Dahaka Dainai Iehova Dekenai Oi Gwauhamata be Namo?

“Lau be Dirava ena tau. . . . Varani hanuaboi aneru ta lau dekenai ia gini.” ​​—⁠KARA 27:⁠23.

1. Bapatiso idia abia gwauraia taudia be dahaka idia karaia vadaeni, bona dahaka henanadai idia vara?

“IESU KERISO ena boubou karana dainai, emu kara dika amo oi helalo-kerehai vadaeni bona Iehova dekenai sibona oi henia vadaeni, iena ura do oi karaia totona, a?” Unai henanadai be bapatiso ena tok ena dokona kahanai idia henia, bapatiso idia abia gwauraia taudia ese idia haerelaia totona. Dahaka dainai Iehova dekenai ita gwauhamata be namo? Edena dala ai Dirava dekenai ita gwauhamata karana ese ita ia durua? Dahaka dainai Dirava dekenai ita gwauhamata guna be namo, unai amo Dirava ese eda tomadiho karana do ia abia dae? Unai henanadai edia haere ita diba totona, gwauhamata ena anina ita tahua guna be namo.

2. Iehova dekenai ita gwauhamata ena anina be dahaka?

² Dirava dekenai ita gwauhamata ena anina be dahaka? Aposetolo Paulo ese ena hetura karana Dirava ida ia herevalaia dalana mani oi laloa. Do ia mutu boutina dekenai idia guia taudia edia vairanai, Paulo ia gwau, ia be Iehova “Dirava ena tau.” (Kara 27:​22-​24 duahia.) Keristani taudia momokanidia ibounai be Iehova ena. To, “Satani ese tanobada taudia ibounai ia gunalaia noho.” (1 Ioa. 5:​19) Keristani taudia be guriguri amo edia gwauhamata idia gwauraia neganai, idia be Iehova ena taunimanima ai idia lao. Unai bamona gwauhamata be ta ta sibona ese do ia karaia gauna. Unai murinai, ranu lalonai bapatiso idia abia.

3. Iesu ia bapatiso ena anina be dahaka, bona edena dala ai ena murinai idia raka taudia be iena haheitalai idia tohotohoa?

³ Ita dekenai Iesu be haheitalai namona badina Dirava ena ura ia abia hidi bona ia karaia. Ia be gwauhamata besena, Israela, amo dainai, anina be Dirava dekenai ia gwauhamata vadaeni. To bapatiso ia abia, ena be Taravatu ese unai ia gwauraia lasi. Baibel ai, Iesu ia gwau: “Dirava e, lau inai, oiemu ura gauna do lau karaia.” (Heb. 10:7; Luka 3:​21) Iesu ia bapatiso ena anina be, Dirava dekenai sibona ia henia Tamana ena ura ia karaia totona. Iena murinai idia raka taudia be bapatiso idia abia neganai, idia be Iesu ena haheitalai idia tohotohoa unai. To, ranu lalonai bapatiso idia abia neganai, idia ese  taunimanima dekenai idia hahedinaraia idia be guriguri amo Dirava dekenai gwauhamata ta idia karaia vadaeni.

Edena Dala ai Gwauhamata ese Ita Ia Durua?

4. Davida bona Ionatana edia hetura karana ese ita dekenai dahaka ia hadibaia?

⁴ Keristani gwauhamata be mai anina bada. Ia be gwauhamata kava ta sibona lasi. To, gwauhamata ta ita karaia neganai, edena dala ai unai ese ita ia durua? Unai ita diba totona, namona be ita itaia edena dala ai taunimanima rua ese gwauhamata ta idia karaia neganai, unai ese idia ia durua. Haheitalai ta be, hetura karana. Ta oi tura henia namonamo totona, namona be turana ena maduna oi huaia. Unai ena anina be gwauhamata ta oi karaia​—⁠oi abia dae emu maduna be emu turana ena namo do oi laloa badana. Baibel be Davida bona Ionatana edia hetura namonamo karana ia herevalaia. Idia ese unai hetura karana ena gwauhamata idia karaia danu. (1 Samuela 17:57; 18:​1, 3 duahia.) Ena be unai bamona gwauhamata idia karaia taudia momo ita davaria lasi, to bema taunimanima be gwauhamata idia karaia bona ta ese ma ta ena namo ia laloa bada, unai hetura karana ia namo.​​—⁠Aon. 17:17; 18:⁠24.

5. Edena dala ai hesiai tauna ta be biaguna namona ta amo heduru ia abia hanaihanai diba?

⁵ Dirava ese Israela taudia dekenai ia henia Taravatuna be hesiai tauna bona ena biaguna idia karaia gwauhamata ta ia gwauraia​—⁠unai gwauhamata amo hesiai tauna be heduru ia abia diba. Bema hesiai tauna ta ia ura biaguna namona ta ena hesiai tauna ai ia lao hanaihanai bona ia noho namonamo, vadaeni biaguna ida gwauhamata ta ia karaia bona ia badinaia hanaihanai be namo. Taravatu ia gwau: “Sedira hesiai tauna do ia gwau, ‘Lau be egu biaguna, bona egu adavana, bona egu natuna dekenai lau ura henia, lau ura lasi lau rakatania kava.’ Unai neganai unai tau be, iena biaguna ese do ia mailaia Dirava ena vairana dekenai. Iduara dekenai o iduara ena auna dekenai, biaguna ese unai hesiai tauna ena taiana dekenai nila amo matuna do ia karaia. Vadaeni unai tau ese iena biaguna dekenai do ia gaukara noho, ia lao bona ia mase.”​​—⁠Eso. 21:​5, 6.

6, 7. (a) Edena dala ai gwauhamata ese taunimanima ia durua? (b) Dahaka ita karaia diba Iehova ita tura henia totona?

⁶ Headava lalonai, taunimanima rua be do idia noho hebou totona mai anina bada gwauhamata ta idia karaia. Bema tau ta bona hahine ta be idia headava lasi to idia noho hebou sibona, idia​—⁠edia natudia danu​—⁠be idia noho namonamo diba lasi. To, headava taudia be edia gwauhamata dainai, herevana dahaka hekwakwanai ia vara, to Baibel ena hereva hegeregerena, mai lalokau ida do idia gaukara goada idia heduru heheni totona.​​—⁠Mat. 19:​5, 6; 1 Kor. 13:​7, 8; Heb. 13:⁠4.

⁷ Baibel negadiai, taunimanima be bisinesi o moni gaukara ai gwauhamata o kontraka idia karaia, unai ese idia ia durua. (Mat. 20:​1, 2, 8) Hari inai negai danu be unai bamona. Hegeregere, bisinesi ta ita do hamatamaia lasi o kampani ta dekenai moni gaukara ita do hamatamaia lasi neganai, kontraka o gwauhamata ta ita torea guna be namo. Oibe, bema gwauhamata ta ese eda hetura karana, headava bona moni gaukara ia durua namonamo, anina be Iehova dekenai oi karaia gwauhamata ese emu hetura karana Dirava ida do ia durua! Hari do ita itaia edena dala ai idaunegai taudia be Iehova Dirava dekenai idia karaia gwauhamatana ese ia durudia, bona edena dala ai gwauhamata be mai anina bada.

Edena Dala ai Israela Taudia be Dirava Idia Gwauhamata Henia Karana amo Namo Idia Davaria

8. Israela taudia ese gwauhamata idia karaia ena namo be dahaka?

⁸ Israela besena be Iehova dekenai gwauhamata ta idia karaia. Iehova ena ura dainai idia be Sinai Ororona badinai idia hebou, bena ia hamaorodia: “Bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao.” Taunimanima edia haere be inai: “Ai be Lohiabada ena hereva ibounai do ai karaia.” (Eso. 19:​4-8) Israela taudia ese gwauhamata idia  karaia ena namo be inai: Idia be Iehova ena, bona Iehova ese idia be ena “bese korikori” bamona ia kara henidia.

9. Edena dala ai Israela taudia be Dirava idia gwauhamata henia karana amo namo idia davaria?

⁹ Israela taudia be Iehova ena dainai namo idia davaria. Ia ese idia ia naria namonamo​—⁠sina ta be natuna ia naria namonamo bamona. Dirava ese Israela taudia ia hamaoroa: “Hahine ta ese iena natuna maragina ia laloaboio diba, a? Iena bogana dekena amo ia havaraia merona, be do ia bogahisihisi henia lasi, a? Io, sedira sinana ta ese iena natuna maragina ia laloaboio diba, to lau ese umui do lau laloaboio lasi momokani.” (Isa. 49:15) Iehova ese Taravatu ia henia, peroveta taudia amo hagoadaia herevadia ia henia, bona aneru amo idia ia gimaia. Salamo torea tauna ia gwau: “Iena hereva be Iakobo dekenai ia hedinaraia vadaeni. Iena taravatu bona iena oda, be Israela dekenai ia henia vadaeni. Bese haida dekenai unai bamona ia karaia lasi.” (Sal. 147:​19, 20; Salamo 34:​7, 19; 48:14 duahia.) Idaunegai, Iehova ese ena bese ia naria namonamo hegeregerena, hari inai negai, Dirava ese ia dekenai idia gwauhamata taudia do ia naria namonamo.

Dahaka Dainai Dirava Dekenai Ita Gwauhamata be Namo?

10, 11. Ita be Dirava ena natuna, a? Mani oi gwauraia.

¹⁰ Haida be gwauhamata bona bapatiso idia lalohadailaia noho lalonai, reana idia henanadai, ‘Dahaka dainai Dirava dekenai lau gwauhamata be namo, unai amo ia lau tomadiho henia diba?’ Hari inai negai Dirava vairanai ita karaia karadia ita laloa neganai, ita gwauhamata ena badina do ia hedinarai. Mani oi laloa, Adamu ena kara dika dainai, ita ibounai be Dirava ena ruma bese murimurinai ita vara. (Roma 3:​23; 5:12) Dirava dekenai ita gwauhamata be gau badana, unai amo Dirava ese ena ruma bese lalonai ita do ia abia dae. Unai ena badina mani ita tahua.

¹¹ Iseda tamana korikorina ta be ita dekenai mauri goevadaena ia henia diba lasi. (1 Tim. 6:​19) Ita be Dirava ena natuna lasi, badina Adamu bona Heva idia kara dika neganai, taunimanima ibounai be edia lalokau Tamana bona Havaraia Tauna amo idia daudau. (Deuteronomi 32:5 hahegeregerea.) Unai nega amo ema bona hari, taunimanima be Iehova ena ruma bese murimurinai idia noho o Dirava amo idia daudau.

12. (a) Edena dala ai goevadae lasi taudia be Dirava ese ena ruma bese lalonai ia abia dae diba? (b) Bapatiso ita do abia lasi neganai, dahaka kara haida ita karaia guna be namo?

¹² Unai dainai, Dirava ita noia diba ena ruma bese lalonai ita ia abia dae bona ena hesiai taudia ai ita lao totona. * Edena dala ai kara dika taudia be unai bamona idia karaia diba? Aposetolo Paulo ia gwau: “Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni.” (Roma 5:​10) Bapatiso ita abia neganai, Dirava ita noia lalomamina namona ita abia bona ita ia abia dae totona. (1 Pet. 3:​21) To, bapatiso ita do abia lasi neganai, kara haida ita karaia guna be namo. Dirava ita dibaia, ia ita abidadama henia, ita helalo-kerehai, bona eda dala ita haidaua. (Ioa. 17:3; Kara 3:​19; Heb. 11:⁠6) Dirava ese ena ruma bese lalonai ita ia abia dae totona, kara ma ta ita karaia danu be namo. Unai be dahaka?

13. Dahaka dainai tau ta ese Dirava ia gwauhamata henia guna be namo, unai amo Dirava ese ena ruma bese lalonai do ia abia dae?

¹³ Dirava amo ia daudau tauna be Dirava ena ruma bese lalonai ia do vareai lasi bona Dirava ena hesiai tauna ta ai ia do lao lasi neganai, Iehova dekenai gwauhamata ta ia karaia guna be gau badana. Unai ita lalopararalaia totona, tama namona ta ita laloa: Tamana sinana lasi mero maragina ta ia hebogahisi henia dainai, ia ura ena natuna ai ia halaoa, bena ia ubua bona naria. Momo idia diba ia be tamana namona. To, mero be unai tama ena natuna ai lao totona, tamana ia ura mero be gwauhamata ta ia karaia  guna. Tamana ia gwau, “Egu natuna ai oi lao totona, lau ura diba oi be lau do oi lalokau henia bona matauraia, tamana ta bamona, a?” Bema unai mero ese unai bamona gwauhamata ia karaia, vadaeni ia be unai tamana ena natuna ai do ia lao. Unai tama ese ia karaia karana be maoro, ani? Unai hegeregerena, Iehova dekenai ia gwauhamata tauna sibona be Dirava ese ena ruma bese lalonai ia abia dae. Baibel ia gwau: “Emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona.”​​—⁠Roma 12:⁠1.

Lalokau Bona Abidadama Karana

14. Edena dala ai gwauhamata karana be lalokau karana?

¹⁴ Dirava dekenai ita gwauhamata neganai, ita hahedinaraia ita be Iehova ita lalokau henia. Unai gwauhamata be headava taudia ese idia karaia gwauhamatana bamona. Headava tadikaka ese ena lalokau ia hahedinaraia dalana be inai: Ia gwauhamata, herevana dahaka do ia vara to ena adavana do ia badinaia noho. Unai gwauhamata aukana be tau bona hahine ese idia karaia bona ia be mai anina bada. Ia ura headava tadikaka ia laloparara ia ese ia ura adavaia hahinena ida do idia noho hebou lasi bema headava gwauhamatana ia karaia lasi. Unai hegeregerena, Iehova ese ena ruma bese lalonai ita ia abia dae totona, Ia dekenai gwauhamata ita karaia be namo. Ena be ita goevadae lasi, to Dirava dekenai gwauhamata ita karaia badina ita ura ita be Iehova ena, bona eda lalona ita hadaia, herevana dahaka do ia vara, ita be Ia do ita badinaia.​​—⁠Mat. 22:⁠37.

15. Edena dala ai gwauhamata karana be abidadama karana?

¹⁵ Dirava dekenai ita gwauhamata neganai, ita hahedinaraia ita be Iehova ita abidadama henia. Dahaka dainai? Iehova ita abidadama henia dainai, ita diba momokani Ia kahirakahira ita lao be namo. (Sal. 73:28) Ita diba Dirava ida ita raka be auka badina ita be “uru gagevana bona dikana” huanai ita noho. To Dirava ita abidadama henia badina ia gwauhamata ita dekenai goada do ia henia bona durua. (Fili. 2:​15, NW; 4:​13) Ita diba ita be goevadae lasi, to ita diba kerere ita karaia neganai Iehova be ita do ia hebogahisi henia. (Salamo 103:​13, 14; Roma 7:​21-​25 duahia.) Ita abia dae badina Iehova ese iseda abidadama ena ahuna namona do ia henia.​​—⁠Iobu 27:⁠5.

Gwauhamata Karana ese Moale Ia Mailaia

16, 17. Dahaka dainai Iehova ita gwauhamata henia neganai ita moale?

¹⁶ Iehova ita gwauhamata henia neganai, ita moale badina ita sibona ita henia bamona. Iesu ena hereva be momokani, ia gwau: “Henia kara ena moale be bada, abia kara ena moale be maragi.” (Kara 20:35) Iesu be tanobada ai haroro gaukara ia karaia neganai, ia be henia karana ia moalelaia. Nega haida, ia laga-ani lasi, ia aniani lasi, bona noho gabu namona ia rakatania, ma haida ia hagoadaia mauri ena dala dekenai idia raka totona. (Ioa. 4:​34) Iesu be mai ena moale ida ena Tamana ena kudouna ia hamoalea. Ia  gwau: “Iena ura be nega ibounai lau karaia.”​​—⁠Ioa. 8:​29; Aon. 27:⁠11.

¹⁷ Unai dainai, ia murinai idia raka taudia ia hamaoroa mauri namona be inai: “Tau ta bema ia ura lauegu murina dekenai do ia raka, ia sibona ena ura do ia laloa lasi.” (Mat. 16:24) Unai bamona ita karaia neganai, ita be Iehova kahirakahira ita lao. Oibe, ita ura ita ia lalokau henia tauna dekenai iseda mauri ita henia, a?

18. Dahaka dainai eda gwauhamata hegeregerena Iehova ena ura ita karaia neganai, unai ese moale ia mailaia bona tau ta o gau ta dekenai ita karaia gwauhamata amo ita abia moalena ia hereaia?

¹⁸ Bema Iehova dekenai ita gwauhamata bena iena ura ita karaia neganai, unai ese moale ia mailaia​—⁠tau ta o gau ta dekenai ita karaia gwauhamata amo ita abia moalena ia hereaia. Hegeregere, momo be edia mauri lalonai moni o kohu momo idia tahua, to moale korikori idia abia lasi. To, Iehova idia gwauhamata henia taudia be hanaihanai idia moale. (Mat. 6:​24) Idia moale badina ‘Dirava ida idia gaukara hebou’; danu edia gwauhamata be gaukara dekenai lasi, to edia gaukara ia moalelaia Diravana dekenai idia karaia. (1 Kor. 3:⁠9) Momokani, sibona edia ura idia dadaraia taudia be Iehova ese ia laloa bada. Ia ese abidadama taudia do ia durua idia matamata lou totona, unai amo do ia naridia ela bona hanaihanai.​​—⁠Iobu 33:25; Heberu 6:​10 duahia.

19. Iehova idia gwauhamata henia taudia be dahaka hahenamo idia moalelaia?

¹⁹ Iehova dekenai idia gwauhamata taudia be ena turana ai idia lao. Baibel ia gwau: “Dirava kahirakahira do umui lao bona ia be umui kahirakahira do ia mai.” (Iam. 4:8; Sal. 25:14) Stadi gabena ai do ita itaia dahaka dainai ita diba momokani Iehova ena taunimanima ai ita lao karana ita abia hidi be maoro.

[Footnote]

Edena Bamona Do Oi Haere?

• Ta be Dirava dekenai ia gwauhamata ena anina be dahaka?

• Dahaka dainai Keristani taudia be Iehova dekenai gwauhamata idia karaia?

• Dirava dekenai ita gwauhamata ese edena dala ai namo ia mailaia?

[Study Questions]

[Picture on page 6]

Eda gwauhamata ita badinaia karana ese moale hanaihanai ia mailaia