Na Cava Mo Yalataki Iko Kina Vei Jiova?

“Ena bogi a mai tu e yasaqu e dua na agilosi ni Kalou e noqu turaga.”​—CAKA. 27:23.

1. Na ikalawa cava era sa cakava oti na vakarau papitaiso, na taro cava e basika kina?

“ENA yavu ni isoro i Jisu Karisito, o sa veivutunitaka nomu ivalavala ca, o yalataki iko tale ga vei Jiova mo cakava na lomana?” Qori e dua vei rau na taro e dau tarogi vei ira na vakarau papitaiso ni oti ga na kena vunau. Na cava mera yalataki ira kina vei Jiova na lotu vaKarisito? E yaga vakacava noda yalataki keda vua na Kalou? Na cava ena sega ni qarava rawa kina na Kalou e dua, vakavo ke yalataki koya vua? Meda kila na kena isau, ena gadrevi meda dikeva mada e liu na ibalebale ni yalayala.

2. Na cava na ibalebale ni nona yalataki koya e dua vei Jiova?

² Na cava na ibalebale ni nona yalataki koya e dua vua na Kalou? Raica mada nona vakamacalataka o Paula nona veiwekani kei na Kalou. A kacivi Jiova me “Kalou e noqu Turaga,” ena matadra e levu era vodo tiko ena waqa e vakarau voca. (Wilika Cakacaka 27:​22-24.) Na lotu vaKarisito dina era nei Jiova, ia na vuravura e “lewa tiko na Vunica.” (1 Joni 5:19) Era na wili mera nei Jiova na lotu vaKarisito dina ena gauna era yalataki ira kina ena masu. Na yalayala qori e yavutaki sara ga ena nodra bubului vakataki ira. Oti ya sa na qai papitaiso.

3. Na cava e vakaraitaka nona papitaiso o Jisu, era na vakatotomuri koya vakacava nona imuri?

³ E ivakaraitaki vei keda o Jisu ena gauna a vakatulewataka kina me cakava na loma ni Kalou. Me vaka ni a sucu ena matanitu yalataki o Isireli, sa yalataki koya oti vua na Kalou. Ia ena gauna a papitaiso kina a cakava na ka e levu cake mai na kena e vinakati ena Lawa. E vakaraitaka na Vosa ni Kalou ni tukuna: “Raica! Au lako mai . . . meu cakava na nomuni inaki, na Kalou.” (Iper. 10:7; Luke 3:21) Nona papitaiso gona o Jisu e vakaraitaka nona soli koya me cakava na loma i Tamana. Era vakatotomuri koya nona imuri ena nodra papitaiso. Nodra papitaiso gona e matanalevu, e vakaraitaka nira sa yalataki ira oti vua na Kalou ena masu.

 Na Yaga ni Noda Yalayala

4. Na cava eda vulica me baleta na veidinadinati ena nodrau veitokani o Tevita kei Jonacani?

⁴ E dua dina na ikalawa bibi vua na lotu vaKarisito na yalayala. E sega ni baleta wale ga na veidinadinati. Ia e yaga vakacava na noda yalataki keda? Meda vakatauvatana mada ena noda vakasamataka na yaga ni noda veidinadinati ena noda veimaliwai. Dua na kena ivakaraitaki na veitokani. Me marautaki nomu veitokani, e dodonu mo tu vakarau mo cakava na kena icolacola e salavata mai. Qo e okati kina e dua na veidinadinati​—e nomu itavi mo kauaitaki nomu itokani. E vakamacalataki ena iVolatabu e dua na veitokani vakasakiti dina, ya o Tevita kei Jonacani. Rau yavutaka sara mada ga nodrau veitokani ena dua na veiyalayalati. (Wilika 1 Samuela 17:57; 18:​1, 3.) E kunekunei dredre na veitokani va qori, ia e laurai ni vinaka na veitokani ke tiko na veidinadinati.​—Vkai. 17:17; 18:24.

5. Ena yaga vakacava vua e dua na bobula ni taukeni koya nona turaga yalololoma?

⁵ Na Lawa a solia na Kalou vei ira na Isireli e vakaraitaka e dua tale na veiwekani e yaga kina na veidinadinati. Ke via tiko nuidei tiko ga e dua na bobula, ena soli vua na galala me veidinadinati tale kei na nona turaga yalololoma, me nona bobula tawamudu. E tukuna na Lawa: “Ia kevaka sa kaya vakadodonu na tamata, Au sa lomana na noqu turaga, kei na watiqu, kei na luvequ; au sa sega ni via sereki: me qai kauti koya na nona turaga vei ira na turaga ni lewa; ka kauta talega ki na katuba, se na duru ni sogo; ena qai cula-basika na daligana ko koya na nona turaga e na dua nai cula; ena qai qaravi koya ko koya ka tawa mudu.”​—Lako 21:​5, 6.

6, 7. (a) E yaga vakacava na veidinadinati? (b) Na cava e vakaraitaka qo me baleta noda veiwekani kei Jiova?

⁶ Na vakawati e dua na veiwekani e vinakati kina vakalevu na veidinadinati. Qo e sega ni veidinadinati e caka vakonitaraki, ia e veidinadinati sara ga kei na dua. Rau na sega ni nuidei rawa o rau na sega ni vakamau rau tiko vata ga, qori tale ga era na vakila na luvedrau. Ia o ira na veiwatini era dei ena nodra veidinadinati ra qai doka nodra vakawati, ena tiko na vuna vinaka vakaivolatabu mera na saga tiko ga kina mera walia ena loloma na leqa e dau basika.​—Maciu 19:​5, 6; 1 Kor. 13:​7, 8; Iper. 13:4.

⁷ E dau yaga ena gauna vakaivolatabu ni caka vakakonitaraki na veika vakabisinisi kei na cakacaka. (Maciu 20:​1, 2, 8) E dina tale ga qo nikua. Me kena ivakaraitaki, ni bera nida tauyavutaka e dua na bisinisi se da tekivu cakacaka ena dua na kabani, ena yaga ni tiko na ivola ni veidinadinati se na ivola ni konitaraki. Macala gona ni vaqaqacotaka noda veiwekani na veidinadinati, me vaka e laurai ena veitokani, vakawati kei na cakacaka. O koya gona noda yalataki keda ena yaga tale ga ena noda veiwekani kei Jiova! Meda raica mada qo na yaga ni nodra yalayala vei Jiova o ira ena gauna makawa, qai bibi vakacava qo mai na dua wale ga na veidinadinati.

Na Yaga ni Nodra Yalayala na Isireli Vua na Kalou

8. Na cava na ibalebale ni nodra yalataki ira na Isireli vua na Kalou?

⁸ Era okati mera yalataki ira vei Jiova na matanitu o Isireli ena gauna era bubului kina vua. E vakasoqoni ira vata ena Ulunivanua o Saioni o Jiova qai kaya: “Kevaka dou na vakarorogo vakaidina ki na domoqu, ka vakabauta na noqu vosa ni yalayala, dou na qai noqui yau talei, kai yau lailai na matanitu kecega.” Ra qai sauma kece na Isireli: “A ka kecega sa kaya ko Jiova keimami na cakava.” (Lako 19:​4-8) Nodra yalataki ira na Isireli, e kena ibalebale ni levu tale na ka e okati mai na nodra veidinadinati wale ga. E kena ibalebale ni taukeni ira o Jiova, e raici ira me vaka e nona iyau “talei.”

9. E yaga vakacava vei ira na Isireli nodra yalataki ira vua na Kalou?

 ⁹ E yaga vei ira na Isireli ni taukeni ira o Jiova. A yalodina vei ira, e karoni ira me vaka ga nona karona e dua na itubutubu dauloloma na luvena. E kaya na Kalou vei ira na Isireli: ‘E bau dua li na yalewa me na guilecava na luvena e sucu, me kua ni lomana na luve ni ketena? io, ena guilecava beka, ia koi au ka’u na sega ni guilecavi iko.’ (Aisea 49:15) A vakarautaka o Jiova na veidusimaki ni nona Lawa, nodra veivakauqeti na parofita, kei na nodra veitaqomaki na agilosi. E vola na daunisame: “Sa tukuna na nona vosa vei ira na Jekope, na nona vunau kei na nona lewa vei ira na Isireli. Sa sega ni caka vakaoqo ko koya ki na dua na matanitu.” (Same 147:​19, 20; wilika Same 34:​7, 19; 48:14.) Me vaka ga nona karona na matanitu a taukena ena gauna makawa, o Jiova ena karoni ira tale ga na yalataki ira vua ena gauna qo.

Vuna Meda Yalataki Keda Kina Vua na Kalou

10, 11. Eda sucu beka ena matavuvale ni Kalou? Vakamacalataka.

¹⁰ Ni vakasamataka tiko e dua me yalataki koya qai papitaiso, eso era dau taroga, ‘Cava na vuna au sega ni qarava rawa kina na Kalou keu sega ni yalataki au?’ Ena qai matata vei keda na vuna ena gauna eda vakasamataka kina na keda irogorogo vua na Kalou. Meda nanuma tiko, ena vuku ni ivalavala ca i Atama, eda sucu kina ena taudaku ni matavuvale ni Kalou. (Roma 3:23; 5:12) Noda yalataki keda vua na Kalou e tiki bibi ni noda ciqomi tale ena nona matavuvale. Meda raica mada na vuna.

¹¹ E sega ni vakarautaka rawa e dua na tama na bula tawamudu, me vaka a nakita taumada na Kalou. (1 Tim. 6:19) Eda sega ni sucu meda luve ni Kalou, baleta nodrau ivalavala ca na imatai ni veiwatini, eda tawasei tani kina vua na Tama dauloloma kei koya na Dauveibuli. (Vakatauvatana Vakarua 32:5.) Tekivu mai na gauna oya, sa tekivu bula na kawatamata ena taudaku ni matavuvale i Jiova, da qai yawaki koya tale ga.

12. (a) E rawa vakacava vei ira na ivalavala ca mera lewe ni nona matavuvale na Kalou? (b) Na cava eso na ikalawa e dodonu meda kalawaca ni bera na papitaiso?

¹² Ia eda rawa ni kerea yadudua vua na Kalou me vakadonui keda meda lewe ni nona matavuvale. * Eda na cakava rawa vakacava qori nida sega ni uasivi? E vola na yapositolo o Paula: “Eda a veimecaki tu kei na Kalou, ia eda sa mai veiyaloni kei koya ena mate i Luvena.” (Roma 5:10) Nida papitaiso eda kerea vua na Kalou na lewaeloma e vinaka me rawa ni ciqomi keda. (1 Pita 3:21) Ni bera noda papitaiso, e tiko e vica na ikalawa meda kalawaca. E dodonu meda kilai koya na Kalou, vulica meda nuitaki koya, veivutuni, da qai veisautaka na noda bula. (Joni 17:3; Caka. 3:19; Iper. 11:6) E vinakati tale e dua na ka meda rawa ni ciqomi ena matavuvale ni Kalou. Na cava oya?

13. Na cava e veiganiti kina me vosa ni yalayala vua na Kalou e dua me vakadonui kina me lewe ni nona matavuvale?

¹³ Me rawa ni lewe ni vuvale ni Kalou o koya e sega ni uasivi, ena vinakati taumada me yalayala vei Jiova. Meda kila na vuna, vakasamataka mada e dua na tama vinaka e dau kauaitaka e dua na luveniyali, qai via susugi koya me lewe ni nona matavuvale. E kilai na tama qo ni dua na turaga vinaka. Ia ni bera ni susugi koya na luveniyali, ena vinakata me vosa ni yalayala na gonetagane qo. Ena tukuna na turaga qo, “Ni bera niu ciqomi iko mo luvequ, au via kila ni o na lomani au qai dokai au me vaka na tamamu.” Ia ke tu vakarau na gone qo me cakava e dua  na yalayala, ena qai vakadonui me lewe ni nona matavuvale na turaga ya. Sega li ni ka vakayalomatua qo? O Jiova tale ga ena ciqomi ira era yalorawarawa nira yalayala vua. E kaya na iVolatabu: “Ni soli kemuni vua: na isoro bula, e yalataki qai ganita nona veivakadonui.”​—Roma 12:​1, The New English Bible.

iVakaraitaki ni Loloma kei na Vakabauta

14. Ena sala cava e ivakaraitaki kina ni loloma na yalayala?

¹⁴ Noda bubului vua na Kalou e vakaraitaka noda lomani koya dina. E via tautauvata qo ina bubului ni vakamau. Ena vakaraitaka na lotu vaKarisito tagane vou nona lomani yalewa vou se mani cava e yaco, oya nona bubuluitaka me yalodina vua. Qo e bubului vua e dua, sega ni dua wale ga na ka e yalataki me caka. Kevaka e sega ni bubului ena nona vakamau na tagane vou lotu vaKarisito, e kila ni na sega ni rawa ni tiko vata kei watina. E tautauvata sara ga qo kevaka eda se bera ni yalayala, eda na sega tale ga ni marautaka na yaga ni noda lewe ni matavuvale i Jiova. Dina nida sega ni uasivi, eda yalataki keda vua na Kalou baleta eda vinakata dina meda sokaloutaki koya da qai vakadeitaka meda yalodina vua se mani cava e yaco.​—Maciu 22:37.

15. E ivakaraitaki vakacava ni vakabauta na yalayala?

¹⁵ Eda vakaraitaka na vakabauta nida yalataki keda vua na Kalou. E rawa vakacava ya? Nida vakabauti Jiova, eda nuidei ni yaga noda toro voleka vua. (Same 73:28) Eda kila ni na sega ni rawarawa noda lako vata kei na Kalou nida bula kei ira na “itabatamata takelo qai talaidredre,” ia eda na nuitaka nona yalayala ni na vukei keda. (Fpai. 2:15; 4:13) Eda kila nida sega ni uasivi, ia eda nuidei ni na yalololoma vei keda o Jiova ena gauna eda cala kina. (Wilika Same 103:​13, 14; Roma 7:​21-25.) Eda vakabauta ni na vakalougatataka o Jiova noda sasaga meda yalodina.​—Jope 27:5.

E Vakavu Marau na Yalayala Vua na Kalou

16, 17. Na cava e vakavu marau kina na yalayala vei Jiova?

¹⁶ Noda yalataki keda vei Jiova e vakavu marau baleta nida soli keda sara ga kina. E tukuna kina o Jisu e dua na ka dina: “E marau vakalevu o koya e solia na ka, vakalailai o koya e taura na ka.” (Caka. 20:35) A vakila dina o Jisu na marau ni solika ena nona cakacaka vakaitalatala voli e vuravura. A sega ni vakacegu ena so na gauna, sega ni kana, qai sega ni cakava na ka me tiko vinaka kina, me rawa ga ni vukei ira kina eso tale mera bula. (Joni 4:34) E dau taleitaka o Jisu me vakamarautaki Tamana. E tukuna kina: “Niu dau cakava na ka e vinakata.”​—Joni 8:29; Vkai. 27:11.

¹⁷ A dusimaki ira nona imuri o Jisu ena dua  na bula vinaka duadua ena nona tukuna: “Ke dua e via muri au, me kua tale ni muria na lomana.” (Maciu 16:24) Noda cakava qori eda toro voleka kina vei Jiova. Eda rawa beka ni vakatautaka vua e dua me qaravi keda vinaka cake vakayalololoma?

18. Na cava eda na marautaka kina vakalevu noda bulataka noda yalayala vei Jiova mai na noda yalayala vua e dua na ka se vua e dua?

¹⁸ Nida yalataki keda vei Jiova da qai bulataka noda yalayala me vakayacori kina nona inaki, e vakavu marau dina qo mai na noda yalataki keda ena dua na ka se vua e dua. Me kena ivakaraitaki, e levu era vakayagataka nodra bula ena qarai ni iyau, ia era sega ni kunea na marau kei na lomavakacegu dina. Ia era marau dina o ira na yalataki ira vei Jiova. (Maciu 6:24) Nodra doka nira “tamata cakacaka kece ni Kalou” e vakavu marau vei ira. Ia era sega ni yalayala ena dua na cakacaka, era yalayala vua na noda Kalou yalovinaka. (1 Kor. 3:9) E marautaka sara vakalevu o Jiova nodra yalo ni vakuai ira. Ena vakavuna mera bulabula tale me vaka na cauravou o ira era dauyalodina vua, me rawa ni karoni ira tawamudu.​—Jope 33:25; wilika Iperiu 6:10.

19. Na cava era na marautaka o ira era yalataki ira vei Jiova?

¹⁹ Ni o yalataki iko vei Jiova o na veiwekani voleka kina kei koya. Na iVolatabu e kaya: “Toro voleka yani vua na Kalou ena qai toro voleka mai vei kemuni.” (Jeme. 4:8; Same 25:14) Eda na dikeva ena ulutaga e tarava na vuna eda rawa ni nuidei kina nida vakatulewataka me taukeni keda o Jiova.

[iVakamacala e ra]

O na Sauma Vakacava?

• Na cava e kena ibalebale nona yalataki koya e dua vua na Kalou?

• E yaga vakacava noda yalataki keda vua na Kalou?

• Na cava e gadrevi kina vua na lotu vaKarisito me yalataki koya vei Jiova?

[Taro]

[iYaloyalo ena tabana e 6]

Ena vakavu marau noda cakava na ka eda yalataka