Imigassamut eqqortumik isiginnittaaseqartuarit

TONY, allaaserisami siullermi eqqaaneqartoq, allaanerujussuarmik inuuneqarsimassagaluarpoq — imigassamik ajornartorsiuteqarnini nassuerutigisimasuuguniuk. Malugisaqaranili taama imigassartortigisinnaarpasikkami isumaqarpoq inuunini aqussinnaallugu. Qanoq ililluni imminut taama kukkutigisumik isiginnittaaseqarsinnaava?

Naliliisinnaanera imigassamik atuipilunneranit innarlerneqarsimavoq. Tonyp sianigigaluaruniuk sianiginngikkaluaruniulluunniit qarasaa — timikkut, isumakkut misigissutsikkullu qanoq inneranik aqutsisorpiaq — imigassartorpallaarnermit artorsinneqaraangat iluamik suliunnaartarpoq. Taanna imigassartornerujartortillugu, qarasaa taassuma qanoq inneranik naliliisinnaannginnerujartuinnassaaq.

Tonyp kukkusumik imminut nalilerneranut pissutaasoq alla tassaavoq imigassamut isiginnittaatsiminik allanngortitsiumannginnersua. Allen, allaaserisap matuma siuliini eqqaaneqartoq, imigassamik ajornartorsiuteqarnini aallaqqaammut miserratigaa. Ima nassuerpoq: “Imertarnera sapinngisara tamaat isertuunniarsaraara, utoqqatsissutissarsiortarpunga atuipilunneralu soqutaanngitsutut itsinniarsaralugu. Ataasiinnaq anguniagaraara — iminngitsoornaveersaarnissara.” Naak allat takusinnaagaluaraat Tonyp Allenillu inuunerat imigassamit aqunneqalersimasut, taakku isumaqartuarput suut tamarmik pissusissamissut ittut. Angutit taakku marluk iliuuseqartariaqarsimapput imigassartortarnertik aqussinnaajumallugu. Suut iliuuserisariaqarsimavaat?

Iliuuseqarit!

Imigassamik atornerluiunnaarsimasorpassuit aalajangersimapput Jiisusip oqaasii uku malillugit iliorniarlutik: “Isivit talerpilliup tammartippatit,  peeruk igillugulu. Ilinnummi pitsaaneruvoq timinni avativit ilaat ataaseq annaassallugu timivit tamarmiusup Anniarfimmut [Gehennamut, NV] iginneqarnissaanit.” — Matthæusi 5:29.

Soorunami Jiisusip siunnersuutaani pineqanngilaq imminut aqqunartiternissaq. Assersuusiorlunili erseqqissarpaa Guutimut attaveqarnitsinnut ajoqutaasinnaasup suulluunniit peernissaanut piumassuseqartariaqartugut. Ilumoorpoq iliuuserisariaqagaq iliuuserissallugu erloqinartorujussuusinnaasoq. Imigassamilli atornerluilernermik kinguneqarsinnaasunik nalaataqannginnissatsinnut eqqarsartaaseqalinnginnissatsinnullu illersuutigissavarput. Taamaattumik illit imigassartorpallaartalersimaninnik isumakuluutiginninnerminnik ersersitsisoqarpat imigassartornerit iliuuseqarfigisariaqarpat. * Erseqqippallu imigassartornerit aqussinnaanngikkit imigassartornaveersaarluinnarnissannut piumassuseqartariaqarputit. Iliuuseqarnerit erloqinartorujussuusinnaavoq, inuunermilli aseruinermut sanilliullugu suunngilaq.

Imerajuttuunngikkaluarlutit imigassartorpallaaqqajaasarpit? Taamaappat imigassamut eqqortumik isiginnittaaseqarnissannut iluaqutigisinnaasannik suut iliuuserisinnaavigit?

Iluaqutaasinnaasut

1. Guutimut qinukulanerup qamanngalu pisumik qinusarnerup pingaaruteqassusia suusupageqinagu. Jehovamut Guutimut attaveqarluarumasut tamarmik Biibilimi ima siunnersorneqarput: “[Kissaatigisasi] qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.” (Filippimiut 4:6, 7) Taamatut qamuuna eqqissiumallutit suna qinnutigisinnaaviuk?

Unneqqarillutit nassuerutigiuk imigassamik ajornartorsiuteqarlutit, illit nammineq akisussaaffigisannik ajornartorsiuteqarlutit. Suut iliuuseriniarnerlugit Guuti oqaluttuukkukku atornerluiunnaarumallutit ajornerusunillu ajornartorsiuteqalernissat pinaveersaartinniarlugu ilungersornerit pilluaqqussavaa. “Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq.” (Ussatit 28:13) Aamma Jiisusi oqarpoq ima qinusinnaasugut: “Ussernartumullu pisinnata, ajortumilli annaatsigut.” (Matthæusi 6:13) Qanorli ilillutit qinnutinnut naapertuuttumik iliuuseqarsinnaavit, aamma qinnutit qanoq akineqartarpat?

2. Guutip oqaasia nakussatsissutigisaruk. “[Ilumut] Guutip oqaasia uumavoq sunniisinnaassuseqarlunilu . . . uummatip eqqarsaatai isumaalu eqqartuuttarlugit.” (Hebræerit 4:12) Siornatigut imigassamik atuipiluttuusimasut ilarpassuisa ullut tamaasa allassimaffinnik Biibilimiittunik atuartarneq eqqarsaatiginneqqissaartarnerlu iluaqutigisimavaat. Tussiaasiortoq ima allappoq: “Pilluarpoq iluaatsut siunnersuutaat malillugit inuunngitsoq, . . . kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu. . . . Qanoq iliornermini tamani iluatsitsisaraaq.” — Tussiaat 1:1-3.

Allen, Jehovap Nalunaajaasuinit Biibilimik atuaqqissaaqatigineqartarnermigut imigassamik atornerluinerminik qaangiinissaminut nukissaqalersimasoq, ima oqarpoq: “Qularutiginngilara imertarunnaarnissamut iluaqutigisannik Biibileqanngitsuuppat tamatumaniittunillu najoqqutassiaqanngitsuuppat toqoreersimassagaluarlunga.”

3. Imminut naalakkersinnaaneq ineriartortiguk. Biibilimi oqaluttuarineqarput imerajuttuusimagaluartut ilagiinni kristumiuniittut ‘Guutitta Anersaavatigut’ uffarneqarlutik minguiarneqarsimasut. (1 Korinthimiut 6:9-11) Qanoq ilillutik? Siullermik, imminut naalakkersinnaanermik, pissusermik Guutip anersaava illernartoq iluaqutigalugu ineriartortinneqarsinnaasumik, ineriartortitsinikkut ernguteqataasarunnaarnissaminnut ikiorneqarput. “Viinnimik aalakooqinasi, aalakoornerup inuunerlunnerit pilersittarmagit, Anersaamilli peqangaalersinneqaritsi.” (Efesosimiut 5:18; Galatiamiut 5:21-23) Jiisusi Kristusi neriorsuivoq “Ataatap qilammiittup imminut qinusut Anersaamik Illernartumik tuniumaarai”. Taamaattumik “qinugitsi [qinujuaannaritsi, NV], tunineqassaasi taava”. — Lukasi 11:9, 13.

 Jehovap akuerisinnaasaanik taassuminnga pallorfiginnikkusuttut imminut naalakkersinnaaneq ineriartortissinnaavaat Biibilimik atuartarnikkut atuaqqissaartarnikkullu qamanngalu pisumik qinusarnikkut. Nikalloqinak, Guutilli oqaasiani neriorsuut una qularutiginngilluinnaruk: “[Anersaamut] siaruarterisup anersaamit inuuneq naassaanngitsoq katersugariumaarpaa. Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta.” — Galatiamiut 6:8, 9.

4. Pitsaasunik ikinngutissarsiorit. “Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” (Ussatit 13:20) Ikinngutitit oqaluttuutikkit imigassamik atuinerit aqussinnaalerniarlugu aalajangersimallutit. Eqqumaffigiulli Guutip oqaasiani mianersoqqussuteqarmat ‘imerujuupiluttarnerit, nuannaapiluttarnerit ernguttarnerillu’ peqataaffigisarunnaarukkit siornatigut ikinngutigisimasavit tamanna ‘tupigusuutigissagaat mitaatigalutillu’. (1 Petrusi 4:3, 4) Imigassamik atornerluiunnaarnissannik aalajangiusimannippiarunnaarsitsisinnaasunik peqateqartarunnaarnissannut piumassuseqartariaqarputit.

5. Erseqqissunik killiliigit. “Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.” (Romamiut 12:2) Ikinngutitit ‘silarsuarluunniit’ killiliitinnagit najoqqutassiat Guutip oqaasianiittut iluaqutigalugit illit nammineq killiliiguit Guutimit akuerisaasumik inooriaaseqarsinnaavutit. Qanorli ilillutit paasisinnaaviuk isumannaatsumik imminut qanoq killilissanerlutit?

Imigassartorsimallutit naliliilluarsinnaajunnaarlutilluunniit eqqarsarluarsinnaajunnaaruit imigassartorpallaarsimassaatit. Taamaattumik imigassartorniarlutit aalajangeruit sianiilliussaatit qaatusimanerup aalakoornerullu akornanni erseqqinngitsumik killiliiguit. Ajornartorsiuteqarnerit miserratigeqinagu, imertarnerit unneqqarillutit nassuerutigiuk.  Aalajangersimasumik isumannaalluinnartumillu — imerpallaannginnissamut iluaqutissannik — killiliigit.

6. Naameerneq ilikkaruk. “Angernersi imaassaaq: Aap, naaggaarnersilu: Naagga.” (Matthæusi 5:37) Pulaartitsisumut kukkusumik inussiarnisaarluni kimigiiserfigalutit ilinnik imigassartoqqusisumut pissuserillutit qujaannarnissat ilinniaruk. “Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.” — Kolossemiut 4:6.

7. Allanut ikiortissarsiorit. Ikinngutinut imigassartortarninnik aqutsisinnaalerniarlutit aalajangerninnik tapersersuisinnaasunut anersaakkullu ilinnik ikiuisinnaasunut ikiortissarsiorit. “Marluugaanni ataasiinnaanermit pitsaaneruvoq, suleruloornerminni akissarsilluassapput. Arlaat orluppat aappaata nikuitittarpaa.” (Oqaluussisartup oqaasii 4:9, 10; Jaaku 5:14, 16) National Institute on Alcohol Abuse and Alcoholism-imit USA-miittumit assingusumik ima siunnersuuteqarpoq: “Imigassartornikilliniartilluni piffissat erloqinartorsiorfiusut nalliuttassapput. Anguniakkat angujumallugu ilaquttannut tapersersortissarsiorit.”

8. Aalajangiusimannigit. “Oqaaseq tusaaginnarnagu maleruarsiuk, taamaaliunngikkussi immissinnut salloqittaqinaasi. Kiffaanngissutsilli inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.” — Jaaku 1:22, 25.

Qanoq ililluni atornerluiunnaartoqarsinnaasoq

Imigassartorpallaartartut tamarmiunngitsoq imerajuttuupput. Ilaalli ima imigassartortigisalertarput — imaluunniit ima imigassartukulatigilertarput — imigassamik pinngitsuuisinnaajunnaarlutik. Akuutissamik sakkortuumik sunniuteqartartumik timikkut eqqarsartaatsikkullu pinngitsuuisinnaannginneq imigassamik pinngitsuuisinnaannginnermut ilaammat, imigassamik atornerluiunnaarumalluni piumassutsip anersaakkullu ikiorneqarnerup saniatigut suli allat pisariaqartinneqarsinnaapput. Allen ima oqaluttuarpoq: “Imertarunnaarama pinaveersaarnerma timikkut malunniutai erloqinartorujussuupput. Tamatuma nalaani paasivara anersaakkut ikiorneqarnerma saniatigut nakorsamit ikiorneqartariaqarlunga.”

 Imerajuttorpassuit atornerluiunnaarluinnarnissamut pisariaqartumik nukissaqarniarlutik nakorsamit ikiorneqartariaqarput. * Ilaat napparsimmavimmut unitsinneqartariaqarput pinngitsuuisinnaannginnerup malunniutai sakkortuut qaangerniarlugit nakorsaatitortariaqarlutilluunniit imerusussuataarnertik sakkukillisinniarlugu imernaveersaartuarnissaminnullu iluaqutissaminnik. Guutip ernera tupinnartuliortarsimasoq ima oqarpoq: “Peqqissut nakorsamik pisariaqanngillat, napparsimasulli.” — Markusi 2:17.

Guutip siunnersuutaanik malinninnerup iluaqutissartai

Imigassaq pillugu siunnersuutit pitsaasut Biibilimiittut Guutimeersuupput ilumoortumit, taannalu uagutsinnik — maannakkuinnaanngitsoq, aammali iluaqutigiuagassatsinnik — pitsaanerpaamik kissaassivoq. Allen ukiuni 24-ni imigassartunngereerluni inuunini kingumut qiviarlugu ima oqarpoq: “Nuanneqaaq paasillugu allanngorsinnaasunga inuuninnillu aaqqiiniarninni Jehovap ikiorusussimagaanga, taassumalu . . .” Allen nipangerpoq eqqaasanilu pissutigalugit qullini nununeq sapileqqajaallugit. “Aap, . . . Jehovamit paasineqarluni, isumassorneqarluni pisariaqartumillu ikiorneqarluni — tupinnaqaaq.”

Taamaattumik imigassamik atornerluisartuuguit pinngitsuuisinnaanngitsuuguilluunniit nakkaannajaarpallaassanngilatit isumaqaliaarpallaassanalluunniit neriuutissaqarnak. Allen allarpassuillu ilittut atugaqarsimasut imigassamik atuinikillisimallutilluunniit imertarunnaavissimapput. Tamanna peqqissimissutiginngilaat, aamma illit peqqissiminavianngilatit.

Ingasaassinak imigassartortarniarlutit imigassartornaveersaarluinnarniarlutilluunniit aalajangeruit, Guutip asannittumik kajumissaarutaa una malillugu iliorit: “Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.” — Esaja 48:18. (wp10 01/01)

[Quppernerup ataani ilanngussat]

[Qupp. 8-mi ungalusaq/​assiliartaq]

 Imigassartornera aqussinnaajunnaalerpara?

Imminut ima aperisinnaavutit:

• Siornatigornit imigassartorneruvunga?

• Siornatigornit imigassartukulaneruvunga?

• Kimittunerusunik imigassartortalersimavunga?

• Stresserunnaarniarlunga ajornartorsiutilluunniit puiorniarlugit imigassartortarpunga?

• Ikinngutima ilaquttamaluunniit ilaasa imigassamik atuinera isumakuluutigaat?

• Imigassartornera angerlarsimaffinni, suliffinni angalaninniluunniit ajoqutaasimava?

• Sapaatip-akunnera imigassartornaveersaarnissaq sapernartippara?

• Allat imigassartunngikkaangata akunnattuungasarpunga?

• Qanoq imertiginera allanut isertuuppara?

Apeqqutit taakkua ilaat arlallilluunniit aappimik akigukkit, immaqa imigassartornerit aqussinnaajumallugu iliuuseqartariaqarputit.

[Qupp. 9-mi ungalusaq/​assiliartaq]

Imigassamut tunngatillugu silatusaartumik aalajangiisarit

Imigassartortinnak imminut ima aperigit:

• Silatusaarnerua imigassartoruma, imaluunniit imigassartornaveersaartariaqarpunga?

Siunnersuut: Imminut killilersinnaanngitsoq imigassartornaveersaartariaqarpoq.

• Qanoq imigassartortigisinnaavunga?

Siunnersuut: Imigassap naliliisinnaaninnut sunniuteqannginnissaa qulakkeerlugu killiliigit.

• Qaqugukkut imigassartorsinnaavunga?

Siunnersuut: Biilertussaatillutit allamilluunniit mianersortariaqarfiusumik iliuuseqartussaatillutit, kristumiutut sammisassat sammisussaatillugit, naartutillutit nakorsaatillu aalajangersimasut nakorsaatigitillugit imigassartornaveersaartarit.

• Sumi imigassartorniarpunga?

Siunnersuut: Avatangiisini ajunngitsuni; isertorniarsarinak; imigassartornermik eqqunngitsuliornertut isumaqarfiginnittut takkuanniunngitsoq.

• Kikkut imigassartoqatiginiarpakka?

Siunnersuut: Ikinngutaalluartut ilaquttalluunniit; imigassamik ajornartorsiuteqanngitsut.

[Qupp. 10-mi ungalusaq/​assiliartaq]

Imerajuttup Guutip oqaasia iluaqutigigaa

Supot Thailandimiittoq imigassartortupilussuuvoq. Aallaqqaammut unnukkuinnaq imigassartortarpoq. Ullaakkulli, kingusinnerusukkullu aamma ullukkut, imigassartortalerpoq. Amerlanertigut aalakoorniaannarluni imigassartortarpoq. Taavali Supot Jehovap Nalunaajaasuinit Biibilimik atuaqqissaaqatigineqartalerpoq, paasigamiullu Guutip imerajunneq akuerinngikkaa imertarunnaarpoq. Sivitsulaartorli siornatigutut imertaleqqippoq. Ilaqutai isumatsaqaat.

Supotilli Jehova suli asavaa uummatikkullu iluunngarluni kiffartorfigerusullugu. Ikinngutaasa ikiortuarpaat, taakkualu taassuma ilaqutai kajumissaarpaat taassumunnga piffissaqarneroqqullugit ikiuiniarunnaaqqunagillu. Tamatuma nalaani Korinthimiunut allakkat siulliit 6:10-mi ‘imerajuttut Guutip naalagaaffianik kingornussissanngitsut’ pillugit toqqaannartumik allassimasoq pissutigalugu Supotip paasivaa qanoq ilungersunartorsiortigaluni. Paasivaa imigassamik ajornartorsiutini ajugaaffigiumallugu allannguerujussuartariaqarluni.

Tamatumuuna Supot aalajangerpoq imigassartortarunnaarluinnarniarluni. Guutip anersaavata illernartup pissaaneratigut, siunnersuutit Biibilimeersut iluaqutigalugit ilaquttamilu ilagiillu ikiuineratigut anersaakkut nukissaqaleriartuaarpoq imigassartorusuttarninilu ajugaaffigalugu. Ilaqutai nuannaaqaat taassuma Guutimut tunniulluinnarnini kuisinnermigut ersersimmagu. Maanna Supotip nuannaarutigaa kissaatigiuarsimasamisut Guutimut qanittumik attaveqalernini, piffissanilu atortarpaa inunnik allanik Biibilimik paasinninnissaannut ikiuinermut.