Subara an Ira Pagtoo

Maunungon Bisan ha mga Pagsari

NABABARAKA nga ginkita ni Pedro an nawong han mga mamarati ni Jesus. Hito nga takna, nakadto hira ha sinagoga ha Kapernaum. An balay ni Pedro nahimumutang dida hini nga syudad pati an iya negosyo nga pangisda, ha baybayon han Dagat han Galilea; damu han iya kasangkayan, paryente, ngan kasosyo an naukoy dida hini nga lugar. Waray ruhaduha nga karuyag niya makilala han iya mga kahimungto hi Jesus, sugad han iya pagkilala ha Iya, ngan maeksperyensyahan an kalipay ha paghibaro mahitungod han Ginhadian han Dios tikang ha pinakabantogan nga magturutdo. Kondi baga hin diri sugad hito an mahitatabo hito nga adlaw.

Damu an umundang na pamati kan Jesus. An iba nagngurutob ngan waray maruyag ha iya mensahe. Kondi, mas nabaraka hi Pedro ha reaksyon han pipira nga disipulo ni Jesus. Diri na nakikita ha ira nawong an kalipay ha kahayag nga hinbaroan ngan ha pakadiskobre han kamatuoran. Yana, baga hin nasisina hira pagkit-on ngan napupungot pa ngani. An iba prangka nga nagyakan nga diri katoohan an mensahe ni Jesus. Tungod kay nadiri na pamati, binaya hira ha sinagoga ngan waray na sumunod ha iya.

Makuri ito nga takna para kan Pedro ngan ha iya mga igkasi-apostol. Waray niya bug-os nga masabti an ginsiring ni Jesus hito nga adlaw. Pero sigurado nga hinsabtan niya kon kay ano nga bangin makasakit an mga pulong ni Jesus kon literal la nga sabton ito. Kondi, ano an bubuhaton ni Pedro? Diri ito an siyahan nga higayon nga ginsarihan an iya pagkamaunungon ha iya Agaron, ngan diri man ito an ultimo. Aton usisahon kon paonan-o an pagtoo ni Pedro nakabulig ha iya nga malamposan an sugad nga mga pagsari ngan magpabilin nga maunungon ha Dios.

Maunungon Bisan kon an Iba Diri Na Maunungon

Hi Pedro agsob mahipausa ha ginhihimo han iya Agaron, hi Jesus. Damu ka beses nga an Iya ginbuhat ngan ginyakan diri amo an ginlalaoman han mga tawo. Antes hito nga adlaw, milagroso nga ginpakaon Niya an yinukot nga katawohan. Salit, nangalimbasog hira nga himoon Hiya nga hadi. Kondi, nahipausa an damu han nagpahirayo Hiya ngan nagsugo ha Iya mga disipulo nga sumakay ha sakayan ngan kumadto ha Kapernaum. Samtang naglalayag an mga disipulo hito nga gab-i, nahipausa na liwat hira han naglakat hi Jesus ha mabalud nga Dagat han Galilea, nga nagtutdo kan Pedro hin importante nga leksyon mahitungod han pagtoo. *

Kinabuwasan ha aga, hinbaroan nira nga an mga tawo naglibot ha danaw ha pagsinunod ha ira. Kondi, matin-aw nga naaghat la an mga tawo han hingyap nga makita hi Jesus nga magtagana utro hin pagkaon ha milagroso nga paagi, diri han hingyap nga mahibaro hin kamatuoran. Salit, ginsaway hira ni Jesus tungod han ira materyalistiko nga panhunahuna. Nagpadayon ito nga paghisgot ha sinagoga ha Kapernaum, diin kinadto utro hi Jesus basi magtutdo hin importante kondi makuri karawaton  nga kamatuoran ha paagi nga waray laumi han mga tawo.

Karuyag ni Jesus nga hunahunaon hiya han mga tawo diri sugad nga burabod han pisikal la nga pagkaon, kondi sugad nga espirituwal nga tagana tikang ha Dios, an usa nga an kinabuhi ngan kamatayon sugad nga tawo magpapahinabo nga makarawat han katawohan an kinabuhi nga waray kataposan. Salit naghatag hiya hin ilustrasyon diin iginpariho niya an iya kalugaringon ha mana, an tinapay nga tikang ha langit ha panahon ni Moises. Kondi, han riniwa an iba, ginamit hiya hin matin-aw nga ilustrasyon nga nagpapakita nga importante an pakig-angbit ha iya unod ngan dugo basi magkaada kinabuhi. Dida hini nga takna nagduro an pagriwa. An iba siniring: “Makuri [makangingirhat] ini nga pulong, hin-o ba an makakahimo pakabati hito?” Damu han disipulo ni Jesus an inundang pagsunod ha iya. *—Juan 6:48-60, 66.

Ano an bubuhaton ni Pedro? Posible nga nagupong liwat hiya ha ginsiring ni Jesus. Waray pa niya hisabti nga kinahanglan mamatay hi Jesus basi matuman an kaburut-on han Dios. Kondi naaghat ba liwat hiya nga umundang ha pagsunod kan Jesus pariho ha ginbuhat han paburobag-o an panhunahuna nga mga disipulo? Waray; may usa nga kalidad nga nagpaiba kan Pedro. Ano ito?

Hi Jesus nagpakiana ha mga apostol kon karuyag ba liwat nira bumulag ha iya. (Juan 6:67) An 12 nga apostol an iya ginpapakianhan, kondi hi Pedro an binaton sugad han agsob mahitabo. Hi Pedro posible nga amo an pinakamagurang ha ira. Ha anoman nga kahimtang, hiya an pinakaprangka; baga hin diri hiya nag-aalang pagyakan kon ano an iya ginhuhunahuna. Ngan hini nga takna, an iya ginhunahuna amo inin makaruruyag ngan makatirigamnan nga mga pulong: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan.”—Juan 6:68.

Diri ba makapabantad an iya ginsiring? An pagtoo ni Pedro kan Jesus nakabulig ha iya nga makapatubo hin maopay gud nga kalidad—an pagkamaunungon. Matin-aw nga nasantop niya nga waray lain nga Manluluwas gawas kan Jesus, ngan hi Jesus nagtatagana hin kaluwasan pinaagi han iya pulong—an iya katutdoan mahitungod ha Ginhadian han Dios. Maaram hi Pedro nga bisan kon may mga nakagupong ha iya, waray na hiya iba nga makakadtoan basi makarawat an pag-uyon han Dios ngan an bendisyon nga kinabuhi nga waray kataposan.

Ito ba liwat an imo ginhuhunahuna? Makasurubo, damu yana an nag-aangkon nga nahigugma kan Jesus kondi napapakyas ha pagin maunungon kon naatubang hin pagsulay. An tinuod nga pagkamaunungon kan Kristo nangangahulogan hin pagtagad ha Iya katutdoan pariho ha pagtagad ni Pedro. Kinahanglan naton ito hibaroan ngan hisabtan, ngan magkinabuhi uyon hito—bisan kon naiiba ito ha aton ginlalaoman o karuyag. Pinaagi la ha pagin maunungon mahimo kita magkaada kinabuhi nga waray kataposan, an kinabuhi nga karuyag ni Jesus para ha aton.

Maunungon Bisan kon Ginsaway

Waray pag-iha katapos hiton sagipo nga takna, gin-upod ni Jesus an iya mga apostol ngan pipira nga disipulo ha hirayo nga byahe tipanorte. An dagaw han napuputos hin yelo nga pungkay han Bukid Hermon, nga nahimumutang ha norte nga pag-ultan han Tuna nga Iginsaad, usahay nakikita ha asul nga katubigan ha Dagat han Galilea. Sugad hin nagtitikahitaas ito samtang nasagka an grupo  ha mga barangay hirani ha Cesarea ha Filipos. * Dida hinin makaruruyag nga lugar, diin nakikita an kadak-an nga bahin han Tuna nga Iginsaad ha sur, nagbangon hi Jesus hin importante nga pakiana ha iya mga sumurunod.

‘Hin-o [ako sugad] han siring han kadam-an?’ Karuyag ni Jesus masayod. Mahahanduraw naton an pagtutok ni Pedro ha mga mata ni Jesus nga nagkikinita ha ira, ngan inabat na liwat niya an pagin buotan ngan an hilarom ngan matin-aw nga kahibaro han iya Agaron. Interesado hi Jesus ha ginhuhunahuna han iya mamarati tikang ha ira nakita ngan hinbatian ha iya. Binaton an iya mga disipulo pinaagi ha pagsumat han pipira nga sayop nga ideya han mga tawo kon hin-o hiya. Kondi karuyag ni Jesus mahibaro hin dugang pa. Sayop ba liwat an ginhunahuna han iya duok nga mga sumurunod mahitungod ha iya? Salit hiya nagpakiana ha ira kon hin-o hiya.—Lukas 9:18-22.

Makausa pa, hi Pedro an binaton dayon. Iya matin-aw nga iginpahayag an aada ha kasingkasing han damu nga nakadto: “Amo ikaw an Kristo, an Anak han buhi nga Dios.” Mahahanduraw naton hi Jesus nga napahiyom ngan sugad hin nagtangdo kan Pedro samtang sinsero nga ginkumendasyonan hiya. Ginpahinumdom ni Jesus hi Pedro nga hi Jehova nga Dios—diri tawo—an nagpahayag hinin importante nga kamatuoran ha mga tawo nga tinuod an pagtoo. Salit, nasantop ni Pedro an usa han pinakaimportante nga kamatuoran nga iginpahayag ni Jehova—kon hin-o an maiha na nga iginsaad nga Mesias, o Kristo!—Mateo 16:16, 17.

Ini nga Kristo an gintawag ha kadaan nga tagna nga bato nga isasalikway han mga magturukod. (Salmo 118:22; Lukas 20:17) Samtang ginhuhunahuna ito nga mga tagna, iginhayag ni Jesus nga hi Jehova mag-iestablisar hin kongregasyon dida hito mismo nga bato, o daku nga bato, an usa nga ginkilala pa la ni Pedro. * Katapos, iya igintapod kan Pedro an pipira nga importante hinduro nga pribilehiyo dida hito nga kongregasyon. Waray niya himoa hi Pedro nga labaw kay ha iba nga apostol, sugad han gintotoohan han iba, kondi gintagan niya hi Pedro hin mga responsabilidad. Iya iginhatag kan Pedro “an mga yawi han ginhadian.” (Mateo 16:19) Responsabilidad ni Pedro an pag-abri han paglaom ngadto ha Ginhadian han Dios ha tulo nga klase hin tawo—siyahan ha mga Judio, sunod ha mga Samaritano, ngan ha kataposan ha mga Hentil, o diri Judio.

Ha urhi, hi Jesus nagsiring nga adton gintagan hin damu, pangangaroan hin damu, ngan ito nga kamatuoran napamatud-an ha kahimtang ni Pedro. (Lukas 12:48) Nagpadayon hi Jesus ha paghayag hin importante nga kamatuoran mahitungod han Mesias, upod na an iya tiarabot nga pag-antos ngan kamatayon ha Jerusalem. Nabaraka hi Pedro ha pakabati hito. Iya gindara hi Jesus ha ligid ngan ginsaway nga nasiring: “Ipahirayo ha imo Ginoo; diri mahimo ini ha imo.”—Mateo 16:21, 22.

Sigurado nga maopay an motibo ni Pedro, salit an baton ni Jesus bangin diri ginlalaoman. Tinalikod hiya kan Pedro, ginkita an iba nga disipulo—nga posible nga naghuhunahuna hin pariho—ngan siniring: “Iwas ha akon atubangan Satanas:  usa ka nga hiparakdolan nakon, kay waray ka makapaghunahuna han mga bagay han Dios, kondi han mga bagay han tawo.” (Mateo 16:23; Markos 8:32, 33) Ito nga ginsiring ni Jesus may importante nga sagdon ha aton. Masayon la naton tagdon an panhunahuna han tawo nga labaw kay ha panhunahuna han Dios. Kon tugotan naton ito, bisan kon pagbulig an aton motibo, bangin diri tinutuyo nga igin-aaghat na naton an katuyoan ni Satanas imbes han kanan Dios. Kondi, ano an reaksyon ni Pedro?

Sigurado nga maaram hiya nga diri literal an pagtawag ni Jesus ha iya nga Satanas. Ngani, an ginsiring ni Jesus kan Pedro diri pariho han iya ginsiring kan Satanas. Kan Satanas hiya nagsiring: “Iwas ka dinhi,” kondi kan Pedro, ginamit hiya hin pulong nga ha orihinal nga yinaknan mahimo ihubad nga “Pakadto ha akon luyo.” (Mateo 4:10) Waray isalikway ni Jesus hi Pedro nga iya nakitaan hin mag-opay nga kalidad, kondi gintadong la niya an sayop nga panhunahuna hito. Matin-aw nga kinahanglan umiwas hi Pedro ha atubangan han iya Agaron sugad nga hiparakdolan ngan bumalhin ha luyo sugad nga nasuporta nga sumurunod.

Nakiglantugi, nasina, o waray na ba magtingog-tingog hi Pedro? Waray; mapainubsanon nga ginkarawat niya an pagsaway. Salit makausa pa nagpakita hiya hin pagkamaunungon. Ngatanan nga sumurunod ni Kristo usahay nagkikinahanglan hin pagsaway. Pinaagi la ha mapainubsanon nga pagkarawat hin disiplina ngan paghibaro tikang hito padayon kita nga magigin mas duok kan Jesu-Kristo ngan ha iya Amay, hi Jehova nga Dios.—Proberbios 4:13.

Ginbalosan an Pagkamaunungon

Waray pag-iha may-ada na liwat urusahon nga ginyakan hi Jesus: “Matuod, ako nasiring ha iyo: May-ada dinhi ha ira nga nagkakatukdaw, nga diri gud makakatilaw han kamatayon, tubtob han ira pagkita han Anak han Tawo nga tisulod ha iya ginhadian.” (Mateo 16:28) Ito nga mga pulong sigurado nga nakainteres gud kan Pedro. Ano daw la an karuyag sidngon han ginsiring ni Jesus? Bangin nabaraka hi Pedro kon makakakarawat pa ba hiya hin sugad nga espesyal nga pribilehiyo tungod kay ginsaway pa la hiya ni Jesus.

Kondi, paglabay hin haros usa ka semana, gin-upod ni Jesus hira Jakobo, Juan, ngan Pedro ngadto ha “hitaas nga bukid”—bangin ha Bukid Hermon, nga pipira la ka kilometro an kahirayo. Posible nga gab-i adto tungod kay ginpipiraw an tulo nga kalalakin-an. Kondi samtang nag-aampo hi Jesus, may-ada nahitabo nga nakawara han ira kapiraw.—Mateo 17:1; Lukas 9:28, 29, 32.

Nakita nira nga nagbag-o an dagway ni Jesus. Naglamrag an iya nawong tubtob nga nagin masilaw ito sugad han adlaw. An iya bado nagranggat liwat ha kabusag. Katapos nakakita hira hin duha nga lalaki ha sapit ni Jesus, an usa sugad hin hi Moises ngan an usa sugad hin hi Elias. Iton duha nga lalaki nakig-istorya kan Jesus mahitungod han “iya paggikan, nga iya tutumanon ha Jerusalem”—nga nangangahulogan han iya kamatayon ngan pagkabanhaw. Matin-aw nga nagsayop gud hi Pedro han ginsaway niya hi Jesus mahitungod han Iya maieksperyensyahan nga kasakit!—Lukas 9:30, 31.

Gin-abat ni Pedro nga kinahanglan na niya makigbahin hiton talagsahon nga panhitabo tungod kay baga hin tibaya na hira Moises ngan Elias. Salit hi Pedro nagsiring: “Magturutdo, maopay ito nga mapabilin kita dinhi; ngan paghimo kita hin tulo nga mga payag: usa ha imo, ngan usa kan Moises, ngan usa kan Elias.” Syempre, inin duha nga maiha na nga patay nga surugoon han Dios diri nagkikinahanglan hin payag. Diri gud maaram hi Pedro han iya ginyayakan. Bisan pa hito, diri mo ba hiya naaapresyar tungod han iya kadasig ngan pagkabuotan?—Lukas 9:33.

 Hito nga gab-i nakakarawat hiya ngan hira Jakobo ngan Juan hin dugang nga balos. May-ada dampog nga naporma ngan nagtabon ha ira ha bukid. Tikang hito nga dampog nakabati hira hin tingog—an tingog ni Jehova nga Dios! Hi Jehova nagsiring: “Iini amo an akon Anak nga pinili: pamatii niyo hiya.” Dida hito natapos an bisyon, ngan hira na la an nakadto ha bukid upod ni Jesus.—Lukas 9:34-36.

Daku gud nga regalo ito nga bisyon para kan Pedro ngan ha aton! Paglabay hin damu ka tuig, nagsurat hiya mahitungod han pribilehiyo nga iya nakarawat hito nga gab-i sugad nga usa han ‘mga testigo han iya [Jesus] pagkaharangdon,’ an aktuwal nga pakakita hin patiuna kan Jesus sugad nga mahimayaon nga Hadi ha langit. Ito nga bisyon nagparig-on han damu nga tagna han Pulong han Dios ngan han pagtoo ni Pedro nga nakabulig ha iya nga malamposan an mga pagsari nga aatubangon. (2 Pedro 1:16-19) Pariho kan Pedro, mapaparig-on liwat kita hito kon magpabilin kita nga maunungon ha Agaron nga ginpili ni Jehova para ha aton, mahibaro tikang ha iya, kumarawat han iya disiplina ngan pagtadong, ngan mapainubsanon nga magsunod ha iya kada adlaw.

[Mga footnote]

[Kahon/Retrato ha pahina 28]

 Hin-o an Daku nga Bato?

“Ako man nasiring ha imo, nga ikaw hi Pedro, ngan ha bawbaw hini nga bato [“daku nga bato,” NW] akon pagtitindugon an akon singbahan.” (Mateo 16:18) Ito nga mga pulong nga ginsiring ni Jesus ha iya apostol nga hi Pedro agsob hunahunaon nga hi Pedro an magigin pundasyon han Kristiano nga kongregasyon. An Iglesia Katolika nagtututdo nga ginhatag ni Jesus kan Pedro an awtoridad nga manguna ha iba nga apostol, nga sugad hin nagpapasabot nga hiya an siyahan nga papa. Salit ha simboryo han Saint Peter’s Basilica ha Roma makikita ito nga mga pulong nga iginsurat ha magarbo nga Latin nga mga letra nga mas daku kay ha tawo.

Karuyag sidngon ba ni Jesus nga hi Pedro an daku nga bato nga magigin pundasyon han iya tutukuron nga kongregasyon? Diri. Tagda an tulo nga hinungdan kon kay ano nga makakasiguro kita hini. Siyahan, presente an iba nga apostol, ngan diri sugad hito an ira pagsabot ha ginsiring ni Jesus. Kon gintagad ni Jesus hi Pedro nga labaw ha ira, kay ano nga naglinantugi pa hira kon hin-o an gilalabawi? (Markos 9:33-35; Lukas 22:24-26) Ikaduha, ginpakita ni apostol Pablo nga an daku nga bato diri hi Pedro, kondi hi Jesu-Kristo. (1 Korinto 3:11; 10:4) Ikatulo, paglabay hin mga dekada, iginpatin-aw ni Pedro mismo nga waray hiya maghunahuna nga hiya an daku nga bato. Lugod, hiya nagsurat nga hi Jesus an maiha na nga igintagna nga ‘bato nga patukoranan’ nga ginpili han Dios.—1 Pedro 2:4-8, Maopay nga Sumat.

Bisan pa hito, tungod kay an ngaran ni Pedro nangangahulogan hin “Bato,” an iba nainsister nga hiya an gintutudlok ni Jesus nga daku nga bato. Kondi, ha pagkamatuod an ngaran ni Pedro ngan an pulong nga “daku nga bato” hito nga bersikulo diri pariho an kahulogan. An ngaran ni Pedro nangangahulogan hin “Usa ka Pidaso nga Bato,” ngan usa ito nga pronombre para ha lalaki; an pulong nga ginhubad nga “daku nga bato” pronombre para ha babaye. Salit, paonan-o sadang sabton an ginsiring ni Jesus? Sugad hin hiya nasiring kan Pedro: “Ikaw, an usa nga akon gintatawag nga Pedro, o Bato, nahibaro kon hin-o an tinuod nga ‘daku nga bato,’ an Kristo, nga amo an magigin pundasyon han Kristiano nga kongregasyon.” Daku gud nga pribilehiyo ni Pedro nga makabulig ha paghayag hiton importante nga kamatuoran!

[Retrato ha pahina 24, 25]

Iginpakita ni Pedro nga maunungon hiya bisan ha panahon nga kinahanglan hiya sawayon

[Retrato ha pahina 26]

Nakakita hi Pedro hin makatirigamnan nga bisyon sugad nga balos ha iya pagkamaunungon