Ushshaa Bessiyaagaadan Xeelliyoogaa

DOOMETTA huuphe yohuwan beˈido Tooni, ushshaara gayttidaagan ba metuwaa ammani ekkidaba gidiyaakko, a deˈoy laamettanaagaa shin. Gidoppe attin, daro ushshaa uyiyoogee kaalettiyoobi qoncci beettennan hegaadan oottana danddayidaba ayyo milatido gishshau, ba deˈuwaa naagana danddayiyaabadan qoppiis. I qoppidobay keehi bala gididoy aybissee?

Daro ushshaa uyiyoogan a qofay moorettiis. Tooni akeekin aggin, a asatettaa, a qofaanne ayyo siyettiyaabaa kaalettiya a guuggee, ushshaa daroy qohido gishshau, suure oottenna. I daro uyido payduwan, a guuggee suure qoppiyoogaa aggi aggi bees.

Tooni qoppidobay bala gidido naaˈˈantto gaasoy, ba uyiyo meeziyaa aggennan deˈanau keehippe koyiyoogaa. Hagaappe kasetiya huuphe yohotun beˈido Aleni, baayyo ushshaara gayttida metoy deˈiyoogaa koyro ammanibeenna. I, “Taani uyiyoogaa qottays; qassi ta hanotau gaaso shiishshaysinne likkiyaappe aatta uyiyoogaa agganau baaxetays. Taani issibaa, giishin uyiyoogaa aggennaadan halchaas” yaagiis. Tooninne Aleni ushshau haarettidoogaa harati akeekiyaaba gidikkokka, eti naaˈˈaykka aybinne baynnabadan qoppidosona. Naaˈˈaykka daro uyennaadan banttana naaganau tangguwaa ekkana koshshiis. SHin ayba tangguwaa ekkana koshshii?

 Tangguwaa Ekka!

Ushshaa likkiyaappe aattidi uyiyoogaa aggida daroti, Yesuusi: “Ne ushachcha aifee nena nagara ootissikko, neeppe shoddada ola baya; aissi giikko, ne bollai muleera Gaannabiyaa taman olettanaagaappe, appe issoi xayiyoogee neeyyo keha” yaagidoogaara moggiya tangguwaa ekkidosona.—Maatiyoosa 5:29.

Yesuusi issi uri ba bollaa qanxxanaadan minttettibeennaagee tuma. Hegaappe, ayyaanaaban nuna qohiya aybanne leemiso hanotan qanxxi olanau koshshiyoogaa qonccissiis. Nuuni ekkiyo tanggoy keehippe deexxana danddayiyoogee tuma. SHin aliyaappe aattidi uyanaadan oottana danddayiya qofaappenne hanotaappe hegee nuna naagees. Yaatiyo gishshau, harati neeyyo qoppidi, neeni keehi daro ushshaa uyiyoogaa yootiyaaba gidikko, daro uyennaadan nena naaganau tangguwaa ekka. * Neeni daruwaa uyennaadan nena naaganau danddayennaba gidikko, hegaa mule agganau eeno giyaagaa gida. Hegee seelettanaadan oottiyaaba gidana danddayikkonne, deˈoy moorettiyoogee hegaappekka aadhi qohiyaaba.

Neeni ushshancha gidana xayikkonne, daruwaa uyanau qaaqqatay? Hegaadaana gidikko, ushshaa bessiyaagaadan xeellanau maaddiya ayba tangguwaa ekkana danddayay?

Maaduwaa Demmiyo Sohuwaa

1. Ubbatoo wozanappe woossiyoogee wolqqaa immiyoogaa ammana. Xoossaa Yihoowa ufayssana koyiya ubbaa Geeshsha Maxaafay: “Xoossaa intte woossiyo woosa ubban a keehi galatiiddi, inttena koshshiyaabaa ubbau [woossite].  . .  Qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana” yaagidi zorees. (Piliphphisiyuusa 4:6, 7) Qofaa sarotettaa demmanau neeni woygada woossana danddayay?

Neeni giigissana koshshiyaaba gidida, ushshaara gayttida metoy neeyyo deˈiyoogaa ammanada ekka. He metuwaa xoonanau neeni ay oottanau qoppidaakko Yihoowayyo woosan yoota; yaatikko, neeni woppaa demmanaunne daro metuwan gelennaadan baaxetiyo baaxiyaa i anjjana. “Ba nagaraa genttiya uri aacenna; shin paaxiyaageenne nagaraa aggiyaagee maarettana.” (Leemiso 28:13) Qassi nuuni: “Iitabaappe ashshanaappe attin, paacen gelissoppa” yaagidi woossana danddayiyoogaa Yesuusi yootiis. (Maatiyoosa 6:13) SHin, hegaa mala woosaara moggiyaabaa waatada oottana danddayay? Qassi ne woosau awuppe zaaro demmana danddayay?

2. Xoossaa Qaalaappe minttettuwaa demma. “Xoossaa qaalai paxa de7⁠eesinne oottees. . . . Qassi asa wozanan de7⁠iya koshshaanne qofaa i shaakkees.” (Ibraawe 4:12) Kase likkiyaappe aattidi uyiya daroti, Geeshsha Maxaafaa xiqiseta galla galla nabbabiyoogaaninne wotti denttidi qoppiyoogan goˈettidosona. Xoossau yayyiya issi mazamuraawee: “Iitatu zoriyan beennaagee, . . . anjjettidaagaa. SHin GODAA higgiyan i ufaittees; a higgiyaa gallassinne qammi qoppees. . . . I oottiyo ubbai au hanees” yaagidi xaafiis.—Mazamure 1:1-3.

Yihoowa Markkatuura Geeshsha Maxaafaa xannaˈiyoogan, likkiyaappe aattidi uyiyoogaa xoonanau minotettaa demmida Aleni, “Geeshsha Maxaafaynne an deˈiya baaso siraatay ushshaa agganaadan tana maaddidoy baynnaakko taani hayqqiyaagaa shin” yaagiis.

3. Ne huuphiyaa naagiyoogan dichaa bessa. Beni Kiristtaane gubaˈiyan deˈida, kase mattottiyaageeti ‘nu Xoossaa ayyaanan meecettidi geeyidoogaa’ Geeshsha Maxaafay yootees. (1 Qoronttoosa 6:9-11) Waanidi? Issi ogee, eti Xoossaa ayyaanay maaddin, bantta huuphiyaa naagiyo eeshshan dichaa bessidi, mattottiyoogaanne cayiyoogaa agganau maaduwaa demmidoogaa. “Inttenan Geeshsha Ayyaanai kumoppe attin, inttena bashshiya woiniyaa giyo eessaa uyidi mattottoppite.” (Efisoona 5:18; Galaatiyaa 5:21-23) Yesuus Kiristtoosi “saluwan de7⁠iya Aawai bana woossiyaageetussi Geeshsha Ayyaanaa” immanaagaa qaalaa geliis. Yaatiyo gishshau, “woossite, intte ekkana.”—Luqaasa 11:9, 13.

 Yihoowa ufayssiya ogiyan ayyo goynnanau koyiyaageeti Geeshsha Maxaafaa nabbabiyoogaaninne xannaˈiyoogan, qassi ubbatoo wozanappe woossiyoogan bantta huuphiyaa naagiyoogan dichaa bessana danddayoosona. Hidootaa qanxxiyoogaappe, Xoossaa Qaalay: “Ayyaanan zeriyaabaa gidikko, Ayyaanaappe merinaa de7⁠uwaa cakkana. Ane lo77⁠o oosuwaa oottanau azalliyoogaa aggoos. Aissi giikko, nuuni azallennan aggikko, cakkiyo wodee sinttappe yaana” yaagiyoogan ammanetta.—Galaatiyaa 6:8, 9.

4. Loˈˈo laggeta doora. “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.” (Leemiso 13:20) Neeni likkiyaappe aattada uyennaadan naagettanau murttidoogaa ne laggetussi yoota. Gidikkonne, neeni kaseegaadan “mattuwan, yettan, ushshan” deˈiyoogaa aggiyo wode, ne kase laggetuppe issoti issoti ‘garamettidi, nena cayanaagaa’ Xoossaa Qaalay yootees. (1 PHeexiroosa 4:3, 4) Neeni likkiyaappe aattada uyennaadan murttido murttiyaa shugissana koyiya laggetuppe haakka.

5. Zawaa wotta. “Xoossai intte qofaa muumeera dummayidi, inttena laammoppe attin, ha sa7aa asaa milatoppite; he wode intte Xoossai koyiyoobi, lo77⁠obi, a ufaissiyaabinne qassi kumettabi aibakko erana.” (Roome 12:2) Neeni zawaa wottanau “ha sa7aa asaa” woykko ne laggetu qofaa kaalliyoogaappe, Xoossaa Qaalan deˈiya baaso siraataa maaduwaa kaallikko, Xoossaa ufayssiya deˈuwaa deˈiyoogan ufayttana. Neessi loˈˈo gidida zawaa wottanau waatada kuuyana danddayay?

Neeyyo ushshay likkiyaappe aadhidaba gidiyoy, ne akeekaa abbiyaa woykko qofaa mooriyo wode. Yaatiyo gishshau, neeni uyanau koyiyaaba gidikko, mattottanau matana gakkanaashin uyiyoogee eratetta gidenna. Ushshaa xeelliyaagan ne hanotaa xaasayada xeelliyoogaappe akeekan qoppa.  Neeni likkiyaappe aattennan uyanau bessiya zawaa wotta.

6. CHii giyoogaa tamaara. “Intte, ‘Ee’ woi, ‘CHii’ giite.” (Maatiyoosa 5:37) Issi uray ne hanotaa akeekennan, kehatettan mintti shoobbiyo wode, liiqo qaalan chii giyoogaa tamaara. “Intte ubbau waati zaaranau bessiyaakko erana mala, intte haasayai ubba wode, siyanau kehiyaagaanne ufaissiyaagaa gidanau bessees.”—Qolasiyaasa 4:6.

7. Hara uri maaddanaadan oycha. Neeni likkiyaappe aattada uyennaadan murttidoogan minnanaadan oottiyaanne ayyaanaaban maaddana danddayiya laggetu maaduwaa oycha. “Issuwaa gidiyoogaappe naa77a gidiyoogee lo77⁠o; aissi giikko, eta oosoi issuwaagaappe aadhdhidi, lo77⁠o aifiyaa immanau danddayees. Qassi, naa77aappe issoi kunddikko issoi denttees.” (Eranchchaa 4:9, 10; Yaaqooba 5:14, 16) Amarkka biittan, Zi Naashinal Inisttitiyut on Alkol Abiyuz end Alkolizim giyo dirijjiteekka: “Neeni kaseegaappe guutta ushshaa uyanaagee issi issitoo metana danddayees. Neeni kessido hoolliyaa gakkanau maaddanaadan ne laggetanne ne soo asaa oycha” yaagiis.

8. Ne murttido murttiyaa naaga. “Xoossaa qaalaa oottiteppe attin, sissa xallan intte huuphiyaa cimmoppite. SHin ooninne ailletettaappe kessiya bali bainna higgiyaa xeellidi, aani aqiyaagee qassi a naagiyaagee, siyidoogaakka dogennaagee, he urai ba oottiyo oosuwan anjjettana.”—Yaaqooba 1:22, 25.

Ushshaa Amaliyaa Aggiyoogaa

Daro ushshaa uyiya ubbay ushshancha gidenna. SHin issoti issoti daro ushshaa, woykko darotoo uyiyoogan ushshay etau amale gidees. Ushshay amale gidiyo uri ushshaa giddon deˈiya, a amottanaadan oottiyaabau haarettiyo gishshau, hegaa mala asay ushshau haarettennaadan murttiyoogaappenne ayyaanaaban maadettiyoogaappe aadhiyaabaa oottana koshshees. Aleni: “Taani ushshaa aggidoogee asatettan keehippe qohettanaadan oottiis. Taani ayyaanaaban demmiyo maaduwaa bolli akkamettanaukka koshshiyoogaa he wode akeekaas” yaagiis.

Daro ushshanchati ushshaa likkiyaappe aattidi uyiyoogaa aggana malanne hegaappe  haakkana mala, ayyaanaaban baaxetiyoogan minnanau akkamettana koshshees. * Issoti issoti ushshaa aggidoogee kaalettiyo sahoy agganaadan woykko ushshaa keehippe qaaqqatiyoogaa agganaunne hegaappe haakkanau maaddana mala hosppitaaliyaa gelana koshshees. Maalaaliyaabaa oottiya, Xoossaa Naˈay: “Hargganchchatuppe attin, payyatuyyo aakime koshshenna” yaagiis.—Marqqoosa 2:17.

Xoossaa Kaaletuwaa Kaalliyoogaa Goˈˈaa

Geeshsha Maxaafay ushshaa xeelliyaagan immiyo loˈˈo zoree, nuuni haˈˈissa xallau ufayttanaadan gidennan merinau goˈettanaadan, nuussi loˈˈobaa qoppiya tumu Xoossaappe yiidaagaa. Aleni ushshaa aggoosappe 24 layttay aadhi simmin hagaadan giis: “Tana maalaalissiyaabay, taani haratuppe dummatana danddayiyoogaa eriyoogaa, ta mooruwaa giigissanaadan Yihooway tana maaddanau koyiyoogaa akeekiyoogaa, i . . . ” Aleni ba hanotaa hassayidoogee siiphoyin takki gi simmidi, “Im, . . . Yihooway akeekiyoogaa, qoppiyoogaanne koshshiya maaduwaa immiyoogaa eriyoogaa—hegee keehippe ufayssiyaaba” yaagiis.

Yaatiyo gishshau, neeni ushshaa likkiyaappe aatta uyiya woykko ushshay amale gidido ura gidikko, hidootaa qanxxanau eesotoppa. Aleninne hara daroti neeni haˈˈi deˈiyo hanotan deˈidosona; eti kaseegaappe guuttaa uyoosona woykko muleera aggidosona. Eti hegaadan oottidoogan zilˈˈettokkona; neenikka zilˈˈettakka.

Neeni ushshaa bessiyaagaadan uyanau woykko mule agganau dooridaba gidikko, Xoossay: “Neeni ta azazuwaa siyidabaa gidiyaakko, ne sarotettai shaafaa haattaadan goggana shin; ne xillotettaikka abbaa beetaadan hanana shin” yaagidi siiquwan zoriyoogaa siya.—Isiyaasa 48:18.

[Tohossa qofata]

[Sinttaa 8n diya misiliyaa]

Ushshay Tana Haarii? Hagaadan nena oychana danddayaasa:

• Kase uyiyoogaappe daruwaa uyiyaanaa?

• Kase uyiyoogaappe darotoo uyiyaanaa?

• Kase uyiyoogaappe mino ushshaa uyiyaanaa?

• Hirggaappenne metuwaappe woppaa demmanau ushshaa uyiyaanaa?

• Ta ushshaa meeziyaa xeelliyaagan issi laggee woy so asaappe issi uri bana qofissiyoogaa yootidee?

• Taani ushshaa uyiyoogee son, ooso sohuwan woykko allaxxiyoosan meto medhii?

• Issi saaminttaa ushsha uyennan takkanau metootiyaanaa?

• Harati ushshaappe haakkiyo wode ufayttikkinaa?

• Taani woqqaa uyiyaakko haratuppe genttiyaanaa?

Ha oyshatuppe issuwaa woykko hegaappe daruwaa ee gaada zaarikko, ne ushshaa meeziyaa xeelliyaagan naagettanau tangguwaa ekkana koshshees.

[Sinttaa 9n diya misiliyaa]

Ushshaa Xeelliyaagan Eratetta Kuushshaa Kuuyiyoogaa

Ushshaa uyanaappe kase, hagaadan qoppa:

• Taani ushshaa uyana koshshiiyye, woy haakkana koshshii?

Zoriyaa: Woqqaa uyana koshshiyaakko erenna uray ushshaappe haakkana koshshees.

• Taani woqqaa uyana koshshii?

Zoriyaa: Ushshay ne qofaa mooranaappe kase woqqaa uyana koshshiyaakko kuuya.

• Taani awude uyana koshshii?

Zoriyaa: Kaamiyaa laagganaappe woy akeekaa koshshiyaabaa oottanaappe kase, ayyaanaabaa oosuwaa oottanaappe kase, shahaarido wodenne issi issi qommo xaliyaa mittiyo wode uyoppa.

• Awan uyana koshshii?

Zoriyaa: Borssiya sohuwan, ushshaa asappe qottiyoosan, ushshaa uyiyoogaa iitabadan xeelliya asa matan uyoppa.

• Oonaara uyana koshshii?

Zoriyaa: Bessiya xeelay deˈiyo laggetuura woykko so asaara gido; ushshaara gayttidaagan metoy deˈiyoogeetuura gidoppo.

[Sinttaa 10n diya misiliyaa]

Kase Mattottiya Bitanee Xoossaa Qaalaappe Maaduwaa Demmiis

Taylandde biittan deˈiya Suppoti kase mattottiyaagaa. Koyro heeran i omarssa xallan uyees. I loddan loddan maalladonne laaxa saatiyan uyiyoogaa doommiis. I darotoo mattottanau koyidi uyees. SHin guyyeppe Yihoowa Markkatuura Geeshsha Maxaafaa xannaˈiyoogaa doommiis. Mattottiyoogee Xoossaa Yihoowa ufayssennaagaa eridi, Suppoti uyiyoogaa aggiigiis. Gidikkokka, guuttaa takkidi, kaseegaadan uyiyoogaa doommiis. A soo asay keehippe azzaniis.

Gidikkokka, Suppoti hegaadan oottiiddikka, Yihoowa siiqeesinne ayyo suure goynnanau koyees. Suppota laggeti ubbatoo a maaddoosona; qassi a soo asay daro wodiyaa aara attanaadaaninne a maaddiyoogaa aggennaadan ubbatoo minttettoosona. He wode, ‘mattottiyaageeti Xoossaa kawotettaa laattokkona’ yaagidi, 1 Qoronttoosa 6:10y qoncciyan yootiyoogee, Suppoti ba deˈiyo iita hanotaa akeekanaadan maaddiis. I ushshay baassi meto gidido hanotaa xoonanau keehippe baaxetana koshshiyoogaa akeekiis.

Suppoti he wode ushshaa uyiyoogaa muleera agganau murttiis. Wurssettan, Suppoti Xoossaa geeshsha ayyaanaa wolqqan, Xoossaa Qaalaa kaaletuwaaninne so asaanne gubaaˈiyaa maaduwan ayyaanaaban minnidi, ushshau deˈiya koshshaa xooniis. I ba huuphiyaa Xoossau geppidi xammaqettido wode, a soo asay keehippe ufayttiis. Suppoti ba qoppidoogaadan haˈˈi Xoossaara mata dabbotay deˈiyoogaa gidiis; qassi ba wodiyaa harata ayyaanaaban maaddanau goˈettees.