohechakuaavéima heta mbaʼe. Ha haʼe noimoʼãiramo jepe ndaikatuvéima ojapo porã mbaʼeve. Upévare omokõvévo ni haʼe ojapóvama ndoikuaavéi.

Péro ndahaʼéi upéva añónte, Tony ndopoiséi voi la vevídagui ha upévare ndojejokói. Ha Alan upeichaiténte vaʼekue avei. Primerorã haʼe onega ndaikatuiha oiko hoʼuʼỹre vevída. Alan heʼi: “Ñemĩhápe amokõmivaʼerã ha ahasa vove la rrája katu haʼe guaʼu mbaʼérepa ajapo térã vyroreinteha upéva. Che asegisénte voi amokõ”. Péicha jahecha mbaʼérepa Tony ha Alan nohendúi la ojeʼéva chupekuéra ha oimoʼã ndojapomoʼãiha mbaʼeve hesekuéra la vevída. Péro ndaupeichaiete. Mbaʼépa ikatu oipytyvõ chupekuéra?

Mbaʼépa ikatu rejapo

Heta oĩ opoivaʼekue ivísio vaígui ojapo rupi Jesús heʼivaʼekue: ‘Peteĩ nde resa ojapoukáramo ndéve ivaíva eipeʼa ha emombo. Iporãve ningo reipeʼa peteĩ párte nde retégui oñehundirangue nde rete kompletoite Gehénape’ (Mateo 5:​29, NM).

 Jaikuaa ningo Jesús ndeʼiséi hague jaipeʼaitevaʼerãha voi ñande resa. Haʼe ningo ontendekasénte ñandéve mbaʼeichaitépa iñimportánte jaipeʼa ñandejehegui opa mbaʼe ñanemomombyrýtava Jehovágui. Ikatu ningo umi mbaʼe tekotevẽva jajapo hasyeterei ñandéve jajapo hag̃ua ku jaipeʼatarõguáicha ñande resa. Péro upéva ñandeprotehéta ani hag̃ua ñapensa ivaíva ha jaʼa jey ñande visiokuépe. Upévare ehendúkena oĩramo heʼíva ndéve ojepyʼapyha nderehe remokõitereíma haguére ha eñehaʼã rejejokove. * Péro rehechakuaáramo ndaikatumoʼãiha rejejoko reʼu jave, iporãvéta ndereʼuieténte. Ijetuʼúramo jepe ndéve upéva, ivaivéta hína reñehundíramo nde po rupiete.

Ikatu ningo nandekaʼúi péro reʼu rasáma la vevída, mbaʼépa ikatu rejapo upéicharõ? Mbaʼépa nepytyvõta ani hag̃ua rehasa la rrája?

Mávapa ikatu nepytyvõ?

1. Pyʼỹinte reñemboʼevaʼerã nde pyʼaite guive. Umi oĩ porãsévape guive Ñandejára ndive, la Biblia heʼi: ‘Ani pejepyʼapy mbaʼevére. Pemoĩ uvei opa mbaʼe Ñandejára pópe peñemboʼévo. Pejerure ha peagradese avei chupe. Ha Ñandejára omeʼẽne peẽme ipyʼaguapy tuichavéva opa ikatuvaʼerãgui yvypóra ohaʼarõ. Ha pe pyʼaguapy oñangarekóne pende pyʼa ha pene remiandúre, Cristo Jesús rupi’ (Filipenses 4:​6, 7). Péro mbaʼépa erevaʼerã Ñandejárape ne ñemboʼépe ikatu hag̃uáicha Haʼe nembopyʼaguapy?

Ñepyrũrã rehechakuaavaʼerã reñenvisiamaha la vevída rehe ha redesidi mbaʼépa rejapóta. Añetehápe repoiséramo la vevídagui ha rejehekyiséramo heta provlémagui, remombeʼu porã vaʼerã Ñandejárape mbaʼépa rejapose ha haʼe katuete nepytyvõta. Proverbios 28:13 heʼi voi: “Hembiapo vai omokañýva ndohoichéne tenonde. Omombeʼu ha ohejávape katu ojeporiahuverekóne”. Jesús voi ñanemokyreʼỹvaʼekue ñañemboʼe hag̃ua Ñandejárape kóicha: ‘Ani reheja roʼa mbaʼe vaípe, orepeʼa uvei aña poguýgui’ (Mateo 6:​13, NM). Mbaʼépa ikatu rejapo rehechauka hag̃ua añetehápe rekambiaseha? Ha mbaʼéichapa Ñandejára ombohováita ndéve ne ñemboʼe?

2. Ñandejára Ñeʼẽ nemombaretéta. ‘Ñandejára Ñeʼẽ ningo oikove ha ipuʼaka. Oipyguara ñane remiandu ha ñande pyʼapy rembipota’ (Hebreos 4:12). Heta ikaʼuetereíva ningo opoi vevídagui olee rupi Ñandejára Ñeʼẽ ára ha ára ha ojepyʼamongeta hese. Pe salmísta ningo heʼi: ‘Ovyʼaite umi ndojapóiva umi iñañáva ñeʼẽ. Ovyʼaite ningo upe ojuhúva pyʼaguapy Ñandejára Ñeʼẽme ha hese ojepyʼamongetáva ára ha pyhare’. Upéi heʼi mbaʼérepa: “Opaite mbaʼe ojapóva guive osẽ porãta chupe” (Salmo 1:​1-3, ÑÑB).

Pór ehémplo, Alan ostudia la Biblia testigos de Jehová ndive ha upéva tuichaiterei oipytyvõ chupe opoi hag̃ua la vevídagui. Haʼe heʼi : “Che haʼe voi la ndastudiáirire la Biblia ndapoirivaʼerãmoʼã la vevídagui ha yma amanovaʼerãmoʼã”.

3. Rejejokokuaavaʼerã. Ñandejára Ñeʼẽ ningo heʼi hetaha oĩ kongregasiónpe yma ikaʼuvaʼekue péro upéi ou ipotĩ ‘Ñandejára espíritu rupive’ (1 Corintios 6:​9-11). Ha mbaʼéicha rupi piko upéva? Ñandejára espíritu sánto oipytyvõ chupekuéra ikatu hag̃uáicha ojejokokuaa, opoi vevídagui ha ndoikovéi vyʼarã rapykuéri. Upévare voi Ñandejára Ñeʼẽ heʼi: “Ani pekaʼútei, [...] tapenerenyhẽ uvei espíritu sántogui” (Efesios 5:18; Gálatas 5:​21-23). Jesucristo heʼi voi ‘ñande Ru yvagapegua omeʼẽtaha espíritu sánto umi chupe ojerurévape’. Upévare heʼive: ‘Pejerure meme ha Ñandejára oñemeʼẽta peẽme’ (Lucas 11:​9, 13).

 Umi Ñandejárandi oĩ porãséva ningo ojejokokuaavaʼerã. Upearã tekotevẽ olee la Biblia ha pyʼỹinte oñemboʼe ipyʼaite guive. Ha upeichahágui reguevise jey mbaʼéramo katu, nemanduʼavaʼerã ko téysto heʼívare: ‘Umi oñotỹva espíritupe, upe espíritugui omonoʼõne jeikove opaveʼỹva. Upévare, aníkena nekaneʼõ rejapo hag̃ua iporãva, naneateʼỹiramo hiʼárape remonoʼõne’ (Gálatas 6:​8, 9).

4. Rejesareko porã vaʼerã. Proverbios 13:20 heʼi: “Upe oikóva iñarandúva ndive iñaranduvaʼerã; ha upe oikóva ivýrova ndive oñembohekovaive ohóvo”. Upéicharõ emombeʼúkena ne amigokuérape redesidi hague nderehasaveimaha ne medída reʼu jave vevída. Péro katuete oĩtahína oñembohorýva nderehe upévare térã nemboligáva rekaʼu hag̃ua. Ñandejára Ñeʼẽ heʼi voi oĩtaha heta ‘opondera ha oñeʼẽvaíva’ hapicháre oñehaʼã haguére oheja ‘kaʼu, tekovai ha okaʼúva aty’ (1 Pedro 4:​3, 4). Upéicha oiko jave ningo iporãvéta nderejeheʼavéintema hesekuéra.

5. Redesidivaʼerã nderehasamoʼãiha la rrája. Romanos 12:2 heʼi: ‘Aníkena peiko yvyporakuéra oikoháicha, peñemoambue uvei pembopyahúvo pende pyʼapypegua. Upéicha pehechakuaáta mbaʼépa Ñandejára rembipota, pe mbaʼe iporãva, ha pe tekoporã oguerohoryetéva’. Ndépa reime porãse Ñandejára ndive? Upéicharõ rehejavaʼerã Ñandejára Ñeʼẽ tanepytyvõ ani hag̃ua rehasa la rrája ha ani repena la nde rapichakuéra heʼívare. Péro mbaʼéichapa nde ikatu reikuaa la ne medída ani hag̃ua rehasa la rrája?

Ndahasyiete la reikuaa hag̃ua upéva. Reʼuʼimíramo jepe reñandúvo nemoakãtavylentomaha heʼisehína hetamaha ndéve g̃uarã. Upévare reʼútaramo vevída reikuaamavaʼerã ne medída ha ani rehasa  upéva. Aníkena reñembotavy ndejupe voi, iporãvéta ningo rejeasegura porã rehasa rangue la rrája ha rekaʼu jey.

6. Neretĩrivaʼerã ere hag̃ua no. Upéva heʼise ‘eréramo rejapotaha peteĩ mbaʼe katuete rejapovaʼerãha; ha eréramo nderejapomoʼãiha nderejapoivaʼerã’ (Mateo 5:​37, NM). Upéicharõ, oĩ jave heʼi jey jeýva ndéve reʼu hag̃ua, neretĩrivaʼerã ere hag̃ua chupe no. Péro heʼiháicha Colosenses 4:​6, ‘erekuaavaʼerã ha ani ne ñeʼẽ pohýi ha eikuaavaʼerã mbaʼéichapa reñeʼẽta peteĩteĩme’.

7. Ehecha mávapa ikatu nepytyvõ. Ejeheʼavaʼerã umi ne amígo nepytyvõtavare rejapo hag̃ua Ñandejára rembipota ha oipotáva avei rejejokove reʼu jave la vevída. Ñandejára Ñeʼẽ ningo heʼi voi: ‘Mokõi iporãve peteĩgui, hetave mbaʼe oguenohẽ imbaʼapógui. Peteĩ hoʼáramo, pe mokõiha ikatu omopuʼã jey iñirũme’ (Eclesiastés 4:​9, 10; Santiago 5:​14, 16). Pe Instituto Nacional sobre el Abuso del Alcohol y el Alcoholismo, oĩva Estados Unídospe heʼi avei: “Ijetuʼuve jave ndéve rejejoko hag̃ua rejerurevaʼerã ne amígo térã ne familiakuérape nepytyvõ hag̃ua”.

8. Ejepytaso mbarete vaʼerã. Santiago 1:​22-pe la Biblia heʼi: ‘Pejapo Ñandejára Ñeʼẽ heʼíva ha ani pehendúnte, ani peñembotavy pendejupe voi. Pe hesaraiʼỹva ohendúvagui, ha omaʼẽ porãva pe léi ñanemboʼévare, ha oñehaʼãmbaitéva ojapo, ovyʼáta opa mbaʼe ojapóva reheve’.

Ivaivévo la situasión

Jaikuaa ningo ndahaʼeiha opavave hoʼumimíva vevída ikaʼúmava. Péro umi hoʼu rasáva térã pyʼỹietereíma hoʼúva ikatu oñenvisia la vevídare ha ojapo vai hese opoise vove chugui. Ha upévare umi oĩva ko situasiónpe oikotevẽta heta mbaʼe, ndahaʼéi ojedesidínteva ha oñepytyvõ chupe Ñandejára Ñeʼẽ rupive. Alan omombeʼu: “Apoítarõ guare pe vevídagui cherasyete voi la ndaʼuvéi haguére ha upépe ahechakuaa ndahaʼeiha Ñandejára Ñeʼẽnte ikatuha chepytyvõ, ahechakuaa avei tekotevẽha aha peteĩ doktórpe”.

 Heta oñenvisiavaʼekue pe vevídare heʼi avei péicha. * Hetápe ombohasyete ndoʼuvéi jave la vevída ha ndaikatúigui ogueropuʼaka ohómante oñeinterna. Ha ikatu hag̃uáicha avei upépe ojeʼuka chupe pohã hoʼuseterei jave la vevída. Upéicharõmante oikóta hesãime porã ha Ñandejára oguerohorýta chupe. Jesús jepe heʼivaʼekue: ‘Hesãiva noikotevẽi oñepohãno, umi hasýva la oikotevẽva’ (Marcos 2:17).

Mbaʼérepa ñahenduvaʼerã Ñandejárape

Umi konsého porãita oĩva la Bíbliape ningo ou Ñandejáragui. Haʼe iporãvante oipota ñandéve g̃uarã ha ndahaʼéi koʼág̃ante, opa ára g̃uarã katu. Alan veinticuatro áñoma opoi hague la vevídagui ha ovyʼaiterei imanduʼávo mbaʼéichapa oñepyrũvaʼekue okambia. Ha hesay pororopa voi heʼívo: “Avyʼaiterei ningo aikuaárõ guare ikatuha akambia che rekove ha Jehová chepytyvõseha upearã. Haʼe ningo oikuaa mbaʼépa che ahasa, ojepyʼapy cherehe ha chepytyvõ aikotevẽve jave. Arakaʼeve ningo ndaagradesepamoʼãi chupe upévare!”.

Aníkena reimoʼã nanepohãveimaha oiméramo reʼu rasa la vevída térã reñenvisiáma voi hese. Alan ha heta ótro tapicha oĩvaʼekue avei ne situasiónpe, péro koʼág̃a saʼivéma hoʼu la vevída térã ndoʼuveietéma voi hikuái. Haʼekuéra ningo nombyasýi opoi haguére la vevídagui, ha nde avei nerembyasyichéne rejapóramo upéicha.

Upévare redesidíramo saʼivénte reʼutaha la vevída térã ndereʼumoʼãveimaha, nemanduʼákena Ñandejára Jehová heʼivaʼekuére: ‘Nde rejapysaka porãramo che ñeʼẽ rehe, tuicha nde pyʼaguapýta ha nde hustísia ojupíta y puʼã marpeguáicha’ (Isaías 48:​18, ÑÑB).

[Nóta]

[Taʼanga ha rrekuádro oĩva páhina 8-pe]

Oime piko ndajejokokuaavéi aikóvo?

Jaikuaa hag̃ua, ñañeporandumivaʼerã:

• Hetavépa haʼu vevída koʼág̃a rupi?

• Pyʼỹivépa amokõ koʼág̃a rupi?

• Imbaretevépa umi vevída haʼúva koʼág̃a?

• Amokõpa apytuʼuhávo térã añembyesarái hag̃ua che provlémagui?

• Heʼímavapa chéve peteĩ che amígo térã che rogaygua amokõ rasámaha?

• Cheprovlémapa che rógape, che travahohápe térã amaneha jave haʼu haguére vevída?

• Ndaikatúipa ahasa una semána haʼuʼỹre vevída?

• Chepichápa oĩramo ndoʼuséiva?

• Atĩpa amombeʼu hag̃ua mboýpa haʼu?

Peteĩ jepe jaʼéramo jajapoha upéicha, tekotevẽtama ñañeñangarekomie jaʼu jave vevída.

[Taʼanga ha rrekuádro oĩva páhina 9-pe]

Ani hag̃ua ñambyasy upe rire

Jaʼu mboyve vevída ñañeporanduvaʼerã:

• Oĩ porãtapa haʼu vevída térãpa ahejátante?

Mbaʼépa ikatu rejapo: Nderejejokokuaáiramo iporãvéta ndereʼuiete.

• Mboýpa haʼúta?

Mbaʼépa ikatu rejapo: Heʼu mboyve voi reikuaamavaʼerã mbaʼe medídapa reʼúta, ani ág̃a upe rire ndaikatúi rejejoko.

• Mbaʼéicha javépa haʼúta la vevída?

Mbaʼépa ikatu rejapo: Aníkena remokõ remaneháta jave térã rejapóta jave traváho ipeligrósova. Ndovaléi avei reʼu nderyeguasúrõ, reʼu jave pohã ni rejapóta jave tembiapo Ñandejárape g̃uarã.

• Moõpa ikatu haʼu?

Mbaʼépa ikatu rejapo: Aníkena reʼu vevída umi lugár noĩporãihápe, ñemihápe térã umi nde rapicha ndogustáivape vevída rovake.

• Mávandipa ikatu haʼu la vevída?

Mbaʼépa ikatu rejapo: Ikatu reʼu vevída nderogaygua térã nde rapicha iñakãguapýva ndive. Aníkena remokõ umi ndojejokokuaáiva ndive.

[Taʼanga ha rrekuádro oĩva páhina 10-pe]

Peteĩ mbaʼe oikovaʼekue

Supot héra peteĩ karai oikóva Tailándiape ha haʼe ningo ikaʼuetereivaʼekue. Ñepyrũrã hoʼu pyharekuénte, upéi hoʼúma pyharevekue avei ha amo ipahápe asajekue entéro. Supot pyʼỹi omokõmivaʼerã okaʼu hag̃uánte. Péro, upe rire ostudia la Biblia testigos de Jehovándi ha oaprende Ñandejára ndoguerohoryiha umi ikaʼúvape. Upévare opoi la vevídagui, péro upe riremínte oñepyrũ jeýma omokõ. Ha ifamiliakuéra ohechávo upéva, ombyasyeterei.

Supot ningo ohayhu jepéma Jehovápe ha omombaʼeguasuse chupe hekoitépe. Iñamigokuéra oservíva Jehovápe katu osegi oipytyvõ chupe, ha omokyreʼỹ ihentekuérape ani hag̃ua heʼi hese péicha g̃uarãntemaha. Ha heʼi avei chupekuéra ohasave hag̃ua tiémpo Supot ndive. Upérõ oipytyvõ chupe 1 Corintios 6:10 heʼihápe umi ikaʼúva ndoikemoʼãiha Ñandejára Rréinope. Upépe ohechakuaa ivaietereiha la ojapóva oikóvo. Ha tekotevẽha opoi la vevídagui.

Koʼág̃a Supot ojedesidíma opoietetaha la vevídagui. Upéva ojapo hag̃ua oipytyvõ chupe Ñandejára espíritu sánto, la Biblia, ifamiliakuéra ha ermanokuéra kongregasionpegua. Ha opoiete katu chugui! Ovyʼaiterei ningo ifamiliakuéra ohechávo chupe ojevautisa testígo de Jehováramo. Ha koʼág̃a, Supot orekóma Jehovápe iñamígoramo ha oipytyvõ la héntepe oikuaa hag̃ua avei Jehovápe.