Taano ta Dapat Mong Idusay an Saimong Sadiri ki Jehova?

“Kan bangging ini nagtindog harani sa sako an sarong anghel nin Dios na may sadiri sa sako.”—GIBO 27:23.

1. Anong mga lakdang an ginibo na kan mga nagpepresentar kan saindang sadiri para sa bautismo, asin anong mga hapot an pinapalataw kaini?

“BASADO sa atang ni Jesu-Cristo, pinagsolsolan mo na daw an saimong mga kasalan asin idinusay an saimong sadiri ki Jehova tanganing gibohon an saiyang kabotan?” Saro ini sa duwang hapot na sinisimbag nin mga kandidato sa bautismo sa katapusan kan pahayag dapit sa bautismo. Taano an saro na gustong magin Saksi ni Jehova ta kaipuhan na idusay an saiyang sadiri sa Dios? Paano kita nakikinabang sa pagigin dusay sa Dios? Taano ta dai puedeng akoon nin Dios an pagsamba nin saro kun sia bakong dusay sa Saiya? Tanganing masabotan an mga simbag, kaipuhan nguna niatong pag-olayan kun ano an boot sabihon nin pagdusay.

2. Ano an boot sabihon kan pagdusay nin saro kan saiyang sadiri ki Jehova?

² Ano an boot sabihon kan pagdusay nin saro kan saiyang sadiri sa Dios? Mangnohon kun paano ilinadawan ni apostol Pablo an saiyang relasyon sa Dios. Sa atubangan nin dakol na iba pang nakasakay sa namemeligrong lumubog na barko, inapod nia si Jehova na “Dios na may sadiri sa sako.” (Basahon an Gibo 27:22-24.) An gabos na tunay na Kristiano sadiri ni Jehova. Sa kabaliktaran, an kinaban sa pangkagabsan “namumugtak sa kapangyarihan kan saro na marigsok.” (1 Juan 5:19) An mga Kristiano nagigin sadiri ni Jehova kun sinda naggigibo nin inooyonan na pagdusay kan saindang sadiri paagi sa pamibi. An siring na pagdusay sarong personal na panuga. Iyan sinusundan nin bautismo sa tubig.

3. Ano an isinisimbolisar kan bautismo ni Jesus, asin paano maaarog kan saiyang mga parasunod an halimbawa nia?

³ Si Jesus nagtao nin halimbawa para sa sato kan sia personal na magdesisyon na gibohon an kabotan nin Dios. Huling sia namundag sa dusay na nasyon nin Israel, sia dusay na sa Dios. Pero, kan sia bautismohan may ginibo sia na labi pa sa kahagadan kan Ley. Ipinaparisa kan Tataramon nin Dios na sia nagsabi: “Uya! Nagdatong ako . . . sa paggibo kan boot mo, O Dios.” (Heb. 10:7; Luc. 3:21) Kaya an bautismo ni Jesus nagsimbolisar sa pagpresentar nia kan saiyang sadiri sa Dios para sa paggibo kan kabotan kan saiyang Ama. Inaarog kan saiyang mga parasunod an halimbawa nia kun ipinepresentar ninda an saindang sadiri para sa  bautismo. Minsan siring, sa kamugtakan ninda, an bautismo sa tubig sarong pagpaheling sa publiko na sinda personal nang nagdusay sa Dios paagi sa pamibi.

Kun Paano Kita Nakikinabang sa Pagdusay

4. An pagigin magkatood ni David asin Jonatan nagsasabi sa sato nin ano manongod sa kapanugaan?

⁴ An Kristianong pagdusay sarong seryosong bagay. Iyan orog pa sa simpleng panuga. Pero, paano kita nakikinabang sa pagdusay? Bilang pagkomparar, pag-olayan niato kun paano nagtatao nin mga pakinabang an paggibo nin kapanugaan sa mga relasyon nin mga tawo. An sarong halimbawa iyo an pagkakatood. Tanganing ikaogma an pagkaigwa nin katood, dapat nindong akoon an paninimbagan nin pagigin sarong katood. Iyan may kalabot na kapanugaan—an pakamate nindo nin obligasyon na magmakolog sa saindong katood. An saro sa pinakapambihirang mga pagkakatood na ilinadawan sa Biblia iyo an ki David asin Jonatan. Naggibo pa ngani sinda nin tipan nin pagigin magkatood. (Basahon an 1 Samuel 17:57; 18:1, 3.) Minsan ngani bihira an mga pagkakatood na may arog kaiyan na klase nin kapanugaan, nagkokosog an kadaklan na pagkakatood kun an magkatood may kapanugaan, o pakamate nin obligasyon, sa lambang saro.—Tal. 17:17; 18:24.

5. Paano an sarong oripon permanenteng makikinabang sa pagigin sadiri nin marahay na kagurangnan?

⁵ An Ley na itinao nin Dios sa Israel nagladawan sa saro pang relasyon na nakinabang an banwaan paagi sa paggibo nin kapanugaan. Kun an sarong oripon gustong magkaigwa kan seguridad na permanente siang magin sadiri nin marahay na kagurangnan, puede siang lumaog sa sarong kasundoan na permanente asin obligadong otobon. An Ley nagsabi: “Kun an oripon may pag-insistir na magsabi, ‘Talagang namomotan ko an sakong kagurangnan, an sakong agom asin an sakong mga aki; habo kong maghale bilang saro na pinatalingkas,’ kun siring irarani sia kan saiyang kagurangnan sa tunay na Dios asin papatindogon sia sa may pinto o sa may harigi kan pinto; asin lalabotan nin guwat kan saiyang kagurangnan an saiyang talinga, asin sia magigin saiyang oripon sagkod sa panahon na daing talaan.”—Ex. 21:5, 6.

6, 7. (a) Paano nakikinabang an mga tawo sa kapanugaan? (b) Ano an ipinaparisa kaiyan manongod sa satong relasyon ki Jehova?

⁶ An pag-agoman sarong relasyon na nagkakaipo nin halangkaw na klase nin kapanugaan. Iyan sarong kapanugaan, bakong sa sarong kontrata, kundi sa sarong tawo. An duwang tawo na nagsasaro na bakong kasal nungkang magkakaigwa nin tunay na katiwasayan; iyo man an saindang mga aki. Alagad, an mag-agom na nanuga sa lambang saro sa kagalanggalang na pag-agoman igwa nin mapuersang dahelan sono sa Kasuratan na pagmaigotan na resolberan an mga problema paagi sa pagkamoot.—Mat. 19:5, 6; 1 Cor. 13:7, 8; Heb. 13:4.

⁷ Kan mga panahon kan Biblia, an mga tawo nakinabang sa pagkaigwa nin mga kontrata na obligadong otobon, sa negosyo man o sa trabaho. (Mat. 20:1, 2, 8) Totoo man iyan ngonyan. Halimbawa, bago kita magpoon nin negosyo o magpoon sa trabaho bilang empleyado nin sarong kompanya, nakikinabang kita sa pagkaigwa nin nasusurat na kasundoan, o nasusurat na kontrata, na obligadong otobon. Huli kaini, kun an kapanugaan nagpapakosog sa mga relasyon na siring baga nin magkatood, mag-agom, saka among asin empleyado, an lubos na pagdusay lalo na nanggad na magtatao nin pakinabang sa saindo sa relasyon nindo ki Jehova! Pag-olayan niato ngonyan kun paano nakinabang an mga tawo kan nakaagi sa pagigin dusay ki Jehova Dios asin kun paano ini orog nanggad kisa sa sarong kapanugaan sana.

Kun Paano Nakinabang an Israel sa Pagigin Dusay sa Dios

8. Ano an nagin kahulogan para sa Israel kan saindang pagigin dusay sa Dios?

⁸ An nasyon nin Israel sa kabilogan nagin dusay ki Jehova kan sinda gumibo nin panuga sa Dios. Sinabi sa sainda ni Jehova na magtiripon sinda harani sa Bukid nin Sinai, dangan sia nagsabi sa sainda: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na rogaring hale sa gabos na ibang banwaan.” An banwaan may pagkasararong nagsimbag: “An gabos na sinabi ni Jehova andam niamong gibohon.” (Ex. 19:4-8) Para sa Israel, an pagigin dusay mas mahalaga nanggad kisa sa saindang kapanugaan na gibohon an sarong bagay.  Nangahulogan iyan na sinda sadiri ni Jehova, asin ibinilang sinda ni Jehova na saiyang “espesyal na rogaring.”

9. Paano nakinabang an Israel sa pagigin dusay sa Dios?

⁹ An mga Israelita nakinabang sa pagigin sadiri ni Jehova. Sia maimbod asin inataman sinda kun paanong inaataman nin sarong mamomoton na magurang an saiyang aki. An Dios nagsabi sa Israel: “Malilingawan daw nin agom na babae an saiyang pinapasuso kaya dai sia maheherak sa aki kan saiyang tulak? Dawa makalingaw an mga babaeng ini, pero ako dai makakalingaw sa saimo.” (Isa. 49:15) Itinao sa sainda ni Jehova an paggiya kan Ley, pagparigon kan mga propeta, asin pagprotehir kan mga anghel. Sarong salmista an nagsurat: “Sinasabi nia an saiyang tataramon ki Jacob, an saiyang mga susundon asin an saiyang hudisyal na mga desisyon ki Israel. Bakong arog kaiyan an ginibo nia sa arin man na iba pang nasyon.” (Sal. 147:19, 20; basahon an Salmo 34:7, 19; 48:14.) Kun paanong inataman ni Jehova kan nakaagi an nasyon na sadiri nia, aatamanon man nia ngonyan an mga tawong nagdudusay kan saindang sadiri sa saiya.

Kun Taano ta Maninigo Niatong Idusay an Satong Sadiri sa Dios

10, 11. Kita daw namundag sa laog kan unibersal na pamilya nin Dios? Ipaliwanag.

¹⁰ Mantang hinohorophorop an Kristianong pagdusay asin bautismo, an nagkapira tibaad maghapot, ‘Taano ta dai ako puedeng sumamba sa Dios kun dai ko idusay an sakong sadiri sa saiya?’ Magigin maliwanag an dahelan kun iisip-isipon niato an katunayan kan satong presenteng kamugtakan sa atubangan nin Dios. Girumdomon na huli sa kasalan ni Adan, kita gabos namundag sa luwas kan pamilya nin Dios. (Roma 3:23; 5:12) An pagdusay kan satong sadiri sa Dios sarong mahalagang marhay na kahagadan tanganing kita akoon sa saiyang unibersal na pamilya. Aramon niato kun taano.

¹¹ Mayo sa sato an may ama sa laman na makakatao kan buhay na maninigo kutanang para sa sato—an sangkap na buhay. (1 Tim. 6:19) Kita dai namundag bilang mga aki nin Dios huling kan magkasala an enot na mag-agom, an katawohan nagin nang suway sa mamomoton na Ama asin Kaglalang kaiyan. (Ikomparar an Deuteronomio 32:5.) Poon kaidto, namumuhay na sa luwas kan unibersal na pamilya ni Jehova an kinaban nin katawohan, na siblag sa Dios.

12. (a) Paano an bakong sangkap na mga tawo puedeng magin miembro kan pamilya nin Dios? (b) Anong mga lakdang an dapat niatong gibohon bago kita magpabautismo?

¹² Minsan siring, bilang mga indibiduwal puede kitang makiolay na logod akoon kita nin Dios sa saiyang pamilya nin inooyonan na mga lingkod. * Paano iyan magigin posible para sa mga makasalan na siring sa sato? Si apostol Pablo nagsurat: “Kan kita mga kaiwal pa, kita nakapakipag-uli sa Dios paagi sa kagadanan kan saiyang Aki.” (Roma 5:10) Sa bautismo, kita naghahagad sa Dios nin marahay na konsensia tanganing akoon nia. (1 Ped. 3:21) Minsan siring, bago magpabautismo may mga lakdang na dapat kitang gibohon. Dapat niatong mamidbid an Dios, makanood na magtiwala sa saiya, magsolsol, asin bagohon an satong pamumuhay. (Juan 17:3; Gibo 3:19; Heb. 11:6) Asin igwa pang dapat gibohon bago kita akoon sa pamilya nin Dios. Ano iyan?

13. Taano ta angay para sa saro na gumibo nin panuga na pagdusay sa Dios tanganing magin kabtang kan Saiyang pamilya nin inooyonan na mga parasamba?

¹³ Bago an saro na siblag sa Dios magin miembro kan pamilya nin inooyonan na mga lingkod nin Dios, kaipuhan nguna niang gumibo nin solemneng panuga ki Jehova. Tanganing masabotan kun taano, imahinara an sarong respetadong ama na nagpapaheling nin maboot na interes sa sarong ilong hoben asin gustong amponon sia bilang miembro kan saiya mismong pamilya. Midbid an ama bilang marahay na tawo. Pero, bago akoon an hoben bilang aki nia, gusto kan lalaking iyan na an hoben gumibo nin panuga. Kaya an lalaki nagsabi, “Bago taka akoon bilang aki ko, gusto kong maaraman kun mamomotan asin igagalang mo ako bilang saimong ama.” An hoben aakoon kan lalaki sa saiyang pamilya solamente kun an hoben na iyan andam na gumibo nin solemneng panuga. Bako daw na rasonable iyan? Kaagid kaiyan, an  solamenteng inaako ni Jehova sa saiyang pamilya iyo an mga andam na gumibo nin panuga na pagdusay sa saiya. An Biblia nagsabi: “Idolot nindo sa saiya an saindo mismong sadiri: sarong buhay na atang, dusay asin angay na akoon nia.”—Roma 12:1, The New English Bible.

Sarong Akto nin Pagkamoot Asin Pagtubod

14. Sa anong paagi na an pagdusay sarong kapahayagan nin pagkamoot?

¹⁴ An paggibo nin panuga na pagdusay sa Dios sarong kapahayagan kan satong odok sa pusong pagkamoot ki Jehova. Sa nagkapirang paagi, kaagid iyan sa sumpaan sa kasal. An sarong Kristianong nobyo nagpapahayag kan saiyang pagkamoot paagi sa pagpanuga na magigin maimbod sa saiyang nobya, ano man an mangyari. Iyan sarong panunumpa sa sarong tawo imbes na saro sanang panuga na gigibohon an sarong bagay. Nasasabotan nin sarong Kristianong nobyo na dai nia puedeng magin agom an saiyang nobya kun sia dai magibo nin sumpa sa kasal. Sa kaagid na paagi, dai niato lubos na makakamtan an mga pakinabang nin pagigin miembro kan pamilya ni Jehova kun kita dai magibo nin panuga na pagdusay. Kaya idinudusay niato an satong sadiri sa Dios huling, sa ibong kan satong pagkabakong sangkap, mawot niatong magin sadiri nia asin desidido kitang magin maimbod sa saiya, ano man an mangyari.—Mat. 22:37.

15. Paanong an pagdusay sarong akto nin pagtubod?

¹⁵ Kun idinudusay niato an satong sadiri sa Dios, naggigibo kita nin sarong akto nin pagtubod. Taano man? An pagtubod niato ki Jehova nagtatao sa sato nin kompiansa na marahay para sa sato an pagrani sa Dios. (Sal. 73:28) Aram niato na dai magigin pirmeng pasil an paglakaw kaiba nin Dios mantang kita namumuhay sa tahaw “nin biko asin biribid na kapag-arakian,” alagad nagtitiwala kita sa panuga nin Dios na susuportaran kita sa satong mga paghihingoa. (Fil. 2:15; 4:13) Aram niato na kita bakong sangkap, alagad may kompiansa kita na si Jehova magigin maheherakon sa sato dawa kun kita nasasala. (Basahon an Salmo 103:13, 14; Roma 7:21-25.) Kita nagtutubod na tatawan ni Jehova nin balos an desisyon niato na papagdanayon an satong integridad.—Job 27:5.

An Pagdusay sa Dios Nagreresulta sa Kaogmahan

16, 17. Taano an pagdusay ki Jehova ta nagreresulta sa kaogmahan?

¹⁶ An pagigin dusay ki Jehova nagreresulta sa kaogmahan huling kalabot dian an pagtao kan satong panahon asin kosog. Ipinahayag ni Jesus an sarong pundamental na katotoohan kan sia magsabi: “Igwang orog na kaogmahan sa pagtao kisa sa pag-ako.” (Gibo 20:35) Lubos na naeksperyensiahan ni Jesus an kaogmahan sa pagtao durante kan saiyang ministeryo digdi sa daga. Kun kaipuhan, ginibo nia iyan na mayong pahingalo, mayong pagkakan, asin bakong komportable tanganing matabangan nia an iba na manompongan an dalan pasiring sa buhay. (Juan 4:34) Ikinaogmang marhay ni Jesus an pagpagayagaya sa puso kan saiyang Ama. Si Jesus nagsabi: “Danay kong ginigibo an mga bagay na nakakapaogma sa saiya.”—Juan 8:29; Tal. 27:11.

¹⁷ Sa siring, itinokdo ni Jesus sa saiyang mga parasunod an nakakakontentong pamumuhay kan sabihon nia: “Kun an siisay man boot na magsunod  sa sako, paindahan nia an saiyang sadiri.” (Mat. 16:24) Sa paggibo kaiyan, mas napapadayupot kita ki Jehova. Puede daw niatong ipagkatiwala an satong sadiri sa kiisay pa man na makakapangataman sa sato sa mas mamomoton na paagi?

18. Taano an pamumuhay kaoyon kan satong pagdusay ki Jehova ta nagtatao nin orog na kaogmahan kisa sa pagigin dusay sa ano man o sa kiisay pa man?

¹⁸ An pagdusay kan satong sadiri ki Jehova dangan pamumuhay kaoyon kan pagdusay na iyan paagi sa paggibo kan saiyang kabotan nagtatao nin orog na kaogmahan kisa sa pagdusay sa ano man o sa kiisay pa man. Halimbawa, idinudusay nin dakol na tawo an saindang buhay sa pagkaigwa nin materyal na kayamanan, pero dai man sinda nagkakamit nin totoong kaogmahan asin tunay na pagkakontento. Minsan siring, an mga nagdudusay kan saindang sadiri ki Jehova nagkakaigwa nin nagdadanay nanggad na kaogmahan. (Mat. 6:24) An onra nin pagigin “mga kapwa trabahador nin Dios” nagpapaogma sa sainda, pero an saindang pagdusay bakong sa trabaho kundi sa satong mapag-apresyar na Dios. (1 Cor. 3:9) Mayo na nin maorog pa sa saiya sa pagigin mapag-apresyar sa pagsakripisyo ninda. Ibabalik pa ngani nia sa pagkahoben an mga maimbod sa saiya tanganing makinabang sinda sa pag-ataman nia sagkod lamang.—Job 33:25; basahon an Hebreo 6:10.

19. Ano an nakakamtan kan mga dusay ki Jehova?

¹⁹ An saindong pagdusay ki Jehova nagreresulta sa saindong dayupot na relasyon sa saiya. An Biblia nagsasabi: “Rumani kamo sa Dios, asin sia marani sa saindo.” (Sant. 4:8; Sal. 25:14) Sa sunod na artikulo, pag-oolayan niato kun taano ta puede kitang magkaigwa nin kompiansa sa satong desisyon na magin sadiri ni Jehova.

[Nota sa Ibaba]

Ano an Isisimbag Nindo?

• Ano an boot sabihon kan pagdusay nin saro kan saiyang sadiri sa Dios?

• Paano kita nakikinabang sa pagigin dusay sa Dios?

• Taano an mga gustong magin Saksi ni Jehova ta kaipuhan na magdusay sa Dios?

[Mga Hapot Para sa Pag-adal]

[Ritrato sa pahina 6]

An pamumuhay kaoyon kan satong pagdusay nagreresulta sa nagdadanay na kaogmahan