Bushe Icalo Cikapwa?

KALEMBA umo uwe shina lya kuti John Scalzi alembele ukuti: “Amafilimu ya kupwa kwa calo e yo abantu abengi batemwa sana.” Mulandu nshi abantu batemenwa amafilimu ya musango uyu? Scalzi atile “Pantu yalanga ifintu ifyo tutiina sana.” Bushe na imwe mulesumina? Bushe kwaliba imilandu ine ine iya kutiinina ifyo icalo cikapwa e lyo ne fyo fyonse ifyabapo fikonaulwa, ne nshita fikacitika?

Mupepi na cila bushiku, tulomfwa utuyofi utucitika mu calo no kusha twaonaula ifintu nakalya nakalya. Kabili libili libili balatambisha utuyofi twine utu pa TV na pa Intaneti. Ifi lyonse batambisha ifikope fya bantu abaleipaiwa ne fifulo fileonaulwa, cilenga tuletiina ukupwa kwa calo no kulamona kwati ifyo batambisha e fikacitika.

Basayantisti nabo balalundapo umwenso pa fyo balanda pa kupwa kwa calo. Bamo balasobela no bushiku icalo cikapwa. Mu March 2008, ulupapulo lwa Monthly Notices of the Royal Astronomical Society lwalandile ukuti abantu babili abasambilila ifya mu lwelele na maplaneti batunganya ukuti nga papita imyaka 7.59 bilioni, akasuba kakafimba icalo kabili cikasunguluka.

Bushe ca cine ukuti bushiku bumo icalo cikapwa?

Bushe Kwaliba Ubushiku Icalo Cikapwilapo?

Baibolo itweba ukuti: “Inkulo imo ilepita, ne nkulo imbi ileisa; lelo isonde lyaikalilila fye umuyayaya.” (Lukala Milandu 1:4) Yehova Lesa ‘ashimpile isonde pa cifulo ca liko icapampamikwa’ kabili alipangile ukuti likekale “umuyayaya, umuyayaya.” (Amalumbo 104:5) Bushe aya mashiwi yafuma kuli Lesa kuti mwayacetekela? Cinshi mwingacetekelela ukuti isonde talyakapwe, ilyo basayantisti bena batila likapwa?

Taleni tontonkanyeni pa miti imo iyo bashitisha. Pa miti imo balalembapo ubushiku ikonaika. Bushe ni bani babikapo ubu bushiku? Bushe ni maneja we tuuka pantu fye alishibapo fimo pali uyo muti? Awe nakalya! Uwapangile umuti e ubikapo ubu bushiku, te muntu umbi iyo. Kuti twasumina ukuti pali ubu bushiku umuti ukonaika pantu uwaupangile e waishiba ifingi pali uyu muti ukucila umuntu umbi. Bushe tatufwile ukucilanapo ukucetekela Kabumba we sonde? Icebo cakwe cilalondolola bwino ukuti ‘alishimpa icalo’ ukuti cikeminine umuyayaya. Tacakabale acipwa!—Amalumbo 119:90.

Nomba bushe abantu abashibika amano ku fintu tabakonaule cino calo umupwilapo? Awe nakalya! Yehova taba nga bantu abapanga ifya kupangapanga, ena ‘alikwata amaka ya kucita fyonse fye ifyo alefwaya.’ (Yobo 42:2) E mulandu wine engalandila no kuti: “Icebo icifuma mu kanwa kandi . . . cikafikilisha ico nacitumina.” (Esaya 55:11) Kanshi kuti twacetekela ukuti Lesa, “Uwatupangile,” takaleke icili conse ukumulesha ukufikilisha ifyo afwaya ukucita kwi sonde. (Amalumbo 95:6) Nomba bushe cinshi Lesa afwaya ukucita kwi sonde, kabili akafikilisha shani?

Ubufumu bwa kwa Lesa Bukafikilisha Ukufwaya Kwakwe

Ukulunda pa kutweba ukuti isonde talyakonaulwe, Icebo ca kwa Lesa cilatweba no kuti Lesa ‘apangile isonde ukuti lileikalwamo.’ (Esaya 45:18) Nangu ca kutila abantu balikala muli lino isonde pa myaka iingi, ukufwaya kwa kwa Lesa takwafikilishiwa.

Yehova ni “Lesa wa nsansa” kabili “atemwa  umulinganya.” (1 Timote 1:11; Amalumbo 37:28) Afwaya ukuti abantu bonse bakekale umutende kabili ukwabula uwa kubafyenga. Pa kuti akafikilishe ubu bufwayo, Lesa asobele ukuti aali no kubikako Ubufumu mu muulu ubukateka isonde lyonse. (Daniele 2:44) Ilyo Yesu ali pa calo, alelanda sana pa Bufumu bwa kwa Lesa. Akoseleshe abasambi bakwe ukulapepela ubu Bufumu pantu alishibe ukuti ilyo bukalateka bukaleta amapaalo. (Mateo 6:9, 10; 24:14) Mapaalo nshi yamo bukaleta?

▪ Umutende no mutelelwe ukafula pe sonde pantu Lesa alaya ukuti akapwisha inkondo shonse.—Amalumbo 46:9.

▪ Bonse bakakwata ifya kulya ifingi.—Amalumbo 72:16.

▪ Takwakabe ifipatala pantu “takuli umwikashi uukatila: ‘Nindwala.’”—Esaya 33:24.

▪ Takwakabe ukuloosha, pantu “imfwa tayakabeko na kabili.”—Ukusokolola 21:4.

▪ Lesa alaya ukuti abantu bakwe bakakuula amayanda, bakekala umutelelwe, kabili ‘bakanga umuyayaya.’—Esaya 65:17-24.

Ukwabula no kutwishika mulafwaya ukuipakisha aya mapaalo twalandapo. Yehova alafwaisha ukufikilisha fyonse ifyo alaya. (Esaya 9:6, 7) Lelo, napamo kuti mwatila: ‘Napapita imyaka iingi nga nshi ukutula apo amalayo ya kwa Lesa yalembelwe muli Baibolo. Mulandu nshi yashafikilishiwa na nomba?’

Ukutekanya kwa kwa Lesa Kukalenga Tukapusuke

Ishibeni ukuti “Yehova tashingashinga ku kufikilisha ubulayo bwakwe.” Baibolo ilondolola ukuti pa mulandu wa kutemwa, Lesa alitutekanishisha. E mulandu wine Baibolo itukoselesesha ukuti ‘tulemona ukutekanya kwa kwa Shikulu ukuti lipusukilo.’ (2 Petro 3:9, 15) Nomba mulandu nshi ukutekanya kwa kwa Lesa kufwaikilwa pa kuti tukapusuke?

Ica kubalilapo ca kuti, Lesa alishiba ukuti ilyo ashilapeela abantunse abalungama isonde ilisuma kabili ilya mutende, afwile “ukonaula abaleonaula isonde.” (Ukusokolola 11:18) Nomba apo Yehova alitemwa abantunse, “tafwaya umuntu nangu umo ukonaika.” E calenga Shifwe wa mu muulu ukutwalilila “ukusoka umubifi ukuti aleke imibele yakwe iyabipa.” Ne ci e calenga ukuti imbila nsuma iya Bufumu bwakwe ileshimikilwa mwi sonde lyonse. * (Esekiele 3:17, 18) Bonse abomfwila ukusoka kwa kwa Lesa no kwalula imibele yabo ukulingana na mafunde ya kwa Lesa ayalungama, bakapusuka no kwikala umuyayaya mwi sonde lya paradaise.

Kabiyeni Kuli Lesa no Kupusuka

Cine cine muli Baibolo mwaliba “imbila nsuma.” (Mateo 24:14) E mo tubelenga amashiwi ya kwa Lesa ayashakaluke aya kuti isonde talyakonaulwe! Na kabili, ukulingana no kusesema kwaba mu Baibolo, kuti twacetekela ukuti “pashala fye panono no mubifi takabepo.” Nomba line fye, abantu abalungama kuli Lesa “bakekala mu calo, kabili bakasekelela nga nshi pantu umutende ukafula.” (Amalumbo 37:9-11, 29; Mateo 5:5; Ukusokolola 21:3, 4) Ilyo ifi fishilacitika, Lesa akatwalilila ukusosa ukuti: “Iseni kuli ine no kupusuka, bonse mwe baba ku mpela ye sonde.” (Esaya 45:22) Bushe mukankulako shani kuli ubu bwite?

Ala kuti cawama nga nshi nga mwaumfwila Lesa! Amalumbo 37:34 yatucincisha ukuti: “Lolela Yehova no kusunga inshila yakwe, na o akakusansabika ku kupyana icalo.” Inte sha kwa Yehova bakatemwa sana ukumwafwa ukusambilila pa fyo Lesa afwaya isonde ukuba ne fyo mwingacita pa kuti mukesemonako ilyo ukufwaya kwakwe kukacitika.

[Futunoti]

[Abatusuminishe Ukubomfya Icikope pe bula 22]

NASA photo