Kia Tau ua Taau Inu Kava

KO Tony tei taikuia i te atikara mua, penei ka mataora atu tona oraanga naringa aia i āriki e e manamanata tona no te inu kava. Inara, irinaki aia e e tau ua tana inu kava no te mea e maata tana ka rauka i te inu ma te kore e kona. Eaa i tarevake ei kia manako akapera aia?

No tana inu maata i te kava i tarevake ei tona manako. Me kua kite a Tony e me kare, no te inu maata i te kava, kua takinokinoia tona roro, te tuanga o te kopapa tei akatere i tona kopapa, manako e te ngakau. Te maata atu tana i inu, te ngata atu i tona roro i te kite mei teaa rai te kino o tana inu kava.

Tetai akaou tumu i tarevake ei te manako o Tony, koia oki ko tona inangaro maata i te rave tamou i te inu kava. I te akamataanga, kua manako a Allen tei taikuia i te atikara mua e kare tana inu kava i te manamanata. Karanga aia: “Ka uuna au i taku inu kava e ka kimi kotoeanga ma te karanga e kare au e inu maata ana. Toku akakoroanga—kia paruru i taku inu kava.” Noatu kua kite te katoatoa e te akatere ra te kava ia Tony raua ko Allen, kua vare ua raua i te manako e te mako ua ra raua. Kua anoanoia raua kia rave i te au tauianga ei akatere i ta raua inu kava. Inara, eaa te au tauianga ta raua ka rave?

Rave i te Tauianga!

E manganui tei akamutu i te inu maata i te kava, kua rave i te au tauianga tei tau ki ta Iesu i tuatua: “E te pekapeka na koe i toou mata katau, e koiti, e akaruke ke atu: e meitaki oki koe me mate tetai oou melo, i to kopapa katoa kia uriia ki roto i te po.”​—Mataio 5:29.

Kare a Iesu i karanga e kia takinokino i toou uaorai kopapa. Mari ra, e akatutuanga ua te reira kia puareinga ua tatou i te takore i tetai ua atu apinga te ka takinokino ia tatou i te pae vaerua. E tika, ka mamae tatou me rave i teia au tauianga. Inara ka paruru te reira ia tatou mei te au aerenga manako e te au turanga te ka taki atu ki te inu maata i te kava. No reira, me akakite mai tetai ke e te akamata ra koe i te inu maata i te kava, e iki i te rave i te au tauianga. * Me kite mai koe e kare e rauka ia koe i te akatere i taau inu kava, kia papa ua koe i te akakore takiri i te reira. Penei ka tupu te mamae kia koe, inara e meitaki roa atu te reira i te oraanga kua kī i te tumatetenga.

Noatu e kare koe i te tangata kona kava, te peea ua ra taau inu kava? Me kua akamata koe i te inu maata, eaa te au takainga taau ka aru kia tau ua taau inu kava?

Au Takainga te ka Tauturu ia Koe

1. Irinaki i te mana o te pure putuputu ma te ngakau tae. Te akamaroiroi maira te Pipiria i te aronga tei inangaro i te akamareka i te Atua ko Iehova: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Eaa taau ka pure kia rauka mai te ngakau ‘au?

E akakite tika ki te Atua e e manata toou no te inu kava, naau uaorai teia apainga. Me akakite koe kiaia i taau ka inangaro i te rave, ka akameitaki aia i taau tautaanga kia rapakau i te manamanata e te kopae i te tumatetenga. “Ko tei tapoki i tana ara, kare ïa e manuia: ko tei aaki ra e kua akaruke, e aroaia ïa.” (Maseli 28:13) Akakite katoa a Iesu e kia pure tatou: “Auraka e akaruke ia matou kia timataia mai, e akaora ra ia matou i te kino.” (Mataio 6:13) Inara, akapeea koe me rave i taau i pure, e akapeea e rauka ai te pauanga ki taau i pati?

2. Kimi i te maroiroi mei roto i te Tuatua a te Atua. “E mea ora oki te tuatua a te Atua, e te ririnui . . . e te akara matariki oki i te manako e te vananga o te ngakau ra.” (Ebera 4:12) Maata te aronga kona kava i mua ana tei tauturuia na te tatau anga e te akamanako oonu anga i te Pipiria i te au rā ravarai. Teia ta tetai tata salamo i atu: “E ao to te tangata, kare e aaere i te ako a te akono kore i te Atua, . . . Ko tei inangaro ra i te ture a Iehova; e tei tana ture tona manako anga i te po e te ao. . . . Ko tana katoa e rave ra, te meitaki ra ïa.”​—Salamo 1:1-3.

Kua riro ta Allen apii Pipiria ma te Au Kite o Iehova ei akamaroiroi iaia kia akamutu i te inu maata i te kava. Karanga aia: “Papu iaku e naringa kare au i apii i te Pipiria e te au kaveinga Pipiria tei tauturu iaku kia akamutu i te inu kava, kua mate ke ana au.”

3. Akatupu i te tu akamako. E aronga kona kava to roto i te putuputuanga Kerititiano i mua ana inara akakite te Pipiria e kua oreiia ratou “e te vaerua o to tatou Atua.” (1 Korinetia 6:9-11) Akapeea ra? Tetai mataara tei tauturu ia ratou kia akamutu i te kona kava e te inu maata i te kava, na te akatupu anga i te tu akamako, tei rauka mai ma te tauturu a te vaerua tapu o te Atua. “Auraka e kona i te wina, e tupu ei te kanga maata; kia ki ra kotou i te vaerua.” (Ephesia 5:18; Galatia 5:21-23) Taputou a Iesu Karaiti no tona Metua i te rangi e ka “oronga [aia] i te Vaerua Tapu i te aronga e pati atu aia ra.” No reira, “e pati, e e orongaia mai ta kotou.”​—Luka 11:9, 13.

Ka rauka i te aronga tei inangaro i te akamori ia Iehova ma te tu tau i te akatupu i te tu akamako me tatau e me apii i te Pipiria ma te pure putuputu mei roto i te ngakau. Auraka e tuku i te ‘au, mari ra e irinaki i teia taputou i roto i te Tuatua a te Atua: “Te ruru i ta te vaerua, ko te ora mutu kore tana e rauka i te vaerua ra. Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—Galatia 6:8, 9.

4. Iki i te au oa meitaki. “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” (Maseli 13:20) E akakite ki toou au oa e ka inangaro koe i te akamako i taau inu kava. Inara, te akamatakite maira te Tuatua a te Atua e me akaruke koe i “te inu nui i te wina ra, te kapiti anga kanga ra, te akakonā kava ra,” ka va ua toou au oa o mua ana “ma te akakino oki” ia koe. (1 Petero 4:3, 4) No reira, kia puareinga ua i te akamutu i te piri atu ki te aronga tei kore i turu i toou akakoroanga no te akamako i taau inu kava.

5. Vaito i taau inu kava. “Eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Auraka e akatika i toou au oa me kore “teianei ao” kia akanoo mei teaa te maata o taau ka inu. Mari ra, e tuku i te au kaveinga Pipiria ei tauturu ia koe kia akakotinga i taau ka inu. Ka rauka i reira ia koe te oraanga ta te Atua e mareka ra. Akapeea ra koe e kite ei eaa te vaito te ka tau noou?

Me inu koe i te kava e oti kua akamata toou manako i te aere ke e ka marie koe i te akamanako, ko te aiteanga i reira e maata roa taau i inu. No reira me iki koe i te inu, kare i te mea meitaki kia vaito i taau ka inu kia vaitata koe i te kona. E akara matatio ia koe uaorai e taau inu kava e auraka kia manako e ka mako ua te reira. E akapapu meitaki e ko taau vaito no te inu kava, kare e maata roa mari ra e tau ua kia kore koe e timataia kia inu maata e kia kona koe.

6. Apii i te karanga e kare. “Kia riro ra ta kotou Koia, ei koia; e ta kotou Kare, ei kare.” (Mataio 5:37) Me māro mai tetai oa kia inu koe, kia kite koe i te pau maru atu e kare. “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa.”​—Kolosa 4:6.

7. Pati i te tauturu. Pati i te tauturu a te au oa te ka akamaroiroi ia koe kia akamako i taau inu kava e ka oronga mai i te tauturu pae vaerua. “E meitaki nga tangata toko rua i te takitai; no te mea e tutaki meitaki ta raua i ta raua angaanga. Kia inga oki tetai ra, na te tokorua e rave e akatu ki runga.” (Koheleta 4:9, 10; Iakobo 5:14, 16) Akakite mai te National Institute on Alcohol Abuse and Alcoholism i Marike e: “Tetai taime, penei e ngata i te akaiti i taau inu kava. E pati i toou ngutuare e te au oa no te tauturu kia itae koe i toou akakoroanga.”

8. Rave i taau i akakoro. “Ei aronga rave oki kotou i te tuatua nei, auraka ei aronga akarongo ua, i te pikikaa ua anga ia kotou uaorai. Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.”​—Iakobo 1:22, 25.

Akakore i te Kaki no te Inu Kava

Kare te katoatoa tei inu maata i te kava e riro mai ei aronga kaki kava. Inara me akamata tetai pae i te inu maata e te putuputu, ka akatupu ratou i te kaki no te kava. No teia kaki kava, ka tupu te au manamanata i te pae kopapa e te pae manako. Me pera, kare e rava ua te tautaanga e te tauturu pae vaerua no te akakore i te kaki kava. Te akamaara ra a Allen, “Te akamutu anga au i te inu kava, e kino tikai te mamae o toku kopapa. I reira au i kite mai e ka anoanoia te rapakauanga, kapiti mai ki te tauturu pae vaerua.”

E maata te aronga inu kava tei anoano i te rapakauanga maki e te tauturu pae vaerua ei akamaroiroi ia ratou kia akakore i te kaki kava e kia akamutu i te inu maata i te kava. * Ka anoanoia tetai pae kia noo ki roto i te aremaki no te akakoromaki i te mamae ka tupu no te akakore i te kava. Me kore, kia orongaia tetai vairakau no te akaiti i te kaki kava e te tauturu ia ratou kia akakore i te inu kava. Akakite mai te Tamaiti a te Atua tei rave i te au temeio: “Kare no te aronga ora te taunga [me kore, taote], no te aronga maki ra.”​—Mareko 2:17.

Au Akameitakianga me Akono i te Akoanga a te Atua

No ko mai i te Atua mou te akoanga meitaki a te Pipiria no te inu kava, e ka inangaro aia i te mea meitaki no tatou no teia tuatau—e tuatau ua atu. E 24 mataiti i muri ake i te akamutu anga a Allen i te inu kava, karanga aia e: “E mea umere tikai i te kite e kua rauka iaku i te taui, e kia kite e te inangaro maira a Iehova i te tauturu mai iaku kia akatanotano i toku oraanga, e . . .” Tāpu a Allen kia kore aia e aue no te akamaaraara i tei tupu kiaia. “E, . . . kia kite e te mārama maira a Iehova e te inangaro maira iaku, e kua oronga mai i te tauturu taku e anoano ra​—kare e aite.”

No reira, me kua taii koe ki te inu maata i te kava, me kore te kaki kava, auraka e tuku i te ‘au e auraka e manako e kare oou manakonakoanga. Kua na roto a Allen e tetai ke i taau e na roto ra i teianei, e kua rauka ia ratou i te akaiti me kore te akakore takiri i te kava. Kare ratou i tataraapa ana e kare rai koe.

Me iki koe kia tau ua taau inu kava me kore kia akakore takiri i te reira, e akarongo ki te patianga aroa a te Atua: “Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”​—Isaia 48:18.

[Au Tataanga Rikiriki i Raro]

[Pia/​Tutu]

 Te Akaaere Nei te Kava ia Koe?

Penei ka ui koe kia koe uaorai:

• Te inu maata ra ainei au i te kava i teianei?

• Te putuputu ra ainei taku inu kava i teianei?

• Te pakari atura ainei te kava taku e inu nei?

• Ka inu kava ainei au me tupu te manako taitaia me kore ei akakoromaki i te manamanata?

• Kua akakite ainei tetai oa me kore tetai o te ngutuare e te riro nei taku inu kava ei manamanata?

• Ka akatupu ainei taku inu kava i te manamanata i te kainga, te ngai angaanga e me teretere aere au?

• E ngata ainei iaku te akakore i te kava e tai epetoma?

• Ka manako apa ainei au me kare tetai ke e inu kava?

• Ka uuna ainei au i te maata o te kava taku e inu ra?

Me kua pau koe e ae ki tetai o teia au uianga, penei ka anoanoia koe kia rave i te au takainga ei akamako i taau inu kava.

[Pia/​Tutu]

Rave i te Ikianga Meitaki no te Inu Kava

I mua ake ka inu kava koe, akamanako ana i teia:

• E mea tau ainei kia inu au i te kava, me ka kopae au i te reira?

Manako tauturu: Me kare e rauka ia koe i te akaiti i taau inu kava, auraka e inu i te reira.

• Eia karati kava taku ka inu?

Manako tauturu: E akapapu meitaki i taau vaito no te inu kava kia kore koe e timataia kia inu maata e kia kona.

• Aea au e inu kava?

Manako tauturu: Eiaa i mua ake ka akaoro koe e me anoanoia koe kia rave i tetai angaanga ka anoanoia kia vai araara ua; eiaa i mua ake i te akamorianga; eiaa i te tuatau e nui ra; eiaa i mua ake ka kai ei i tetai au vairakau.

• Ka inu au kiea?

Manako tauturu: I te ngai tau; eiaa i te ngai muna ei uuna i taau inu kava; eiaa i mua i te aronga te ka akaturoriia e te kava.

• Koai ma taku ka piri atu me inu kava?

Manako tauturu: E inu ma te au oa e te ngutuare tangata meitaki; eiaa ma te aronga inu maata i te kava.

[Pia/​Tutu]

Tauturu te Tuatua a te Atua i Tetai Tangata Kona Kava

E tangata inu maata i te kava a Supot, no Thailand mai. I te akamataanga, kua inu ua aia i te avatea. Inara i muri mai, kua akamata aia i te inu i te popongi e i te tuaero. Maata te taime, ka inu aia i te kava kia kona aia. Inara i muri mai, kua akamata aia i te apii i te Pipiria ma te Au Kite o Iehova. Te apii anga aia e kare te Atua ko Iehova e mareka ana i te kona kava, kua akamutu a Supot i te inu kava. Inara i muri mai, kua akamata akaou aia i te inu maata. Kua taitaia tikai tona ngutuare tangata.

Inara, kua inangaro rai a Supot ia Iehova e kia akamori iaia ma te tau. Kua tauturu ua rai te au oa o Supot iaia e kua akamaroiroi i tona ngutuare kia akapou maata i te taime kiaia e auraka kia tuku i te ‘au. I taua taime rai, na te tuatua mou i roto ia 1 Korinetia 6:10 e ‘kare te konā kava e noo i te basileia o te Atua’ i tauturu ia Supot kia kite e e mea kino tikai tana inu kava. Kua mārama pu tikai aia e ka anoanoia kia tauta pakari kia autu i tona manamanata no te inu kava.

I teianei, kua iki a Supot i te akamutu takiri i te inu kava. Ma te mana o te vaerua tapu o te Atua, te aratakianga a te Tuatua a te Atua e te tauturu a tona ngutuare e te putuputuanga, kua rauka ia Supot te maroiroi e te inangaro kia akakore takiri i tona kaki no te inu kava. Mataora tikai tona ngutuare tangata i te rā i papetitoia aia ei akairo i tona akatapuanga ki te Atua. Teianei kua rauka ia Supot te pirianga vaitata ki te Atua tana i inangaro e te taangaanga nei aia i tona tuatau no te tauturu i tetai ke i te pae vaerua.