Mbaʼérepa ñañemeʼẽvaʼerã Jehovápe?

‘Ko pyharépe che Jára, che añemeʼẽvaʼekuépe ombou cherendápe peteĩ ánhel.’ (HECH. 27:​23, ÑÑB.)

1. a) Mbaʼe mbaʼépa ojapovaʼerã peteĩ ojevautisaséva? b) Mbaʼe mbaʼépa ñambohováita ko artíkulope?

 “JESUCRISTO oñemeʼẽ rupi nderehehápe, reñembyasy ha rejevýmapa ne rembiapo vaikuégui ha reñemeʼẽ Jehovápe rejapo hag̃ua hembipota?” Kóicha ningo oñeporandu umi ojevautisátavape opakuévo pe diskúrso ojejapóva chupekuéra. Péro, mbaʼérepa oñemeʼẽvaʼerã Jehovápe umi oserviséva chupe? Mbaʼépa ohupyty hikuái ojapo haguére upéicha? Mbaʼérepa ñañemeʼẽmantevaʼerã Ñandejárape ikatu hag̃uáicha haʼe oguerohory jajapóva chupe g̃uarã? Ñambohovái hag̃ua koʼã porandu, jaikuaa raẽ vaʼerã mbaʼépa heʼise ñañemeʼẽ Jehovápe.

2. Mbaʼépa heʼise ñañemeʼẽ Jehovápe?

² Mbaʼépa heʼise ñañemeʼẽ Jehovápe? Ñambohovái hag̃ua ko porandu ningo tuicha ñanepytyvõta apóstol Pablo heʼivaʼekue oĩrõ guare peteĩ várko oyguypotaitévape. Apóstol Pablo heʼi Jehováre: ‘Che Jára, che añemeʼẽvaʼekuépe’. Péicha haʼe ohechauka oñemoĩha Jehová poguýpe imbaʼéramo (jaleemína Hechos 27:​22-24). Upévare ko múndo ‘oĩramo jepe Satanás poguýpe’, ñande kristiánovape Jehová ñandererekóma imbaʼéramo ha ñañemoĩ ipoguýpe (1 Juan 5:19). Mbaʼéichapa jahupyty upéva? Upearã ñañemeʼẽ raẽ vaʼerã térã ñañekompromete Jehovápe peteĩ ñemboʼe rupive ha upéi jajevautisa.

3. Mbaʼépa ohechauka Jesús ojevautisávo? Mbaʼéichapa ñande jasegi iñehémplo?

³ Jesús ningo ojevautisaha árape ohechaukavaʼekue mbaʼéichapa jajevautisavaʼerã. Upérõ haʼe oikuaauka enterovépe ojedesidimaha ojapo Itúva rembipota. Jaikuaa ningo pe tetã Israel oñemeʼẽma hague Ñandejárape. Ha Jesús onase rupi upe tetãme natekotevẽvéima oñemeʼẽ jey Ñandejárape. Péro ojevautisávo ojapohína peteĩ mbaʼe iñimportantetereíva, ndahaʼéi ojapovahína pe léi mosáika heʼíva. Jesús ningo heʼintehína Jehovápe: “Péinako aju [...] ajapo hag̃ua ne rembipota”  (Heb. 10:​7, BNP; Luc. 3:21). Péicha Jesús ojevautisávo oñemboja Itúva renondépe ojapo hag̃ua hembipota. Koʼág̃a rupi ñande kristianokuéra jasegi Jesús ehémplo jajevautisávo. Ha jajapóvo upéicha jahechaukañaína enterovépe ñañemeʼẽma hague Ñandejárape ñañemboʼévo chupe.

Mbaʼépa jahupyty ñañemeʼẽ haguére Jehovápe?

4. Mbaʼépa ñanemboʼe David ha Jonatán ojapo haguére peteĩ promésa ojupe?

⁴ Ñañemeʼẽvo Jehovápe ndahaʼéi vyrorei la jajapóva. Tuichaiterei mbaʼe ningo upéva. Ha mbaʼépa jahupyty ñañemeʼẽ haguére Jehovápe? Jaikuaa hag̃ua ñapensami mbaʼeichaitépa iporã ñanerresponsávle oñondive. Pór ehémplo ñande rapichándi oñoamigoite hag̃ua, ñande raẽ voi ñañehaʼavaʼerã jaiko iñamígoramo. Tekotevẽ ñanerresponsávle oñondive ha upéicha ñañangareko hag̃ua ojuehe. La Biblia ningo omombeʼu yma David ha Jonatán oñoamigoite hague, haʼekuéra ojapo voi peteĩ promésa ojupe (jaleemína 1 Samuel 17:57 ha 18:​1, 3). Koʼág̃a rupi saʼi oĩ oñoamigoitéva haʼekuéraicha ha ojeroviáva ojuehe. Péro yma guaréicha avei umi oñoamigoitéva ojerovia ojuehe ha ojapo hikuái peteĩ promésa ojupe (Pro. 17:17; 18:24).

5. Mbaʼépa ohupyty peteĩ tembiguái odesidíva opyta ijára poguýpe?

⁵ Pe léi mosáika oñeʼẽ avei peteĩ kompromíso ojapóvare peteĩ tembiguái ijára ndive, ha upéicha oservi chupe omano meve. Éxodo 21:​5, 6-pe heʼi: ‘Ha pe tembiguái heʼíramo: “Che ahayhu che járape, che rembireko ha che raʼykuérape, apytátante, nasẽmoʼãi”. Upéicharamo ijára ogueraháta chupe Ñandejára renondépe ha ombojáta chupe okẽ rehe térã pe okẽ márko rehe; ha ijára ombokuáta chupe inambi peteĩ mbaʼe akuápe ha oikóta hembiguáiramo oikove aja pukukue’. Upéicharõ pe tembiguái ikatu vaʼekue odesidi opytánte ijára imbaʼeporãitéva poguýpe ha osegi oiko porã.

6, 7. a) Mbaʼépa ojehupyty ojejapóramo peteĩ kontráto? b) Mbaʼérepa jaʼe Jehová ndive jajapoha la kompromíso tuichavéva?

⁶ Umi omendáva avei ojapo peteĩ kompromíso tuichaitereíva oñondive. Ndahaʼéi peteĩ kontráto reíte, haʼekuéra ningo oñekompromete voi ojupe. Ha mbaʼépa ohupyty hikuái ojapo haguére upéicha? Oaseguráta hikuái la ikompromíso ha oñangareko porãta ifamíliare. Péro arakaʼeve ndoikomoʼãi upéicha umi oikóva oñondive omendaʼỹre. Umi omendáva katu oservíramo Ñandejárape oñehaʼãta ojapo la Biblia heʼíva ména ha tembirekópe. Oñehaʼãta avei mborayhúpe osolusiona iprovlemakuéra (Mat. 19:​5, 6; 1 Cor. 13:​7, 8; Heb. 13:4).

⁷ Jahechami koʼág̃a mbaʼéichapa jajapo jepi peteĩ kontráto ñambaʼapo hag̃ua. Ymaite guivéma ningo ojejapo upéva ha iñimportanteterei (Mat. 20:​1, 2, 8). Upéicha ñamoñepyrũvo peteĩ negósio térã ñambaʼapo ñepyrũtaramo ótrope g̃uarã, iporãta jajapóramo peteĩ kontráto. Upéicharõmante isériota upe kompromíso. Jahecháma ningo iñimportanteha ojapo peteĩ kompromíso tahaʼe umi oñoamígo, umi omendáva térã umi ombaʼapótava. Péro Jehová ndive ñande jajapo la kompromíso tuichavéva. Ñande ningo ñañemeʼẽ voi chupe ñañemboʼévo ha péicha jahejáma ipoguýpe ñande rekove. Koʼág̃a jahecháta mbaʼépa ohupytyvaʼekue yma umi oñemeʼẽva Jehovápe. Jahecháta avei mbaʼérepa ndahaʼéi peteĩ kompromíso reínte.

Mbaʼépa ohupyty Israel oñemeʼẽ haguére Jehovápe?

8. Mbaʼépa ojapomavaʼerã umi Israelgua oñemeʼẽ rire Jehovápe?

⁸ Umi isrraelíta ningo enterovete oñemeʼẽvaʼekue Jehovápe ojapóvo peteĩ kompromíso hendive. Jehová ningo ombyaty umi Israelguápe pe mónte Sinaí renondépe ha heʼi chupekuéra: ‘Pejapóramo añetehápe che haʼéva ha pepytáramo che ñeʼẽme, peẽta che retã tee opa tetã apytépe’. Upévo umi Israelgua  heʼijoa: “Rojapóta opa mbaʼe heʼíva Ñandejára” (Éxo. 19:​4-8). Upéicha oñemeʼẽ hikuái Jehovápe ha upéva iñimportantevehína oimeraẽ kompromísogui. Péicha haʼekuéra ohechauka Jehová mbaʼeha ha Haʼe katu oñekompromete oñangarekotaha hesekuéra ‘hetã teeramoguáicha’.

9. Mbaʼe mbaʼépa ohupyty umi Israelgua oñemeʼẽ haguére Jehovápe?

⁹ Heta mbaʼe porã ningo ohupyty umi Israelgua oñemeʼẽ haguére Jehovápe. Haʼe ojerovia ha oñangareko porã hesekuéra ha otrata chupekuéra itaʼyrarõguáicha. Jehová ningo heʼi voi Israélpe: ‘Peteĩ kuña piko ikatu hesarái imemby kambúgui ha ndoiporiahuverekói imemby teépe? Haʼe hesaráiramo jepe, Che ndacheresaraichéne ndehegui’ (Isa. 49:15). Ñandejára oisãmbyhy isiervokuérape pe Léi mosáika rupive, omondo umi proféta omokyreʼỹ hag̃ua chupekuéra ha oñangareko hesekuéra umi ánhel rupive. Pe salmísta ningo heʼi voi: ‘Jehová oikuaauka Jacóbpe hembipota. Israélpe haʼe omeʼẽ iléi ha heʼi mbaʼépa ojapóta. Ambue tetã ndive katu Jehová ndojapói upéicha’ (Sal. 147:​19, 20; jaleemína Salmo 34:​7, 19 ha 48:14). Jehová oñangareko haguéicha Israel rehe, koʼág̃a rupi avei oñangarekóta entéro kristianokuéra oñemeʼẽmavaʼekuére chupe.

Mbaʼérepa ñañemeʼẽvaʼerã Ñandejárape?

10, 11. Mbaʼérepa ñande nañanasevéima Jehová família guasúpe?

¹⁰ Heta ningo oĩ heʼíva: “Mbaʼérepa tekotevẽ añemeʼẽ Jehovápe ha ajevautisa aservi hag̃ua chupe?”. Jaikuaa hag̃ua mbaʼérepa, ñanemanduʼami raẽ vaʼerã mbaʼe situasiónpepa ñande ñaime Jehová renondépe. Adán opeka rupi ningo ñande nañanasevéima Jehová família guasúpe (Rom. 3:23; 5:12). Ha ikatu hag̃uáicha jaike jey ifamíliape ñañemeʼẽmantevaʼerã chupe. Jahechamína mbaʼérepa jaʼe upéicha.

¹¹ Ndaipóri ningo ni peteĩ ñande apytépe itúva omeʼẽva chupe pe tekove añetetéva térã pe tekove perféktova (1 Tim. 6:19). Ñande ru ha ñande sy ypykue opeka rupi, ñande nañanasevéima Ñandejára imbaʼeporãitéva poguýpe. Upévare ndaikatúi voi jaʼe ñandejehe itaʼyraha (embojojami Deuteronomio 32:5 rehe). Upeha ára guive yvyporakuéra oiko mombyry Jehovágui ha ifamília guasúgui.

12. a) Mbaʼépa jajapovaʼerã ñaimemi hag̃ua Jehová família apytépe? b) Mbaʼe mbaʼépa jajapo raẽ vaʼerã jajevautisa mboyve?

¹² Upéicharõ jepe, ñande ikatu jajerure Jehovápe ñaimemi hag̃ua ifamília apytépe. Upe ifamíliape ningo oĩhína umi isiervokuéra Haʼe oguerohory ha oĩ porãva hendive. * Péro mbaʼeichakue piko ikatu ñaime porã henondépe ha ñandeguerohory ko ñande imperféktova? Apóstol Pablo heʼivaʼekue mbaʼérepa: ‘Pe ndajahayhúirõ gueteri chupe, Ñandejára ñanemoingo porã vaʼekue hendive Itaʼýra mano rupi’ (Rom. 5:​10, BNP). Ha jaiko hag̃ua isiérvoramo jajerurevaʼerã chupe omeʼẽ hag̃ua ñandéve pyʼaguapy térã konsiénsia potĩ. Upéva ningo jajapoñaína jajevautisávo (1 Ped. 3:21). Péro ndahaʼéi upévante jajapovaʼerã. Jajevautisa mboyve jaikuaa porã vaʼerã Jehovápe ha jajerovia hese. Upéi ñañembyasyvaʼerã ha jajevy ñane rembiapo vaikuégui (Juan 17:3; Hech. 3:19; Heb. 11:6). Mbaʼépa tekotevẽ jajapove?

13. Mbaʼérepa jajapovaʼerã peteĩ promésa ñaime hag̃ua Ñandejára siervokuéra apytépe?

¹³ Ñande ningo jajapovaʼerã peteĩ promésa ñaime hag̃ua Ñandejára siervokuéra apytépe. Mbaʼérepa? Ñamoĩmi peteĩ ehémplo: Peteĩ komunidápe ningo oiko peteĩ karai ojerrespetáva. Upéi oikuaa peteĩ mitãkuimbaʼe tyreʼỹmíme, oiporiahuvereko ha  ohayhu voi chupe. Upémaramo heʼi oadoptataha pe mitãkuimbaʼe itaʼyrarã. Péro heʼi chupe: “Aipota repromete chéve cherayhutaha nde túva teéicha ha akói cherrespetataha”. Ha pe mitãkuimbaʼe oipotáramo ojeadópta chupe, oprometemantevaʼerã pe karaípe ojapotaha upe ojeruréva chupe. Ajépa oĩ porãite pe karai ojapo upéicha! Jehová avei oipota ifamília apytépe umi oprometévante ojapotaha hembipota ha oñemeʼẽ chupe. La Biblia heʼi voi: ‘Peñemeʼẽ peẽ voi Ñandejárape sakrifísio oikove ha imarangatúvaramo. Upéva ningo ombovyʼaiterei Ñandejárape’ (Rom. 12:​1, JMP).

Jahechauka jahayhu ha jajeroviaha

14. Mbaʼérepa ñañemeʼẽvo Jehovápe jahechauka jahayhuha chupe?

¹⁴ Ñañemeʼẽvo Jehovápe jahechauka jahayhuha chupe. Ojogua pe kompromíso ojapóvape umi omendáva. Omendaha díape, pe kariaʼy ohechauka ohayhuha hembirekorãme oprometévo chupe oĩtaha ijykére ivai ha iporã jave la situasión. Ndahaʼéi oñekomprometénteva ojapotaha oñehaʼarõva peteĩ ménagui, oñekompromete katu akóinte ohayhutaha hembirekópe. Oikuaa avei omendamantevaʼerãha oipotáramo chupe iñirũrã. Upéicha avei ñañemeʼẽmantevaʼerã Jehovápe ñaime hag̃ua ifamília guasúpe ha jahupyty hag̃ua heta mbaʼe porã. Ha ñande ningo ñañemeʼẽ Jehovápe jaikoségui ipoguýpe ha ñaneimperféktoramo jepe ára ha ára ñaneñeʼẽrenduse chupe (Mat. 22:37).

15. Mbaʼérepa ñañemeʼẽvo Jehovápe jahechauka jajeroviaha hese?

¹⁵ Ñañemeʼẽvo Jehovápe jahechauka avei jajeroviaha hese. Ñañemeʼẽ ningo Jehovápe jaikuaágui chupe ha jahechakuaágui iporãveha ñaime porã hendive (Sal. 73:28). Jaikuaa ijetuʼuha sapyʼánte jaservi Jehovápe, jaiko voi ningo umi “tekove aña ha mbaʼe vai apoha apytépe”. Péro jajerovia Jehová ovendesitaha opa mbaʼe porã ñañehaʼãva jajapo (Fili. 2:15; 4:13). Jaikuaa avei Ñandejára ñandeporiahuverekoha ha katuete ñaneperdotaha jajavy jave (jaleemína Salmo 103:​13, 14 ha Romanos 7:​21-25). Ha jajerovia Jehová ñanevendesitaha ñañehaʼã haguére ñaneñeʼẽrendu chupe ha jaiko haʼe oipotaháicha (Job 27:5).

Ñañemeʼẽramo Jehovápe jaikóta vyʼápe

16, 17. Mbaʼérepa javyʼa ñañemeʼẽramo Jehovápe?

¹⁶ Javyʼa ningo ñañemeʼẽramo Jehovápe, ñande rekove voi ñamoĩ Jehová pópe. Ha Jesús heʼi haguéicha: “Javyʼave ñameʼẽvo, ñandéve oñemeʼẽrõguágui” (Hech. 20:35). Ñandejára Raʼy oikórõ guare ko yvy ape ári ojapo upéicha ha ovyʼa ipojera haguére ambuéndi. Sapyʼánte haʼe ni ndopytuʼúi, ndokarúi  ha omboyke heta mbaʼe omboʼe hag̃ua la héntepe Ñandejára rape (Juan 4:34). Ha ovyʼaiterei voi ojapo haguére umi mbaʼe Itúva oguerohorýva. Upévare heʼi: ‘Akóinte ajapo umi mbaʼe chupe ombovyʼáva’ (Juan 8:29; Pro. 27:11).

¹⁷ Jesús ohechauka hemimboʼekuérape mbaʼéichapa oikovaʼerã ovyʼa hag̃ua: “Oiméramo chemoirũséva, toñembyesarái ijehegui” (Mat. 16:24). Jajapóvo péicha ñañemoag̃uiveñaína Jehováre. Ha ñañembyesaráivo ñandejehegui, jahejáma ñande rekove Ñandejára ñanderayhuetéva pópe. Ha máva poguýpe voi piko ñaime porãvéta!

18. Mbaʼérepa ovyʼave umi oñemeʼẽva Jehovápe ha oikóva Haʼe oipotaháicha?

¹⁸ Umi oñemeʼẽva Jehovápe ha oikóva Haʼe oipotaháicha ovyʼave umi ombaʼapóvagui peteĩ yvypórape g̃uarã térã ipláta heta hag̃ua. Jehová siervokuéra oñekontenta la orekomíva reheve ha ovyʼa (Mat. 6:24). Haʼekuéra ningo ovyʼa omoirũgui Ñandejárape hembiapópe. Péro ndahesaráiri hikuái oñemeʼẽ hague Ñandejára ohayhuetévape chupekuéra ha ndahaʼéi upe tembiapópe (1 Cor. 3:9). Ndaipóri ningo Jehováicha omombaʼéva hembiguaikuérape ha opa mbaʼe ojapóva hikuái hesehápe. Ha umi itujámavape jepe ombopyahu jeýta oiko porã hag̃ua opa árare ipoguýpe (Job 33:25; jaleemína Hebreos 6:10).

19. Mbaʼépa ohupyty umi oñemeʼẽva Jehovápe?

¹⁹ La Biblia heʼi ñandéve: ‘Peñemoag̃ui Ñandejárare, ha haʼe oñemoag̃uíta penderehe’ (Sant. 4:8; Sal. 25:14). Upéicharõ umi oñemeʼẽva Jehovápe oĩ porãta hendive ha iñamigoitéta. Pe artíkulo oúvape jahecháta mbaʼérepa ndajakyhyjeivaʼerã ñañemeʼẽ hag̃ua Jehovápe ha upéicha ñañemoĩ ipoguýpe.

[Nóta]

Ñambohovaimína koʼã porandu:

• Mbaʼépa heʼise ñañemeʼẽ Ñandejárape?

• Mbaʼépa jahupyty ñañemeʼẽ haguére Jehovápe?

• Mbaʼérepa ñañemeʼẽvaʼerã Jehovápe?

[Porandu ñahesaʼỹijóva]

[Nóta oĩva taʼanga ndive páhina 6]

Javyʼáta ñañemeʼẽramo Jehovápe ha jaiko haʼe oipotaháicha