Etẹwutu Hiẹ Dona Klan Dewe Do Wiwe Na Jehovah?

“To ozán mẹ, angẹli Jiwheyẹwhe he yẹn nọ sẹ̀n . . . lọ tọn de ṣite to apá na mi.”—OWALỌ 27:23, NW.

1. Afọdide tẹlẹ wẹ mẹhe wleawufo nado yí baptẹm lẹ ko nọ ze, podọ kanbiọ tẹlẹ wẹ ehe fọndote?

 “TO DODONU avọ́sinsan Jesu Klisti tọn ji, be hiẹ ko lẹnvọjọ sọn ylando towe lẹ mẹ bo ko klan dewe do wiwe hlan Jehovah nado wà ojlo etọn ya?” Ehe yin dopo to kanbiọ awe he mẹhe jlo na yí baptẹm lẹ nọ na gblọndo na to vivọnu hodidọ baptẹm tọn lẹ mẹ. Etẹwutu Klistiani lẹ dona klan yede do wiwe na Jehovah? Nawẹ klandowiwe na Jiwheyẹwhe nọ hẹn ale wá na mí gbọn? Naegbọn mẹde ma sọgan sẹ̀n Jiwheyẹwhe to aliho he sọgbe mẹ, adavo e klan ede do wiwe na ẹn? Nado mọ gblọndo kanbiọ ehelẹ tọn, mí dona lẹnnupọndo nuhe klandowiwe yin ji whẹ́.

2. Etẹwẹ e zẹẹmẹdo dọ mẹde ni klan ede do wiwe na Jehovah?

² Etẹwẹ mídelẹ kinklandowiwe na Jiwheyẹwhe zẹẹmẹdo? Doayi lehe apọsteli Paulu basi zẹẹmẹ haṣinṣan he e tindo hẹ Jiwheyẹwhe tọn do go. Whenue e tin to gbẹtọgun he to tọjihun he to na siọ de mẹ lẹ nukọn, e ylọ Jehovah dọ “Jiwheyẹwhe he yẹn nọ sẹ̀n.” (Hia Owalọ lẹ 27:22-24.) Klistiani nugbo lẹpo wẹ yin Jehovah tọn. Ṣigba, aihọn lọ pete wẹ “tin to huhlọn mẹylankan lọ tọn glọ.” (1 Joh. 5:19, NW) Whenue Jehovah kẹalọyi klandowiwe he Klistiani lẹ basi na ẹn to odẹ̀ mẹ wẹ yé nọ lẹzun etọn. Klandowiwe mọnkọtọn yin opà de, he mẹdopodopo nọ do. To enẹgodo, baptẹm osin tọn nọ bọdego.

3. Etẹwẹ baptẹm Jesu tọn dohia, podọ nawẹ hodotọ etọn lẹ nọ hodo apajlẹ etọn gbọn?

³ Jesu ze apajlẹ de dai na mí to whenue e basi nudide mẹdetiti tọn nado wà ojlo Jiwheyẹwhe tọn. Na Jesu yin jiji to akọta Islaeli tọn he yin kinklandowiwe de mẹ wutu, e ma biọ dọ nisọ klan ede do wiwe na Jiwheyẹwhe ba. Etomọṣo, to baptẹm etọn whenu, e wà nude he hugan nuhe Osẹ́n Mose tọn biọ. Ohó Jiwheyẹwhe tọn dohia dọ Jesu dọ dọ: “Pọ́n! Yẹn wá . . . nado wà ojlo towe, Jiwheyẹwhe E.” (Heb. 10:7; Luku 3:21, NW) Gbọnmọ dali, baptẹm Jesu tọn dohia dọ, e ze ede jo na Jiwheyẹwhe nado wà ojlo etọn. Hodotọ etọn lẹ nọ hodo apajlẹ etọn to whenue yé ze yede jo nado yí baptẹm. Ṣigba to whẹho Klistiani lẹ tọn mẹ, baptẹm osin tọn yin  dohia gbangba tọn de dọ yé ko klan yede do wiwe na Jiwheyẹwhe to odẹ̀ mẹ.

Lehe Klandowiwe Nọ Hẹn Ale Wá Na Mí Do

4. Etẹwẹ họntọnjiji Davidi po Jonatani po tọn plọn mí gando gbemima go?

⁴ Klandowiwe Klistiani tọn ma yin whẹho he mí na yí nukun vlẹkẹsẹ do pọ́n gba. E hugan gbemima de bibasi poun. Ṣigba aliho tẹ mẹ wẹ klandowiwe nọ hẹn ale wá na mí te? Nado mọnukunnujẹ enẹ mẹ, mì gbọ mí ni lẹnnupọndo lehe gbemima he nọ yin bibasi to gbẹtọvi lẹ ṣẹnṣẹn nọ hẹn ale wá na yé do ji. Apajlẹ dopo wẹ họntọnjiji. Eyin hiẹ na mọaleyi sọn họntọnjiji de mẹ, hiẹ dona kẹalọyi azọngban he e bẹhẹn lẹ. Enẹ biọ gbemima de—hiẹ dona mọ dewe to dandannu glọ nado nọ hò họntọn towe tọn pọ́n. Dopo to họntọnjiji he jẹna ayidego to Biblu mẹ lẹ mẹ wẹ, Davidi po Jonatani po tọn. Yé tlẹ basi alẹnu de to yedelẹ ṣẹnṣẹn. (Hia 1 Samuẹli 17:57; 18:1, 3.) Dile etlẹ yindọ họntọn he nọ basi gbemima mọnkọtọn lẹ ma sù, suhugan họntọn lẹ tọn nọ tindo kọdetọn dagbe eyin yé basi gbemima de na ode awetọ.—Howh. 17:17; 18:24.

5. Eyin afanumẹ de mọdọ klunọ etọn jọmẹ bo jlo na gbọṣi e dè, etẹwẹ e dona wà?

⁵ Osẹ́n he Jiwheyẹwhe na Islaelivi lẹ sọ basi zẹẹmẹ haṣinṣan wunmẹ devo tọn, he mẹ gbẹtọ lẹ nọ mọ ale sọn eyin yé basi gbemima de. Eyin afanumẹ de mọdọ klunọ emitọn jọmẹ bo jlo na gbọṣi e dè, e sọgan basi gbemima de hẹ ẹ. Osẹ́n lọ dọmọ: “Eyin devi lọ na dọ gbangba dọmọ, Yẹn yiwanna mẹmẹnu ṣie, asi ṣie, po ovi ṣie lẹ po; yẹn ma na jẹgbonu yì vọnu gba: whenẹnu mẹmẹnu etọn na hẹn ẹn wá jẹ [Jiwheyẹwhe nugbo lọ] dè, bosọ hẹn ẹn wá jẹ ohọ̀n lọ kọ̀n, kavi jẹ ohọ̀n lọ dòtin kọ̀n; mẹmẹnu etọn bo na yí nútọ́nnu de do tọ́n otó etọn luntọ́n; ewọ bo nasọ nọ sẹ̀n ẹn kakadoi.”—Eks. 21:5, 6.

6, 7. (a) Nawẹ gbemima nọ hẹn ale wá na gbẹtọ lẹ gbọn? (b) Etẹwẹ enẹ nọ dohia gando haṣinṣan he mí tindo hẹ Jehovah go?

⁶ Alọwle yin haṣinṣan de, he nọ biọ gbemima sinsinyẹn. Gbemima de wẹ e yin nado yin nugbonọ na mẹde, e ma yin pàdido de poun gba. Sunnu po yọnnu po he to pọnọ bo ma ko wlealọ lẹ ma sọgan vò to yede mẹ gbede; mọjanwẹ ovi yetọn lẹ lọsu ma na vò do niyẹn. Ṣigba asu po asi po he biọ gbemima de mẹ gbọn alọwle yẹyinọ dali lẹ nọ tin to dandan glọ nado setonuna nubiọtomẹsi Owe-wiwe tọn lẹ. Gbọnmọ dali, yé nọ dovivẹnu nado wazọ́n do yedelẹ go nado sọgan didẹ nuhahun yetọn lẹ po owanyi po.—Mat. 19:5, 6; 1 Kọl. 13:7, 8; Heb. 13:4.

⁷ To ojlẹ Biblu tọn mẹ, gbẹtọ lẹ nọ duvivi gbekọndopọ dagbe de tintindo tọn to ajọwiwa po agbasazọ́n po mẹ. (Mat. 20:1, 2, 8) Onú dopolọ wẹ nọ jọ to egbehe. Di apajlẹ, alenu de wẹ e nọ yin dọ mí ni basi kandai gbekọndopọ tọn de whẹpo do dota ajọ́ de mẹ kavi jẹ azọ́nwa ji to azọ́nwhé de. Ṣigba, eyin gbemima nọ hẹn haṣinṣan họntọn tọn, alọwle tọn, kavi agbasazọ́n tọn pọnte, be klandowiwe ahundopo tọn towe ma na gọalọna we nado hẹn haṣinṣan towe hẹ Jehovah pọnte dogọ ya? Todin, gbọ mí ni lẹnnupọndo ale he mẹdelẹ ko mọyi sọn klandowiwe he yé basi na Jehovah Jiwheyẹwhe mẹ to hohowhenu ji, bo pọ́n lehe e gbọnvo mlẹnmlẹn na gbemima de bibasi poun do.

Lehe Klandowiwe Hẹn Ale Wá Na Islaelivi lẹ Do

8. Etẹwẹ klandowiwe bibasi na Jiwheyẹwhe zẹẹmẹdo na Islaelivi lẹ?

⁸ Taidi akọta de, whenue Islaelivi lẹ to pọmẹ dopà na Jehovah, whenẹnu wẹ yé klan yede do wiwe na Ẹn. Jehovah dọ yé ni pli sẹpọ Osó Sinai tọn, bo dọna yé dọmọ: “Eyin mìwlẹ na yí ogbè ṣie sè nugbonugbo, bo yìn alẹnu ṣie, whenẹnu wẹ mìwlẹ na yin adọkunnu vivẹ de hlan mi sọn ṣẹnṣẹn gbẹtọ lẹpo tọn.” Akọta lọ kọngbedopọ to pọmẹ dọmọ: “Ehe OKLUNỌ ko dọ lẹpo wẹ mí na wà.” (Eks. 19:4-8) Klandowiwe he Islaeli basi bẹ nususu hẹn hugan gbemima nado wà nude. E zẹẹmẹdo dọ yé ko lẹzun nutindo Jehovah tọn, podọ ewọ lọsu pọ́n yé taidi “adọkunnu vivẹ” etọn.

9. Nawẹ Islaelivi lẹ mọaleyi sọn klandowiwe he yé basi na Jiwheyẹwhe mẹ gbọn?

⁹ Na Islaelivi lẹ lẹzun nutindo Jehovah tọn  wutu, enẹ hẹn ale wá na yé. Jiwheyẹwhe yin nugbonọ na yé bosọ nọ penukundo yé go kẹdẹdile mẹjitọ owanyinọ de nọ wà na ovi etọn do. E dọna Islaeli dọmọ: “Be yọnnu sọgan wọn ovi etọn he tin anọ́nù, bọ e ma nado wàlẹblanu na ovi ohò etọn mẹ tọn? Nugbo yé sọgan wọn, ṣigba yẹn ma na wọnji gowe gba.” (Isa. 49:15) Jehovah na yé anademẹ Osẹ́n lọ tọn lẹ, tulinamẹ yẹwhegán lẹ tọn, po hihọ́-basinamẹ angẹli lẹ tọn po. Psalm-kàntọ de wlan dọmọ: “E do ohó etọn hia hlan Jakobu, osẹ́ndoai po whẹdida etọn lẹ po hlan Islaeli. E ma ko wà hẹ akọta de domọ gba.” (Ps. 147:19, 20; hia Psalm 34:7, 19; 48:14.) Dile Jehovah penukundo akọta he yin nutindo etọn to hohowhenu go do, e na penukundo mẹhe klan yede do wiwe na ẹn to egbehe lẹ go ga.

Nuhewutu Mí Dona Klan Míde Do Wiwe Na Jiwheyẹwhe

10, 11. Be whẹndo Jiwheyẹwhe tọn mẹ wẹ mí wá sọn ya? Basi zẹẹmẹ.

¹⁰ Vlavo whenue mẹde to nulẹnpọndo klandowiwe po baptẹm Klistiani tọn po ji, e sọgan kanse ede dọ, ‘Be dandan janwẹ n’na klan dee do wiwe na Jiwheyẹwhe whẹpo do sẹ̀n ẹn ya?’ Eyin mí lẹnnupọndo nuhe mí yin to nukun Jiwheyẹwhe tọn mẹ to alọnu din ji, enẹ na gọalọna mí nado mọnukunnujẹ whẹwhinwhẹ́n lọ mẹ. Flindọ, na ylando Adam tọn wutu, depope to mí mẹ ma pegan nado yin yiylọdọ ovi Jiwheyẹwhe tọn. (Lom. 3:23; 5:12) Klandowiwe mítọn na Jiwheyẹwhe yin nubiọtomẹsi titengbe de, eyin ewọ na kẹalọyi mí taidi ovi etọn. Gbọ mí ni pọ́n nuhewutu e do yinmọ.

¹¹ Depope to mí mẹ ma tindo otọ́ gbẹtọvi de, he sọgan na mí ogbẹ̀ nujọnu tọn—yèdọ, ogbẹ̀ pipé. (1 Tim. 6:19) Mí ma yin jiji taidi ovi Jiwheyẹwhe tọn lẹ gba, na whenue asu po asi po tintan lọ waylando, gbẹtọvi lẹ klan yede sọn Otọ́ owanyinọ po Mẹdatọ yetọn po dè. (Yijlẹdo Deutelonomi 32:5 go.) Sọn whenẹnu gbọ́n, gbẹtọvi lẹ masọ yin apadewhe whẹndo Jiwheyẹwhe tọn ba, yé hẹn yede jẹla na Jiwheyẹwhe.

12. (a) Nawẹ gbẹtọvi mapenọ lẹ sọgan lẹzun apadewhe whẹndo Jiwheyẹwhe tọn gbọn? (b) Afọdide tẹlẹ wẹ mí dona ze whẹpo do yí baptẹm?

¹² Etomọṣo, dopodopo mítọn sọgan biọ dọ Jiwheyẹwhe ni yí mí do whẹndo etọn he bẹ devizọnwatọ etọn he e kẹalọyi lẹ hẹn mẹ. a Nawẹ enẹ sọgan yọnbasi na gbẹtọvi ylandonọ taidi míwlẹ gbọn? Apọsteli Paulu wlan dọmọ: “Mí lẹzun mẹhe gbọwhẹ hẹ Jiwheyẹwhe gbọn okú Visunnu etọn tọn gblamẹ to whenue mí gbẹ́ yin kẹntọ lẹ.” (Lom. 5:10, NW) To baptẹm whenu, mí nọ biọ Jiwheyẹwhe dọ ni na mí ayihadawhẹnamẹnu dagbe nado sọgan yin alọkẹyi gbọn ewọ dali. (1 Pita 3:21) Ṣigba afọdide delẹ tin bọ mí dona ze whẹpo do yí baptẹm. Mí dona tẹnpọn nado yọ́n Jiwheyẹwhe, bo plọn nado nọ dejido ewọ go, bosọ lẹnvọjọ, podọ mí dona diọ aliho gbẹninọ tọn mítọn. (Joh. 17:3; Owalọ 3:19; Heb. 11:6) Humọ, onú devo sọ tin he mí dona wà whẹpo do yin alọkẹyi do whẹndo Jiwheyẹwhe tọn mẹ. Etẹwẹ nulọ?

13. Naegbọn e do sọgbe dọ mẹde ni dopà klandowiwe tọn na Jiwheyẹwhe nado lẹzun apadewhe whẹndo sinsẹ̀n-basitọ Etọn he e kẹalọyi lẹ tọn?

¹³ Whẹpo mẹhe jẹla sọn Jiwheyẹwhe dè de nido lẹzun apadewhe whẹndo devizọnwatọ Jiwheyẹwhe tọn he e kẹalọyi lẹ tọn, ewọ dona do opà titengbe de na Jehovah. Nado mọnukunnujẹ ehe mẹ, lẹnnupọndo otọ́ dagbe de ji he jlo na yí jọja tọṣiọvi de do whẹndo etọn mẹ bo na pọ́n e go taidi ovi etọn titi. Mẹsusu wẹ yọ́n dawe lọ taidi otọ́ dagbe de. Etomọṣo, whẹpo dawe lọ nado kẹalọyi jọja lọ taidi ovi etọn, e jlo dọ ni dopà de na emi. Enẹwutu dawe lọ dọ dọ, “Whẹpo n’nado yí we taidi ovi ṣie, n’jlo na yọnẹn eyin a na yiwanna mi bo na mi sisi taidi otọ́ de.” Kiki eyin jọja lọ tin to gbesisọ mẹ nado dopà lọ wẹ dawe lọ na yí i do whẹndo etọn mẹ. Be enẹ ma sọgbe hẹ lẹnpọn dagbe ya? To aliho dopolọ mẹ, mẹhe wleawufo nado dopà klandowiwe  tọn lẹ kẹdẹ wẹ Jehovah nọ kẹalọyi taidi apadewhe whẹndo etọn tọn. Biblu dọmọ: “[Mì] yí agbasa mìtọn do basi avọ́sinsan he to ogbẹ̀, wiwe [kavi he yin klandowiwe], he yin alọkẹyi na Jiwheyẹwhe.”—Lom. 12:1, NW.

Nuyiwa Owanyi po Yise po Tọn De

14. Aliho tẹ mẹ wẹ klandowiwe yin dohia owanyi tọn te?

¹⁴ Opà klandowiwe tọn didó na Jiwheyẹwhe nọ dohia dọ mí yí ahundopo do yiwanna Jehovah. To aliho delẹ mẹ, e taidi opà alọwle tọn. Asisunọ yọyọ he yin Klistiani de nọ dohia dọ emi yiwanna asi yọyọ emitọn gbọn pàdido nado yin nugbonọ na ẹn dali, mahopọnna nudepope he to jijọ. Alẹnùnù hẹ mẹde wẹ e yin kakati nido yin pagbe dido nado wà nude poun. Klistiani asisunọ yọyọ de nọ mọnukunnujẹemẹ dọ emi ma tindo jlọjẹ lọ nado nọpọ́ hẹ asi yọyọ emitọn, adavo emi do opà alọwle tọn hẹ ẹ. To aliho dopolọ mẹ, mí ma sọgan duvivi ale he mẹhe nọ lẹzun apadewhe whẹndo Jehovah tọn lẹ nọ mọyi tọn eyin mí ma dó opà klandowiwe tọn. Enẹwutu, mahopọnna mapenọ-yinyin mítọn, mí nọ klan míde do wiwe na Jiwheyẹwhe na mí jlo na lẹzun etọn wutu, bo nọ magbe nado yin nugbonọ na ẹn mahopọnna nudepope he to jijọ.—Mat. 22:37.

15. Nawẹ klandowiwe yin dohia yise tọn gbọn?

¹⁵ Yise wẹ mí dohia to whenue mí basi klandowiwe na Jiwheyẹwhe. Naegbọn mí do dọ mọ? Yise he mí tindo to Jehovah mẹ wẹ hẹn mí deji dọ e yọ́n nado dọnsẹpọ ewọ. (Ps. 73:28) Mí yọnẹn dọ e ma na bọawuna mí to whelẹponu nado zinzọnlin hẹ Jiwheyẹwhe dile mí to gbẹnọ to “whẹndo jijọ gbíngbánnọ po bublunọ de po” ṣẹnṣẹn, ṣigba mí deji to opagbe Jiwheyẹwhe tọn mẹ dọ ewọ na nọgodona mí to vivẹnudido mítọn lẹ mẹ. (Flp. 2:15; 4:13, NW) Mí yọnẹn dọ mapenọ wẹ mí, ṣigba mí kudeji dọ eyin mí tlẹ ṣinuwa, Jehovah na wàlẹblanuna mí. (Hia Psalm 103:13, 14; Lomunu lẹ 7:21-25.) Mí tindo yise dọ Jehovah na suahọ mí na gbemima mítọn nado hẹn tenọgli go.—Job 27:5.

Klandowiwe Na Jiwheyẹwhe Nọ Hẹn Ayajẹ Wá

16, 17. Naegbọn klandowiwe bibasi na Jehovah nọ hẹn ayajẹ wá?

¹⁶ Klandowiwe mítọn na Jehovah nọ na mí ayajẹ, na enẹ nọ biọ dọ mí ni ze mídelẹ jo na ẹn. Jesu hẹn nugbo titengbe de họnwun to whenue e dọmọ: “Ayajẹ sù to nunamẹ mẹ hú to mimọyi mẹ.” (Owalọ 20:35, NW) Jesu duvivi ayajẹ he nọ wá sọn nunamẹ mẹ tọn to gigọ́ mẹ to lizọnyizọn etọn whenu to aigba ji. To whedelẹnu, e ma nọ gbọjẹ kavi dùnú, podọ e nọ yí nuhe na hẹn awuvivi wá na ẹn lẹ do sanvọ́ na e nido sọgan gọalọna mẹdevo lẹ wá aliho ogbẹ̀ tọn lọ ji. (Joh. 4:34) Jesu nọ mọ ayajẹ to homẹ Otọ́ etọn tọn hinhẹn hùn mẹ. Jesu dọmọ: “Yẹn nọ wà nuhe nọ hẹn homẹhun in lẹ to whepoponu.”—Joh. 8:29, NW; Howh. 27:11.

¹⁷ Abajọ, Jesu do gbẹzan he nọ hẹn pekọ wá hia hodotọ etọn lẹ to whenuena e dọmọ: “Eyin mẹdepope jlo nado hodo mi, mì gbọ e ni mọ́n  ede bo ze yatin etọn bosọ to hihodo mi zọnmii.” (Mat. 16:24, NW) Mọwiwà nọ hẹn mí dọnsẹpọ Jehovah dogọ. Be mẹdevo de tin he yiwanna mí taun bo sọgan penukundo mí go sọmọ bọ mí na ze míde jo na ẹn ya?

18. Naegbọn gbẹninọ sọgbe hẹ klandowiwe mítọn na Jehovah nọ hẹn ayajẹ wá na mí hugan mídelẹ zizejona mẹdevo kavi onú devo depope?

¹⁸ Eyin mí klan míde do wiwe na Jehovah bo nọgbẹ̀ sọgbe hẹ klandowiwe mítọn gbọn ojlo etọn wiwà dali, enẹ na hẹn ayajẹ susu wá na mí hugan nado ze míde jo na mẹdevo kavi onú devo depope. Di apajlẹ, mẹsusu nọ doafọna adọkunnu lẹ, etomọṣo yé ma nọ mọ ayajẹ po pekọ nujọnu tọn po. Ṣigba, mẹhe klan yede do wiwe na Jehovah lẹ nọ mọ ayajẹ tẹgbẹ tọn. (Mat. 6:24) Lẹblanulọkẹyi lọ nado yin “azọ́nwatọ hatọ Jiwheyẹwhe tọn” nọ hẹn ayajẹ wá na yé, etomọṣo e ma yin yede zizejona azọ́n de wẹ nọ hẹn yé jaya gba, kakatimọ na yé ze yede jo na Jiwheyẹwhe mítọn he nọ yọ́n pinpẹn nutọn wutu wẹ. (1 Kọl. 3:9, NW) Mẹdevo ma sọgan yọ́n pinpẹn gbigbọ mẹde-yido-sanvọ́ tọn yetọn sọ Jiwheyẹwhe gba. Ewọ na tlẹ sọ hẹn agbasa nugbonọ etọn lẹ tọn gọwá jọja whenu tọn, na yé nido sọgan mọaleyi sọn nukunpedomẹgo etọn mẹ kakadoi.—Job 33:25; hia Heblu lẹ 6:10.

19. Lẹblanulọkẹyi tẹwẹ mẹhe klan yede do wiwe na Jehovah lẹ nọ duvivi etọn?

¹⁹ Dewe kinklandowiwe na Jehovah na hẹn we biọ haṣinṣan pẹkipẹki de mẹ hẹ ẹ. Biblu dọmọ: “Mì dọnsẹpọ Jiwheyẹwhe, podọ ewọ na dọnsẹpọ mì.” (Jak. 4:8, NW; Ps. 25:14) To hosọ he bọdego mẹ, mí na gbadopọnna nuhewutu mí sọgan yí adọgbigbo do basi nudide lọ nado lẹzun Jehovah tọn.

[Nudọnamẹ odò tọn]

Nawẹ Hiẹ Na Na Gblọndo Gbọn?

• Etẹwẹ e zẹẹmẹdo nado klan míde do wiwe na Jiwheyẹwhe?

• Nawẹ klandowiwe na Jiwheyẹwhe nọ hẹn ale wá na mí gbọn?

• Naegbọn Klistiani lẹ dona basi klandowiwe na Jehovah?

[Kanbiọ Oplọn tọn lẹ]

[Yẹdide to weda 6]

Gbẹninọ sọgbe hẹ klandowiwe mítọn nọ hẹn ayajẹ tẹgbẹ tọn wá na mí