Nte Mme Christian Eyo Mme Apostle Ẹkedude Uwem

Ebiet Emi Mmọ Ẹkedụn̄de

“[N̄ketreke] ndikpep mbufo n̄kpọ an̄wan̄wa ye ke ufọk ke ufọk.”—UTOM 20:20.

AMA ebe ata akamba inuaotop, eyebe inikiet inikiet odụk obio eyo mme apostle. Enye odoro ke enyọn̄ obot, kpa nte edide ye ediwak obio. Enyọn̄ enyọn̄ obio odu ke ibuot obot. Ndiye ikpọ mfia ufọk emi ẹnyenede in̄wan̄esa emi ẹsịnde ọkọ ẹkanade ke ẹsem ke un̄wana utịn. Imọ owo ẹdụn̄ ke n̄kan̄ emi. Oyokụt nsio nsio ufọk ke utọ ke utọ ke usụk usụk. Ikpọ ufọkenyọn̄ mme anyamurua ye mme enyene-isọn̄ emi mînen̄ekede inyene n̄kpọ ẹdu ke edem mbiba ke usụn̄ oro ẹsịnde itiat. Mme ubuene ẹdụn̄ọ ke ata usụk usụk. N̄kpri ufọk emi mîyehe, emi ẹbietde ekebe ẹdu mi, ndien ẹbọp mmọ ke mfafaha efak mîdịghe ẹbọp ẹkanade ekpri okụre.

Uyom ye ufuọn̄ emi okopde anam fi ọfiọk se mme owo ẹnamde nte asan̄ade ke efak. Iban ke ẹtem udia, ndien emi anam ofụri ebiet ọfuọn̄. Oyokop uyom unam ye eke nditọwọn̄ emi ẹbrede mbre. Irenowo ke ẹsịn ifịk ẹnam utom ke mme efe emi ẹtiede uyom uyom ẹnyụn̄ ẹnyenede ufịk.

Ofụri edinam ubon Christian ẹkedi ke mme ufọk emi. Do ke mmọ ẹkenam n̄kpọ ke usen ke usen, ẹkpep Ikọ Abasi, ẹnyụn̄ ẹtuak ibuot.

N̄kpri Ufọk Udomo ye utọ ufọk eketiene ebiet emi ẹbọpde ye ukeme ubon nte edide mfịn. N̄kpri-n̄kan ufọk (1) ẹkedi mfafaha n̄kịmn̄kịm ubet kiet, emi ofụri ubon ẹkedụn̄de. Ẹkesida kọrikọri emi ẹdade ntan ẹtịm ekem ẹnịm asat ke eyo, ẹbọp ediwak n̄kpri ufọk. Ẹkeda n̄kpotụk n̄kpotụk itiat emi ẹsiakde ẹsion̄o ke ikpọ itiat ẹbọp ndusụk. Ẹkesibọp orụk ufọk mbiba emi ẹdori ke enyọn̄ itiat.

Ama esiyom ẹse ẹban̄a ibibene esịtufọk emi ẹkeyọn̄ọde ye isọn̄ emi ẹkedade itiat ẹsịn ke  ubọk ke ubọk. Ẹma ẹsisio ekpedi ekpri ndudu kiet ke ọkọm m̀mê ke ibibene man nsụn̄ikan̄ itie utemudia ọkpọwọrọ do. N̄kpọ ndụn̄ufọk ẹkenyụn̄ ẹdi ibat ibat n̄kpọ oro ẹkenen̄erede ẹyom.

Ẹkesida ntan ẹfụk ọkọm emi ẹdoride ndori ke obubọk ẹnyụn̄ ẹdade n̄kọketo ye nnyan̄yan̄a ẹkpana. Ekem ẹyọn̄ọ, ndien emi ama anam enye edi dek emi mmọn̄ mîkemeke ndidụt. N̄kukụre usụn̄ ndidọk ọkọm emi ekedi ndiberi eberi ke an̄wa ndọk.

Idem ke ini mme Christian ẹketienede ẹdụn̄ ke mme okụre emi mme owo ẹdụn̄de ẹwak, ufọk mmọ ama esiye, onyụn̄ edi se ọkpọkọm ubon emi ẹbuenede ẹkemede nditie n̄kpep Ikọ Abasi nnyụn̄ n̄kop inemesịt.

Mbon Oro Mînen̄ekede Inyene N̄kpọ Ikpọ ufọk emi ẹdide enyọn̄ iba oro ẹdade itiat ẹbọp (2) oro ẹnyenede mbon oro mînen̄ekede inyene n̄kpọ ẹma ẹnyene ubet isen. (Mark 14:13-16; Utom 1:13, 14) Ikpọ ubetenyọn̄ emi ẹma ẹkem ndida nnịm mbono esop, mmọ ke ẹkesiwak ndida nnịm usọrọ. (Utom 2:1-4) Ẹkeda itiat ye mbat ẹkọk mme ufọk emi ye mbon oro ẹkenen̄erede ẹkponi (3) emi ẹkenyenede mme anyamurua ye mme enyene-isọn̄. Ẹkesida itiat ẹsịn isọn̄ ufọk, ẹnyụn̄ ẹda simen ẹyọn̄ọ isọn̄ emi ye ibibene esịtufọk; ẹyet afia ndom ke ibibene an̄wa.

Ẹkesisan̄a ke udịghi-ukot ẹdọk mme ubetenyọn̄ ye ọkọm. Ẹma ẹsibọp ibio ibio ibibene ẹkanade kpukpru mbatmbat ọkọm ẹkụk mbak owo edidian̄ade ọduọ. (Deuteronomy 22:8) Ẹma ẹsituak ataya ke enyọn̄ ọkọm emi ẹda ẹtie ẹkpep n̄kpọ, ẹkere n̄kpọ, ẹbọn̄ akam, m̀mê ẹduọk odudu ke ufọt uwemeyo.—Utom 10:9.

Okposụkedi emi mme iman ẹkesiwakde nditiene ndụn̄ ke mme ikpọ ufọk emi, mme ufọk emi ẹma ẹnyene ikpọ ubet ye ekese ufan̄, nsio nsio ubetnna, akwa itie utem udia ye ubetudia.

Ufọk Ata Mbon Imọ Ufọk mbon Rome (4) ẹkedi ke utọ ke utọ. Ikpọ ubet ẹma ẹdu ẹkanade akwa ubetudia, emi edide ebiet emi ẹkesinamde ekese n̄kpọ ke ubon. Ndusụk orụk ufọk emi ẹma ẹnyene udiana ye ọyọhọ enyọn̄ ita (5) mîdịghe ẹnyene mme in̄wan̄esa emi ẹbọpde ọkọ ẹkanade.

Etie nte ẹma ẹsibon ediwak ikpọ n̄kpọ ndụn̄ufọk, emi ẹkedade nnụk enen ye gold ẹnam ndusụk, ke ufọk ata mbon imọ. Mme ufọk emi ẹma ẹnyene mme orụk n̄kpọ nte mmọn̄ esan̄ukwak ye akwa uyeremmọn̄. Etie nte ẹkesida  obukpọk mîdịghe ẹda mbuaha uduot itiat mable ẹbana isọn̄, onyụn̄ etie nte ẹma ẹsidian eto cedar ke ibibene. Ẹma ẹsida eso ukan̄ ẹnam ufọk ofiop. Ẹma ẹsiwak ndida eto n̄kpana window mbak mbon n̄wo, ndien ẹma ẹsiyịri ọfọn̄ enyịnusụn̄ mbak ẹdida ẹkụt esịtufọk. Ẹma ẹsisịbe itiat emi an̄wan̄ade ẹsịn n̄kpọitie mben window.—Utom 20:9, 10.

Inamke n̄kpọ m̀mê ufọk mme Christian eyo mme apostle ẹketie didie, mmọ ẹma ẹsidara isen ẹnyụn̄ ẹtat ubọk ẹnọ owo n̄kpọ. Mmọdo, ikesisọn̄ke mme esenyịn oro ẹsan̄ade-san̄a ndikụt ubon oro ẹdidarade mmọ nnyụn̄ ndụn̄ ye mmọ tutu ẹkụre utom mmọ ke obio oro.—Matthew 10:11; Utom 16:14, 15.

“Ufọk Simon ye Andrew” Ẹma ẹnen̄ede ẹdara Jesus ke “ufọk Simon ye Andrew.” (Mark 1:29-31) Ekeme ndidi ufọk mme ọkọiyak emi ẹkesịne ke otu ediwak ufọk ubuene (6) oro ẹkebọpde ẹkanade okụre oro ẹdade itiat ẹsịn isọn̄.

Enyịnusụn̄ ye window orụk ufọk oro ẹkese okụre, emi ẹkewakde ndinam kpukpru n̄kpọ do, esịnede editem udia, edisan̄ uyo, edikọk ibokpot, ye mboho otuowo ye edidia udia.

Ẹkeda n̄kpotụk n̄kpotụk itiat ẹbọp mme ufọkenyọn̄ oro ẹdude ke Capernaum. Ẹkesisan̄a udịghi ukot emi odude ke an̄wa ẹdọk ọkọm emi ẹkefụkde ntan m̀mê itiat ufụk ọkọmufọk ke mme n̄kọketo emi ẹdoride ke ndori. (Mark 2:1-5) Ẹma ẹsida simen ẹsịn isọn̄ esịtufọk ẹnyụn̄ ẹwak ndibri ikan.

Ẹma ẹsibọp mme ufọk ke udịm ke udịm ke ikpọ ye mfafaha efak ke mben Inyan̄ Galilee. Capernaum ekedi mfọnn̄kan ebietidụn̄ mme ọkọiyak emi ẹkesikọde n̄kpọ ke inyan̄ oro ẹda ẹdu uwem.

“Ke Ufọk ke Ufọk” Ke nditịn̄ ibio ibio, ufọk mme Christian eyo mme apostle ẹkedi ke utọ ke utọ—ọtọn̄ọde ke ufọk emi edide ubet kiet, emi ẹbọpde ke kọrikọri emi ẹdade ntan ẹtịm tutu esịm ikpọ ufọk mbon imọ emi ẹbọpde ke itiat.

Mme ufọk oro ikedịghe ebietidụn̄ kpọt inọ ubon oro ẹkenyenede mmọ. Ufọk oro ẹkedi ebiet emi ẹdade ẹkpep Ikọ Abasi. Ubon ẹma ẹsituak ibuot ẹnọ Abasi ke ufọk oro. Mmọ ẹma ẹsisop idem ke mme ufọk owo man ẹkpep N̄wed Abasi ẹnyụn̄ ẹsop idem ye mme Christian eken. Mmọ ẹma ẹsinam se mmọ ẹkekpepde ke ufọk mmọ ke ini mmọ ẹnamde akakan utom mmọ, oro edi, ndikwọrọ ikọ nnyụn̄ n̄kpep owo n̄kpọ “ke ufọk ke ufọk” ke ofụri Obio Ukara Rome.—Utom 20:20.