Tsahatsaharo ty Toake Inome’o

VA’E ho nihafa ty fiaigna i Ndriana, i nirehafegne taloha tagney naho nagneke reke fa nanagne olagne amy ty finomagne toake. Faie nihevetse reke fa voafehe’e soa avao ty fiaigna’e, satria hoe nahazaka toake maro avao reke. Nagnino reke ro diso hevetse?

Tsy nisaigne soa ty Ndriana noho ireke ninogne tafahoatse. Izao ty maregne, ndra fanta’e ndra tsy fanta’e: Ty betro’e, ty dika izay ty taova mibaiko ty fihetse’e naho ty fisaigna’e vaho ty fihetseham-po’e, ro tsy niasa soa sasa naho fa donto i toakey. Vao mainke tsy nifanta’e ty nanjò aze arakarake ty ninoma’e.

Diso hevetse ka ty Ndriana satria tsy te hiala amo o toakeo. Tamy ty voaloha’e ty Mika, i nirehafegne taloha tagney, le tsy nagneke fa managne olagne amy ty finomagne toake. Hoe reke: “Naetako tie ninogne raho, sady nipay fialan-tsiny avao naho fa tratse. Nataoko sare jebe tie fa ninogne tafahoatse raho. Tsy te hiala raho, le niaro tegna avao.” Sambe nihevetse ty tegna’e ho tsy nanagne olagne ty Ndriana naho i Mika, ie amy izao fa trea o ndatio fa nifehé o toakeo iareo. Nila nanao raha iareo. Faie inogne zay?

Manoa Raha!

Maro tamo o ndaty niafake tamo o toakeo ro nagnorike ty reha i Jesosy toy: “Naho ty maso’o havana ty mahavy azo hanota, le afaho sady ario lavitse azo. Fa ndra aleo mamoe maso raike, ta tie ty vata’o iaby ro hatorake amy i Gehena agne.”​—Matio 5:29.

Tsy te hirehake ty Jesosy tie tapaho ty rantsambata’o. Nampiasa o rehake agn’ohatse rehoe reke mba hagnamafesagne fa toko’e ho vognogne hagnafake ze raha va’e hanimba ty fifandrambesantikagne aman’Andrianagnahare tika. Va’e ho tena mafe zay faie hikalagne antikagne tsy hieretseretse ndra hanao raha va’e hahavy antikagne hinogne tafahoatse. Manoa raha areke naho fa nisy nirehake tama’o tie maro loatse ty toake inome’o. * Toko’e ho vognogne tsy hinogne sasa rehe naho trea’o fa tsy voafehe’o o toakeo. Mafe zay faie ndra aleo manao izay toy izay hanimba ty fiaigna’o.

Te hinogne tafahoatse vao rehe ndra tie tsy miankin-doha amo o toakeo aza? Akore ty hahaia’o manahatsahatse?

Aia ty Hahazoagne Fagnampeagne?

1. Matokia fa misy heri’e ty vavake atao mateteke sady boake amy ty fo. Manoro hevetse ze te hampifale i Jehovah Andrianagnahare ty Baiboly tie: “Amy ze kila raha, le ampahonigno an’Andrianagnahare amy ty vavake naho ty fihalaleagne miharo fisaoragne ty fangataha’areo. Le ty fiadanan’Andrianagnahare ambone ze kila eretseretse ro hiambegne ty fo’areo naho ty sai’areo amy ty alala i Kristy Jesosy.” (Filipianina 4:6, 7) Ino ty azo’o rehafegne amy ty vavake mba hanagna’o ze fiadanan-tsaigne zay?

Ekeo tie managne olagne amy ty finomagne toake rehe, sady irehe avao ty tompon’andraikitse ama’e. Hotahien’Andrianagnahare rehe naho mirehake ama’e ze raha irie’o hatao, sady mikezake mipay fagnampeagne ro magnalavitse ze olagne va’e hiseho. “Tsy hahomby ze mandika lily faie magnetaketake ty natao’e, fa ze magneke ty fahota’e naho miala amy izay ro hamindragne fo.” (Ohabolana 28:13) Nirehake ty Jesosy fa afake mivavake hoe izao tika: “Ko minday anay amy ty tsapa hevetse, fa afaho amy i ratỳ zahay.” (Matio 6:13) Faie akore ty hanoa’o raha mifagnarake amy ty vavake hoe izay? Aia ty hahazoa’o valem-bavake?

2. Manoviza hery boake amy ty Saontsin’Andrianagnahare. “Velogne naho mahery ty saontsin’Andrianagnahare ... mahay mamantatse ty raha eretserete ty fo naho ty raha safirie’e.” (Hebreo 4:12) Nagnampe ndaty maro fa nimpiboboke toake ty famakiagne naho ty fisaintsaignagne andinin-teny tsiampeampe isan’andro. Hoe ty mpanao salamo raike matahotse an’Andrianagnahare: ‘Sambatse ze ndaty tsy magnorike ty fanoroagne mey ty raty fagnahy. Hotomombagne iaby ze raha anoe’e.’​—Salamo 1:1-3.

Nahavita niala amo o toakeo ty Mika naho fa nianatse Baiboly tamy ty Vavolombelo i Jehovah. Hoe reke: “Azoko antoke tie va’e fa nimate raho hinane zay naho tsy nagnampe ahy hiala amo o toakeo ty Baiboly naho ty toro lala’e.”

3. Mahaia mifehe tegna. Rehafe ty Baiboly fa sinasa malio “tamy ty fagnahin’Andrianagnaharentikagne”, i ndaty mpinon-toake nanjare Kristiana rey. (1 Korintianina 6:9-11) Agnisa ty nagnampe iareo hiala tamy ty fibobohan-toake naho ty fete tsy voafehe ty fifehezan-tegna. Magnampe antikagne hanagne o toetse iohoe ty fagnahy masin’Andrianagnahare. “Ko mba mamo o divaio, fa mahavy anareo hanao hagegeagne zay. Mikezaha mba ho feno fagnahy masigne lognandro.” (Efesianina 5:18; Galatianina 5:21-23) Nampitamà ty Jesosy Kristy fa ‘hagnomey i fagnahy masigney hoahy ze mangatake ama’e i Baba an-dagnitse agney.’ “Mangataha avao [areke] le homeagne” rehe.​—Lioka 11:9, 13.

Afake mifehe tegna ze magniry hahazo sitrake amy i Jehovah, naho mamaky sady mianatse ty Saontsin’Andrianagnahare vaho mivavake mateteke naho boake amy ty fo. Ko mitofa fa matokia ty fampitamà ty Baiboly toy: “Ze mitongy hoahy i fagnahỳ ro hahazo fiaignagne nainai’e boake amy i fagnahỳ. Lonike tika tsy ho rerake hanao ty soa, satria amy ty fotoagne voatondro ro handrambesantikagne valesoa naho tsy rerake tikagne.”​—Galatianina 6:8, 9.

4. Miaraha amy ty namagne soa. “Ho hendre ze miarake amy ty hendre, faie hahatrea loza ze miragnetse amy ty tsisy saigne.” (Ohabolana 13:20) Rehafo ty nama’o fa nanapa-kevetse ty hitao rehe naho fa minogne. Faie mampitao antikagne ty Baiboly fa naho fa miala amy ty ‘fibobohagne divay, naho ty fete tsy voafehe vaho ty fifaninanagne minon-toake’ rehe, le ho “veren-draha” ty nama’o taloha, sady ‘hanimbotimbo’ azo tsy misy fara’e . (1 Petera 4:3, 4) Mikezaha areke mba tena hagnalavitse ze ndaty va’e hanembatsembagne ty kezake atao’o.

5. Asio fetra’e ty hamaro’e. “Sady ko magneke hovolavolae ty tontolo toy sasa, fa miovà le havaozo ty sai’areo, mba handineha’areo soa sady hamantara’areo soa ty zoton’arofon’Andrianagnahare, i fanjaka sady ankasitrahagne ro tsy misy tsiko’ey.” (Romanina 12:2) Hankasitrahan’Andrianagnahare ty fomba fiaigna’o naho ty toro lala ty Baiboly ro enga’o hametra ty hamaro ty toake hinome’o, fa tsy ty nama’o ndra ty “ty tontolo toy.” Faie akore ty hahafantara’o ze tsahatse azo?

Fa maro loatse ty toake inome’o naho fa tsy afake misaigne soa sasa rehe. Naho mifily ty hinon-toake areke rehe, le ko somongàgne avao ty fetra ty hamaro’e, fa anò hentetse soa. Ekeo fa managne olagne amy ty finoman-toake rehe. Fetrao soa ty hamaro ty toake hinome’o, sady ko atao marine ty hamaro ty toake mahamamo azo zay.

6. Mahaia mandietse. “Naho fa Eka ty reha’areo le Eka, naho fa Aha’a le Aha’a.” (Matio 5:37) Mahaia mandietse am-pagnajagne naho lava mandrisike azo hinon-toake ty ndaty soa fagnahy faie diso hevetse. ‘Anò fanjaka naho soa sira lognandro ty rehake rehafe’areo, soa tie ho hai’areo ty mamale ty ndaty tsikiraidraike.’​—Kolosianina 4:6.

7. Mangataha fagnampeagne. Mipaliava namagne vognogne hagnampe azo ho tapa-kevetse hitao amy ty finomagne toake, sady ho afake hagnatanjake ty finoa’o. “Soa ty roe noho ty raike. Fa naho tonta ty raike, le afake magnampe aze hiaregne i nama’ey.” (Mpitoriteny 4:9, 10; Jakoba 5:14, 16) Manoro hevetse hoe izao ty Fikambanagne Mialy amy ty Finomagne Toake, a Etazonia agne: “Va’e ho tena mafe ty miala amo o toakeo. Mangataha fagnampeagne amy ty longo’o naho ty nama’o mba hahavità’o magnatratse i tanjo’oy.”

8. Ko miovaova hevetse. “Toko’e ho mpankatò ty saontsy nareo. Faie ze mandineke soa i lalàna voririke magnafake o ndatioy, magnorike izay avao, le hanjare mpankatò ty saontsy fa tsy mpitsanogne magnaligno. Ho sambatse reke naho fa mankatò. ”​—Jakoba 1:22, 25.

Fialagne amo o Toakeo

Tsy ze minogne tafahoatse ro manjare miankin-doha amo o toakeo. Faie manjare miboboke toake ndra minogne mateteke ty ndaty ila’e, le manjare andevoze’e. Manjare mipay i fangaron-draha mahery amy i toakey ao ty vata’e naho ty sai’e, le ndra tie tena vognogne hiala aza reke sady va’e fa misy magnampe aze hanagne finoagne matanjake, le mbe tsy ampe zay. Hoe ty Mika: “Nanaintaigne raho tamy iraho nisintake amo o toakeoy. Teo vaho tsapako fa nipay fitsaboagne raho, ankoatse ty fagnampeagne ahy hatanjake ara-pagnahy.”

Mpinon-toake maro ty mipay ty fagnampea o dokoterao, mba hisintaha’e amy ty finomagne tafahoatse naho tsy hiheregna’e amy izay sasa. * Mila ampidiregne lapotaly ty ndaty ila’e mba hahazaka’e i fanaintaignagne mafe boake amy ty fisintahagne o toakeoy. Mipay fagnafoly ka ty ndaty ila’e mba hampihegnagne ty fagniriagne mafe hinon-toake sady hagnampeagne aze tsy hinon-toake sasa. Hoe tasa i Anak’Andrianagnahare mpanao fahagagagney: “Tsy ty matanjake ty mipay dokotera fa ty marare.”​—Marka 2:17.

Mahasoa ty magnorike ty toromareke boake aman’Andrianagnahare

Misy torohevetse mahasoa miomba ty toake ty agnate Baiboly ao, sady boake amy i tena Andrianagnaharey i raha rey. Mipay ze hahasambatse antikagne reke, tsy amy izao avao fa ho nainai’e. Hoe ty Mika, 24 taogne tafara ty niala’e tamo o toakeo: “Tena fale raho nahafantatse tie afake nanao fiovagne, naho tihoe nagniry hagnampe ahy hagnitsy ty fiaignako ty Jehovah sady...” Te higanaganake ty ranomaso’e naho fa miheregne an-tsai’e ao ty raha taloha. Nifoaigne reke sady nanohy hoe izao: “Taka i Jehovah ty manjò o ndatio sady mikarakara naho magnomey ty fagnampeagne ilae’e reke. Hoe tsy mampino zay!”

Ko mora kivy areke naho mihevetse areke tie fa tsy misy tamaegne sasa ty ama’o, naho andevoze ty toake rehe ndra minon-toake maro loatse. Mitovy amy ty nanjò i Mika naho ty ndaty hafa ty manjò azo tie amy izao. Faie nahavita nifehe ty toake ninome’e iareo, ndra tena afake tamy izay. Tsy nanegnegne iareo, le tsy hanegnegne hoe izay ka rehe!

Ndra rehe mifily ty hinogne arake ty antogno’e ndra mifily ty tena tsy hinon-toake, le oriho ty fiangaviagne feno hatea boake aman’Andrianagnahare toy: “Naho mankatò ty liliko rehe, le hanahake o reneranò ty fiadana’o sady hanahake o fagnonjan-driakeo ty hamarena’o!”​—Isaia 48:18.

[Fagnamarehagne ambane peje]

[Efajoro/​Sare]

 Feheze o Toakeo vao Rehe?

Azo’o eretseretegne retoa:

• Nitombo vao ty hamaroa ty toake ninomeko?

• Minon-toake mateteke vao raho naho oharegne amy ty taloha?

• Mihamahery vao ty toake inomeko?

• Minon-toake vao raho mba hiatrehako ty raha mampivali-doha ahy ndra mba hamonoagne eretseretse?

• Fa nisy namako ndra keleiako vao nirehake fa mampinekoneko aze iraho minon-toakeo?

• Nampisy olagne an-tragno ao, ndra am-piasagne agne ndra naho fa nanao lia lavitse vao ty finomako toake?

• Mafe amako vao ty tsy hinon-toake agnate ty heregnandro?

• Tsy azoazoko vao ty aiko naho fa mahatrea ndaty mifaly toake raho?

• Aetako vao ty hamaro ty toako inomeko?

Manoa raha mba hifeheza’o ty fahazara’o minogne, naho misy eka ty toin-dreha’o amo o fagnonteneagne rehoe.

[Efajoro/​Sare]

Mahaia Manapa-kevetse Naho fa Hinon-toake

Eretsereto retoagne aloha ty hinomagne toake:

• Mete amako vao ty minon-toake sa toko’e hifaly raho?

Torohevetse: Toko’e hifaly aze rehe naho tsy mahafehe tegna.

• Manao akore ty hamaro ty toake toko’e hinomeko?

Torohevetse: Fetrao ty toake toko’e hinome’o amy ihe mbe misaigne soa io.

• Ombia raho ro toko’e hinogne toake?

Torohevetse: Tsy toko’e hinon-toake rehe naho fa hinday tobile, ndra hanao raha ilaegne fifantohagne, ndra hanao raha mifandrambe amy ty ara-pagnahy, ndra naho fa mivesatse, ndra naho fa mihinagne fagnafoly ila’e.

• Aia raho ro toko’e hinogne?

Torohevetse: Tsy amy ty toeragne tsisy mahatrea ndra agnatreha o ndaty tsy tea mahatrea ndaty hafa minon-toakeo, fa amy ty toeragne azo antoke.

• Ia ty hiarahako minogne?

Torohevetse: Miaraha amy ty namagne soa ndra ty keleiagne, fa tsy amy ty ndaty mpinon-toake.

[Efajoro/​Sare]

Nagnampe ty Mpinon-toake Raike ty Saontsin’​Andrianagnahare

Mpiboboke toake ty Supot, a Tailande agne. Isake hariva avao reke ty ninogne tamy ty voaloha’e. Faie nanjare ninogne ka reke naho fa maraindraigne, le naho fa tafara tatoy naho fa atoandro. Mateteke reke ninon-toake mba ho mamo avao. Naho fa niavy eo reke nanomboke nianatse Baiboly tamy ty Vavolombelo i Jehovah. Nianara i Supot fa tsy ankasitrahan’Andrianagnahare ty fimamoagne, le tsy ninogne sasa reke. Faie niheregne ninogne indraike reke tafara kede izay. Tena nikivy i keleia’e rey.

Faie mbe tea i Jehovah avao ty Supot sady nagniry ty hahazo ty fankasitraha’e. Nagnampe aze avao ty nama’e. Nirisihe iareo ty keleia i Supot mba hanokagne fotoagne maro hiarahagne ama’e sady tsy ho kivy. Mazava soa ty rehafe ty 1 Korintianina 6:10 tie ‘tsy handova ty Fanjakàn’Andrianagnahare ty mpimamo.’ Nagnampe i Supot zay mba hahatsapa’e tie tena nanagne olagne lahibey reke, le nila nikezake mafe mba hiala amy i fahazara’e minogney.

Vognogne hiala tanterake amo o toakeo ty Supot tamy izay. Nahazo hery reke sady nahavita tsy niankin-doha tamy ty toake sasa. Nagnampe aze o keleia’eo naho ty mpiara-mivavake ama’e, sady teo ka ty fagnahy masigne naho ty tari-dala ty Saontsin’Andrianagnahare. Tena fale i keleia’ey naho fa nanokan-tegna ho an’Andrianagnahare naho natao badisa reke. Tanterake amy hinane zao ty fagniria i Supot hatrake amy izay, le ty hifandrambe marine aman’Andrianagnahare. Mampiasa ty fotoa’e mba hagnampeagne ty hafa hanao izay ka reke.