Boasa Ikkon Dilehon Hamu Ngolumuna tu Jahowa?

“Na bodari, jongjong do di labbungku suru-suruan ni Debata, i ma Debata nappuna au.”—ULAON NI APOSTEL 27:23.

1. Aha do naung diulahon akka halak na naeng tardidi, jala sukkun-sukkun aha do na lao taalusi?

“NUNGNGA muba hamu sian akka dosamuna, nungnga dilehon hamu dirimuna tu Jahowa, jala nungnga diihutton hamu dalan haluaon na dilehonna marhite Jesus Kristus?” On ma sada sukkun-sukkun na ikkon dialusi halak na naeng tardidi. Boasa ikkon dilehon halak Kristen ngoluna tu Jahowa? Aha do manfaatna molo talehon ngolutta tu Jahowa? Nang pe porsea sasahalak tu Jahowa, boasa tetap ikkon dilehon ibana ngoluna tu Jahowa? Asa taboto alusna, parjolo ikkon taboto do aha do lapatanna mangalehon ngolu tu Jahowa.

2. Aha do lapatanna mangalehon ngolu tu Debata?

² Aha do lapatanna mangalehon ngolu tu Debata? Taida ma na didok Apostel Paulus taringot hubunganna tu Debata. Di jolo ni godang halak di bagasan ni kapal naung sega, didok ibana do Jahowa i “Debata nappuna au”. (Jaha Ulaon ni Apostel 27:22-24.) Appuna ni Jahowa do sude halak Kristen na sittong. Alai molo akka halak na di portibi on, “di bagasan huaso ni Sibolis” do nasida. (1 Joh. 5:19) Molo nungnga dilehon sasahalak ngoluna tu Jahowa di bagasan tangiangna, gabe appuna ni Jahowa ma ibana. Dung i boi ma ibana tardidi.

3. Aha do na dipatudu sian pandidion ni Jesus, jala boha do cara ni akka halak maniru ibana?

³ Gabe sitiruon do Jesus tu hita. Bangso ni Debata do halak Israel. Jadi ala halak Israel do Jesus, sebenarna nungnga gabe appuna ni Debata ibana. Nang pe songon i, dilehon ibana do muse ngoluna tu Debata jala tardidi. Didok ibana do, “Nungnga ro be au . . . Ale Debatakku, lomo do rohakku mangulahon lomo ni roham.” (Heb. 10:7; Luk. 3:21) Tikki tardidi Jesus, on patuduhon nungnga dilehon ibana ngoluna lao mangulahon lomo ni roha ni Bapakna. Jadi tikki tardidi akka halak na mangihutton Jesus, na ditiru nasida do Jesus. On patuduhon nungnga dilehon nasida ngoluna tu Jahowa di bagasan tangiang.

Aha do Manfaatna Molo Talehon Ngolutta tu Debata?

4. Sian persahabatan ni si Daud dohot si Jonatan, aha ma manfaatna molo marjanji halak na bersahabat asa saling setia?

⁴ Dang holan sada perjanjian molo marjanji halak Kristen lao mangalehon ngoluna tu Debata. Attong, aha do manfaatna molo marjanji hita lao mangalehon ngolutta tu Jahowa? Taida ma jo aha manfaatna tu jolma molo mambahen sada perjanjian nasida. Contohna persahabatan. Asa tahilala manfaatna adong sahabatta, ikkon gabe sahabat na burju do tong hita. Dipaboa do sada contoh di Bibel taringot persahabatan ni si Daud dohot si Jonatan. Jala mambahen perjanjian do nasida na dua. (Jaha 1 Samuel 17:57; 18:1, 3.) Memang jarang do halak na bersahabat mambahen perjanjian. Alai molo marjanji halak na bersahabat asa saling setia, boi ma gabe lam kompak nasida.—Poda 17:17; 18:24.

5. Aha do manfaatna molo dibahen sahalak hatoban perjanjian tu tuanna?

⁵ Adong do Hukum na dilehon Debata tu halak Israel taringot hatoban. Boi ma tarida sian Hukum i, adong do manfaatna molo mambahen sada perjanjian. Molo lomo roha ni sasahalak naeng gabe hatoban ni tuanna saleleng ni ngoluna, ikkon dibahen ibana do perjanjian dohot tuanna. Asa boi pos rohana naung gabe appuna ni tuanna i do ibana. Didok di Hukum i, “Molo dang olo hatoban i lao jala didok, ‘Holong do rohakku tu tuanku, tu istrikku, dohot tu anakkokku. Alani i toktong ma au gabe hatoban ni tuanku.’ Ikkon diboan tuanna ma hatoban i tu jolo ni pintu manang tu tiang ni pintu. Dung i ditusuk tuanna i ma pinggol ni hatoban i. Gabe hatoban ni tuanna ma ibana saleleng ni ngoluna.”—2 Mus. 21:5, 6.

6, 7. (a) Aha do manfaatna mambahen sada perjanjian? (b) Aha do manfaatna molo marjanji hita mangalehon ngolutta tu Jahowa?

⁶ Songon mambahen perjanjian do halak na menikah. Alana marjanji do nasida tu pasanganna asa saling setia. Molo holan rap tinggal bawa dohot borua alai dang menikah, pasti dang boi tenang dihilala nasida. Jala dang boi denggan dipabalga-balga nasida ianakkon ni nasida. Alai molo menikah nasida, pasti marjanji do nasida di jolo ni Debata asa saling setia nang pe adong masalah.—Mat. 19:5, 6; 1 Kor. 13:7, 8; Heb. 13:4.

⁷ Di Bibel, dipaboa do manfaatna molo dibahen akka halak perjanjian tu urusan bisnis. (Mat. 20:1, 2, 8) Songon i ma tong na masa saonari. Contohna, molo tabahen perjanjian manang kontrak tertulis sebelum mambahen sada bisnis, manang sebelum karejo hita di sada perusahaan, pasti godang do manfaatna. Jadi godang do manfaatna mambahen perjanjian tu persahabatan, perkawinan, dohot tu urusan bisnis. Jala pasti unggodang do manfaatna molo marjanji hita lao mangalehon ngolutta tu Jahowa. Saonari taida ma akka halak na mandapot manfaat ala dilehon nasida ngoluna tu Jahowa. Jala umbalga do manfaatna sian mambahen sada perjanjian.

Aha do Manfaatna Molo Dilehon Halak Israel Ngolu ni Nasida tu Debata?

8. Aha do na istimewa tikki marjanji halak Israel lao setia nasida tu Jahowa?

⁸ Gabe bangso ni Debata do halak Israel tikki marjanji nasida lao setia tu Jahowa. Dipapungu Jahowa do nasida di jonok ni Dolok Sinai jala didok Jahowa do tu nasida, “Molo toktong dioloi hamu sude hatakku, jala diulahon hamu parjanjian i, sian sude bangso hamu ma na gabe appunakku na massai arga.” Dialusi bangso i ma, “Rade do hami lao mangulahon sude paretta ni Jahowa.” (2 Mus. 19:4-8) Dang holan mambahen perjanjian halak Israel di tikki i. Alai mulai sian i, gabe appuna ni Jahowa ma nasida. Jala dibahen Jahowa ma nasida gabe ‘appunana na massai arga’.

9. Aha do manfaatna ala dilehon halak Israel ngoluna tu Debata?

⁹ Godang do manfaatna ala gabe appuna ni Jahowa halak Israel. Setia do Jahowa tu nasida, jala diparrohahon Ibana do nasida, dos songon sahalak natua-tua na makkaholongi gellengna. Didok Jahowa do tu halak Israel, “Boi do lupahonon ni sahalak borua anakkonna na manusu dope? Manang boi do dang holong rohana tu anak na ditubuhon ibana? Nang pe boi ibana lupa, alai dang hea lupa Au tu ho.” (Jes. 49:15) Dilehon Jahowa do Hukum tu nasida. Jala disuru do akka panurirang lao manogu-nogu nasida. Disuru Jahowa do tong akka suru-suruan lao manjaga nasida. Didok sahalak panurat psalmen do, “Dipasahat Ibana ma hatana i tu si Jakkob, jala dipaboa ma akka paretta dohot aturanna tu halak Israel. Dang dibahen Ibana songon i tu bangso na asing”. (Ps. 147:19, 20; jaha Psalmen 34:7, 19; 48:14.) Diparrohahon Jahowa do bangso Israel najolo. Saonari pe, pasti diparrohahon Jahowa do tong akka halak na marjanji lao mangalehon ngoluna tu Ibana.

Boasa Ikkon Talehon Ngolutta tu Debata?

10, 11. Pittor gabe bagian ni keluarga ni Debata do hita disi tubu? Patorang ma.

¹⁰ Adong do halak na marpikkir, ‘Boasa ikkon hulehon ngolukku tu Debata?’ Boi do taboto alusna molo taingot boha do sebenarna keadaanta saonari di jolo ni Debata. Ala mardosa si Adam, dang bagian ni keluarga ni Debata be hita sude. (Rom 3:23; 5:12) Jadi ikkon talehon do ngolutta tu Debata asa boi hita gabe bagian ni keluargana. Taida ma jo alasanna.

¹¹ Dang adong nanggo sahalak bapak pe na boi mangalehon hangoluan na sempurna tu gellengna. (1 Tim. 6:19) Mulai sian na tubu hita, dang gabe bagian ni keluarga ni Debata be hita. Alana dung mardosa si Adam dohot si Hawa, nungnga pulik be nasida sian Bapak ni nasida na parholong, i ma Jahowa. (Bandingkon tu 5 Musa 32:5.) Mulai sian i, pulik ma sude jolma sian Debata dohot sian keluargana.

12. (a) Boasa boi jolma na pardosa gabe bagian ni keluarga ni Debata? (b) Aha do na ikkon taulahon asa boi tardidi?

¹² Nang pe songon i, boi do hita ganup marsada-sada mangido tu Debata asa dijalo hita gabe bagian ni keluargana. * Boasa boi jolma na pardosa gabe bagian ni keluargana? Didok Apostel Paulus do, “Tikki musuna dope hita, nungnga dibahen hita mardame dohot Debata marhite hamamate ni Anakna i.” (Rom 5:10) Tikki tardidi hita, tapangido do tu Debata asa ias hati nuranitta. Dung i, boi ma tabahen las rohana. (1 Ptr. 3:21) Alai sebelum tardidi, adong do na ikkon taulahon. Ikkon tatanda do Debata, ikkon marhaposan hita tu Ibana, ikkon muba hita, jala tagatti ma tujuan ni ngolutta. (Joh. 17:3; Ul. 3:19; Heb. 11:6) Alai adong dope na ikkon taulahon asa boi gabe bagian ni keluarga ni Debata. Aha ma i?

13. Boasa ikkon marjanji sasahalak lao mangalehon ngoluna tu Jahowa?

¹³ Asa boi sasahalak gabe bagian ni keluarga ni Debata, ikkon jolo marjanji do ibana lao mangalehon ngoluna tu Jahowa. Boasa boi songon i? Bayakkon ma adong sahalak bapak na sangap. Burju do ibana tu sahalak dakdanak na so marama na so marina. Jala lomo do rohana mambahen dakdanak i gabe anggota keluargana. Sebelum dijalo ibana dakdanak i, disuru ibana do asa marjanji dakdanak i tu ibana. Didok ibana do, “Asa boi ho gabe gellengku, ikkon dihaholongi jala dipasangap ho au.” Molo olo dakdanak i marjanji, baru pe boi ibana gabe anggota keluarga ni ama i. Dos songon ama i do Jahowa. Olo do Ibana manjalo hita gabe bagian ni keluargana, molo marjanji hita lao mangalehon ngolutta tu Ibana. Bibel mandok, “Pelehon hamu ma dirimuna gabe pelean na mangolu, na badia, jala na palasson roha ni Debata.”—Rom 12:1.

Patuduhon na Porsea jala na Holong do Rohatta tu Jahowa

14. Boasa boi didok bukti ni holong ni rohatta do molo talehon ngolutta tu Debata?

¹⁴ Molo olo hita marjanji lao mangalehon ngolutta tu Jahowa, on patuduhon na holong do rohatta tu Ibana. Sipata boi do disarupahon i tu halak na marjanji tikki menikah. Tikki marjanji sahalak bawa lao setia tu sahalak borua manang aha pe na masa, on patuduhon na holong do rohana tu borua i. Dang lao mangulahon sada ulaon ibana marjanji, alai lao setia do ibana tu borua i. Dang boi ibana gabe suami ni borua i, molo dang jolo marjanji ibana tikki menikah. Dos songon i ma, asa boi hita gabe bagian ni keluarga ni Debata, ikkon jolo marjanji do hita tu Ibana. Jadi talehon ma ngolutta tu Jahowa. Alana nang pe dang sempurna hita, lomo do rohatta gabe appuna ni Debata. Jala bertekad do hita lao setia tu Ibana manang aha pe na masa.—Mat. 22:37.

15. Boasa boi didok na porsea do hita tu Debata molo talehon ngolutta tu Ibana?

¹⁵ Tikki talehon ngolutta tu Debata, on pe patuduhon na porsea do hita tu Ibana. Boasa boi songon i? Ala porsea hita tu Jahowa, gabe pos ma rohatta marlaba do molo jonok hita tu Ibana. (Ps. 73:28) Taboto do dang mura lao mangihutton dalan ni Debata, alana “di tonga-tonga ni sundut naung sega jala na jahat” do hita. Alai pos do rohatta, pasti diurupi Debata do hita. (Plp. 2:15; 4:13) Jala taboto do, dang sempurna hita. Alai pos do rohatta, pasti marasi ni roha do Jahowa nang pe taulahon na sala. (Jaha Psalmen 103:13, 14; Rom 7:21-25.) Jala pos do rohatta pasti dilehon Jahowa do pasu-pasu tu hita ala bertekad lao setia tu Ibana.—Job 27:5.

Parohon Las ni Roha

16, 17. Boasa gabe las rohatta molo talehon ngolutta tu Jahowa?

¹⁶ Molo talehon ngolutta tu Jahowa, gabe las ma rohatta. Didok Jesus do, “Umlas do roha ni halak na mangalehon sian na manjalo.” (Ul. 20:35) Songon i ma na dihilala Jesus saleleng di tano on. Olo do sappe dang sanga ibana mangan manang istirahat lao mangurupi akka halak asa boi nasida mamboto dalan tu hangoluan. (Joh. 4:34) Las do roha ni Jesus ala boi mambahen las roha ni Bapakna. Didok ibana, “Toktong do huulahon lomo ni rohana.”—Joh. 8:29; Poda 27:11.

¹⁷ Dipaboa Jesus do tu akka siseanna, boha carana asa boi marlas ni roha nasida. Didok ibana, “Manang ise na naeng mangihutton au, ikkon disoadahon do dirina.” (Mat. 16:24) Molo taulahon songon i, gabe lam jonok ma hubungatta tu Jahowa. Pasti olo do hita mangalehon ngolutta tu Jahowa, na makkaholongi jala na mamparrohahon hita.

18. Boasa boi didok umbalga do las ni rohatta molo talehon ngolutta tu Jahowa?

¹⁸ Pasti las do rohatta molo talehon ngolutta tu Jahowa jala mangulahon lomo ni rohana. Umbalga do las ni rohatta i sian apala mangalehon ngolutta tu sada ulaon manang tu sasahalak. Contohna, molo dilehon sasahalak ngoluna lao mangalului hepeng sagodang ni godangna, pasti dang boi ibana marlas ni roha jala merasa puas. (Mat. 6:24) Alai molo dilehon ibana ngoluna tu Jahowa, boi ma dihilala ibana las ni roha na saleleng ni lelengna. Alana dang tu sada ulaon dipakke ibana ngoluna. Alai gabe “dongan sakarejo” ni Debata do ibana, na sai mangargai sude na diulahon ibana. (1 Kor. 3:9) Holan Jahowa do na paling mangargai sude na diulahon naposona. Jala di masa depan, bahenonna ma naposona mulak poso muse asa boi nasida makkilala haburjuon ni Jahowa saleleng ni lelengna.—Job 33:25; jaha Heber 6:10.

19. Aha ma manfaatna molo talehon ngolutta tu Jahowa?

¹⁹ Molo talehon ngolutta tu Jahowa, pasti gabe lam jonok ma hubungatta tu Ibana. Bibel pe mandok, “Pajonok hamu ma tu Debata, dung i pajonokonna ma tu hamu.” (Jak. 4:8; Ps. 25:14) Di artikel berikutna, tabahas ma boha carana asa pos rohatta mangalehon ngolutta tu Jahowa.

[Surat na di Toru]

Aha do Alusmuna?

• Aha do lapatanna mangalehon ngolu tu Jahowa?

• Aha do manfaatna mangalehon ngolutta tu Jahowa?

• Boasa ikkon dilehon halak Kristen ngoluna tu Jahowa?

[Sukkun-Sukkun Parsiajaran]

[Gambar]

Boi do tahilala las ni roha na saleleng ni lelengna molo talehon ngolutta tu Jahowa