Ndi Isọn̄ Eyebe Efep?

JOHN SCALZI emi esiwetde mbụk n̄kpọntịbe ọkọdọhọ ete: “Mme owo ẹsinyene udọn̄ kpukpru ini ke n̄kpọ oro aban̄ade utịt ererimbot, akpan akpan ke ndise senima.” Ntak emi mme owo ẹsinen̄erede ẹma ndise senima oro aban̄ade utịt ererimbot? Scalzi ọkọdọhọ ete: “Koro mmọ ẹban̄a mme n̄kpọ oro ẹnamde nnyịn ndịk.” Ndi edi ntre? Ndi imenyene eti ntak ndikop ndịk mban̄a ini ye nte ẹkemede ndisobo isọn̄—ye kpukpru se idude ke esịt?

Ekpere ndidi imesikop nte oto-obot afanikọn̄ ẹbiatde n̄kpọ ke ofụri ererimbot kpukpru usen. Ẹsisio mme enyene-ndịk ndise mme utọ afanikọn̄ oro ndien ndien ke TV ye ke Intanet. Ima ise nte oto-obot afanikọn̄ owotde mme owo onyụn̄ abiatde obio ndien ndien, isọn̄ke ndida utịt ererimbot nte ata afanikọn̄, idịghe nte ikpîkpu ndise senima.

Ntaifiọk ẹnọ ekikere ẹban̄a nte ẹkemede ndisobo isọn̄, ndien emi ọdọdiọn̄ anam mme owo ẹkop ndịk. Ndusụk mmọ ẹkam ẹsiak ini emi ẹdisobode isọn̄. Ke March 2008, Monthly Notices of the Royal Astronomical Society ọkọdọhọ ke owo iba emi ẹdide mme ekpepn̄kpọ mban̄a ikpaenyọn̄ ẹkedọhọ ke ufan̄ isua biliọn itiaba ye ubak ke utịn oyosobo isọn̄ efep.

Ndi isọn̄ eyebe efep?

Ndi Ẹnịm Ini Emi Ẹdisobode Isọn̄?

Bible ọn̄wọn̄ọ ọnọ nnyịn ete: “Emana kiet aka, emana efen onyụn̄ edi: edi ererimbot ada ke nsinsi.” (Ecclesiastes 1:4) Jehovah Abasi ama etịm “odori isọn̄ ke itie esie,” onyụn̄ anam enye man odu “ke nsinsi-nsinsi.” (Psalm 104:5) Ndi etie nte ke ikọ emi ẹkedade odudu spirit Abasi ẹwet mi ikemeke nditịbe? Ntak emi afo mûkpenịmke ke isọn̄ nnyịn eyebe efep, okposụkedi emi ndusụk ntaifiọk ẹdọhọde ntre?

Ọfọn, kere ban̄a mme n̄kpọurua oro ẹdude ke ufọkurua. Ẹsiwet usenọfiọn̄ oro ndusụk ẹdibiarade. Anie ẹwet usenọfiọn̄ oro? Ndi enyene-ufọkurua onyụn̄ ada mbufiọk esie ewet? Idịghe. Andinam n̄kpọurua oro ọfiọk usenọfiọn̄ emi n̄kpọ oro edibiarade. Nnyịn imenịm ke usenọfiọn̄ oro enen koro enye enen̄ede ọfiọk n̄kpọ esie akan owo en̄wen ekededi. Adan̄a didie akan oro ke nnyịn ikpọbuọt idem ye Andibot isọn̄ nnyịn! Ikọ esie etịn̄ in̄wan̄-in̄wan̄ ete ke enye “omowụk isọn̄” man ọsọn̄ọ ada ke nsinsi. Abasi idehedei inịm usenọfiọn̄ emi isọn̄ edibede ifep!—Psalm 119:90.

Okûdi ndiọi owo ẹkeme ndisobo isọn̄ nnyịn? Tutu amama! Sia Jehovah mîtiehe nte owo, enye “emekeme ndinam kpukpru n̄kpọ.” (Job 42:1) Ntak edi oro enye etịn̄de uko uko ete: ‘Ikọ mi emi ọwọrọde mi ke inua oyokụt unen.’ (Isaiah 55:11) Imenyene mbuọtidem ke “andinam nnyịn” idiyakke n̄kpọ ndomokiet akpan enye ndinam se enye aduakde aban̄a isọn̄. (Psalm 95:6) Nso ke enye aduak ndinam, ndien didie ke enye edinam emi?

Obio Ubọn̄ Abasi Ayanam Uduak Abasi

Ikọ Abasi ọn̄wọn̄ọ ọnọ nnyịn ke isọn̄ idibehe ifep tutu amama onyụn̄ asian nnyịn ke Abasi ‘okobot isọn̄ man ẹdụn̄ ke esịt.’ (Isaiah 45:18) Okposụkedi emi edide ẹdụn̄ ke isọn̄ emi ke ediwak tọsịn isua, oro isụhu kan̄a uduak Abasi.

Jehovah edi “Abasi inemesịt” onyụn̄ ‘ama  edinen ikpe.’ (1 Timothy 1:11; Psalm 37:28) Uduak esie edi ndinam kpukpru owo ẹdụn̄ ọtọkiet ke inemesịt, utụk inyụn̄ idụhe. Abasi ama etịn̄ ke iyanam Obio Ubọn̄ kiet adaha ada ke heaven emi edikarade ofụri isọn̄ man isu uduak imọ. (Daniel 2:44) Jesus ama esiwak nditịn̄ mban̄a ukara Obio Ubọn̄ Abasi ke ini enye okodude ke isọn̄. Enye ama esịn udọn̄ ọnọ mbet esie ete ẹbọn̄ akam ẹben̄e Obio Ubọn̄ oro, sia enye ama ọfiọk kpukpru edidiọn̄ oro Obio Ubọn̄ oro edinọde ubonowo. (Matthew 6:9, 10; 24:14) Nso idi ndusụk edidiọn̄ oro?

▪ Emem ye ifụre ẹyedu ke kpukpru ebiet sia Abasi ọn̄wọn̄ọ nditre kpukpru ekọn̄.—Psalm 46:9.

▪ Kpukpru owo ẹyenyene udia oro ekemde.—Psalm 72:16.

▪ Idem ọyọsọn̄ kpukpru owo sia “andidụn̄ ididọhọke ite, Ndọdọn̄ọ.”—Isaiah 33:24.

▪ Owo ndomokiet idifụhọke sia “n̄kpa idinyụn̄ idụhe aba.”—Ediyarade 21:4.

▪ Abasi ọn̄wọn̄ọ ke ikọt imọ ẹyebọp ufọk idemmọ, ẹdụn̄ ke ifụre, ẹnyụn̄ ‘ẹbre ke nsinsi.’—Isaiah 65:17-24.

Anaedi ọdọn̄ fi ndidu ke utọ ebiet oro kpukpru se itịn̄de emi ẹditịbede. Enen̄ede ọdọn̄ Jehovah ndinam kpukpru se enye ọn̄wọn̄ọde. (Isaiah 9:6, 7) Edi afo emekeme ndikere ete: ‘Ediwak tọsịn isua ẹbe tọn̄ọ ẹkewet mme un̄wọn̄ọ Abasi ke Bible. Ntak emi mmọ mîsụhu kan̄a?’

Ime Abasi Ada Edinyan̄a Edi

Nen̄ede nịm ke “Jehovah iduọnke ke ndinam un̄wọn̄ọ esie.” Bible akam ọdọhọ ke ima anam Abasi osụk enyene ime ye nnyịn. Ke ntre, ẹsịn udọn̄ ẹnọ nnyịn ẹte “[ibat] ime Ọbọn̄ nte edinyan̄a.” (2 Peter 3:9, 15) Edi ntak emi oyomde Abasi eme ime ndien ẹnyan̄a nnyịn?

Akpa kan̄a, Abasi ọfiọk ke ana imọ ‘isobo mmọ oro ẹsobode isọn̄,’ mbemiso inamde nti owo ẹdụn̄ ke eti isọn̄ ke ifụre. (Ediyarade 11:18) Edi sia Jehovah amade ubonowo enye ‘iyomke owo ndomokiet atak.’ Mmọdo, Ete nnyịn eke heaven ke enyene ime “ọnọ idiọk owo item, ete enye ọkpọn̄ idiọk usụn̄ esie.” Ntak edi oro Jehovah anamde ẹkwọrọ etop Obio Ubọn̄ esie ke ofụri ererimbot. * (Ezekiel 3:17, 18) Ẹyenyan̄a kpukpru mbon oro ẹnamde item Abasi ẹnyụn̄ ẹdude uwem ekekem ye ndinen edumbet esie, mmọ ẹyenyụn̄ ẹdu nsinsi uwem ke Paradise isọn̄.

Kabade Se Abasi Ndien Ẹyenyan̄a Fi

Ke akpanikọ, Bible ọnọ nnyịn “eti mbụk.” (Matthew 24:14) Enye asian nnyịn ikọ Abasi emi mîdikpụhu ete ke isọn̄ idibehe ifep tutu amama! Akan oro, mme ntịn̄nnịm ikọ Bible ẹdọhọ ke imekeme ndinyene mbuọtidem ke “osụk esisịt idiọk owo ididụhe.” Idibịghike, mbon oro Abasi abatde ke ndinen kpọt “ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:9-11, 29; Matthew 5:5; Ediyarade 21:3, 4) Tutu ini oro, Abasi ayaka iso enyene ime eteme ete: “Mbufo kpukpru mme idụt ererimbot, ẹkabade ẹse mi, ndien ẹyenyan̄a mbufo.” (Isaiah 45:22) Nso ke afo edinam?

Biere ndikabade nse Abasi. Psalm 37:34 eteme nnyịn ete: “Bet Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene.” Mme Ntiense Jehovah ẹtetie ẹbet ndin̄wam fi ekpep mme n̄kpọ en̄wen aban̄a se Abasi aduakde aban̄a isọn̄ ye nte afo ekemede ndidu uwem n̄kụt uduak esie osude.

[Ikọ Idakisọn̄]

[Ebiet Ẹdade Ndise Ẹto ke page 22]

NASA photo