Oñehundítapa ko yvy?

“OÚTA la fín del múndo. Péicha ningo ymaite guive ojeʼe, ha koʼýte umi pelíkulape oñeñeʼẽ upévare koʼág̃a peve.” Kóicha heʼi peteĩ periodísta hérava John Scalzi. Ha mbaʼére piko opárupi ojehechasete peichagua pelíkula? Upe periodísta heʼi: “Pórke ohechauka ñandéve peteĩ ñandekyhyjeha”. Ha ndépa mbaʼe repensa? Jakyhyjevaʼerãpa peteĩ árape oñehundietérõ g̃uarã ko yvy ha opa oikóva pype?

Koʼág̃a rupi ningo káda díantema voi ñahendu oikoha sarambi, ouha yvytu atã, ama guasu ha hoʼaha amandáu. Internét ha téle umívape ojehecha jepi umi fóto ha vidéo ohechaukáva umi tapicha ohasa asyetereíva. Upévare heta oĩ heʼíva “la fín del múndo” ikatueteha oiko ha ndahaʼeiha peteĩ mbaʼe pelíkulapente ojehecháva.

Oĩ avei umi sientífiko heʼíva mbaʼe tiémpope ha mbaʼéichapa oñehundíne ko yvy. Oĩ voi katu omoĩva chupe “fécha de vensimiénto” entéro! Pór ehémplo pe marzo de 2008-pe peteĩ rrevísta sientífikape osẽ mbaʼépa heʼi mokõi astrónomo. Haʼekuéra heʼi ofaltaha 7.590 millones de áño rupi pe kuarahy omokõ hag̃ua ko yvy ha upéicha ohundiete (Monthly Notices of the Royal Astronomical Society).

Ha oñekumplíne piko upe ojeʼevaʼekue?

Oreko ndajeko “fécha de vensimiénto”

La Bíbliape heʼi: ‘Oĩ ningo heta onaséva ha heta omanóva, ha ko yvy katu opytavaʼerã opa ára g̃uarã’ (Eclesiastés 1:4, ÑÑB). Jaikuaa ningo Ñandejára Jehová ‘ojapo hague ko yvy ha omopyenda ani hag̃ua okuʼe arakaʼeve’. Upéicharõ ko yvy ‘opytáta opa ára g̃uarã’ (Salmo 104:5). Jaikuaa avei Ñandejára ohaika hague la Biblia, upévare jaguerovia la heʼíva. Péro mbaʼérepa ikatu jaʼe umi sientífiko ojavyha heʼívo ko yvy oñehunditaha? Jahechamíta upéva koʼág̃a.

Pór ehémplo heta mbaʼe oñevendéva umi negosioha rupi ningo oreko fécha de vensimiénto. Ha máva piko la omoĩvaʼekue upéva? Oime piko peteĩ vendedór ikatupyryetereíva mbaʼe? Nahániri. Pe ijapohare añoite ningo ikatu omoĩ hese la fécha de vensimiénto. Haʼe mánteko la oikuaa porãva pe prodúkto. Upévare ñande ikatu jaʼe oĩ porãha pe fécha de vensimiénto oñemoĩva hese. Ha la Biblia ningo heʼi voi Ñandejára ‘ojapo hague ko yvy opyta porã hag̃uáme’, pono arakaʼeve oñehundi (Salmo 119:90). Upéicha heʼígui jaikuaa Ñandejára haʼeha ko yvy “apohare”, ha ko yvy ndorekoiha “fécha de vensimiénto”.

Péro ikatu ñañeporandu: “Mbaʼéiko oikóta yvypóra ombyaietéramo ko yvy ha naisolusionvéi?”. Arakaʼeve ningo ndoikomoʼãi upéva. Jehová ndahaʼéi umi prodúkto oñevendéva apoharéicha. Haʼe ningo todopoderóso ha katuete ojapóta heʼíva (Job 42:2). Haʼe heʼi porã voi: ‘Che ñeʼẽ oikopavaʼerã katuete’ (Isaías 55:11). Upéicharõ mbaʼeve ndojokomoʼãi ñande Apoharépe okumpli hag̃ua hembipota ko yvýpe g̃uarã (Salmo 95:6). Péro mbaʼépa hína upe Ñandejára rembipota ko yvýpe g̃uarã ha mbaʼéichapa okumplíta?

Ñandejára okumplíta hembipota Irréino rupive

La Biblia ohechauka porã ko yvy noñehundimoʼãiha, péro omyesakã avei Ñandejára ojapo hague ‘ojeiko hag̃ua ipype’ (Isaías 45:18). Ha ojeikómaramo jepe pype ymaiterei guive, ndahaʼéi upévante Ñandejára oipotáva ko yvýpe g̃uarã.

 Jehová ningo haʼe peteĩ ‘Ñandejára ovyʼáva’ ha ‘ohayhúva tekojoja’ (1 Timoteo 1:11; Salmo 37:28). Upévare Haʼe oipota opavave jaiko peteĩ múndo henyhẽhápe vyʼa ha tekojoja. Ha mbaʼéichapa ojapóta upéva? Yma Ñandejára heʼimavaʼekue omoĩtaha peteĩ Rréino yvágape ogoverna hag̃ua ko yvy tuichakue (Daniel 2:44). Ha Jesús oĩrõ guare ko yvy ape ári heta oñeʼẽvaʼekue upe Ñandejára goviérnore. Haʼe omboʼe hemimboʼekuérape oñemboʼévo ojerure hag̃ua Ñandejára Rréinore. Jesús oikuaa heta mbaʼe porã oguerutaha upéva ko yvýpe ha yvyporakuérape g̃uarã (Mateo 6:9, 10; 24:14). Koʼã téysto jaleétava oñeʼẽhína umi mbaʼe porãre:

▪ Opáta umi ñorairõ guasu ha jaikóta pyʼaguapy ha kyhyjeʼỹme (Salmo 46:9).

▪ Hetaiterei oĩta hiʼupyrã, ndofaltamoʼãi avavetépe (Salmo 72:16).

▪ Ndaiporimoʼãvéima hasýva ni heʼíva: ‘Cherasyʼaína’ (Isaías 33:24).

▪ Nañañembyasyvéima omano haguére peteĩ jahayhúva, pórke ‘opáta ñemano’ (Revelación [Apocalipsis] 21:4).

▪ Ñandejára opromete isiervokuéra omopuʼãtaha hóga teerã, oikotaha kyhyjeʼỹme ha ‘vyʼapópe opa ára g̃uarã’ (Isaías 65:17-24).

Ajépa enterovénte jaikose péicha? Ñande Ru yvagapeguápe ningo hiʼãitereíma avei og̃uahẽ pe ára okumpli hag̃ua umi mbaʼe oprometevaʼekue (Isaías 9:6, 7). Péro nde ikatu repensa: “Ymaitereíma ningo ojehai hague la Biblia, mbaʼére piko Ñandejára nokumplírima umi mbaʼe oprometevaʼekue?”. Jahechamína koʼág̃a mbaʼérepa.

Ñandejára pasiénsia ikatu ñandesalva

‘Jehová naimbeguéi okumpli hag̃ua oprometevaʼekue.’ Haʼe ningo ipasiénsia ñanderayhu rupi. Upévare la Biblia heʼi ñandéve jahechakuaa hag̃ua ‘Ñandejára ipasiensiaha oporosalva hag̃uánte’ (2 Pedro 3:9, 15). Péro mbaʼére piko Ñandejára ipasiénsia rupi jajesalváta ñande?

Ñandejára ningo oikuaa ohundi raẽmante vaʼerãha umi ‘ombyaivapehína ko yvy’ ikatu hag̃uáicha umi yvypóra ipyʼaporãva oiko vyʼápe ha kyhyjeʼỹme (Revelación 11:18). Péro haʼe ohayhu opavave yvyporakuérape ha ‘ndoipotái ni peteĩ oñehundi’. Upévare Jehová ipasiénsia ha predikasión rupive ‘oikuaauka umi iñañávape’ mbaʼépa Haʼe ojapóta (Ezequiel 3:17, 18). * Umi ohendúva pe marandu Ñandejára Rréino rehegua ha iñeʼẽrendúva Ñandejárape ojesalváta ha oikóta opa árare peteĩ hardínpe ko yvy ape ári.

Ñañemoag̃uíkena Ñandejárare

Jahecháma ningo la Biblia omboʼéva ‘iporãitereiha’ (Mateo 24:14). Jaikuaáma Ñandejára jurúgui osẽha ko yvy oĩtaha opa ára g̃uarã. Ha opromete avei ñandéve ñahaʼarõtaha ‘sapyʼamíntema ha umi iñañáva ndaiporimoʼãvéima’. Koʼẽrõitéma umi iñeʼẽrendúvape Ñandejára ‘omeʼẽta ko yvy imbaʼerã’ ha oikóta pyʼaguapýpe (Salmo 37:9-11, 29; Mateo 5:5; Revelación 21:3, 4). Péro upe tiémpo og̃uahẽ mboyve Ñandejára mborayhúpe heʼi gueteri ñandéve: ‘Pejerovia cherehe, chénte posalvakuaa peẽ peimévape opárupi ko yvy ape ári’ (Isaías 45:22). Ha ndépa mbaʼe rejapóta?

Upéva ningo ndémante voi redesidikuaa. Upevére Salmo 37:34 heʼi: “Ñandejára rehe ejerovia, ha ejapo haʼe heʼíva, yvate nemopuʼãne ha omeʼẽ ndéve ko yvy”. Rejaposéramo koʼápe heʼíva, testigos de Jehová torypápe nepytyvõta reikuaave hag̃ua mbaʼépa Ñandejára ojapóta ko yvýpe g̃uarã. Ha péicha reaprendéta mbaʼépa rejapovaʼerã reikove hag̃ua opa ára g̃uarã Ñandejára rréino guýpe.

[Nóta]

[Roagradese oĩva páhina 22-pe]

NASA fóto