¿Kunatsa Jehová Diosar katuyasiñasa?

“Jichha arumax mä angelaw uñstitu, Diosan khitanita. Nayax uka Diosankaraktwa.” (HECH. 27:23)

1. 1) ¿Maynix bautisasiñatakixa kunanak lurañapasa? 2) ¿Kuna jisktʼanakarus qhanañchasiskani?

 AKHAM sasaw bautisasirinakarux jachʼa tantachäwinakan jisktʼasi: “Jesucriston luqtasïwipxaruxa, ¿juchanakamat arrepentistati ukat Jehová Diosan munañap lurañataki Juparu jakäwim katuyasxtati?” sasa. Ukampis ¿kunatsa cristianonakax Diosar katuyasipxañapa? ¿Uk lurasax kuna askinaksa katuqapxi? ¿Diosar luqtañatakix kunatsa Jupar katuyasiñax wakisi? Uka tuqinakat sumpach amuytʼañatakixa, Diosar katuyasiñax kamsañs muni uk sum yatxatañäni.

2. ¿Diosar katuyasiñax kamsañs muni?

² ¿Diosar katuyasiñax kamsañs muni? Uk sum amuytʼañatakix apóstol Pablon arunakapat amtañäni. Mä kutix barcot saraskäna ukat uka barcox qutar jalantañampïkäna ukhaw mayninakar akham säna: “Nayax [Jehová] Diosankaraktwa” sasa. Uka arunakampix Jehová Diosar katuyasitapwa uñachtʼayaskäna (Hechos 27:22-24 liytʼasiñapawa). Jïsa, akapachax ‘Supayan munañapankkchisa’; Jehová Diosaw cristianonakarux munañaparjam katuyastan ukhaxa katuqistu, ukhamatwa Jupanktanxa (1 Juan 5:19). Nayraqatxa, jumarukiw luqtxäma sasaw Diosar katuyastanxa, ukat uk uñachtʼayañatakiw uman bautisastanxa.

3. ¿Kun uñachtʼayañatakis Jesusax bautisasïna, ukat kunsa cristianonakax jupat yatiqasipxaraki?

³ Jesusax bautisasisaw Diosar luqtañ amtatapxa uñachtʼayäna, ukhamatwa mä uñachtʼäwi jaytawayarakistu. Niyakixay Diosar katuyat Israel markan yurchïnxa, Diosar mayampi katuyasiñapax janiw wakiskänti. Janirakiw Moisesan katuqat Leyirjam phuqañ laykuki bautisaskänti; jan ukasti, yaqha wakiskir amtanïnwa. Bibliarjamaxa akham sasaw jupax Awkipar säna: “Nayawa juman munañama phuqhir jutta” sasa. (Heb. 10:7; Luc. 3:21). Jesusax Awkipan munañap phuqañatakiw bautisasïna. Jichhax jupat yatiqasisaw cristianonakax bautisastanxa. Ukampis jiwasax mä oración tuqiw Diosar katuyastanxa, uk  uñachtʼayañatakiw taqinin uñjkat bautisastanxa.

Diosar katuyasiñax wali askiwa

4. ¿Sum apasiñ tuqitxa kunsa Davitampit Jonatanampit yatiqtanxa?

⁴ Diosarux janiw laka may katuyasiñasäkiti, jan ukasti taqi chuymäñapawa. Ukampis ¿uk lurasax kuna askinaksa katuqsna? Uk amuytʼañatakix jaqichäwimpit amigonakampit parltʼañäni. Jupanakax taqi chuymaw purapat sum uñjasipxañapa, mä arunxa, uka amtaw chuymanakapan utjañapa, ukaw jupanakkam sum apasiñ yanaptʼani. Ukat irnaqäwinakansa ukhamarakiwa. Nayraqatxa amigonakat parltʼañäni. Maynix amigonïñ munasax jupaw nayraqat suma jaqïñapa. Ukat chuymanakapanxa purapat yanaptʼasiñatakiw amtapxañapa. Bibliax qillqaskäna uka urunakanxa wali sumpun Davitampi Jonatanampix apasipxäna, ukat purapat taqi chuym yanaptʼasiñatakiw mä amtar puripxäna (1 Samuel 17:57 ukat 18:1, 3 liytʼasiñapawa). Ukampis jichhürunakanxa ukham suma amigonakax janiw uñjasxiti. Mä qhawqhanikiw purapat taqi chuym yanaptʼasipxi (Pro. 17:17; 18:24).

5. ¿Uywirip jakʼan qhiparañ munir uywatax kuna askinaksa katuqäna?

⁵ Nayra Israel markanxa niya ukhamarakiw uñjasïna. Moisesan katuqat Leyirjamaxa, mä uywatax uywiripampiw wiñayatak mä amtar mantaspäna. Éxodo 21:5, 6 qillqatax akham siwa: “Serviritix jan librëña munkchi warmiparu, wawanakaparu, uywiriparu munatap layku ukaxa, uywiripax Diosan ukar irpasinxa, uta punkuru jan ukax uta punku marcor saykatayasinwa mä pʼiyañampi jinchxa pʼiyjañapa, ukhamata uka servirix wiñayatak jupan serviripäñapataki” sasa. Kunjamtï amuytanxa, mä uywatax munasir uywirip jakʼan sum jakasiñatakiw mä amtar purispäna.

6, 7. 1) ¿Kunjamsa mä suma amtar puriñax jaqinakar yanapi? 2) ¿Ukax kunsa Jehová Diosar katuyasiñ tuqit uñachtʼayistu?

⁶ Jichhax jaqichatanakat parltʼañäni, jupanakax purapat sum uñjasiñatakiw chuymanakapan amtapxañaparaki. Mä arunxa, lurañanakapampi taqi chuym phuqapxañapawa. Janiw papelanak utjipanakxa sum uñjasipxañapäkiti; jan ukasti, munasiñatwa sum uñjasipxañapa. ¿Purapat sum uñjasisax kuna askinaksa jikxatapxi? Chacha warmis wawanakas jan axsarasaw sum jakasipxi. Jan jaqichatanakax janiw ukham jakapkaspati. Ukampis cristian chacha warminakax kunjamtï Bibliax yatichki ukarjam phuqañatakiw chʼamachasipxi ukat jan walinak utjipansa munasiñampiw askichapxaraki (Mat. 19:5, 6; 1 Cor. 13:7, 8; Heb. 13:4).

⁷ Jichhasti irnaqäw tuqit parltʼarakiñäni. Bibliax qillqaskän uka tiemponakansa contrato lurañax wali wakiskirïnwa (Mat. 20:1, 2, 8). Jïsa, mä negocio lurañatakis jan ukax kunan irnaqañatakisa contrato lurañax purapatak wali askiwa. Kunjamtï uñjawayktanxa, amigonakatakis jaqichatanakatakis purapat taqi chuym sum uñjasiñax wali askiwa, ukhamatwa nayrar sartapxaspa. Ukat irnaqäwinakan lurañanakampi phuqañas ukham askirakiwa. Ukampis Jehová Diosampix janiw ukham mä amtaruki purktanti; jan ukasti, jan kun suyasaw pachpa jakäwis Jupar katuyastanxa. Bibliax qillqaskäna uka tiemponxa ukhamarakiw Diosar katuyasipxäna, ukat kuna askinaksa katuqapxäna ukanak jichhax uñjañäni.

¿Diosar katuyasisax kuna askinaksa katuqapxäna?

8. ¿Diosar katuyasiñatakix kunsa israelitanakax lurapxañapäna?

⁸ Israelitanakax Jehová Diosampiw mä arustʼäwir mantapxäna. Diosax Sinaí qullu uñkatasinwa israelitanakar tantachthapisin akham säna: “Jumanakatix nayan arunakax sum istʼasina jaysapxitäta, ukhamarak nayan jumanakampi mä suma amtäwi lurataxsa phuqhapxarakïta ukaxa jumanakasti nayan suma munat markaxäpxätawa taqi markanak  taypinxa” sasa. Uk istʼasax taqiniw akham sapxäna: “Lurañäniwa kunanaktix Tatitux siski ukanaka” sasa (Éxo. 19:4-8). Ukham arsusax janiw aliqak mä amtar mantapkänti. Jan ukasti Jehová Diosaruw katuyasipxäna. Ukatwa Diosax jupanakar akham säna: “Munat markaxäpxätawa” sasa.

9. ¿Diosar katuyasisax kuna askinaksa israelitanakax jikxatapxäna?

⁹ Israelitanakax Diosar katuyasisinwa wali askinak katuqapxäna. Mä munat wawarjamaw Diosax jupanakar taqi chuym uñjäna. Ukatwa akham säna: “¿Mä taykax [asu] wawanakaparux armasiti, munasiñaps janirakich churki? Inas uka taykax armaschispa, ukampis nayax janipuniw armaskäti” sasa (Isa. 49:15). Kamachinak churasaw Diosax markapar sum uñjäna, profetanak khitasaw chʼamañchäna ukat angelanakapampiw jan walinakat jarkʼaqäna. Ukatwa Salmo 147:19, 20 qillqatax akham saraki: “Tatituw Jacoburux arunakap yatiyi, Israel markarusti leyinakapamp arsutanakapamp churaraki. Janiw kawkïr markampis ukham lurkänti” sasa (Salmo 34:7, 19 ukat 48:14 liytʼasiñapawa). Kunjamtï Jupar katuyat Israel markar sum uñjkänxa, ukhamarakiw Jehová Diosax Jupar katuyat taqi luqtirinakapar jichhax uñjaski.

¿Kunatsa Diosar katuyasiñasa?

10, 11. ¿Kunatsa Diosan familiapat jayarstʼata yuriwaytanxa?

¹⁰ “¿Diosar luqtañatakix Jupar katuyasis bautisasiñax wakisipuniti?” sasaw yaqhipax jisktʼasipxi. Uk amuytʼañatakisti jaqinakax Dios nayraqatan kunjamsa jikxatastan uk amtañasawa. Adanax taqi wawanakaparuw juchar aptʼawayistu, ukatwa Diosan familiapat jayarstʼat yuriwaytanxa (Rom. 3:23; 5:12). Ukhamax Jupar katuyasisakiw familiapan katuqatäsnaxa. Kunatsa ukham sistan uk amuytʼañäni.

¹¹ Taqiniw juchan yuritätanxa, janiw khitis wawanakaparux chiqpach jakañxa churkaspati (1 Tim. 6:19, NM). Niyakixay Adanampi Evampix juchar aptʼawaychistuxa, taqinis wali munasir Awkisat jayarstʼataw yuriwaytanxa, ukatwa Diosan wawanakapjama janix uñtʼatäktanti (Deuteronomio 32:5 uñxattʼarakismawa). Jaqinakax janiw Diosan familiapampi chikäxiti, Jehová Diosat jithiqtatäpxiwa.

12. 1) ¿Kunjamatsa jucharar jaqinakax Diosan familiapan katuqatäpxaspa? 2) ¿Janïr bautisaskasax kunanak lurañas wakisi?

¹² Ukat familiapan katuqatäñatakixa, sapa mayniw Diosar mayisiñasa. * Ukampis ¿kunjamsa Diosax jucharar jaqinakar katuqistaspa? Pablox akham sänwa: “Diosan uñisiripäkasinsa Dios kipkaw sumankthapiyistu jupan Wawapan jiwatap tuqi” sasa (Rom. 5:10). Ukatsti, Diosampi katuqatäñatakix mä qʼuma conciencia mayiñasarakiwa, ukatakix bautisasiñasawa (1 Ped. 3:21). Ukampis nayraqatxa Jehová Diosar sum uñtʼañasawa ukat Jupar atinisiñasawa, ukxarux juchanakasat arrepentisisax jan wali luräwinaksa jaytxañasarakiwa (Juan 17:3; Hech. 3:19; Heb. 11:6). Ukat ¿kunamp lurañas wakisi?

13. ¿Diosar yupaychir familiapan katuqatäñatakix kunatsa Diosar taqi chuym katuyasiñasa?

¹³ Maynix Diosar yupaychir familiap taypin katuqatäñatakix Jehová Diosar taqi chuym katuyasiñapawa. ¿Kunatsa? Uk amuytʼañatakix wali respetat mä awkit parltʼañäni. Markapan jakasir mä wajcha waynuchur uñtʼaspa ukat uka waynitur munasiñat wawaparjam uywasiñ amtaspa, ukampis janïr utapar irpkasax akham saspa: “Awkimarjam munasitäta ukat respetarakitäta ukhaxa wawajarjamaw uñjäma” sasa. Ukat uka waynitux “uk phuqäwa” sasin taqi chuym arsuni ukhakiw uka tatax wawaparjam katuqaspa. ¿Kamis ukham mayinix sissnati? ¡Janiwa! Jehová Diosax uka awkir uñtasitarakiw Jupar taqi chuym  katuyasiñ amtapki ukanakarux familiapan katuqi. Bibliax uka tuqit akham siwa: “Diosarux jakkir ofrendjamay luqtasipxam [jan ukax, katuyasipxam], Diosar kusisiykiri luqtata” sasa (Rom. 12:1).

Munasiñampi iyawsañampi

14. ¿Diosar katuyasisax kunjamatsa Jupar munatas uñachtʼaytanxa?

¹⁴ Nayraqatxa, munasiñatwa Diosar katuyastanxa. Uka amuytʼañatakix casarasir wayn tawaqut parltʼañäni. Casarasiñ uruxa, walinsa jan walinsa janipuniw jaytkämati sasaw waynax tawaqur taqi chuym sixa. Janiw luräwinakap phuqañak amtkiti; jan ukasti taqi chuymaw munasïma sasaw arsu. Ukampis jan ukham arskaspa ukhaxa janiw chacha warmjam jakapkaspati. Jehová Diosan familiapar mantañatakix ukhamarakiwa. Diosar jan katuyasisax janiw uka familianxa kuna askinaksa katuqksnati. Mä arunxa, Diosan wawapjam uñtʼatäñatakiw jupar katuyastanxa; juchararäkstansa, walinsa jan walinsa Diosar taqi chuym luqtañwa amttanxa (Mat. 22:37).

15. Diosar katuyasisax Jupar iyawsataswa uñachtʼaytanxa, ¿kunatsa ukham sistanxa?

¹⁵ Ukatxa, iyawsäwinïtas laykuw Diosar katuyasiraktanxa. Jïsa, Jehová Diosan utjatapatxa janiw pächasktanti, ukat Jupampi sum apasiñax jiwasatakix wali askipuniwa (Sal. 73:28). Inas awisax Diosar luqtañax chʼamächini, kunattix “jan wali jaqinak taypin[wa]” jakastanxa. Ukampis Diosar luqtañataki wal chʼamachasiñäni ukhaxa, bendicistaniw sasaw Jupar atinistanxa (Fili. 2:15; Isa. 12:2). Ukat juchar puriñäni ukhasa, khuyapayasiñap uñachtʼayistani (Salmo 103:13, 14 ukat Romanos 7:21-25 liytʼasiñapawa). Chiqansa, jan jithiqtañatak wal chʼamachasiñänixa, wali askinakwa Diosat katuqañäni (Job 27:5).

Diosar katuyasisax kusisiñ jikxattanxa

16, 17. ¿Kunatsa Diosar katuyasisax kusisiñ jikxattanxa?

¹⁶ “Katuqirit sipansa jukʼamp kusisiñaniw khititï churki ukaxa” sasaw Jesusax säna, ukhamasti Diosar katuyasisaxa, mä arunxa, jakäwis churasax kusisiñ jikxattanxa (Hech. 20:35). Jesusax aka Uraqin luqtkasaxa, uka arunakarjam sarnaqasaw kusisiñ jikxatarakïna. Wakisïna ukhaxa, qaritpachas manqʼat awtjatpachas jaqinakar yatichaskakïnwa, jupatakix jakañar apiri thakit yatichañaw munañanakapat sipansa nayrankäna (Juan 4:34). Wali kusisitapuniw Awkipar luqtäna, janiw jupatakix ukham yaqha aski luräwix utjkänti. Ukatwa akham säna: “Nayax jupar kusisiykirpun kuns [lurta]” sasa (Juan 8:29; Pro. 27:11).

¹⁷ Kusisit jakasipxañapatakiw Jesusax arkirinakapar akham sarakïna: “Maynitix nayar arkañ munchitu ukaxa, jupa kipkat armtʼaspan” sasa (Mat. 16:24). Kunapachatï munañanakas maysar apanuktan ukhaxa wali munasir Awkisampiw apnaqayastanxa. Ukham yaqha suma Awkix janipuniw utjkaspati.

18. ¿Jaqir jan ukax mä luräwir katuyasiñat sipansa kunatsa Diosar katuyasiñax jukʼamp aski?

 ¹⁸ Khitinakatix Jehová Diosar katuyasipki ukat ukarjam phuqapki ukanakax wali kusisitaw jakasipxi. Ukampis khitinakatix qamiriptañ laykuki jaqi masipar jan ukax luräwinakar katuyasipxi ukanakax janiw chiqpach kusisiñ jikxatapkiti (Mat. 6:24). Maysa tuqitxa, cristianonakax janirakiw mä luräwir katuyatäktanti. Wali kusisitaw Diosan yanapiripjam luqtasktanxa, ukampis janiw ukar katuyatäktanti; jan ukasti wali munasir Jehová Diosar katuyatätanwa (1 Cor. 3:9). Ukat kunapachatï Jupar taqi chuym luqtañ layku jan walinakansa uñjastan ukanakxa Jehová Diosax janiw armaskaniti. Sum jakasiñasatakiw uñjistani ukat chuymankipstatanakarus wayn tawaquruw kuttayxani (Job 33:25; Hebreos 6:10 liytʼasiñapawa).

19. ¿Jehová Diosar katuyasiñax kunatsa wali askixa?

¹⁹ Bibliax akham sistuwa: “Diosar jakʼachasipxam, jupasti jumanakarux jakʼachasirakiniwa” sasa (Sant. 4:8; Sal. 25:14). Ukhamasti khitinakatix Jehová Diosar katuyasipki ukanakax wali sum Jupampix apasipxi. Ukampis ¿kunjamatsa Jehová Diosarux jan pächasis katuyassna? Uka tuqitwa jutïr yatichäwin qhanañchasiskani.

[Qhanañchäwi]

¿Kamsasmasa?

• ¿Diosar katuyasiñax kamsañs muni?

• ¿Diosar katuyasisax kuna askinaksa jikxattanxa?

• ¿Kunatsa cristianonakax Jehová Diosar katuyasipxañapa?

[Jisktʼanaka]

[6 janan fotopa]

Diosar katuyasisin ukarjam phuqapki ukanakax wali kusisitaw jakasipxi