Warom sol ich mayn leepe tsu Yeehoowa kepe?
Warom sol ich mayn leepe tsu Yeehoowa kepe?
“In te letste nacht, een engel fon tëm Kot woo ich keheere … is uf mayn sayt xteen keplip.” (APHOSTELE SAYN KEXICHT 27:23)
1. Was fer xrite hon tii woo sich taafe lose xon kep, un was fer frooche mise keantwort wëre?
“TORICH Yeesus Kristus sayn opfer host tuu tich fon tayn sinte peroyt un een tetikatsyoon fer Yeehoowa kemacht, fer tëm sayn wile mache?” Tas is een fon te tswaay frooche woo ti kantitaate woo sich taafe lose antworte am ën fon te reet fon te taaf. Warom is es neetich tas ti kriste iire leepe fer Yeehoowa kepe? Wii khan tas nutslich sin fer uns? Warom khan nimant Kot aan peete soo wii Tee wil wën eyer net sayn leepe ap kep hot? Fer ti antworte wise, mise mer eyerst ferxteen was een tetikatsyoon is.
2. Was petayt een tetikatsyoon fer Yeehoowa mache?
2 Was petayt een tetikatsyoon mache? Mërk wii te aphostel Phaul kexrip hot iwich sayn ferheltnis mit Kot. Foer fiil layt in een xif woo in kefoer waar, hot tee kexproch iwich Yeehoowa wii ‘te Kot tsu weem ich keheere’. (Lees Aphostele sayn Kexicht 27:22-24.) Al woere kriste keheere tsu Yeehoowa. Awer kans anerste, is ti welt “in te macht fom Xlechter”. (1 Yo. 5:19) Wën Yeehoowa heert tas kepeet woo te krist macht fer sayn leepe fer iim kepe, tan wërt tee tsu Yeehoowa keheere. Tiise tetikatsyoon is een perseenlich ferxprechung woo kemacht kept foer ti taaf.
3. Was hot Yeesus sayne taaf simpolisiirt, un wii khene sayn tisipele sayn payxpiil noo mache?
3 Yeesus hot uns tas payxpiil kep wii tee raus kesuucht hot Kot sayne wile mache. Wayl tee kepoer is in Israël, in een natsyoon woo xon tetikiirt waar tsu Yeehoowa, hat tee khee uersache kehat fer wiiter een tetikatsyoon mache. Noch soo, in sayne taaf, hot Yeesus mee kemacht wiis ferlang waar im Kesets. In te Piipel xteet tas tee saat: ‘Too sin ich fer tayn wile mache, oo Kot.’ (Hep. 10:7; Luk. 3:21) Soo, mit sayne taafe is tee foer sayne Fater khom fer Tëm sayne wile mache. Hayt wën ti kriste ketaaft wëre, mache se Yeesus noo. Awer tëne iire taaf is fer tsayche foer ti layt tas se in een kepeet iire tetikatsyoon fer Kot kemacht hon.
Wii tas nutslich khan sin unser leepe fer Yeehoowa kepe
4. Was lërne mer fon te fraayntxaft unich Tawi un Yoonatan iwich inlasung?
4 Ti kristlich tetikatsyoon is etwas ërnstes. Tas is mee wii een inlasung. Awer, wii ti tetikatsyoon mache khan nutslich sin fer uns? Etwas woo uns helfe khan tas ferxteen is wën ma tenkt aan ti inlasunge woo ma khan hon mit anere layt. Wole mer aan fange mit fraayntxaft. Tsum payxpiil, fer een kuut fraaynt hon, mus tuu aan nëme ti responsapiliteet fer aach een fraaynt sin. Tas hot tsu tuun mit een inlasung — tuu xpiirst ti flicht fer tich khimere mit tayne fraaynt. Een fon te xeenst fraayntxaft woo kenënt is in te Piipel is unich Tawi un Yoonatan. Tii hon soo kaar een fraayntxaft pakt unich sich kemacht. (Lees 1 Samuël 17:57; 18:1, 3) Opwool tiise sort fraayntxaft selte mool pasiirt, ti meyerste fraayntxafte keen kuut foran wën se een xtark inlasung unich sich hon, orer xpiire tas eene mim anere sich khimere mus. (Xpr. 17:17; 18:24)
5. Wii khënt tas nutslich sin fer een sklaaw wën tee fer imer tsu een kuute hër keheere teet?
5 Im Kesets woo Kot tsu Israël kep hot, xprecht noch iwich ti nuts woo een kuut inlasung pringe khan. Tsum payxpiil, wën een sklaaw wolt fer imer pay sayn kuute hër plaype, khont tee een kexeft mache mit tëm fer imer tsu tëm keheere. Tas Kesets saat: “Awer, wën te sklaaw aan halt un saat: ‘Ich liipe mayne hër, mayn fraa un mayn khiner; ich wil net fray wëre’, sol sayne hër iim foer te woere Kot neme. Tan sol tee tëm aan ti teer orer aan een sayt fon te teer wiiter tuun, un sayne hër tuut aan tëm sayn oer een loch mache mit een xpis, un tee wërt sayn sklaaw sin tas kanse leepe.” (Eeks. 21:5, 6)
6, 7. (a) Warom een insalung nutslich is? (b) Was tsaycht uns tas iwer unser ferheltnis mit Yeehoowa?
6 Ti hayrat is een payxpiil fon een ërnste inlasung. Tas is een ferxprechung woo mer sich iwer nëmt net mit een xtik papier awer mit een mënx. Tswaay woo samer woone oone ferhayrat sin khene nii sicherheet hon un iire khiner aach net. Awer, wën se ferhayrat sin tan hon se een xtarke piiplixe motiiw fer sich aan xtrenge fer ti xwiirichkheete um keen mit liip, wëns propleeme kept. (Mat. 19:5, 6; 1 Kor. 13:7, 8; Hep. 13:4)
7 In te piiplixe tsayte waar es nutslich fer ti mënxe een aarwayts kontrakt hon un aach een kontrakt fer kexefte mache. (Mat. 20:1, 2, 8) Hayt se taach is tas aach noch soo, wën mer tenke aan kexefte mache orer aarwayts kontrakte. Soo, wën ti inlasung ferpesert unser ferheltnis mit fraaynte, hayrat un aarwayt, soo fiil mee wërt unser tetikatsyoon nuts pringe fer unser ferheltnis mit Yeehoowa! Yets wole mer siin wii tas friier fer ti mënxe nutslich waar iire leepe tsu Yeehoowa kepe un warom tas waar fiil mee wii ploos een flicht.
Wii ti tetikatsyoon nutslich waar fer Israël
8. Was hot tas petayt fer Israël tetikiirt sin fer Kot?
8 Israël is een tetikiirt natsyoon kewoer wii se een ferxprechung fer Kot kemacht hot. Yeehoowa hot ti natsyoon kesamelt foer te përich Sinaay un hot kesaat: “Wën teyer mayn xtim troy aan heert un mayn pakt in halt, sicher wërt teyer mayn spetsyaal aychentum tswixich ti kanse foleke.” Tas kans folek hot eenich keantwort: “Meyer sin wilich fer se mache ales was Yeehoowa kesaat hot.” (Eeks. 19:4-8) Tetikiirt sin hot mee petayt fer Israël wii ploos een flicht fer etwas mache. Tas hot petayt tas ti natsyoon tsu Yeehoowa keheert hat un tee hot se pehantelt wii sayn “spetsyaal aychentum”.
9. Wii waar tas nutslich fer Israël een tetikiirt natsyoon tsu Kot sin?
9 Tsu Yeehoowa keheere waar tas peste woo fer ti israeliiter pasiire khont. Tee waar leaal un hot imer kesoricht fer tëne, soo wii een liipliche fater sayn khint uf phast. Kot saat tsu Israël: “Khan een fraa sayn nëneche ferkese, orer net mitlayt xpiire fer te soon fon sayn muterlayp? Soo kaar wën tiise fraae sich ferkese teete, ich teet nii tich ferkese.” (Isa. 49:15) Yeehoowa hot tëne kesetse kep, profeete fer se uf muute un aach ëngele fer se xitse. Eene psalmist hot kexrip: “Tee macht sayn wort pekhant tsu Yaakop, sayn kesetse un sayn kerichte tsu Israël. Tee hot tas mit khee anere natsyoon kemacht.” (Psal. 147:19, 20; lees Psalm 34:7, 19; 48:14.) Soo wii Yeehoowa tas folek woo iim keheert hot friier uf kephast hot, soo phast tee aach uf tii woo hayt sayn leepe iim kepe.
Warom unser leepe fer Yeehoowa kepe?
10, 11. Warom sin mer net kepoer in Yeehoowa sayn kroos welts familye? Lee tas aus.
10 Wën etliche tenke iire leepe tsu Yeehoowa kepe un ketaaft wëre, khene se sich frooe: ‘Warom khan ich net Kot aan peete oone een tetikatsyoon tsu iim mache?’ Meyer khene tas ferxteen wën mer uns erinere aan unser situatsyoon foer iim. Weeche Aatam sayne sint, sin mer net kepoer in Yeehoowa sayn kroos welts familye. (Rom. 3:23; 5:12) Ti eensich aat woo mer khene aan kenom wëre in tiise familye is wën mer unser leepe fer iim kepe. Wole mer siin warom.
11 Khee eensiche mënxliche fater khan sayn khiner kepe was Kot kepe wolt — tas perfekt leepe. (1 Tim. 6:19) Meyer sin net kepoer wii Kot sayn khiner, wayl wii tas eyerste pheyerche kesint hot, sin ti mënxe ap keteelt woer fon iire liipe Fater un Kriatoer. (Kuk Teuteronoomyum 32:5.) Fon tat aan, keheere ti mënxe net mee tsum Kot sayn kroos familye.
12. (a) Wii khene imperfekte mënxe teel mache in Kot sayn kroos welts familye? (b) Was fer xrite mise mer kepe eep mer uns taafe lose?
12 Awer toch, khan yeete eene fon uns ferlange tas Yeehoowa uns aan nëmt in sayn familye fon leaale tiiner a. Awer wii is tas meechlich wayl mer sinter sin? Te aphostel Phaul hot kexrip: “Meyer [sin] mit Kot torich sayne Soon sayne toot fereenicht kewoer, als meyer noch faynte waare.” (Rom. 5:10) Im taaf ferlange mer tas Kot uns een kuut kewise kept tas mer iim kefale khene. (1 Phe. 3:21) Awer, ep mer ketaaft wëre, mise mer etliche xrite kepe. Meyer mise Kot khëne un lërne uf iim traue, uns peroye un ënerunge mache in te aat wii mer uns aan xtele. (Yoo. 17:3; Aph. 3:19; Hep. 11:6) Un too is noch etwas woo mer mise mache eep mer aan kenom wëre in Kot sayn kroos welts familye. Was is tas?
13. Warom is es neetich een ërnst ferxprechung fer unser leepe tsu Kot kepe fer tas mer khene teel mache in sayn familye fon troye tiiner?
13 Eep yemant woo ap keteelt is fon Kot khan teel mache in sayn kroos familye fon troye tiiner, mus tee een ërnst ferxprechung fer Yeehoowa mache. Fer tas ferxteen, tenk mool aan eene ferninftiche fater woo liipliche interes tsaycht aan een yunge woo khee eltere hot, un wil tee aan nëme fer teel mache in sayn familye. Te papa is pekhant wii een kuute mënx, awer toch, eep tee te yunge aan nëmt wii sayne soon, waart eyer tas tee een ërnst ferxprechung mache sol. Soo saat tee: “Eep ich tich aan nëme wii mayne soon, mus tuu mich ferxpreche tas tuu mich liipst un respektiirst wii een fater.” Tee man wërt tee aan nëme in sayn familye ploos wën te yunge tiise ferxprechung mache wil. Sicher is tas net tsu fiil ferlange. Aach soo, nëmt Yeehoowa aan in sayn familye ploos tii woo wërklich wole sayn leepe fer iim kepe. Ti Piipel saat: “Tas teyer ayer khërper foer xtelt wii een lepeentich opfer, woo haylich is un woo Kot kefalt.” (Rom. 12:1)
Pewaysung fon liip un klaape
14. Uf was fer aat is ti tetikatsyoon een pewaysung fon liip?
14 Yeehoowa ferxpreche unser leepe kepe, pewayst tas mer iim wërklich liipe. Tas khan ma ferklayche mit een hayrat uner woere kriste. Te taach fon iire hoochtsayt pewayst te prautiken sayn liip wën eyer ferxprecht leaal sin tsu sayn praut ekaal was pasiirt. Tas is een inlasung mit een mënx un net ploos een ferxprechung. Te prautiken ferxteet tas ploos noo tas khan tee mit iir leepe. Soo aach, khene mer net ti kanse nutse kriin fer teel mache in Yeehoowa sayn kroos familye, oone eyerst een ferxprechung mache tas mer unser leepe iim kepe. Ale tëm mer imperfekt sin, kepe mer unser leepe tsu Kot wayl mer wole tsu iim keheere; mer wole leaal sin ekaal was pasiirt. (Mat. 22:37)
15. Warom is ti tetikatsyoon een pewaysung fon klaape?
15 Unser tetikatsyoon tsu Kot is een pewaysung fon klaape. Warom? Klaape aan Yeehoowa kept uns ti sicherheet tas ticht pay iim khome is kuut fer uns. (Psal. 73:28) Meyer wise tas es net imer laycht is mit Kot keen, wayl mer leepe unich een “fertreetne un xlecht xeneratsyoon,” awer mer traue tas Kot xtits unser aanxtrengung. (Fili. 2:15; 4:13) Meyer wise tas mer imperfekt sin, awer mer traue tas Yeehoowa wërt parmhërtslich sin mit uns aach wën mer feeler mache. (Lees Psalm 103:13, 14; Romaaner 7:21-25.) Meyer klaape tas Yeehoowa wërt peloone unser aanxtrengung fer unser intekriteet hale. (Yoop 27:5)
Unser leepe fer Yeehoowa kepe pringt frayt
16, 17. Warom pringt tas frayt unser leepe tsu Yeehoowa kepe?
16 Yeehoowa unser leepe kepe pringt frayt, wayl tas hot tsu tuun fon uns selepst kepe. Soo wii Yeesus saat: “Kepe pringt mee frooheet wii se kriin.” (Aph. 20:35) Wii Yeesus hiir uf ti eyert waar, hot tee selepst kexpiirt ti frayt woo tas “kepe” pringt. Wën tas neetich waar, hot tee sich net kexoont, is tee oone ruue un oone ese keplip fer anere helfe tas eewiche leepe fine. (Yoo. 4:34) Yeesus hat kërn sayne Fater sayn hërts kefrayt. Tee saat: “Ich mache imer was tëm kefalt.” (Yoo. 8:29; Xpr. 27:11)
17 Yeesus hot sayn tisipele ketsaycht een aat leepe woo mee frayt pringt: “Wën yemant mich noo keen wil, mus eyer sich selepst ap saan.” (Mat. 16:24) Wën mer tas mache, khome mer tichter pay Yeehoowa. Khent yemant uns peser in soo een liiplich aat uf phase wii tee?
18. Warom pringt tas mee frayt unser leepe fer Yeehoowa kepe xtats fer een anere mënx orer een anere opjetiiw?
18 Tii woo iire leepe fer Yeehoowa kepe un mache sayne wile, sin frooer wii tii woo iire leepe penutse fer xafe fer anere mënxe orer anere opjetiiwe erfiile, soo wii raych wëre. Ti unerxiit is tas tii woo iire leepe fer Yeehoowa kepe fiil mee frayt hon. (Mat. 6:24) Tii fraye sich tas se ‘Kot sayn mitaarwayter’ sin opwool iire tetikatsyoon net tsu ti aarwayt is, awer tsu iire liipe Kot. (1 Kor. 3:9) Nimant khent mee weyert kepe tsu unser leaaliteet un aanxtrengung wii tee. Tee wërt uns soo kaar tsurik pringe tsu unser yunge yoore tas mer khene uf kephast wëre fon iim fer imer. (Yoop 33:25; lees Hepreeyer 6:10.)
19. Was fer priwilëj hon tii woo iire leepe fer Yeehoowa kep hon?
19 Tayn leepe fer Yeehoowa kepe macht tas tuu khanst een ëng fraayntxaft mit tëm hon. Ti Piipel saat: “Khomt ticht tsu Kot, un Eyer khomt ticht tsu aych.” (Tya. 4:8; Psal. 25:14) Warom khene mer mit sicherheet ëntxlise Yeehoowa keheere? Te neekste artikel wërt too triwer xpreche.
[Noote]
a Yeesus sayn “anere xeef” wëre net Kot sayn khiner sin eep ti tausent yoore am ën keen. Awer, wayl se iire leepe Kot kep hon, thërfe se iim als “Fater” ruufe un keheere tsu Kot sayn kroos welts familye. (Yoo. 10:16; Isa. 64:8; Mat. 6:9; Apo. 20:5)
Wii teest tuu antworte?
• Was petayt unser leepe fer Yeehoowa kepe?
• Wii khan unser tetikatsyoon tsu Kot nutslich sin fer uns?
• Warom mise ti kriste iire leepe fer Yeehoowa kepe?
[Xtuutium frooche]
[Pilt]
Leepe wii mer in unser tetikatsyoon kexproch hon pringt uns kroos frayt