¿Chucoch yom mi la cʌcʼ lac bʌ ti Jehová?

«Cheʼ ti acʼʌlel tsiʼ pʌsbeyon i bʌ juntiquil i yángel jiñi c Dios muʼ bʌ c melben chʼujul bʌ i yeʼtel» (HECH. 27:23).

1. a) ¿Chuqui yom miʼ mel juntiquil chaʼan miʼ mejlel i chʼʌmeʼ jaʼ? b) ¿Chuqui ti cʼajtiya tac mi caj la cʌqʼuen i jacʼbal?

 JUMPʼEJL cʼajtiya muʼ bʌ i melbentelob tiʼ yujtibal jiñi discurso muʼ bʌ i cajelob ti chʼʌmjaʼ jiñʌch: «¿Tsaʼix baʼ cʌyʌ a mul yicʼot tsaʼix baʼ wʌcʼʌ a bʌ ti Jehová, i mucʼʌch baʼ ñop chaʼan Jesucristo jiñʌch tsaʼ bʌ i yʌcʼʌ Dios chaʼan mi lac taj laj coltʌntel». ¿Chucoch jiñi xñoptʼañob yom miʼ yʌcʼob i bʌ ti Jehová? ¿Chuqui ti wenlel tac miʼ tajob? ¿Chucoch ñuc i cʼʌjñibal miʼ melob ili chaʼan Dios miʼ chʼʌm ti ñuc jiñi eʼtel muʼ bʌ i melob? Chaʼan mi lac tajben i jacʼbal ili cʼajtiya tac, ñaxan yom mi lac chʼʌmben i sujm chuqui yom i yʌl cheʼ mi la cʌcʼ lac bʌ ti Dios.

2. ¿Chuqui i sujmlel cheʼ mi la cʌcʼ lac bʌ ti Jehová?

² ¿Chuqui yom i yʌl cheʼ mi la cʌcʼ lac bʌ ti Dios? Junchajp muʼ bʌ caj i coltañonla la cʌqʼuen i jacʼbal, jiñʌch tsaʼ bʌ i yʌlʌ Pablo cheʼ bʌ an ti jumpʼejl barco tsʼitaʼ jax bʌ yom chaʼan miʼ sujpʼel ti jaʼ. Jiñi apóstol Pablo tsiʼ yʌlʌ tiʼ tojlel Jehová: «Jiñi c Dios». Ili tsiʼ pʌsʌ chaʼan añʌch tiʼ wenta Dios (pejcan Hechos 27:22-24). Anquese jiñi pañimil an tiʼ pʼʌtʌlel Satanás, jiñi xñoptʼañonbʌla i chaʼañonla Jehová (1 Juan 5:19). ¿Bajcheʼ tsaʼ sujtiyonla tiʼ chaʼan? Tsaʼ lac mele cheʼ bʌ tsaʼ la cʌcʼʌ lac bʌ tiʼ tojlel, yom bʌ i yʌl, chaʼan tsaʼ la cʌqʼue lac tʼan ti jumpʼejl oración, i ti wiʼil tsaʼ lac chaʼle chʼʌmjaʼ.

3. ¿Baqui bʌ i sujmlel cheʼ bʌ tsiʼ chaʼle chʼʌmjaʼ Jesús, i bajcheʼ miʼ lajiñob jiñi xñoptʼañob ili ora?

³ Jesús tsiʼ cʌybeyonla jumpʼejl ejemplo cheʼ bʌ tsiʼ yajca i melben i yeʼtel i Tat. Mach cʼʌñʌlic miʼ chaʼ acʼ i bʌ ti Dios come tsiʼ yila pañimil ti jiñi tejclum Israel yajcʌbilix bʌ i chaʼan Dios, pero cheʼ bʌ tsiʼ chʼʌmʌ jaʼ tsaʼʌch i mele junchajp wen ñuc bʌ i cʼʌjñibal mach bʌ añic ti jiñi Mandar. Cheʼ bajcheʼ miʼ yʌl jiñi Biblia, Jesús tiʼ sube Jehová: «Qʼuele, tsaʼ tiliyon chaʼan mic mel chuqui a wom» (Heb. 10:7; Luc. 3:21). Jin chaʼan, cheʼ bʌ Jesús tsiʼ chʼʌmʌ jaʼ tiʼ tsictesʌbe i Tat chaʼan mi caj i mel pejtelel chuqui miʼ cʼajtiben. Ili ora, jiñi xñoptʼañonbʌla mi lac tsajcʌben i yejemplo cheʼ mi lac chaʼlen chʼʌmjaʼ, anquese mucʼʌch lac tsictesan tiʼ tojlel yañoʼ bʌ chaʼan tsaʼ la cʌcʼʌ lac bʌ ti Jehová ti oración.

Wenlel tac muʼ bʌ lac taj cheʼ mi la cʌcʼ lac bʌ ti Dios

4. Cheʼ bajcheʼ David yicʼot Jonatán, ¿baqui bʌ i wenlel cheʼ lʌcʼʌl mi la cajñel la quicʼot la camigo?

⁴ Cheʼ mi lac waʼchocon lac tʼan, mach alasic jach. Wen ñucʌch i cʼʌjñibal cheʼ mi la cʌcʼ lac bʌ ti Dios. Pero ¿chuqui ti wenlel mi lac taj? Chaʼan mi lac chʼʌmben i sujm, laʼ lac tsajin baqui bʌ i wenlel cheʼ lʌcʼʌl mi la cajñel la quicʼot lac piʼʌlob. Jumpʼejl ejemplo, jiñʌch cheʼ la com juntiquil la camigo. Mi la com juntiquil wem bʌ la camigo, yom wem bʌ amigojonla jaʼel. Yomʌch mi lac wen qʼuel ti ñuc yicʼot yom mi lac wen ñaʼtan bajcheʼ miʼ mejlel laj coltan. Yaʼ ti Biblia miʼ tajtʌl ti tʼan David yicʼot Jonatán tsaʼ bʌ sujtiyob ti wem bʌ amigojob. Iliyob tsaʼʌch i temeyob i tʼan chaʼan lʌcʼʌl mi caj i yajñelob tiʼ pejtelel ora (pejcan 1 Samuel 17:57 yicʼot 18:1, 3). Ili ora, mach wen cabʌlix amigojoʼ bʌ lʌcʼʌl bʌ miʼ yajñelob bajcheʼob, pero muʼ bʌ mejlel i coltañob jiñi i yamigojob i bʌ chaʼan lʌcʼʌl miʼ yajñelob, jiñʌch cheʼ miʼ qʼuelob i bʌ ti ñuc yicʼot miʼ ñaʼtañob bajcheʼ miʼ mejlel i coltañob i bʌ (Pr. 17:17; 18:24).

5. ¿Chuqui miʼ mejlel i mel juntiquil xyaj eʼtel mi yom cʌytʌl tiʼ pejtelel ora yicʼot i yum?

⁵ Yaʼ ti Israel an jumpʼejl Mandar muʼ bʌ i pʌsbeñonla chuqui ti wenlel miʼ taj juntiquil lac piʼʌl cheʼ bʌ miʼ mel jumpʼejl trato yicʼot yambʌ. Jiñi Mandar miʼ yʌl bajcheʼ iliyi: «Mi tsiʼ yʌlʌ jini xʼeʼtel: Cʼux mi cubin c yum quicʼot quijñam quicʼot calobilob. Mach comic loqʼuel, mi cheʼen, i yum mi caj i pʌy majlel baʼ miʼ yujtel meloñel. Yaʼ ti poste baʼan i puertajlel o mi chumteʼ, i yum mi caj i chʼuben i chiquin ti tsucul taqʼuin. Mux i yochel ti toʼol eʼtel tiʼ wenta i yum tiʼ pejtelel ora» (Éx. 21:5, 6). Cheʼ bajcheʼ miʼ yʌl jiñi Biblia, mi juntiquil xyaj eʼtel yom i bej ubin i tijicñʌyel yicʼot jiñi uts bʌ i yum, yomʌch miʼ mel jumpʼejl trato muʼ bʌ i pʌs chaʼan i chaʼañix i yum.

6, 7. a) ¿Bajcheʼ miʼ coltañonla cheʼ mi lac waʼchocon lac tʼan? b) ¿Chuqui miʼ mejlel la cʌl chaʼan bajcheʼ yilal añonla la quicʼot Jehová yicʼot cheʼ mi la cʌqʼuen lac tʼan?

⁶ Yambʌ ejemplo muʼ bʌ mejlel i coltañonla lac ñaʼtan iliyi jiñʌch jiñi ñujpuñel. Wen ñucʌch i cʼʌjñibal cheʼ mucʼʌch i tsʼʌctesañob i tʼan jiñi muʼ bʌ i ñujpuñelob, come miʼ waʼchocoñob i tʼan tiʼ tojlel i piʼʌl i mach jiñic ti jiñi jun. Mi juntiquil wiñic yicʼot xʼixic maʼañic ñujpuñemob, maʼañic baʼ ora mi caj i yʌqʼueñob jiñi i piʼʌl yicʼot i yalobilob jiñi ñʌchʼtʌlel añoʼ bʌ i chaʼan jiñi xñoptʼañob ñujpuñemoʼ bʌ. Cheʼ jaʼel, maʼañic mi caj i wen qʼuelob ti ñuc yom bʌ melol tiʼ familia yicʼot bajcheʼ yom miʼ tojʼesañob jiñi wocol tac (Mat. 19:5, 6; 1 Cor. 13:7, 8; Heb. 13:4).

⁷ Jiñi cojix bʌ muʼ bʌ caj laj qʼuel jiñʌch chaʼan bajcheʼ yomonla ti la queʼtel. Ti wajali, wen ñuc i cʼʌjñibal jiñi contrato tac (Mat. 20:1, 2, 8). Jiñi contrato tac miʼ mejlel i coltañonla mi an chuqui miʼ yujtel cheʼ bʌ mi lac tech jumpʼejl negocio o eʼtel yicʼot yambʌ lac piʼʌlob. Cheʼ bajcheʼ tsaʼix laj qʼuele, mi la com chaʼan wen mi la cajñel yicʼot yañoʼ bʌ, bajcheʼ jiñi la camigojob, ti lac ñujpuñel, o ti la queʼtel, yomʌch mi lac tsʼʌctesan ti wen jiñi lac tʼan. Ixcu ti lac tojlel, ¿chuqui ñumen ñuc bʌ muʼ bʌ mejlel i lʌcʼtesañonla ti Jehová? Jiñʌch cheʼ mi la cʌqʼuen laj cuxtʌlel. Wʌle, laʼ laj qʼuel chuqui ti wenlel tsiʼ tajayob jiñi tsaʼ bʌ i yʌcʼʌyob i bʌ ti Dios ti wajali yicʼot chucoch mach toʼol trato jach.

Israel tsiʼ taja i wenlel cheʼ tsiʼ yʌcʼʌ i bʌ ti Dios

8. ¿Chuqui yom i yʌl cheʼ jiñi israelitajob tsiʼ yʌcʼʌyob i bʌ ti Jehová?

⁸ Jiñi israelitajob tsaʼʌch i yʌcʼʌyob i bʌ ti Jehová cheʼ bʌ tsiʼ meleyob jumpʼejl trato. Jehová tsiʼ tempayob yaʼ ti wits Sinaí, i tiʼ subeyob: «Mi utsʼat mi laʼ jacʼ jini xucʼul bʌ c tʼan, mi caj laʼ wochel tic chaʼan tiʼ tojlel pejtelel colem tejclum tac». I jiñi israelitajob tsiʼ jacʼʌyob: «Mi caj c mel lojon cheʼ bajcheʼ tsiʼ yʌlʌ lac Yum» (Éx. 19:4-8). Cheʼ bʌ jiñi israelitajob tsiʼ yʌcʼʌyob i bʌ tiʼ tojlel Jehová, mach toʼol tʼañic jach. Wolʌch i yʌcʼob i bʌ ti cʌñol chaʼan i chaʼañobix Jehová, i Jehová tsiʼ yʌlʌ chaʼan mi caj i sujtelob tiʼ wiñicob.

9. ¿Chuqui ti wenlel tsiʼ tajayob jiñi israelitajob cheʼ tsiʼ yʌcʼʌyob i bʌ ti Dios?

⁹ Cheʼ bʌ jiñi israelitajob i chaʼañobix Jehová, tsiʼ tajayob cabʌl i wenlel. Jehová tsiʼ pʌsʌ i xucʼtʌlel, i yutslel tiʼ tojlelob yicʼot tsiʼ qʼuele bajcheʼ i yalobilob. Jehová tiʼ subeyob: «¿Muʼ ba ñajʌyel i chaʼan xʼixic i yalobil? ¿Muʼ ba i cʌy i cʼuxbin i yalobil tsaʼ bʌ i yʌcʼʌ ti pañimil? Añʌch muʼ bʌ i cʌy muʼ bʌ i ñajʌyel i chaʼan. Pero joñon mach cheʼicon. Mach ñajʌyiyetic c chaʼan» (Is. 49:15). Jehová tsiʼ colta jiñi i tejclum cheʼ bʌ tsiʼ yʌqʼueyob i Mandar, cheʼ bʌ tsiʼ cʼʌñʌ xʼaltʼañob chaʼan miʼ ñuqʼuesʌbeñob i pusicʼal yicʼot cheʼ bʌ tsiʼ cʼʌñʌ ángelob chaʼan miʼ cʌntañob. Jiñi salmista tsiʼ yʌlʌ: «[Jehová] tsiʼ yʌqʼue i tʼan Jacob. Tsiʼ subeyob israelob i mandar yicʼot i ley. Mach cheʼic tsiʼ mele tiʼ tojlel yan tac bʌ colem tejclum» (Sal. 147:19, 20; pejcan Salmo 34:7, 19 yicʼot 48:14). Cheʼ bajcheʼ ti wajali tsiʼ cʌnta jiñi tejclum Israel, ili ora cheʼʌch miʼ cʌntan jaʼel jiñi xñoptʼañob tsaʼix bʌ i yʌcʼʌyob i bʌ tiʼ tojlel.

¿Chucoch yom mi la cʌcʼ lac bʌ ti Dios?

10, 11. ¿Chucoch maʼañic mi la quilan pañimil tiʼ familia Jehová?

¹⁰ An muʼ bʌ i ñaʼtañob: «¿Chucoch yom mi cʌcʼ c bʌ yicʼot mic chaʼlen chʼʌmjaʼ chaʼan miʼ mejlel c melben i yeʼtel Jehová?». Mi caj lac tajben i jacʼbal ili miʼ mucʼʌch laj cʼajtesan bajcheʼ yilal añonla tiʼ tojlel Dios ili ora. Tiʼ caj jiñi mulil tsaʼ bʌ i mele Adán, maʼañic mi la quilan pañimil tiʼ familia Jehová (Rom. 3:23; 5:12). Cojach mi caj la cochel tiʼ familia mi mucʼʌch la cʌcʼ lac bʌ tiʼ tojlel. ¿Chucoch? Laʼ laj qʼuel.

¹¹ Maʼañic mi juntiquilic lac piʼʌl wʌʼ ti pañimil am bʌ juntiquil i tat muʼ bʌ mejlel i yʌqʼuen toj bʌ i cuxtʌlel (1 Tim. 6:19). Ti lac pejtelel xmulilonla yicʼot mach weñic añonla la quicʼot Dios come tilemonla tiʼ pʼolbal Adán (laja yicʼot Deuteronomio 32:5). Cʼʌlʌl ti jimbʌ ora, jiñi lac piʼʌlob mach ochemobic tiʼ familia Jehová yicʼot ñajt añob tiʼ tojlel.

12. a) ¿Chuqui miʼ mejlel i melob jiñi lac piʼʌlob xmuliloʼ bʌ chaʼan miʼ yochelob tiʼ familia Jehová? b) ¿Chuqui yom miʼ ñaxan melob cheʼ bʌ muʼto caj i chaʼleñob chʼʌmjaʼ?

¹² Anquese cheʼ bajcheʼ jiñi, jujuntiquilonla miʼ mejlel laj cʼajtiben Jehová chaʼan miʼ yotsañonla tiʼ familia. * Pero ¿bajcheʼ mi lac mejlel ti ochel tiʼ familia mi xmulilonla? Cheʼ bajcheʼ tsiʼ yʌlʌ Pablo: «Tsaʼ utsʼayonla la quicʼot Dios cheʼ bʌ tsaʼ chʌmi jiñi i Yalobil cheʼ bʌ i contrajontola» (Rom. 5:10). Chaʼan mi lac mejlel ti ochel tiʼ familia, yom mi laj cʼajtiben wem bʌ laj conciencia, i junchajp bajcheʼ mi lac mel jiñʌch cheʼ mi lac chʼʌmeʼ jaʼ (1 Ped. 3:21). Pero añʌch chuqui yom bʌ mi lac ñaxan mel. Ñaxam bʌ, yom mi lac wen cʌn Jehová yicʼot mi lac ñop tiʼ tojlel. Cheʼ jiñi, mi lac chaʼ ñaʼtan lac bʌ yicʼot mi laj qʼuextan jiñi lac melbal tac (Juan 17:3; Hech. 3:19; Heb. 11:6). ¿Chuqui miʼ mejlel lac mel ti wiʼil?

13. ¿Chucoch yomʌch mi la cʌcʼ lac bʌ tiʼ tojlel Dios chaʼan mi lac mejlel ti ochel ti jiñi familia muʼ bʌ i chʼujutesañob?

¹³ Chaʼan mi la cochel ti jiñi familia muʼ bʌ i chʼujutesañob Dios, yomʌch mi lac waʼchocoben lac tʼan. ¿Chucoch? Jumpʼejl ejemplo, laʼcu lac ñaʼtan chaʼan juntiquil tatʌl muʼ bʌ i qʼuejlel ti ñuc tiʼ lumal miʼ cʌn juntiquil mebaʼ alob. Jiñi tatʌl miʼ cʼotel i cʼuxbin yicʼot miʼ pʌy majlel ti chumtʌl tiʼ yotot. Pero mucʼʌch i suben ili tʼan: «Com chaʼan maʼ wʌqʼueñon a tʼan chaʼan mi caj a qʼuelon bajcheʼ a tat, mi caj a cʼuxbiñon yicʼot mi caj a qʼuelon ti ñuc tiʼ pejtelel ora». Mi jiñi alob mach yomic i waʼchocon i tʼan, jiñi tatʌl maʼañic mi caj i qʼuel bajcheʼ i yalobil. ¿Wocol ba woli bʌ i cʼajtin? Maʼañic. Ili cheʼʌch miʼ yujtel jaʼel tiʼ tojlel Jehová. Cojach mi caj i chʼʌm tiʼ familia jiñi muʼ bʌ i yʌcʼ i bʌ tiʼ tojlel. Cheʼʌch miʼ yʌl jiñi Biblia, miʼ subeñonla chaʼan yom mi la cʌcʼ jiñi lac bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios (Rom. 12:1).

Mi lac pʌs cʼuxbiya yicʼot ñopoñel

14. ¿Chucoch jiñʌch junchajp bajcheʼ mi lac pʌs laj cʼuxbiya cheʼ mi la cʌcʼ lac bʌ tiʼ tojlel Dios?

¹⁴ Cheʼ mi la cʌcʼ lac bʌ tiʼ tojlel Jehová mi lac pʌsben chaʼan mi laj cʼuxbin. Lʌcʼʌ lajal bajcheʼ jiñi tʼan muʼ bʌ i subeñob i bʌ jiñi muʼ bʌ i ñujpuñelob. Cheʼ bʌ woliyob ti ñujpuñel, jiñi xñoptʼan miʼ suben i novia chaʼan tiʼ pejtelel ora mi caj i yajñel yicʼot, mach yʌlʌyic chuqui miʼ yujtel. Ili mach toʼol tʼañic jach woli bʌ i suben, woliyʌch i suben chaʼan xucʼul mi caj i yajñel yicʼot. Cheʼ jaʼel, yujil chaʼan maʼañic mi caj i mejlelob ti tem ajñel mi maʼañic mi ñaxan aqʼueñob i bʌ i tʼan. Joñonla jaʼel, maʼañic miʼ mejlel lac luʼ taj jiñi bendición am bʌ i chaʼan jiñi i familia Jehová mi maʼañic mi lac ñaxan acʼ lac bʌ tiʼ tojlel. Tiʼ sujm, mi la cʌcʼ lac bʌ tiʼ tojlel Dios come la com ochel tiʼ familia, i anquese xmulilonla la com xucʼulonla tiʼ tojlel mach yʌlʌyic chuqui miʼ yujtel (Mat. 22:37).

15. ¿Chucoch mi la cʌl chaʼan cheʼ mi la cʌcʼ lac bʌ ti Dios mi lac pʌs lac ñopoñel?

¹⁵ Cheʼ mi la cʌcʼ lac bʌ ti Dios, mi lac pʌs lac ñopoñel. Mi la cʌcʼ lac bʌ ti Jehová come jiñʌch jiñi ñumen wem bʌ amigo muʼ bʌ mejlel lac taj yicʼot mucʼʌch lac wen ñop tiʼ tojlel (Sal. 73:28). La cujil chaʼan mach cʼuñic ti melol i yeʼtel Jehová come chumulonla baqui an jontol bʌ lac piʼʌlob. Pero la cujilʌch chaʼan Dios mi caj i tsʼʌctesan i tʼan chaʼan mi caj i yʌqʼueñonla i bendición mi mucʼʌch laj cuch (Filip. 2:15; 4:13). Miʼ mejlel lac wen ñop chaʼan mucʼʌch caj i pʌsbeñonla i pʼuntaya cheʼ bʌ mi lac taj lac sajtemal come xmulilonla (pejcan Salmo 103:13, 14 yicʼot Romanos 7:21-25). Cheʼ jaʼel, la cujil chaʼan mi caj i yʌqʼueñonla i bendición mi mucʼʌch lac chaʼlen wersa chaʼan xucʼul mi la cajñel (Job 27:5).

Tijicñayonla cheʼ mi la cʌcʼ lac bʌ ti Dios

16, 17. ¿Chucoch mi lac ñumen taj lac tijicñʌyel cheʼ mi la cʌcʼ lac bʌ ti Dios?

¹⁶ Cheʼ mi la cʌcʼ lac bʌ ti Dios miʼ yʌqʼueñonla lac tijicñʌyel come woli la cʌqʼuen laj cuxtʌlel. I cheʼ bajcheʼ tsiʼ yʌlʌ Jesús: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hech. 20:35). Cheʼ bʌ Jesús tsajñi wʌʼ ti pañimil tsiʼ chaʼle wersa i coltan yañoʼ bʌ, i jiñi tsiʼ yʌqʼue i tijicñʌyel. Jumpʼejl ejemplo, an i tajol maʼañic tsiʼ cʼaja i yo yicʼot maʼañic tsiʼ cʼuxu i waj come yom i cʌntesan jiñi yañoʼ bʌ jiñi bij muʼ bʌ i yʌcʼ cuxtʌlel (Juan 4:34). Tsaʼ bʌ i ñumen aqʼue i tijicñʌyel jiñʌch cheʼ miʼ mel muʼ bʌ i mulan i Tat, jin chaʼan tsiʼ yʌlʌ: «Tiʼ pejtelel ora mic mel chuqui miʼ mulan» (Juan 8:29; Pr. 27:11).

¹⁷ Jesús tiʼ sube jiñi xcʌntʼañob bajcheʼ miʼ mejlel i ñumen tajob i tijicñʌyel: «Mi an majqui yom i tsajcañon, laʼ i cʌy i bajñel sʌclan i wenlel» (Mat. 16:24). Cheʼ bʌ mi laj cʌy lac bajñel sʌclan lac wenlel, mi lac ñumen lʌcʼtesan lac bʌ ti jiñi Dios xcʼuxbiya bʌ. Tiʼ sujm, maʼañic baqui yambʌ mi lac mejlel ti ajñel bajcheʼ iliyi.

18. ¿Chucoch miʼ ñumen aqʼueñonla lac tijicñʌyel cheʼ mi la cʌcʼ lac bʌ ti Dios i mach jiñic tiʼ tojlel juntiquil wiñic o ti jiñi chubʌʼañʌl tac?

¹⁸ Jiñi muʼ bʌ i yʌcʼob i bʌ tiʼ melol i yeʼtel juntiquil wiñic o miʼ chaʼleñob wersa i yochelob ti rico, maʼañic miʼ tajob i sujm bʌ tijicñʌyel. Pero jiñi muʼ bʌ i yʌcʼob i bʌ tiʼ tojlel Jehová i miʼ melob cheʼ bajcheʼ miʼ mulan, qʼuexelobʌch, mucʼʌch i tajob i tijicñʌyel cheʼ bajcheʼ chumulob (Mat. 6:24). Jiñi xñoptʼañob miʼ tajob i tijicñʌyel come miʼ tem chaʼleñob eʼtel yicʼot Dios. Pero maʼañic miʼ ñajʌyel i chaʼañob chaʼan mach jiñic jiñi eʼtel tsaʼ bʌ i yʌqʼueyob i tʼan, jiñʌch jiñi Dios muʼ bʌ i qʼuelob ti ñuc (1 Cor. 3:9). Maʼañic yambʌ muʼ bʌ i ñumen qʼuel ti ñuc jiñi lac xucʼtʌlel yicʼot chuqui mi lac mel cheʼ bajcheʼ Jehová. Cheʼto jaʼel, mi caj i chaʼ sutqʼuin lac bʌcʼtal bajcheʼ i chaʼan juntiquil chʼiton, i mi caj i cʌntañonla tiʼ pejtelel ora (Job 33:25; pejcan Hebreos 6:10).

19. ¿Chuqui miʼ tajob jiñi muʼ bʌ i yʌcʼob i bʌ tiʼ tojlel Jehová?

¹⁹ Yaʼ ti Biblia mi lac taj ili tʼan: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Sant. 4:8; Sal. 25:14). Jiñi muʼ bʌ i yʌcʼob i bʌ ti Jehová, ñumen lʌcʼʌl mi caj i yajñelob yicʼot. Ti jiñi yambʌ estudio mi caj laj qʼuel chucoch miʼ mejlel lac ñop chaʼan jiñi ñumen wem bʌ miʼ mejlel lac mel jiñʌch cheʼ mi la cʌcʼ lac bʌ tiʼ tojlel Jehová chaʼan mi lac sujtel tiʼ chaʼan.

[Nota]

¿Bajcheʼ mi caj a jacʼ?

• ¿Chuqui i sujmlel cheʼ mi la cʌcʼ lac bʌ ti Dios?

• ¿Chuqui ti wenlel mi lac taj cheʼ mi la cʌcʼ lac bʌ ti Dios?

• ¿Chucoch jiñi xñoptʼañob yom miʼ yʌcʼob i bʌ tiʼ tojlel Jehová?

[Cʼajtiya tac chaʼan estudio]

[Foto]

Cheʼ mi lac tsʼʌctesan jiñi tʼan tsaʼ bʌ lac waʼchocobe Jehová, miʼ ñumen aqʼueñonla lac tijicñʌyel