Becherei a Rrom me Di el Ngar er a Olsechelel

A TONY, el lulsaod er ngii sel kot el suobel, a mle sebechel el oldeu er a rengul er a mle ngodech el bedengel a klengar, omko ngkilengei el kmo ngngar er ngii a mondai er ngii el kirel a omelim. Engdi ngii el mle sebechel el melim a betok e dimlak a kora mengodech er ngii, a uchul e nguluumerang el kmo ngdirk ulemtebechel er a klengar er ngii. Ngera uchul me ngkmal mle cheleuid tia el osengel er ngii?

A tabesul el osengel a mle telemall er a klou el ildisel a rrom el lullim. Me a Tony a ble lodengelii me a lak, engdi a no er a bdelul el ngii a omtebechel aike el bek el loruul a bedengel a chad me a uldesuel me a klisichel el omelechesiu a tekoi, a mo diak el ungil el oureor sel bo el siseb a klou el rrom er a chelsel. Me a cherengel a taem el lolemolem el melim e a no er a bdelul a mengal mo diak el sebechel el melemalt el omdasu.

Sel ongeru el uchul me a Tony a dimlak el ungil el mesang a blekerdelel a omelmil er a rrom, ngii el kmal mle soal el omekerreu er a omelim er ngii me di lolemolem. A Allen el dulsaod a tekingel er sel uleak uchei el suobel a dirrek el kot el uchul e ngdimlak el kengei el kmo ngmla er ngii a mondai er ngii er a omelim el rrom. Engdi nguluuchais er a uriul el kmo: “Ak ulemart er a omelim er ngak, e mesosaod er ngak e mellasem el omekbeot er a chelitechetuk el di melim el mo imis. E le ngdi mle ta el tekoi a soak, el ngii a omekerreu er a omelmik me ngdi melemolem.” Me alta e a rebebil a milsa el kmo a omelim a mesisichang er a Tony me a Allen, engdi tir a mellemolem el omdasu el kmo ngdiak a telemall. Tir el terung el dul mle kirir el mo meruul a tekoi el mo omtebechel a omelim er tir. Engdi ngngera el tekoi a mle kirir el meruul?

Moruul a Tekoi el Di Kau el Ngosukau!

Te betok el mla torob a mondai er tir er a imis el omelim a mlo meruul a tekoi el oltirakl a tekingel a Jesus el kmo: “A lsekum a kidekmel a medam a melibas er kau, e bechetir el choitii; le ngbai klungiolem a lriid a tara klekedall ra bedengem, e a bedengem el rokir lak bo lobidokl ra Gehenna.”​—Matteus 5:⁠29.

Ngulterekokl a Jesus el dimlak lolisiich er a omelektuk el klekedellel a bedenged. Engdi, nguleak a  okesiu e ngmillisiich er a klungel a ultutelel a dekengei el duebes el choroid er a klengar er kid a ngii di el ngerang el sebechel el mo uchul a telemellel a klereng er kid. Ngmera el tekoi, a chouaisei el omeruul a sebechel el kmal el mo meringel er kid. Engdi ngmo omekerreu er kid er a uldasu me a blekeradel el sebechel el mo uchul e kede mo soiseb er tia el mondai er a imis el omelim. Me a lsekum a rechad a mla ocholt a uldesuir el bekikl er a omelmim er a rrom, e bo momtebechel er a omelim er kau. * Me a lsekum e ke mesa el kmo ngbleketakl el diak el sebechem el mtebechel a ildisel a imelem, e bo mkengei el dobesii el choridii er a klengar er kau. Alta nglocha kmal el mo meringel, engdi ngtelkib el beot er a rengelel a mla metemall el klengar.

Me alta ngdiak msecher er a omelim el rrom, engdi kau ngkse er kau el melim el mo imis? A leuaisei, e ngngera el tekoi a sebechem el meruul el ngosukau el mechei a rrom me di el ngar er a olsechelel?

Ke Mo Metik a Ngeso er Ker

1. Bo moumerang er a klisichel a mekudem, el nglunguuch el ngar er a rengud. A Biblia a omesterir a rokui el sorir el mo oldeu er a rengul a Jehovah el Dios tia el ulekrael el kmo: “E di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu el ngara Kristus Jesus.” (Filipi 4:​6, 7) Ngera ke meluluuch el kirel me bo el sebechem el nguu a chouaitia el budech?

Bo beches el kongei el kmo ngngar er ngii a mondai er kau er a omelim el rrom, el ngii a mondai el di ngerechelem kau el tang. A omouchais er a Dios aike el soam el mo meruul el kirel tia el mondai, e ngmo ochau a klengeltengat el mla er ngii el mo olengeseu er kau el mo metik a ulengull e mo olechib er kau er a lmuut el meringel el mondai. “Ngikel omart a kngtil a diak bo lungilbesul a klengar er ngii, e ngdi ngikel ocholt a kngtil e choridii er ngii, a mo nguu a klechubechub er a Dios.” (Osisechakl 28:​13) A Jesus a dirrek el dilu el kmo ngsebeched el meluluuch el kmo: “E lak momekesiuekl er kemam er chomengarm, e mosobelemam era mekngit.” (Matteus 6:​13) Engdi ngmekerang e sebechem el oureor el oltirakl er a chouaisei el nglunguuch, e mo metik a nger er ker?

2. Mngai a klisiich el mla er a Tekingel a Dios. “Ele tikingel a Dios a dingar e ngarngii a klisichel . . . [el] kutukel chomelebedebek ma uldesuel a reng.” (Hebru 4:​12) A rebetok el mle chad er a omelim er a uchei a mlongeseu el oeak sel longuiu e lolebedebek a bades er a Biblia er a bek el sils. A ta er a milluches er a Psalm a dilu el kmo: “Ngeltengat ngikel chad el diak lolab a tekingir a re dengerenger . . . Ng bai semeriar er a llechul a RUBAK, me ng mesuub er ngii er a llomes ma klebesei. . . . Ng di mo ungil er a ikel bek el loruul.”​—Psalm 1:​1-3.

A Allen, el omesubel er a Biblia el obengterir a Resioning er a Jehovah a rirellii el mo mesisiich er a imis el omelim el rrom a dilu el kmo: “Ak kmal loumerang el kmo a lemlak el Biblia me a omellach el ngar er a Biblia el ngilsukak el mo diak kulim, e ak ulekoad er a chelechang.”

3. Momekeroul er a reng er a omengerem. A Biblia a ouchais el kirir a remillim el mo cheltelaol er a uchei, el mla mei er a chelsel a ongdibel er a Rekristiano e mla mekikiid er a ‘reng ra Dios er kid.’ (1 Korinth 6:​9-11) El oeak a ngera el rolel? Te mongeseu el mo oba omengerem el ngii a blekeradel el mukeroul el oeak a ngelsuil a chedaol el reng er a Dios, me te mo chemoit a omelim el mo cheltelaol er a rrom me a tametereng el blengur. ‘E lako bo mcheltelaol ra bilong, e nguchul a delemumuu; bai bo mukeek ra reng.’ (Efesus 5:18; Galatia 5:​21-23) A Jesus Kristus a tilbir el kmo a “Chedam ra eanged ngdiak bai lsal mesterir a Chedaol Reng tirikel olengit er ngii?” Me seikid e molemolem el ‘olengit, me le beskemiu.’​—Lukas 11:​9, 13.

Tirke el sorir el mo mengull er a Jehovah er sel rolel el lekengei er ngii a sebechir el omekeroul er a omengerem el oeak sel longuiu e losuub er a Biblia e lemekudem el meluluuch el ngar er a rengrir. Me lak bo meteremokl sel bo mchebangel a blekeradel el mengitechut er a rengum, e bai mkengei er tia el telbiil el debetik er ngii er a Tekingel a Dios el kmo: “Ele ngikel omriid el mora tech er ngii a mo meridm ra tech a ngemed; e ngikel omriid el mora Reng a mo meridm ra Reng ra diak a ullebengelel klengar. Me lak bo de mesaul el meruul a ungil, ele de kelekelii e a bo le blsechel e kede mo meridm.”​—Galatia 6:​8, 9.

 4. Molilt er a rungil el chad el mousechelei er tir. “Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.” (Osisechakl 13:​20) Mouchais er a resechelim er a uldesuem el soam el omtebechel er a omelim el rrom er kau. Engdi a bades a mengelechel el kmo, sel lekea mobengterir el ngar er a omelim el rrom me a tametereng el blengur, e a rebebil er a rechad el omdilak er a uchei a mo mechas a rengrir ‘me toltuub er kau.’ (1 Petrus 4:​3, 4) Bo mkengei el dobesii el choridii er a klengar er kau a klausechelei el obengterir a rechad el mengitechut er a uldesuem el mo omtebechel er a omelmim er a rrom.

5. Moterekeklii a telekelel a ildisel a imelem. “E lako bo blekerdelel tial belulechad, e bai mngedechemiu loeak a ukbechesul a reng er kemiu, e bo msal medengei el kmo ngngera soal a Dios, me ngngera ungil lodeuir a rengul a Dios.” (Rom 12:⁠2) A lsekum e ke mechei a omellach er a tekingel a Dios me ngngosukau el mo oterekokl a ildisel a imelem e bai diak bechititerir a resechelim me a lechub a “blekeredelel tial belulechad” me loluk a ildisel a imelem, e ngmo sebechem el oldeu er a rengum er a blekerdelel a klengar el lekengei er ngii a Dios. Engdi ke mekerang e sebechem  el mo medengei el kmo ngerang a ungil el telekelel a imelem?

A ngii di el ildisel a rrom el tomellii a tabesul el uldesuem el melilt a tekoi me a lechub e ke meruul a tekoi el oltirakl er a ungil el urebetellel a omesaod, a mla engelakl er a ungil el telekelel a imelem. Me seikid e a lsekum e ke ngiltii el mo melim, e ngdiak el olecholt a llomeserreng a omrellii a telekael el kirem el mo diak el sal bleketakl el kmo ke dirk medengelii a rengum me a lechub e ke mechetelolang. Lak becherei a uldasu el kmo “Ngak a diak uaisei!” me lerellau el mo diak msiojiki el omes er a blekerdelel a omelmim er a rrom. Moterekeklii a ildisel a imelem er a telekael el rullii a omelmim er a rrom me ngultebechel el diak el bo el iis.

6. Mosuub el dmu ngdiak. “Bechei a omelekingiu me a le Choi e di le Choi, me Ngdiak e  Ngdiak.” (Matteus 5:​37, New World Translation) Bo meduch el kotouar a okedongel a chad el lta e ngungil a uldesuel engdi ngdiak el melemalt el kirem. “Mdiblechoel lousbech a medemedemek el cheldecheduch, el ulsar, me bo modengei a ikel kiriu longer ra dertal chad.”​—Kolose 4:⁠6.

7. Bo mosiik a ngeso el kirem. Molengit a ngeso er a resechelim me el sebechir el ngosukau el smisichii a uldesuem el mo omtebechel er a omelim er kau e dirrek el sebechir el meskau a ngeso er a klereng el mousbech. “E le lebo lubuu a tang, e ngike el tang el obengkel a ngosuir el okisii.” (Olisechakl 4:​9, 10; Jakobus 5:​14, 16, New World Translation) A National Institute el kirel a Mekngit el Usbechel a Rrom me a Secherel a Omelim el Rrom el ngar er a beluu er a Merikel a dirrek el mengelechel el kmo: “A omolengeasek er a omelmim er a rrom a lebebil er a taem e ngkmal el meringel. Molengit er a rechad er a telungalek er kau me a resechelim me lolengeseu er kau el mo kutmeklii a turrekong er kau.”

8. Motireklii a uldesuem. “Bo mchad er chotutel a Tekoi, e lak di mchad er chorenges, el di kemiu el mengeblad er kemiu. E ngdi ngikel belsechakl ra cherrungel llach, el llach ra ilmokl, el diak di lrenges e lobes, e ngbai meral chad er chomeruul a mo ngeltengat el kirel chomerellel.”​—Jakobus 1:​22, 25.

Mo Mesisiich er a Secherel a Omelim el Rrom

Ngdiak el rokui el chad el melim el mo imis a mo smecher er a omelim el rrom. Engdi te ngar er ngii a rebebil el mo omuchel el melim a kmal betok me a lechub e te mo mekudem el di melim me te mo smau el melim me ngmo diak el sebechir el choitii. A secherel a omelim el mo uldimukl er ngii a bedengel a chad me a uldesuel el mla mo ultuil er a usbechel a mesisiich el ilumel a uchul, a reuaisei el chad a ousbech er a lmuut el klou er a di klisichel a rengrir me a ngeso er a klereng el mo sebechir el mo mimokl er tia el tekoi. A Allen a ouchais el kmo: “Sera kungoit er a omelim el rrom e ak kmal mlo imis el smecher e meringel a bedengek. Seikid e ak mlo medengei el kmo obengkel a ngeso er a klereng el kulai er ngii, e ak dirrek el uluusbech a ukeruul el mo olengeseu er ngak el mo mengoit er a omelim.”

Te betok el chad el melim a rrom a ousbech a ngeso er a rolel a ukeruul el obengkel a klakoad er a klereng el loruul er ngii me bo el sebechir el mo mimokl e lolemolem el cheroid er a mekngit el  usbechel a rrom. * Te ngar er ngii a rebebil el mo niuying el olengeseu a secherel a bedengir el merael el mo chemis a rrom er ngii, me a remelai a kar el meruul er tir el mo diak el sorir a rrom me a lechub e lolemolem el lomekiai. A Ngelekel a Dios el mle sebechel el meruul a ongasireng el tekoi a dilu el kmo: “Ar misisiich a diak lousbech ra toktang, e te bai smecher chousbech er ngii.”​​—Markus 2:⁠17.

Aike el Klungiolel a Doltirakl a Osisechakl el Mla er a Dios

Aike el ungil el ulekrael er a Biblia el kirel a omelim el rrom a mla er a mera el Dios, el melatk aike el kot el ungil el kired, el diak el di el kirel a deuil a rengud er a chelecha el taem e ngdirrek el kirel a klungioled el diak a ulebengelel. Lluich me a eua el rak er a uriul er a lebechei a rrom, e a Allen a ouchais el kmo: “Ngmle dmeu a renguk el mo medengei el kmo ngsebechek el mo ngodech, e bo kudengei el kmo a Jehovah a soal el olengeseu er ngak el omeklemalt er a klengar er ngak . . . ” A Allen a tirrebengii a cheldechedechal el telkib el taem e mesuld a iuechel a medal sel lolebedebek er a klengar er ngii er a ngar er a mong. E melemolem el melekoi el kmo: “Sera . . . bo kudengei el kmo a Jehovah a ungil el medengei e omekerreu e omeskak a ngeso el kuusbech er ngii, tiaikid sel kmal el mle mechas a renguk er ngii el tekoi.”

Me seikid, a lsekum e kau a mechitechetong er a mekngit el usbechel a rrom me ngmerengla er kau el mengoit er ngii, e lak omereched el mo omdasu el kmo ngdikea el sebechem el mongeseu. A Allen me a lmuut el betok el chad a mlo er tilecha el omngar er ngii er a chelecha el taem e mla mo sebechir el mengesadel a imelir me a lechub e te mla choitii. Ngkmal el diak el ouuchel er a rengrir, me kau me ke ulterekokl el mo uaisei.

Me a omngiltii el mo olterekokl er a ungilbesul el ildisel a imelem me a lechub e ke ngiltii el mo diak molim, ngungil a omotireklii a tekingel a Dios el meldung el mei er kid el oeak a bltikerreng el kmo: “Ulekum me kom rirenges a tekingek! Seikid e a budech er kemiu a omaoch el ua omoachel ma llemeltiu a ua chedesaoch er a daob.”​—Isaia 48:18.

[Footnote]

[Baks/Siasing el ngar er a 8 el llel]

 A Rrom Ngomtebechel er Ngak?

Di lekau el oker el kmo:

• A omelmik er a rrom nglmuut el mesisiich er a ngar er a mong?

• Ngak ak blechoel el melim a rrom er a chelechang?

• Ngak ak kmal imis el melim a rrom?

• Ngak ak kuusbech a rrom me bo el sebechek el outekangel a mondai er ngak?

• A sechelik me a lechub a chedak ngmla mengedecheduch er ngak el kirel a omelmik?

• A rrom nguchul a mondai er ngak er a blik me a urerek me sel kurael a beluu?

• Ngmeringel er ngak a lak kulim a rrom el ta el sandei?

• Ngak, ngchetik el obengterir tirke el diak lolim a rrom?

• Ngak ak kumart a ildisel a rrom el kulim?

A lsekum a nger er kau er a betok er aika el ker a kmo choi, e ngbelkul a kmo ngmla mo kirem el osiik a ngeso el mo ngosukau el mesebech er a omelmim er a rrom.

[Siasing el ngar er a 9 el llel]

Moruul a Melemalt el Telbiil el kirel a Rrom

Uchei er a omolim a rrom, e molatk aikang:

• Ngdi ungil a kulim a rrom me a lechub e ngdiak?

Uleklatk: A chad el diak el sebechel el mtebechelii a omelmil er a rrom a bai kirel el diak lolim a rrom.

• Ngua ngera ildisel el rrom a sebechek el nguim?

Uleklatk: A uchei er a omolim e di msebechii a ildisel a imelem me lak bo el temellii a ungil el omelilt er kau.

• Ngoingerang e ngsebechek el melim?

Uleklatk: Ngdiak kulim er a uchei er a kumekall a mlai me a ngii di el ngera el tekoi el ousbech er a melemalt el uldasu; me a uchei er a kuruul er a omesiungek el mo er a Dios; ngdiak kulim sel kdioll; ngdiak kulim a rrom a lsekum ak melim a bebil el kar.

• Ak mo er ker e melim?

Uleklatk: Ngar er a basio er a omelim; e  diak kumart er ngak a kulim; e diak kulim er a mederir a rechad el chetirir a omelim el rrom.

• Ak mo obengkel techang sel kulim a rrom?

Uleklatk: Ngdiak kubengterir a resekengim er a rrom; ak bai obengterir a rungil el sechelei me a rungil el chedak.

[Baks/Siasing el ngar er a 10 el llel]

A Tekingel a Dios a Ngilsuir a Ta el Sekengim er a Rrom

A chad er a Thailand el Supot a mle mesisiich el melim a rrom. A uchei e ngdi millim a lekebesengei, e mlo omuchel el melim a letutau me a dirrek a lesueleb, me ngmlo uchul e ngdi blechoel el cheltelaol. E sola e mlo omuchel el mesuub a Biblia el obengterir a Resioning er a Jehovah. Me sera lesubii el kmo a Jehovah el Dios a diak el kengei er a recheltelaol, e ngmlo diak lolim a rrom. Ngdi mle telkib, e ngliluut el mo melim a rrom me a telungalek er ngii a kmal mlo mekngit a rengrir.

Me nguaisei, a Supot a mle betik a rengul er a Jehovah e soal el mengull er ngii er a melemalt el rolel. A resechelil a millemolem el olengeseu er ngii e millisiich er a telungalek er ngii me lolengeseu e lolisiich er ngii. Seikid, e a uleklatk er a 1 Korinth 6:10 el kmo a re “cheltelaol ra rrom, . . . a diak bo loudiukes ra rengedel a Dios” a ngilsuir a Supot el mo medengelii a kngtil a cheltelaol er a rrom. Ngmlo melechesuar el kmo ngkirel el mo blak a rengul el mengoit er a omelim el rrom.

A Supot a tilbir er a rengul el diak el lluut el mo melim a rrom. Cherengel a taem, e a klisichel a chedaol el reng er a Dios me a ulekrael er a Tekingel, me a ngeso er a telungalek er ngii me a dirrek el ongdibel a ngilsuir el mo melisiich er a klereng er ngii me bo el sebechel el choitii a omelim el rrom. Ngkmal mlo ungil a rengrir a rechad er a blil er a bo lemetecholb el olecholt er a telbilel a rengul el mo er a Dios. Chelechang e a Supot a dmeu a rengul er a ungil el deleongel er ngii me a Dios, me chelechang e ngbai olengeseu er a rebebil el kirel a tekoi er a klereng.