Anang Nejuka Diri Dikuasa Ai Bisa!

TONY, ke disebut ba artikel tu tadi engka ulih nyeliahka diri ari eksiden jalai alun enti iya ulih mutarka diri ari gian ngirup ai bisa. Tang sayau, iya enggai ngaku diri bisi penanggul ba senentang pekara tu, laban iya ngasaika diri ulih ngirup mayuh ai bisa tang nadai nama-nama kesan ti balat. Nya kebuah iya ngumbai diri ulih ngirup mayuh ai bisa. Nama kebuah runding iya nya jauh ari ke patut?

Runding iya baka tu, laban tebiat ngirup iya. Iya enda nemu diri, ai bisa udah nguasa tubuh, runding sereta emosi iya. Nyentukka iya enda ulih berunding enggau manah agi. Mayuh agi ai bisa diirup iya, tusah agi alai iya deka berunding enggau betul.

Kelimpah ari nya, Tony mega enggai muai tebiat gian ngirup ai bisa. Sama baka Allen ke disebut tadi, sida enggai nerima diri bisi penanggul ba senentang pekara tu. Ku Allen madah, “Aku deka ngelalaika tebiat aku ke ngirup ai bisa ari orang bukai. Aku meri mayuh kebuah, lalu selalu ngumbai semua utai OK. Aku takut ditagang ngirup.” Taja pan orang bukai ulih meda Tonny enggau Allen udah gian ngirup ai bisa, tang sida enggai nerima nya. Sida patut mutarka penanggul tu. Tang nama chara iya?

Jampat, Anang Nanguh!

Mayuh orang mutarka penanggul gian ngirup ai bisa, lebuh sida nitihka lalau Jesus tu. “Enti mata kanan kita mai kita bedosa, keruk lalu buai iya! Manah agi kita lenyau sebagi ari perengka tubuh kita, ari ke nejuka semua tubuh kita dibuai ngagai Gehena.”—Matthew 5:29.

Nama reti jaku Jesus tu? Kati iya ka kitai ngemediska diri empu? Ditu, Jesus ngena jaku sempama. Kitai patut ngemeratka pengawa diri ti deka muai semua tebiat ke ulih ngasuh pengarap kitai dalam bahaya. Tu enda senang sereta ulih ngemedis, tang nya meh chara nuan ulih nyelamatka nyawa diri. Enti kaban tauka diri sebilik nuan ngasaika nuan kelalu balat ngirup ai bisa, dingaka meh lalau sida lalu kereja utai ti patut. a Enti nuan enda ulih nagang diri, manah agi enda ngirup sekali. Munyi ku jaku orang, “Nesal dulu bisi penguntung iya, nesal dudi nadai guna.” Nya alai, anang meh betangguh deka ngaga ubah.

Taja nuan enda gian enggau ai bisa, tang kati nuan selalu ngirup ai bisa enggau mayuh? Enti au, nama sekeda tip ke ulih nulung nuan?

Alai Bulih Bantu

1. Besampi enggau tetap sereta bebendar laban sampi nya amat bekuasa. Dalam Bup Kudus ngembuan lalau tu ngagai semua orang ke deka ngelantangka ati Jehovah. “Anang irauka nama-nama utai, tang seruran meh besampi ngagai Petara, bebendar meh minta iring ari Iya pasal semua utai, sereta seruran beterima kasih ngagai Iya. Enggau nya, pengelantang ari Petara ke ngelui ari utai ke ulih dimeretika kitai deka nyaga ati enggau runding kita nengah Jesus Kristus.” (Pilipi 4:6, 7) Baka ni nuan bulih pengelantang ari Petara?

Keterubah, anang bula ke diri empu. Ngaku diri bisi penanggul gian ngirup ai bisa, lalu padahka meh ngagai Petara enggau nyemetak pasal pekara tu. Iya deka merekatka usaha nuan lalu nulung nuan nyeliahka diri ari penanggul ti jai agi. Dalam Bup Kudus bisi madahka, ‘Nuan enda ulih mujur dalam pengidup nuan, enti nuan nguji ngelalaika dosa diri. Tang enti nuan ngaku dosa diri lalu badu agi bedosa, nya baru Petara deka kasihka nuan.’ (Jaku-Dalam 28:13) Jesus mega meransang kitai besampi, “Anang nejuka kami alah laban penguji.” (Matthew 6:13) Tang baka ni kitai ulih sejalai enggau sampi, sereta baka ni chara Petara nyaut sampi kitai?

2. Bulih pengering ari Jaku Petara. “Jaku Petara idup sereta bekuasa, . . . lalu ulih mandangka runding enggau pengingin ati orang.” (Hebrew 4:12) Mayuh ari orang ke suba ti gian ngirup ai bisa, ulih muai tebiat tu ketegal sida macha lalu beratika ayat Bup Kudus ninting hari. Kelimpah ari nya, penulis bup Masmur mega bisi madahka, ‘Beberekat meh orang ti enda nitihka penemu orang ke jai, . . . tang gaga ati ke Adat Jehovah, lalu belematika Adat nya siang malam. . . . Iya mujur dalam semua utai ti dikereja iya.’—Masmur 1:1-3.

Pengudah Allen berengkah belajarka Bup Kudus enggau Saksi-Saksi Jehovah, iya bulih pengering ke diguna kena mutarka penanggul iya. Ku iya madah, “Enti ukai ketegal Bup Kudus enggau lalau ari iya, aku enda ulih ngetu ngirup ai bisa. Engka diatu pan aku udah nadai lalu becherita pasal penanggul aku tu.”

3. Belajar nagang diri. Bup Kudus bisi madahka, sekeda orang Kristian ke pemabuk suba ulih nyadi tuchi “nengah kuasa kudus Petara.” (1 Korint 6:9-11) Kuasa kudus Petara nulung sida nemu nagang diri. Pia mega, kuasa kudus tu nulung sida ngetu ari ngereja pengawa ke dipegedika Petara, chunto iya mabuk sereta berami enda beiga-iga. Dalam Bup Kudus bisi lalau ke madah, “Pia mega, anang mabuk ketegal wain, laban nya deka nuju ngagai pengidup ti enda menuku. Tang awakka kita terus penuh laban kuasa kudus.” (Epesus 5:18; Galatia 5:21-23) Kingatka, Jesus mega besemaya “Apai ti ba serega tentu deka meri kuasa kudus ngagai orang ke minta ari Iya!”—Luke 11:9, 13.

Kelimpah ari kuasa kudus Petara, kitai mega ulih nagang diri enti kitai selalu macha sereta mansik Bup Kudus, lalu besampi ari ati. Anang meh putus asa. Dalam Bup Kudus bisi semaya Petara ti madahka, “Orang ke nanam nitihka pengingin ti bedosa, deka ngetau utai ti jai ari pengingin ti bedosa nya. Tang orang ke nanam nitihka iring kuasa kudus, deka ngetau pengidup ti meruan belama iya ari kuasa kudus nya. Nya alai, anang ngetu ngereja utai ti manah. Enti kitai enda putus pengarap, kitai deka ngetau ba maya ti ngena.”—Galatia 6:8, 9.

4. Milih kaban ti betul. “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” (Jaku-Dalam 13:20) Nuan ulih madahka bala kaban nuan, nuan benung bebendar deka ngetuka diri ari ngirup ai bisa. Tang dalam Bup Kudus mega bisi madahka, enti nuan enggai “berami nyentukka enda tetagangka ulah diri, enggai alah ngirup” baka suba, sekeda bala kaban nuan deka ‘tekenyit lalu bejaku’ pasal nuan. (1 Peter 4:3, 4) Nya alai, nuan patut besedia mutuska kaul nuan enggau orang ke ulih ngelemika pengeran nuan ke deka berubah.

5. Tetapka tatak. Dalam Bup Kudus madah, “Badu agi nitihka chara dunya tu. Tang awakka Petara ngubah chara kita berunding, ngambika kita andal sereta nemu pasal peneka Petara ti manah, sempurna, sereta ngelantangka ati Iya.” (Rome 12:2) Enggau chara tu, kitai enda nejuka bala kaban tauka “chara dunya” tu nentuka tatak ai bisa ke patut diirup kitai. Tang, kena meh prinsip Bup Kudus ngambika nuan ulih ngetanka kaul ti manah enggau Petara. Tang, baka ni nuan nemu naka ni tatak ai bisa ke ulih diirup nuan empu?

Enti nuan ngasaika diri tusah berunding sereta tusah beratika sesiti utai, nya nunjukka nuan udah ngirup kelalu mayuh ai bisa. Nya alai, tentuka nuan udah tumu ngetu sebedau nuan datai ke tahap nya. Enti nuan deka ngirup ai bisa, dulu tentuka naka ni tatak ai bisa ke ulih diirup nuan. Anang nipu diri, tauka meri mayuh alasan maya nuan ngaga pemutus.

6. Berani nyebut “Enda.”. “Enti au, sebut aja ‘Au.’ Enti enggai, sebut aja ‘Enggai.’” (Matthew 5:37) Kekadang, orang bukai engka enda nemu nuan benung deka ngetuka diri ari ngirup ai bisa. Nya alai, belajar meh enggau chara ti nelap nulak kangau sida. Bup Kudus madah, “Awakka jaku kita seruran ngelantangka ati, baka pemakai ke dichampur garam, ngambika kita nemu chara deka nyaut tiap iku orang.”—Kolosi 4:6.

7. Giga bantu. Giga meh bantu ari orang ke ulih ngeringka pengeran nuan ke deka nagang diri ari ngirup ai bisa. Giga mega bantu ari kaban ke kering ba pengarap. Laban Bup Kudus bisi madah, “Dua iku manah agi ari siku, laban enti seduai iya begulai, seduai iya bulih agi gawa. Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya.” (Pengajar 4:9, 10; James 5:14, 16) Nitihka Institut Kebangsaan Penyalahgunaan Alkohol dan Alkoholisme Amerika Serikat, “ngurangka penyampau ai bisa ke diirup amat-amat enda senang. Nya alai, pinta meh bantu ari bala kaban sereta diri sebilik ngambika nuan ulih nyapai juluk ati tu.”

8. Keran nyapai juluk ati nuan. “Tang, kita patut ngereja utai nitihka jaku nya, ukai semina ninga aja, lalu anang nipu diri ngena runding ti salah. Tang orang ke bebendar beratika sereta terus nitihka adat ti sempurna ke mai pengelepas, ukai orang ke jampat enda ingatka utai ke didinga diri. Iya orang ke ngereja utai ke didinga iya, lalu iya deka gaga ati enggau utai ke digaga iya.”—James 1:22, 25.

Ngelepaska Diri ari Dikuasa Ai Bisa!

Ukai semua orang ke ngirup ai bisa terus gian. Keterubah, sida engka ngirup mayuh ari biasa. Udah nya, sida ngirup suah agi ari biasa lalu nyadi gian. Ketegal ai bisa nya ngembuan bahan ke amat kuat, tu meh ke ulih ngachau sida ba fizikal sereta mental. Semina pengeran ti kering sereta rohani kekadang enda chukup nulung sekeda orang. Munyi ku Allen, “Maya aku ngetuka diri ari ngirup ai bisa, tubuh aku berasai pedis sereta mayuh pemedis bukai pansut. Taja aku bisi bantu ba pengarap, aku sedar, aku mega begunaka bantu ba ubat.”

Baka Allen, mayuh orang bukai ke gian mega begunaka bantu ba ubat. b Indah, bisi ke bulih penyakit ti amat balat nyentukka patut tama sepital. Tang ba din, sida deka diberi ubat ke ulih nulung sida ari gian. Jesus Kristus mega kala ngelalau kitai, “Orang ke gerai enda begunaka lutur, tang semina orang ke sakit begunaka lutur.”—Mark 2:17.

Penguntung ke Diulih ari Nitihka Prinsip Bup Kudus

Lalau Bup Kudus pasal ai bisa datai ari Petara ti bendar, lalu Iya dekaka kitai ngasaika pengidup ti manah sereta enda nesal diri belama iya. Allen begunaka kira-kira 24 taun mutarka penanggul iya ke gian ngirup ai bisa. Iya madahka, “Aku amat beterima kasih lalu amat gaga ati lebuh aku nemu diri ulih berubah ketegal bisi bantu ari Jehovah.” Ku iya nyebut baru seraya iya ngendas ai mata, “Jehovah amat faham pasal penanggul aku lalu ibuhka aku. Iya meri aku bantu ke amat diguna aku.”

Enti nuan benung bebendar deka muai gian ngirup ai bisa, anang meh putus asa. Pechaya meh, nuan ulih berubah baka Allen sereta orang bukai. Diatu, sida idup enggau puas ati sereta enda nesal ati.

Enda ngira nuan ngaga pemutus deka terus badu ngirup ai bisa tauka semina deka ngirup mimit aja, kingatka meh lalau Petara tu, “Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang. Pemenang tentu udah datai ngagai kita baka gelumbang ti ngalun ngagai tebing.”—Isaiah 48:18.

[Nota Kaki]

[Kutak/Gambar]

 Kati Ai Bisa ke Nguasa Pengidup Nuan?

Tanya diri empu:

• Kati aku ngirup ai bisa mayuh agi ari ke suba?

• Kati aku ngirup suah agi ari ke suba?

• Kati ai bisa ke diirup aku kuat agi?

• Kati kebuah aku ngirup ai bisa kena mutarka stress tauka enda ingatka penanggul?

• Kati bala kaban sereta diri sebilik irau meda chara aku ngirup ai bisa?

• Kati chara aku ngirup ai bisa ngujungka bisi penanggul ba rumah, endur gawa, tauka maya aku bechuti?

• Kati ulih aku enda ngirup ai bisa dalam seminggu?

• Kati aku berasai enda nyamai ati lebuh orang bukai enggai ngirup ai bisa?

• Kati aku belalaika penyampau ai bisa ke ulih diirup aku?

Enti saut nuan “au” ngagai siti ari tanya ba atas, nuan engka patut nagang chara nuan ngirup ai bisa.

[Kutak/Gambar]

Ngaga Pemutus ti Betul pasal Ngirup Ai Bisa

Sebedau ngirup ai bisa, perundingka:

• Patut ke enda aku ngirup ai bisa?

Lalau: Enti nuan enda ulih nagang diri, manah agi enda ibuh.

• Berapa penyampau ai bisa ke ulih diirup aku?

Lalau: Tentuka tatak diri empu sebedau runding nuan dikachau ketegal ai bisa.

• Kemaya aku ulih ngirup ai bisa?

Lalau: Seliahka diri ari ngirup ai bisa sebedau nuan deriba, maya ngaga pengawa ke begunaka nuan fokus, tauka maya nuan bejalaika pengawa rohani. Anang mega ngirup ai bisa enti nuan benung ngandung tauka makai sekeda ubat.

• Dini alai aku ulih ngirup ai bisa?

Lalau: Ngirup ai bisa ba endur ke ngena. Anang belalai, laban nya baka ke nunjukka nuan besalah. Seliahka diri ngirup ai bisa ba endur orang ke engka ulih enda nyamai ati lebuh sida meda nuan ngirup ai bisa.

• Sapa enggau aku ngirup ai bisa?

Lalau: Enggau diri sebilik tauka bala kaban ke nemu berunding. Anang ngirup enggau orang ke selalu mabuk tauka orang ke enda tetagangka diri.

[Kutak/Gambar]

Jaku Petara Nulung Siku Pengirup

Tu cherita Supot ke asal ari Thailand. Suba, iya siku pengirup. Keterubah, iya semina ngirup maya lemai hari. Tang nyau kelama, iya ngirup maya pagi sereta tengah hari mega. Suah iya, iya sigi ngirup nyentukka mabuk. Pengudah iya belajarka Bup Kudus enggau Saksi-Saksi Jehovah, iya sedar Jehovah begedika pengawa mabuk. Taja iya mujur ngetu enda lama, tang iya amat tusah muai tebiat tu. Tu ngasuh sida sebilik tusah ati.

Tang, Supot agi rinduka Jehovah lalu deka nyembah Iya enggau chara ti betul. Nya alai, bala kaban Supot terus nulung iya lalu meransang iya sebilik meri mayuh agi awak begulai enggau iya. Sida mega ngingatka iya sebilik ngambika enda putus asa enggau Supot. Maya nya, jaku ba 1 Korint 6:10 udah nulung Supot sedar, penanggul iya amat besai. Ayat nya madah, ‘orang ke pemabuk enda ulih bempu Perintah Petara.’ Ari tu Supot nemu, iya patut bebendar agi berusaha mutarka penanggul iya tu.

Kenyau ari nya, Supot netapka atur ngagai diri empu, iya enggai ngirup ai bisa agi. Ari bantu kuasa kudus Jehovah, iring Bup Kudus, sereta sukung ari diri sebilik enggau bala menyadi, Supot ulih ngelepaska diri ari ulah iya ke gian ngirup ai bisa. Ruang bilik Supot amat gaga ati meda iya nyerahka diri lalu dibaptisa! Diatu, Supot ulih ngasaika kaul ti rapat enggau Jehovah lalu nulung orang bukai belajarka pemendar.